Porofo Marim-pototra

REHEFA milaza zavatra iray ianao, ny mpihaino anao dia manana zo hanontany hoe: “Nahoana izany no marina? Inona no porofo fa tokony hekena ilay zavatra lazain’ny mpandahateny?” Ianao mpampianatra no tsy maintsy mamaly ireo fanontaniana ireo, na manampy ny mpihaino hahita ny valiny. Raha tena zava-dehibe ilay lazainao, dia omeo antony tsara hanekeny azy io ny mpihaino. Tena handresy lahatra azy ireo ny famelabelaranao, raha manao izany ianao.

Nanao izany ny apostoly Paoly. Nampiasa porofo marim-pototra sy fanjohian-kevitra mirindra ary fiangaviana izy, mba hanampiana ny olona niresahany hanova ny fomba fisainany. Ohatra tsara ho antsika izany. (Asa. 18:4; 19:8) Marina fa misy mpikabary mampiasa ny fandresen-dahatra mba hamitahana olona. (Matio 27:20; Asa. 14:19; Kol. 2:4) Milaza tombantombana diso izy ireny, miantehitra amin’ny tenin’olona manavakavaka, mampiasa porofo tsy marim-pototra, manilika ireo zava-misy tsy mifanaraka amin’ny fomba fiheviny, na mitady hampihetsi-po fotsiny fa tsy manjohy hevitra. Tokony hitandrina isika mba tsy hanaraka fomba toy izany.

Miorina mafy amin’ny Tenin’Andriamanitra. Tsy tokony hampianatra ny hevitsika manokana isika. Izay nianarantsika tao amin’ny Baiboly no ezahintsika hampianarina ny hafa. Manampy antsika be dia be amin’izany ireo boky sy gazety avoakan’ny mpanompo mahatoky sy malina. Mampirisika antsika handinika tsara ny Soratra Masina izy ireny. Isika indray kosa manasa ny hafa hitodika any amin’ny Baiboly, tsy hoe mba hanaporofoana fa marina ny antsika, fa noho isika maniry amim-panetren-tena hanampy azy ireo hahita izay voalaza ao. Ekentsika ny tenin’i Jesosy Kristy, tao amin’ny vavaka nataony tamin-dRainy hoe: “Ny teninao no fahamarinana.” (Jaona 17:17) Tsy misy fahefana lehibe kokoa noho i Jehovah Andriamanitra, Mpamorona ny lanitra sy ny tany. Tokony hiorina amin’ny Teniny ny porofo omentsika, raha tiantsika ho marim-pototra.

Mety hiresaka amin’olona tsy mahalala ny Baiboly na tsy manaiky azy io ho Tenin’Andriamanitra ianao indraindray. Tokony hofidinao tsara, amin’izay, ny fomba sy ny fotoana hampiasanao andinin-teny. Miezaha anefa hisarika ny sain’ny olona ho amin’ny Baiboly, haingana araka izay azonao atao.

Midika ve izany fa ny fanononana fotsiny andinin-teny iray mety tsara dia efa porofo tsy azo lavina? Tsy voatery ho izany. Mety hila hisarika ny sain’ny olona ho amin’ny teny manodidina ianao, mba hampisehoana fa tena manamarina izay lazainao ilay andininy. Mety hila hanome porofo fanampiny ianao raha fitsipi-pitondran-tena no tsoahinao avy ao, nefa tsy miresaka momba izany ny teny manodidina. Mety hila hamaky andinin-teny hafa mifandray amin’ilay andininy ianao, mba hampiekena ny mpihaino fa tena miorina tsara amin’ny Soratra Masina izay lazainao.

Aza itarina ny zavatra lazain’ny andinin-teny iray. Vakio amim-pitandremana izy io. Mety hifandray amin’ilay foto-kevitra ankapobe resahinao izy io. Raha tianao anefa ny handresy lahatra, dia tokony ho hitan’ny mpihaino ao amin’ilay andinin-teny ny porofon’izay lazainao.

Hamarinin’ny porofo fanampiny. Mety ho tsara indraindray, ny maka porofo hafa ivelan’ny Baiboly, mba hanampiana ny olona hahita fa azo ekena tsara izay lazain’ny Soratra Masina.

