Okotoba

Uzye insita zimwi cikamutalila ukuya ni cuvwila? Umwene Devedi camutalilanga, fwandi wapefile kuli Leza ukuti: “Umpeele umwenzo wa kulondesya kukuvwila.” (Masa. 51:12) Devedi watemilwe Yeova. Nomba insita zimwi camutalilanga ukumuvwila, nupya naswe kwene ali vino caya. U mulandu ci? Ica kutandikilapo, twapyana ukukanaya ni cuvwila uku yavyazi itu. Cakwe ciili, Satana lyonsi akaezya ukutulenga ukupondokela Yeova, wakwe vino wacisile pa kutandika. (2 Kol. 11:3) Cakwe citatu, tukaikala na antu akwata umupasi wakwe ucipondoka kuli kuti “umupasi uno ndakai ukaomba umu yana ya cintuvwa.” (Efes. 2:2) Tutalinzile sile ukuombesya ukulwisyanya nu luyembu luno twapyana, lelo tulinzile ukuombesya ukucimvya Ciwa na antu aa mu nsi aakalenga catutalila ukuya ni cuvwila. Tulinzile ukuombesya ukulauvwila Yeova alino na antu yano wikako ukuti yatutungulula. w23.10 6 ¶1

I vyani vino tungasambilila uku cizungusyo cino Yesu wacisile ica kusangula amanzi ukuya waini? Tukasambililako ukuicefya. Yesu ataitumiike apa cizungusyo cii, umu nzila imwi tungati ataitumikanga umu vintu vyonsi vino wacitanga. Lelo waicefizye nu kuleka ululumbi nu mucinzi ukuya kuli Isi. (Yoa. 5:​19, 30; 8:28) Ndi cakuti tukukolanya Yesu pali vino wali umuicefye, tutalaitumika apa milimo ino tukaomba. Tutalinzile ukulaitumika, lelo tulinzile ukulaitumika pa mulandu wakuti Leza watupeela isyuko lya kumuombela. (Yele. 9:​23, 24) Lekini twamupeela umucinzi uno akalondekwa. Nupya ukwaula ukwazwa kwakwe Yeova, kusi ivili vyonsi vino tungakwanisya ukucita? (1 Kol. 1:26) Ndi cakuti twaicefya, tutalinzile ukulapokelela ululumbi pali vino twacitila yauze. Tukateeka umwenzo pano tukamanya ukuti Yeova akalola nupya wacindika vino tukacita. (Loliniko na Mateo 6:​2-4; Aeb. 13:16) Tukazanzya Yeova ndi cakuti tukukolanya vino Yesu wali umuicefye.—1 Pet. 5:6. w23.04 4 ¶9; 5 ¶11-12

Leza walenzile umutumwa Paulo ukukomelezya aina klistu ukwika mano uku vintu ivingazipila yauze. Uzye tungaomvya ukusunda kuu lino tuli pa kulongana? Tulinzile ukwiusya ukuti na yauze kwene yakulonda ukwasukapo? Elenganyini pali cii. Uzye ndi cakuti mukulanzyanya na cuza winu, mungatemwa sile ukuti mwalanda sile mwenga ukwaula ukuti umuzo alandepo? Awe foo. Mungatemwa ukuti nawe kwene alandapo. Ndi cakuti asikulandapo, cingalenga ayuvwa ukuti mutamwisileko mano. Umu nzila imwi kwene, tukalonda ukuti aina na ya nkazi yaasukapo pa kulongana. Umu cumi ii yaya iinzila yonga ino tungaomvya pa kukomelezya aina na ya nkazi nga tukuleka ukuti nayo yayalanda pa utailo wao. (1 Kol. 10:24) Cino tulinzile ukucita u kwasuka ivyasuko iviipi, pakuti na yauze yangasukapo. Nanti cakuti mukwasuka icasuko iciipi, mutaasuka ivisinka ivingi. Nga mwasuka ivyasuko vyonsi ivili muli palaglafu, ala yauze yatamakwata ivyakulandapo. w23.04 22-23 ¶11-13

