2 Timoti

3 Lelo manya ukuti umu manda akusyalikizya mulaya insita izitale sana. 2 Pano antu yalaitemwa, yalatemwa impiya, yalaya na mataki, yalaitutumula, amiponto, aasiuvwila avyazi yao, aasitaizya, aataya ni cisinka, 3 aataya nu kutemwa, aasizumilizyanya na auze, aalwambo, aasiyikaanya, aankalwe, aatatemwa usuma, 4 aakafutuka auze, aasilonda ukuuvwa uku yauze, aacilumba, aatemwa ivya kuizanzya ukucila ukutemwa Leza, 5 aakaloleka kwati aakapepa lelo aakana maka yakwe ukapepa; ku yantu ya musango uu uwatalukako. 6 Muli yakwene u mwafuma aonsi aakaingila umu mang’anda ya yantu umu mucenjelo nu kuteeka uzya anaci aatonta pa mulandu wa membu zyao, nupya aakatungululwa nu lunkumbwa lwa misango yonsi, 7 lyonsi yakasambilila lelo yasimanya ningo icumi.

8 Wakwe vino Yanesi na Yambulesi yakaanyanga Mose, avino na yakwene yakakaanya icumi. Antu yaa yononeka melenganyo nupya Leza atayatemwa pano yatakwata utailo. 9 Lelo yatalaya nanti akumwi, pano uwelewele wao ulaloleka apaswe kuli yonsi, wakwe vino cali kuli yaya yaili. 10 Lelo wemo ukakolanya sana imisambilizizye yane, vino nkacita, mapange yane, utailo wane, kuteekela kwane, ukutemwa kwane, kuzizimizya kwane, 11 ukacuziwa nu kukwata intazi wakwe zino nakweti umu Antioki, umu Ikoniya, nu mu Lisitila. Nazizimizye intazi zizyo nupya Umwene wampuswisye kuli zyonsi kwene. 12 Nupya asambi yakwe Klistu Yesu yonsi aakalonda ukupepa Leza, yalacuziwa. 13 Lelo antu aipe nupya asomvi yalatwalilila ukwipilako sile, yalaaponzya antu nupya yalaaponziwa.

14 Lelo wemo, twalilila umu vintu vino wasambiliile nupya ivyalenzile ukuti utaile, pano wamanya aakusambilizye ivintu vivyo 15 nu kuti ukufuma uku unya wamanya malembo ya muzilo aalenga uye na mano pakuti uce upusuke pa mulandu nu kutaila muli Klistu Yesu. 16 Amalembo yonsi yafuma kuli Leza nupya yakaomviwa ku kusambilizya, ku kusunda, ku kulungika ivintu, nu ku kusalapwila umu ulungami, 17 pakuti umuntu wakwe Leza aye umufikepo, umuipekanye ningo ukuomba umulimo onsi usuma.