Ampiasao eny Amin’ny Fanompoana ny jw.org

Fitaovana tena mahomby ny tranonkalantsika mba hitoriana ny vaovao tsara “any amin’ny faritra lavitra indrindra amin’ny tany.” (Asa. 1:8) Tsy mahita irery ny jw.org ny ankamaroan’ny olona, raha tsy misy mpitory manoro azy.

Naka an’ilay video hoe Nahoana Ianao no Tokony Hianatra Baiboly? ny mpiandraikitra mpitety faritany iray. Nataony tao amin’ny findainy ilay izy, ary asehony amin’ny olona isaky ny afaka manao izany izy. Hoy, ohatra, izy rehefa mitory isan-trano: “Mandalo kely aho mba hanampy ny olona hahita ny valin’ireto fanontaniana telo lehibe ireto: Nahoana no be dia be ny olana mahazo antsika? Ahoana no hamahan’Andriamanitra azy ireny? Ahoana no hiatrehantsika azy ireny amin’izao? Mamaly an’ireo ity video fohy ity.” Alefany ilay izy avy eo ary jereny ny fihetsik’ilay olona. Manintona be ilay video ka maro no mijery an’ilay izy hatramin’ny farany. Hoy avy eo ilay mpiandraikitra: “Voalaza teo fa afaka mangataka ny hianatra Baiboly amin’ny alalan’ny Internet ianao. Efa eto ihany aho ka azoko aseho anao vetivety ilay fomba fianarana.” Raha manaiky ilay olona, dia mampiasa ny bokikely Vaovao Tsara izy mba hanaovana an’izany. Raha tsy manam-potoana kosa ilay olona, dia mifanao fotoana izy ireo mba hanaovana an’izany amin’ny manaraka. Toy izany koa no ataony rehefa miala hetaheta eny amin’ny mpivarotra izy, ka avy manombo-dresaka amin’ilay olona eo akaikiny. Mampiasa ny jw.org koa ve ianao rehefa manompo?