Tulinzile ukulaiusya umulandu uno cacindamila ukutwalilila ukulaazwa yauze, sana sana lino tukuomba umulimo wa kusimikila. Lino tukuomba umulimo wa kusimikila, tutalinzile ukumilila sile pali vino tukulonda. Tukazana antu aakwata ivizumilo ni miyele ipusanepusane nupya aa nkulilo izipusanepusane. Umutumwa Paulo waitemelwanga ukusenuka, nupya tungasambilila ivingi kuli aliwe. Yesu wasonsile Paulo ukuya “mutumwa uku yantu ya mu nko.” (Loma 11:13) Na cico calenzile ukuti Paulo asimikile uku Yayuda, Agiliki, asambilile sana, aatasambilile sana, aalasi, alino na kuli ya mwene. Pakuti Paulo aafika antu apusanepusane pa mwenzo, wacitanga ‘vyonsi vino angacita pakuti aazwe antu amisango yonsi.’ (1 Kol. 9:​19-23) Wikanga sana mano kuli vino antu yano wazananga yacitanga, inkulilo yao, alino na vino yazumilemo pakuti angayazwa ukulingana na vino yakulondekwa. Tungazifya imisimikilile itu ndi cakuti tukusenula ivya kusimikila ukulingana na antu yano tukuzana. w23.07 23 ¶11-12

Ukufuuka kusilangilila ukuti umwi watonta lelo kukalangilila ukuti wasipa. Cikalondekwa ukuombesya pakuti mutwalilile kuteeke umwenzo nga mwakwata intazi. Ukufuuka kwaya pa “miyele iikafuma ku mupasi wa muzilo.” (Gala. 5:​22, 23) Izwi lya Cigiliki lino yaomvya ilyakuti “ukufuuka” insita zimwi yaliomvyanga ukulanda pa mfwalasi ya mu mpanga ino yaleta umu muzi nu kuisambilizya. Elenganyini pa mfwalasi ya mu mpanga iteekele. Nanti icakuti iteekele nomba ikome. Nga swemo tungaya uli afuuke nupya pa insita ili imwi kwene akome? Tutanga tucite vivyo uku maka itu sweineco. Icingatwazwa u kupepa kuli Leza ukulenga umupasi wa muzilo pakuti utwazwe ukutwalilila ukuya ni miyele kwene ii isuma. Antu aingi yasambilila ukuya ni miyele ii. Wakwe aina na na ya nkazi aingi yakatwalilila ukuya afuuke ndi cakuti yamwi yayasosya nupya cii cikalenga aingi yaelenganya ivisuma pali ya Nte. 2 Tim. 2:​24, 25. w23.09 15 ¶3

Umutumwa Yoani waweni aikolo 24 yakufukama pa nkoleelo yakwe Yeova. Yalumbanyanga Yeova nu kupunda yati, “Walinga we Yeova Leza witu ukupokelela ululumbi nu mucinzi na maka.” (Kuso. 4:​10, 11) Kwaya ivyalenga ya malaika ya cumi nayo kwene yalumbanya Yeova. Iikala nawe pa myaka ingi na ci calenga yamumanye ningo. Yakalola imiyele ino wakwata ikalolekela muli vino akacita. Nga yalola vino Yeova akacita cikalenga yatwalilila ukumulumbanya. (Yobo 38:4) Naswe kwene tukalonda ukulalumbanya Yeova umu mapepo itu, nu kutaizya pali vino twatemwa pali aliwe. Lino mukubelenga nu kuisambilizya Baibo, mwalola imiyele isuma ino Yeova wakwata. (Yobo 37:23; Loma 11:33) Lyene mwamunena pali vino mukayuvwa pa miyele iyo. Nupya tukalumbanya Yeova pali vino akatwazwa na pali vino akaazwa aina na ya nkazi aya umu cilongano citu.—1 Sam. 2:​1, 2. w23.05 3-4 ¶6-7

