Fampiasana Drafitra

MARO no matahotra, rehefa hoe hampiasa drafitra mba hanaovana anjara na lahateny. Matoky tena kokoa izy ireo, raha voasoratra manontolo na ianarany tsianjery izay holazainy.

Tsy misy amintsika anefa mamaky ny resaka ataontsika isan’andro amin’ny fianakaviantsika sy ny namantsika. Tsy manao izany koa isika eny amin’ny fanompoana sy rehefa mivavaka amin’ny fontsika, na mitokana izany, na eo anivon’olon-kafa.

Inona no fahasamihafana eo amin’ny lahateny vakina sy ny drafitra? Marina kokoa sy voafidy tsara kokoa ny teny ampiasainao amin’ny lahateny vakina, saingy tsy dia afaka manohina loatra ny fon’ny hafa ianao. Manjary tsy toy ny fiteninao andavanandro ny hafainganam-piteninao sy ny filanton’ny feonao aorian’ny fehezanteny vitsivitsy, fa lasa mitovy foana. Maro ny mpihaino tsy dia hihaino tsara raha mifantoka kokoa amin’ny taratasy ianao fa tsy amin’izy ireo, satria toa tsy tena mieritreritra azy ianao, ary toa tsy mampifanaraka ny fanazavanao amin’izay ilainy. Ny lahateny atao tsy an-kijery soratra no tena manosika ny olona hanao zavatra.

Natao hanampiana antsika eo amin’ny fiainantsika andavanandro ny Sekolin’ny Fanompoana. Rehefa mifankahita amin’ny namantsika isika, dia tsy mamoaka taratasy avy ao am-paosy, ka mamaky ireo hevitra tiantsika holazaina, mba ho marina tsara ny teny hilazantsika azy. Eny amin’ny fanompoana koa, dia tsy mitondra lahateny vakina isika, sao hoe hanadino hevitra sasany tiantsika holazaina. Mizàra miteny amin’ny fomba tsotra sy tsy amboamboarina raha fitoriana no faritra anaovanao ny anjaranao amin’ny sekoly. Manaova fanomanana tsara, dia ho hitanao fa efa ampy mba hampahatsiahy anao ireo hevi-dehibe tianao horesahina ny drafitra, na ataonao an-kandrina ilay izy, na an-tsoratra. Ahoana anefa no hananana ny fatokisan-tena ilaina mba hahatongavana amin’izany?

Alamino ireo hevitrao. Mila mandamina ireo hevitrao ianao, mba hahafahana hampiasa drafitra. Tsy hoe hifidy ny teny tsirairay hampiasainao akory ianao amin’izany, fa hieritreritra fotsiny aloha vao hiteny.

Eo amin’ny fiainana andavanandro, ny olona faingam-bava dia mety hilaza zavatra izay hanenenany avy eo. Ny hafa indray mety tsy hilaza zavatra hentitra fa mifindrafindra foto-kevitra. Samy azo resena ireo kilema ireo, raha miato aloha ianao ka mandamina ny hevitrao ao an-tsainao, vao miteny. Ataovy tsara ao an-tsaina aloha ny zava-kendrenao, dia fanteno avy eo ireo dingana ilainao amin’izany, vao mitenena.

Miomana ho amin’ny asa fanompoana ve ianao? Tsy ny kitaponao ihany no tokony homaninao, fa ireo hevitrao koa. Raha mikasa ny hampiasa fomba fampiseho iray ao amin’ny Fanompoantsika Ilay Fanjakana ianao, dia averimbereno vakina ilay izy, mandra-pahazonao tsara ireo hevi-dehibe ao an-tsaina. Fintino ao anaty fehezanteny fohy iray na roa izy ireo, ary lazao amin’ny fomba fiteninao sy araka ny zava-misy eo amin’ny faritaninao. Hanampy anao ny fanaovana drafitra an-kandrina. Inona no hampidirinao ao amin’izany? 1) Azonao atao fampidiran-dresaka ny filazana zavatra iray mampanahy ny rehetra eo an-toerana. Asao ilay olona hilaza ny heviny. 2) Mieritrereta zavatra iray azonao lazaina momba ilay foto-kevitra, ary koa andinin-teny iray na roa mampiseho izay hataon’Andriamanitra. Mety hanana fahafahana ianao hilaza fa ny Fanjakany any an-danitra no hanatanterahany izany. 3) Ampirisiho ilay olona hanao zavatra mifandray amin’ilay resaka nifanaovanareo. Manolora zavatra hovakiny sy (na) fampianarana Baiboly, ary mifanaova fotoana mba hanohizana ilay resaka.

Drafitra an-kandrina fotsiny no hany hilainao amin’izany. Raha te hampiasa drafitra voasoratra ianao alohan’ny hitsidihana olona, dia izao ihany no ampidiro ao: Teny vitsivitsy ho fampidiran-dresaka, sy andinin-teny iray na roa, ary hevitra fohy ho famaranana. Raha manomana sy mampiasa drafitra toy izany isika, dia tsy ho lava resaka, fa ho afaka hampita hafatra mazava sy mora tadidina.

Manaova fikarohana raha misy fanontaniana na fanoherana mipoitra matetika ao amin’ny faritaninareo. Mazàna no hevi-dehibe roa na telo sy izay andinin-teny iorenany, no hany ilainao. Mety hanome anao ilay drafitra ilainao indrindra ny Foto-dresaka Ara-baiboly na ireo lohatenikely amin’ny sora-matevina ao amin’ny Fomba Fanjohian-kevitra avy Amin’ny Soratra Masina. Te hampiasa tenin’olona hitanao tany anaty boky hafa angamba ianao. Manorata drafitra fohy misy izany tenin’olona izany, ary ampiaraho amin’ireo fitaovana fitondranao eny amin’ny fanompoana. Rehefa misy olona manapoitra ilay fanontaniana na ilay fanoherana, dia ampahafantaro azy fa faly ianao afaka hanazava ilay izy aminy. (1 Pet. 3:15) Ampiasao ilay drafitra mba hamaliana ny fanontaniany.

