Kilemaina Nefa Mahita Vokatra
1 Mbola afaka mahita vokatra amin’ny fanompoana ianao, na dia anisan’ireo Vavolombelon’i Jehovah maro kilemaina aza. Mety hanome anao fahafahana manokana hitoriana sy hampaherezana ny hafa mihitsy aza ilay tarehin-javatra misy anao.
2 Fitoriana: Maro amin’ireo kilemaina no mandray anjara feno amin’ny fanompoana. Ohatra: Nanjary nalemy ny anabavy iray ary sahirana rehefa miteny, noho ny fandidiana natao taminy. Mbola afaka mizara gazety anefa izy, raha mametraka azy eo amoron-dalana be olona ny vadiny. Indray mandeha, dia nahapetraka gazety 80 izy tao anatin’ny adiny roa! Mety hifanerasera amin’olona sarotra ihaonana koa ianao, noho ilay tarehin-javatra manokana misy anao. Hevero ho faritaninao manokana àry izy ireny.
3 Afaka ny tena hahomby ny fitorianao! Mety ho liana amin’ny hafatra momba ilay Fanjakana ny olona, rehefa mandinika ny fahatapahan-kevitrao sy ny vokatra entin’ny fahamarinana ara-baiboly eo amin’ny fiainanao. Noho ilay zavatra iainanao koa, dia hainao kokoa ny manome fampaherezana avy amin’ny Soratra Masina, rehefa mihaona amin’ny olona iharan-java-manahirana ianao.—2 Kor. 1:4.
4 Hatanjaho ny hafa: Tsy nampahery anao ve ny tantaram-piainan’i Laurel Nisbet? Voatery nijanona tao anaty havokavoka vy i Laurel, nandritra ny 37 taona. Nanampy olona 17 hahafantatra ny fahamarinana ara-baiboly anefa izy! Manosika ny mpiray finoana mba hiezaka mafy amin’ny fanompoana an’i Jehovah koa ny ohatra omenao.—wMG 15/9/01 p. 17.
5 Mbola afaka manatanjaka ny hafa ihany ianao, na dia tsy mamela anao hivoaka hanompo matetika araka izay tianao aza ny tarehin-javatra misy anao. Hoy ny rahalahy iray: “Fantatro fa afaka manampy olona foana na dia ny olona manan-kilema lehibe aza. Toy ny ‘vatofantsika’ ho an’ny olona samihafa eo anivon’ny fiangonana izahay mivady. Noho ny tarehin-javatra misy anay dia eo foana izahay, ary azo hatonina.” Marina fa mety tsy ho araka ny zotom-ponao foana ny mety ho vitanao, noho ny kilemanao. Afaka ny havitrika amin’ny fanompoana anefa ianao, raha ampiana. Koa raha mila fanampiana ianao, dia aza misalasala miresaka izany amin’ny anti-panahy, na amin’olon-kafa ho afaka hanampy anao eo anivon’ny fiangonana.
6 Hitan’i Jehovah ny zavatra rehetra ataonao mba hanompoana azy, ary faly izy fa manompo azy amin’ny fo manontolo ianao. (Sal. 139:1-4) Afaka manatanjaka anao mba hanompo tsara sy hahita vokatra izy, raha mitoky aminy ianao.—2 Kor. 12:7-10.