Umu 1919, Babiloni Mukalamba walesile ukutungulula antu yakwe Leza. Mu mwaka kwene uwa, amuno “umuomvi mutailwe nupya uwa mano” watandike ukwazwa antu aalondesyanga icumi pakuti yangatandika ukulapita umu “Museo wakutungulula kuli Umuzilo.” (Mate. 24:​45-47; Eza. 35:8.) Milimo ino antu aliko uku cisila yaomvile pakuti yapekanye umu museo uu, vyazwa antu ukutandika ukupita umu museo ukalamba nu kumanya ivingi pali Yeova alino na vino akalonda ukucita. (Mapi. 4:18) Nupya vyayazwile ukulacita ivintu ukulingana na vino Yeova akalonda. Yeova atenekelanga antu yakwe ukuti yasenuke muli vyonsi pa muku onga. Lelo, watwalilila ukuyazwa ukusenuka panono panono. Tulaya sana ni nsansa lino tulazanzya Leza witu muli vyonsi vino tukucita. Pakuti museo utwalilile ukuya usuma ukalondekwa ukulazifiwa. Ukufuma umu 1919, “Museo wakutungulula kuli Umuzilo” watwalilila ukuzifiwa pakuti caangukila antu ukufuma muli Babiloni Mukalamba. w23.05 17 ¶15; 19 ¶16

Ina aya umwi Iumba Ilikatungulula yakasambilizya aina ivya kuomba umu ma Komiti apusanepusane amwi Iumba Ilikatungulula. Aina ya Aakaazwilizya yakaomba imilimo ipusanepusane iya mwi iuvi. Yaipekanya ukutwalilila ukuomba umulimo wa kusakamala imfwele zyakwe Klistu. Lino apakwe akusyalikizya yalaya ukwi iyulu, antu yakwe Yeova yalatwalilila ukumupepa na ucisinka. Tusitwisika ukuti tulatwalilila ukupepa Yeova na ucisinka pa mulandu wakuti Yesu ali ntunguluzi. Twamanya ukuti pa nsita ii Gogi wa ku Magogi, alazanza antu yakwe Leza. (Ezek. 38:​18-20) Lelo ukuzanza kuu kutalalenga antu yakwe Yeova ukuta ukumupepa. Tusikutwisika ukuti alayacingilila. U mu cilolwa umutumwa Yoane waweni “iumba ilikalamba” ilya mfwele na zyuze. Yoani yamunenyile ukuti “iumba ilikalamba” yafuma “umu ucuzi ukalamba.” (Kuso. 7:​9, 14) Ukwaula nu kutwisika twamanya ukuti Yeova alayacingilila. w24.02 5-6 ¶13-14

Tungacita uli pakuti Leza atupeele umupasi uwa muzilo? Tulinzile ukumulenga umupasi uwa muzilo, kuisambilizya Izwi Lyakwe Leza, alino nu kutwalilila ukuya umwi iuvi lyakwe ilikatungululwa nu mupasi wakwe. Ukucita vii kulatwazwa ukuya ni miyeele “iikafuma ku mupasi wa muzilo.” (Gal. 5:​22, 23) Leza akapeela umupasi wa muzilo kuli yano yakatwalilila ukuya aasanguluke umu melenganyo alino nu mu miyeele. Atanga atwalilile ukutupeela umupasi uwa muzilo ndi cakuti tukwelenganya pa vintu iviipe nu kulondesya ukucita ivintu kwene vivyo. (1 Tesa. 4:​7, 8) Pakuti tutwalilile ukupokelela umupasi wa muzilo, tutalinzile ukulasuula “amazwi ya usesemo.” (1 Tesa. 5:20) Amazwi aakuti “amazwi ya usesemo” yakulozya uku vyeo vino Yeova akatunena ukupitila umu mupasi wa muzilo, kumwi sile ni vyeo ivikalanda pa wanda wakwe Yeova alino na pa manda yano tulimo. Tusiita ukwelenganya pa wanda uu, nanti sile ukwelenganya ukuti Amagedoni italatuzana tuli nu umi. Lelo tutwalilila ukuya ni miyeele isuma na lino tukutwalilila ukuya acincile umu kuombela Leza.—2 Pet. 3:​11, 12. w23.06 12 ¶13-14