Azonao alaina ho porofon’ny fisian’ny Mpamorona, ohatra, izao tontolo izao hita maso. Miresaha momba ny lalàn’ny natiora, toy ny herin’ny tany misintona, mba hanjohiana hevitra fa raha misy lalàna toy izany, dia tsy maintsy misy koa ny Mpanao lalàna. Hety tsara ny fanjohian-kevitrao, raha mifanaraka amin’izay ambaran’ny Tenin’Andriamanitra. (Joba 38:31-33; Sal. 19:1; 104:24; Rom. 1:20) Tsara ny porofo toy izany, satria mampiseho fa mifanaraka tsara amin’ny zava-misy hitan’ny maso ny zavatra lazain’ny Baiboly.

Moa ve ianao miezaka hanampy olona iray hahita fa tena Tenin’Andriamanitra tokoa ny Baiboly? Mety hilaza ny tenin’ny manam-pahaizana mino izany ianao, nefa tena porofo ve izany? Ny olona manaja ireny manam-pahaizana ireny ihany no hanaiky ny teny toy izany. Azonao ampiasaina ve ny siansa mba hanaporofoana fa marina ny Baiboly? Ho maivana ny porofo iorenan’ny fanazavanao raha ny fomba fihevitry ny mpanao siansa, izay olombelona tsy lavorary, no raisinao. Ho marim-pototra kosa anefa ny porofo omenao, raha ny Tenin’Andriamanitra no resahinao voalohany, ary avy eo ianao vao manonona ny zava-bitan’ny siansa izay manamafy ny fahamarinan’ny Baiboly.

Na inona na inona ezahinao porofoina, dia manomeza porofo ampy. Miankina amin’ny mpihaino anao ny habetsahan’ny porofo ilainao. Ohatra, raha miresaka momba ny andro farany ao amin’ny 2 Timoty 3:1-5 ianao, dia milazà vaovao iray fanta-bahoaka izay mampiseho fa “tsy manam-pitiavana” ny olona. Mety ho efa ampy io ohatra iray io, mba hanaporofoana fa tanteraka io lafiny iray amantarana ny andro farany io.

Matetika no tsara ny mampitaha zavatra roa samy hafa izay manan-javatra itoviana. Tsy ilay fampitahana akory no porofo, fa mbola tsy maintsy hamarinina amin’ny alalan’ny Baiboly izy io. Mety hanampy anefa ny fampiasana fampitahana, mba hahitan’ny olona fa azo ekena ny hevitra iray. Ohatra iray azo ampiasana fampitahana toy izany ny fanazavana fa ny Fanjakan’Andriamanitra dia fitondram-panjakana. Lazao fa sahala amin’ny fitondram-panjakan’olombelona, ny Fanjakan’Andriamanitra dia manana mpitondra, olom-pehezina, lalàna, fitsarana, ary rafi-pampianarana.

Matetika no azo ampiasaina ny zavatra tena nitranga mba hanaporofoana fa fahendrena ny manaraka ny torohevitry ny Baiboly. Azo ampiasaina koa ny zavatra niainanao manokana mba hanamarinana ny zavatra lazainao. Ohatra, rehefa hampiseho amin’ny olona iray ianao fa tena ilaina ny mamaky sy mianatra ny Baiboly, dia azonao hazavaina fa nanatsara ny fiainanao ny fanaovanao izany. Ny apostoly Petera, izay vavolombelona nanatri-maso ny niovan’i Jesosy tarehy, dia niresaka momba azy io mba hampaherezana ny rahalahiny. (2 Pet. 1:16-18) Nilaza ny zavatra niainany koa ny apostoly Paoly. (2 Kor. 1:8-10; 12:7-9) Aza mampiasa matetika loatra ny zavatra niainanao anefa, sao misarika ny sain’ny hafa ho amin’ny tenanao.

Koa satria tsy mitovy ny toe-piainana niavian’ny olona sy ny fomba fisainany, dia mety tsy hahafa-po ny olona iray ny porofo mampiaiky ny iray hafa. Koa hevero àry ny fomba fihevitry ny mpihaino anao, rehefa mifidy izay porofo hampiasainao sy ny fomba hampiasanao azy ianao. Hoy ny Ohabolana 16:23: “Ny fon’ny hendry mahahendry ny vavany sady manampy fahendrena eo amin’ny molony.”