Rehefa hanao vavaka eo anivon’ny fianakavianao, any amin’ny fianarana boky, na any amin’ny fivoriana, ianao, dia tsara koa raha alaminao aloha ireo hevitra holazainao. Araka ny Lioka 11:2-4, dia nomen’i Jesosy drafitra tsotra momba ny vavaka misy heviny, ny mpianany. Nanao vavaka lava be i Solomona tamin’ny fitokanana ny tempoly tao Jerosalema. Tsy maintsy ho efa noeritreretiny mialoha ilay izy. I Jehovah sy ilay fampanantenana nataony tamin’i Davida aloha no nolazainy; avy eo ny tempoly; ary avy eo izy dia nanonona toe-javatra sy olona voafaritra tsara. (1 Mpanj. 8:22-53) Hanampy antsika ny fandinihana ireny ohatra ireny.

Hazòny ho tsotra ny drafitry ny lahateninao. Inona avy no tokony hampidirinao ao amin’ny drafitra ho an’ny lahateninao?

Tadidio fa natao mba hanampianao ny tenanao hitadidy hevitra ny drafitra. Mety hanampy anao ny fanoratana fehezanteny vitsivitsy ho fampidiran-dresaka. Aorian’izany anefa, dia ireo hevitra no ifantohy, fa tsy ireo teny. Fehezanteny fohy ampiasaina, raha tianao hosoratana ao anaty fehezanteny ireo hevitra ireo. Tokony hiavaka tsara ao amin’ny drafitrao ireo hevi-dehibe vitsivitsy kasainao hovelabelarina. Azonao soratana amin’ny sora-baventy izy ireny, na tsipihina, na asongadina amin’ny penina miloko. Tanisao eo ambanin’ny hevi-dehibe tsirairay, ireo hevitra tianao hampiasaina mba hamelabelarana azy. Mariho ireo andinin-teny kasainao hovakina. Mazàna no tsara indrindra ny mamaky azy ireo ao amin’ny Baiboly. Mariho ireo fanoharana tianao hampiasaina. Mety hahita teny mahaliana sy mety tsara nolazain’olona tsy Vavolombelona koa ianao. Ataovy ampy tsara ireo tsipirian-javatra hatolotrao. Ho mora hampiasaina kokoa ilay drafitra, raha madio sy milamina.

Misy mampiasa drafitra tsy ahitana afa-tsy izay tena ilaina: Teny fototra vitsivitsy, andinin-teny hotononin’ilay mpandahateny an-kandrina, ary sary na sarisary hanampy azy hitadidy ireo hevitra. Soratra tsotra toy izany dia efa ahafahan’ny mpandahateny iray mamelabelatra ny fanazavany amin’ny fomba mirindra sy toy ny miresaka andavanandro. Izany no zava-kendren’ity lesona ity.

Misy fanazavana momba ny “Fanomanana Drafitra” eo amin’ny pejy faha-39 ka hatramin’ny faha-42 amin’ity boky ity. Hanampy anao be dia be ny famakiana azy io, rehefa mianatra ity lesona hoe “Fampiasana Drafitra” ity ianao.

Fomba fampiasana ilay drafitra. Tsy ny hanomana drafitra ho an’ny lahateninao fotsiny izao no tanjonao, fa ny hampiasa tsara azy io koa.

Ny fanaovana famerenana ilay anjara na ilay lahateny no dingana voalohany amin’izany. Jereo ilay loha hevitra, dia vakio ny hevi-dehibe tsirairay, ary lazao ny ifandraisan’ny tsirairay aminy amin’ilay loha hevitra. Mariho ny fotoana azonao atokana ho an’ny hevi-dehibe tsirairay. Ivereno indray izao ilay hevi-dehibe voalohany, ary fakafakao. Jereo ireo fanaporofoan-kevitra sy andinin-teny sy fanoharana ary ohatra kasainao hampiasaina mba hamelabelarana io hevitra io. Averimbereno jerena io tapany amin’ny lahateninao io mandra-pahazavany tsara ao an-tsainao. Toy izany no ataovy amin’ny hevi-dehibe tsirairay. Jereo izay azonao esorina, raha ilaina, mba tsy hihoaranao ny fotoana. Avereno jerena avy eo, ilay lahateny manontolo. Ireo hevitra no ifantohy, fa tsy ireo teny. Aza ianarana tsianjery ilay lahateny.

Tokony ho afaka hijery ny mpanatrika ianao rehefa manao ilay lahateny. Rehefa avy mamaky andinin-teny iray ianao, dia tokony ho afaka hanjohy hevitra avy amin’izy io, amin’ny fampiasana ny Baibolinao, fa tsy hiverina hijery ny taratasinao. Toy izany koa ny fanoharana: Lazao toy ny miresaka amin’ny namana ilay izy, fa aza vakina avy ao amin’ny taratasinao. Rehefa miteny ianao, dia aza mijery ny taratasinao mba hilazana ny fehezanteny tsirairay. Mitenena avy amin’ny fo, dia hanohina ny fon’ireo mihaino anao ianao.

Rehefa hainao tsara ny mampiasa drafitra, rehefa manao anjara na lahateny, dia efa nahavita dingana tena lehibe ianao mba ho tonga mpandahateny mahay.