I vyani vino umwina Klistu alinzile ukucita ndi cakuti lino akuomvya foni nanti ciombelo cuze nga piiza ivikope ivya uzelele? Tulinzile ukuvifumyapo zuwa zuwa. Icingalenga tucite vii u kwiusya icintu icicindame cino twakwata kuli kuti ucuza witu na Yeova. Nanti cakuti ivikope vimwi vitanga viye ivya uzelele nomba vingalenga umuntu ukukwata insuna. U mulandu ci uno tutalinzile ukulatamba ivikope ivya musango uu? Pano tusilonda nanti sile a panono ukulaelenganya pa vintu ivingalenga tucite uzelele. (Mate. 5:​28, 29) Eluda uwi zina lyakuti David aakaikala uku Thailand watiile: “Nkayuzya nemwineco inti: ‘Nanti cakuti ivikope visi ivya ucizelele, uzye Yeova anguvwa ndi cakuti nkuvitamba?’ Ukwelenganya kwa musango uu kukangazwa ukupingula ningo pa vintu.” Ukutiina ukucita ivili vyonsi ivingasosya Yeova, kungalenga tupingule ningo pa vintu. Ukutiina Leza aali “ntendekelo ya mano.”

Mazwi aakuti “mu ng’anda inu” yangalozya umu vilongano vino twayamo. Umu ucuzi ukalamba, Yeova watulaya ukuti alatucingilila ndi cakuti twatwalilila ukuya aalemane na ina na ya nkazi. Fwandi ali mulandu uno icicindamila ndakai ukuombesya pakuti tutwalilile ukutemwa aina na ya nkazi. Nga tukutemwa aina na ya nkazi, limwi tungaca tupusuke. ‘Uwanda ukulu wakwe Yeova’ ulaleta intazi izingi uku yantunze. (Zefa. 1:​14, 15) Antu yakwe Yeova nayo kwene yalakwata intazi. Nomba ndi cakuti ituipekanyizizya limwi, tulaya aateekele nupya tulaazwako na yauze. Tulazizimizya intazi zyonsi zino tulaakwata. Ndi cakuti umwina nanti nkazi akucula, tulaezya papezile amaka itu ukulanga icikuuku nu kumwazwa muli vino akulondekwa. Tulapalama sana uku ina na ya nkazi pano ala twatemwana mpiti. Lyene Yeova alatulambula nu kutupeela umi uwa pe umu nsi ipya umutalaya mazanzo akuiponela alino ni ntazi zino tukakwata ndakai.—Eza. 65:17. w23.07 7 ¶16-17

Ilingi Izwi Lyakwe Leza likalondolola aonsi acisinka ukuti yali na maka. Lelo asi lyonsi lino yayuvwanga ukuti yakweti amaka. Wakwe, apa nsita imwi Umwene Devedi wayuvwile ukuti wakoma wa mwamba, apa insita imwi napo uvwile intete. (Masa. 30:7) Umupasi wakwe Leza walenzile Samusoni ukuya sana na maka. Lelo Samusoni wamanyile ukuti ndi cakuti umupasi wakwe Leza wafuma pali aliwe ‘amaka yangasila nupya angatonta nu kuya wa yonsi asyala.’ (Yakapi. 14:​5, 6; 16:17) Aonsi yaa yakweti amaka pa mulandu wakuti Yeova u wayapeezile. Umutumwa Paulo wamanyile ukuti nawe kwene walonda amaka ukufuma kuli Yeova. (2 Kol. 12:​9, 10) Paulo wakweti intazi izya mu umi. (Gala. 4:​13, 14) Insita zimwi, walwisyanyanga nu kulonda ukucita icisuma. (Loma 7:​18, 19) Nupya uvwanga intete pali vino vyali nu kumucitikila. (2 Kol. 1:​8, 9) Nomba, lino Paulo wali umutonte wizile aya na maka. U munzi ci? Yeova wapeezile Paulo amaka yano walondekwangwa pakuti azizimizye intazi zino wakweti. w23.10 12 ¶1-2

Ndi cakuti insita zimwi mukayuvwa asile sile mwaiusya ukuti Yeova lyonsi waya umupipi namwe. (Yoa. 6:44) Akalola ivisuma muli sweswe vino tutanga tulole nupya watumanya ningo sana. (2 Mila. 6:30) Fwandi tulinzile ukutaila ndi watunena ukuti twacindama. (1 Yoa. 3:​19, 20) Yamwi lino yatatala yasambilila icumi, yacitanga ivintu ivyalenga limwi yayuvwa amulandu. (1 Pet. 4:3) Na Aina Klistu aakula muli vyakwe Leza nayo kwene yangakwata intazi yamusango uu. Uzye namwe mukaelenganya ukuti Yeova atanga amwelele? Ndi cakuti avino mukaelenganya ukumanya ukuti aomvi yakwe Yeova aliko mpiti nayo kwene yakwatanga intazi ya musango uu kungamwazwa. Wakwe umutumwa Paulo wayuvwanga uwa ulanda pa mulandu nu kukana malilika. (Loma 7:24) Nanti icakuti Paulo walapile nu kubatiziwa. Watwalilile ukuilola ukuti uwali ali ‘mucepesye pa yatumwa’ nupya “muyembu” ukucilapo.—1 Kol. 15:9; 1 Tim. 1:15. w24.03 27 ¶5-6

Icintu conga cino tukasambilila kuli vino Umwene Yoasyi atapingwilepo ningo icakuti, tulinzile ukulasoolola yacuza aangatwazwa ukulacita ivisuma, aatemwa Yeova nupya aakalonda ukumuzanzya. Tutalinzile sile ukuya yacuza na antu amusinku witu. Mwaiusya ukuti Yoasyi wali umwance sana pali cuza wakwe Yeoyada. Lino mukusoolola ivyuza, mungayuzya ukuti: ‘Uzye yakangazwa ukukomya utailo muli Yeova? Uzye yakankomelezya ukulondela amasunde yakwe Leza? Uzye yakalanda pali Yeova na pa cumi cakwe icicindame? Uzye yakalanga ukuti yacindika masunde yakwe Leza? Uzye yakanena sile vino ningatemwa ukuvwa, nanti uzye yakasipa pakuti yandungike nga naluvyanya?’ (Mapi. 27:​5, 6, 17) Ukwaula nu kupita umu mbali, ndi cakuti yacuza inu yatatemwa Yeova, ala yatalinga ukuya yacuza inu. Lelo ndi cakuti yatemwa Yeova, twalililini ukuya ivyuza pano yangamwazwa.—Mapi. 13:20. w23.09 9-10 ¶6-7

Izwi lyakuti aufa ali izwi lya kutandikilako muli aufabeti ya Cigiliki, lyene izwi lyakuti omega ali lyakusyalikizyako. Fwandi vino Yeova wailondolola ukuti a “Aufa nupya Omega,” cikalangilila ukuti ndi cakuti watandika ukucita vimwi ala alamalilila ukucita ivintu vivyo. Pa cisila cakuti Yeova waumba Adamu na Eva, wayanenyile ati: “ Vyalanini nu kuvula, mukumane insi.” (Utan. 1:28) Pa nsita iya tungati Yeova walanzile ukuti a “Aufa.” Yeova walangilile ukulonda kwakwe: Insita yali nu kwiza lino ana yakwe Adamu na Eva acuvwila nupya amalilike yali nu kuzula insi nu kuilenga ukuya paladaise. Ndi cakuti Yeova wafikilizya ukulonda kwakwe, cilaya kwati walanda ukuti a “Omega.” Lino Yeova wamazile “ukuumba mayulu, insi na vyonsi ivyayamo,” walanzile vimwi ivyalangililanga ukuti alafikilizya ukulonda kwakwe. Cii cikalangilila ukuti Yeova alafikilizya ukulonda kwakwe uku nsi nu ku yantunze pa mpela ya manda 7.—Gen. 2:​1-3. w23.11 5 ¶13-14

Ulendo uwa kufuma uku Babiloni ukuya uku Izlaeli wali nu kuyasendela imyezi 4, nomba Yeova wayalavile ukuti wali nu kufumya vyonsi umu nzila ivyali nu kulenga ulendo ukutala. Ayuda ali na ucisinka, yamanyile ukuti ukuswilila uku Izlaeli kwali nu kulenga yaipakizya ivintu ivisuma ukucila na vino yali nu kusya. Nupya icintu icikalamba sana cino yali nu kulaipakizya u kupepa Leza. Mutaali itempele lyakwe Yeova nanti a lyonga umu musumba uwa Babiloni. Mutaali pano Aina Izlaeli yangapeelela malambo kuli Leza wakwe vino Masunde yakwe Mose yalandanga, nupya mutaali ya simapepo aakupeela malambo. Nupya umu musumba uwa mwali antu aingi aapepanga tuleza twaufi ukucila antu aacindike masunde yakwe Yeova nupya aamupepanga. Fwandi Ayuda aingi aatiinanga Leza yalondesyanga ukuswilila uku mpanga iya kumwao pakuti yakawezye ukupepa kwa cumi. w23.05 14-15 ¶3-4

Umupasi wakwe Yeova ungatwazwa ukutwalilila ukupita “wa yana ya luswepo.” Umulandu cii? Apa mulandu wakuti catala sana ukutwalilila ukuya acisinka umu nsi ii iipe. (1 Tesa. 4:​3-5, 7, 8) Umupasi wa muzilo ungatwazwa ukukanaelenganya wa antu amu nsi ii asilola ivintu wakwe vino Yeova akavilola. Umupasi wa muzilo ukatwazwa ukukwata “ivintu ivisuma, nu ulungami ni cumi.” (Efes. 5:9) Tungapokelela umupasi wa muzilo ndi cakuti tukupepa. Yesu walanzile ukuti Yeova akapeela “umupasi wa muzilo kuli yano yakamulenga.” (Luka 11:13) Nupya lino tuli pa kulongana tukapokelela umu pasi wa muzilo. (Efes. 5:​19, 20) Umu pasi wa muzilo ulatwazwa ukutwalilila ukuzanzya Leza. w24.03 23-24 ¶13-15

Uzye mukulonda ukuya sana ateekele? Nga vino cili, mwapepa pakuti mwaya ateekele. Kuteeka umwenzo kwaya pa miyele ino umupasi wa muzilo ukatulenga ukukwata. (Gala. 5:​22, 23) Fwandi tulinzile ukulapepa kuli Yeova nu kuleenga umupasi wa muzilo pakuti watwazwa ukuya ni miyele ii. Ndi cakuti twakwata intazi izingalenga ukuti citutalile ukuya ateekele, tulinzile ukutwalilila ‘ukulenga’ Leza ukuti atupeele umupasi wa muzilo kuti utwazwe ukutwalilila ukuya ateekele. (Luka 11:13) Nupya tungalenga Yeova ukuti atwazwa ukulola ivintu wakwe vino akavilola. Lyene pa cisila ca kupepa, tulinzile ukuombesya pakuti twatwalilila ukuya ateekele cila wanda. Ndi cakuti twatwalilila ukupepa ukuti twaya ateekele, Yeova alatwazwa ukuya ateekele nanti cakuti catutalilanga ukucita vivyo pa kutandika. Ukuya ateekele kulamwazwa nu kulaelenganya pa antu aalembwa muli Baibo. Muli Baibo mwaya malyasi aingi aakalanda pa antu aali ateekele. Ndi cakuti tukwelenganya pa malyasi yaa, tungasambililako vino tungacita pakuti twaya ateekele. w23.08 22 ¶10-11

Yesu walenzile umutumwa Petulo ukusininkizya ukuti Yeova wali nu kumwazwa. Pa cisila lino Yesu watuutulwilwe, Petulo na atumwa yauze yaweniko lino Yesu wacisile icizungusyo na cuze lino yalemile inswi izingi. (Yoa. 21:​4-6) Ukwaula nu kutwisika, icizungusyo cii calenzile Petulo asininkizye ukuti Yeova wali nu kumupeela vyonsi vino walondekwanga. Limwi umutumwa Petulo wiwisye na amazwi yakwe Yesu aakuti Yeova akasakamala yayo yonsi akatwalilila ukulonda “Uwene wakwe Leza” inkoleelo. (Mate. 6:33) Vii vyonsi vyazwile Petulo ukwika sana mano uku mulimo wa kusimikila ukucila uku kulema inswi. Apa Pentekosti umu 33 C.E., waombisye ukusimikila nu kwazwa antu ukuvwa ilyasi ilisuma. (Mili. 2:​14, 37-41) Lyene pa cisila wazwile Aina Samaliya na aatali Ayuda ukusambilila pali Klistu nu kutandika ukumulondela. (Mili. 8:​14-17; 10:​44-48) Yeova waomvizye Petulo ukwazwa antu aingi ukwiza umu cilongano cakwe. w23.09 20 ¶1; 23 ¶11

Pa cisila ca myaka iili lino Aina Babiloni yononyile umusumba uwa Yelusalemu, Umwene Nebukadineza walosile iciloto icalenzile auvwe intete muno waweni icilubi icikulu. Walanzile ukuti wali nu kukoma ya mpandamano yonsi pyu kumwi sile na Danieli ndi cakuti yatamunenyile iciloto alino nu upiliulo wa ciko. (Dan. 2:​3-5) Danieli walinzile ukuombelapo zuwa zuwa pano antu aingi yali nu kufwa. Papo kwene sile Danieli waile uku “mwene ku kulenga kuti apelwe akasita, pakuti anganena umwene muno iciloto ciile.” (Dan. 2:16) Vino wacisile vikalangilila ukuti wali u musipe nupya wakweti utailo. Kutaya ivyalembwa ivili vyonsi ivikalangilila ukuti Danieli watazile ailulapo iviloto uku cisila. Danieli wanenyile ya cuza yakwe “ukuti yapepe kuli Leza wa kwi yulu kuti aye na mizu kunoyali nu kumulenga kuti ayalondolwele inkama.” (Dan. 2:18) Yeova waswike mapepo yao. Leza wamwazwile ukwilula iciloto cino Nebukadineza walosile. Na cii calenzile ukuti Danieli na auze yapusuke. w23.08 3 ¶4

Mwaelenganya pa visuma ivikacitika nga tuli ateekele. Ndi cakuti tuli ateekele tukaya ni nsansa. Ukuteeka umwenzo kukatwazwa ukuya nu umi usuma. Ndi cakuti tukuteekelela yauze, tukaipakizya ucuza usuma na aliyo. Amu cilongano yakaya alemane sana. Ndi cakuti umwi watusosya, ukusoka zuwa kutalalenga ivintu ukwipilako. (Masa. 37:8; Mapi. 14:29) Ni cicindamisye icakuti tukakoolanya Tata witu uwa kwi yulu nupya tukapalama sana kuli aliwe. Ukuteeka umwenzo i miyele isuma sana iikalenga ivintu ukutuzipila! Nanti cakuti asi lyonsi lino cikatwangukila ukuya ateekele, ndi cakuti Yeova watwazwa tungatwalilila ukulundulula imiyele ii. Nupya lino tukuloleela insi ipya, tungasininkizya ukuti “Yawe akawaka yayo akamuyela, yayo ataila mu kutemwa kwakwe ukwa pe.” (Masa. 33:18) Lekini swensi tutwalilile ukuya ateekele. w23.08 22 ¶7; 25 ¶16-17

Yakobo walanzile ukuti umonsi angalanda ukuti wakwata utailo, lelo imilimo yakwe italangililanga ukuti waya nu utailo. (Yako. 2:​1-5, 9) Nupya Yakobo walanzile pa muntu uwaweni ‘umwina nanti nkazi aatakweti ivyakuzwala ni vyakulya’ lelo atamwazwile. Nanti cakuti umuntu wiyo walandanga ukuti wali nu utailo, vino wacitanga vitalangililanga ukuti wakwata utailo. (Yako. 2:​14-16) Yakobo walanzile pali Lahabu pa kulangilila vino utailo uwakwata imilimo wacindama. (Yako. 2:​25, 26) Lahabu uvwile pali Yeova nupya wamanyile ukuti Yeova u watungililanga Aina Izlaeli. (Yoswa 2:​9-11) Imilimo yakwe yalangilile ukuti wali nu utailo lino wacingilile inengu ziili izya Ina Izlaeli. Cii calenzile ukuti Lahabu ataali Umwina Izlaeli nupya ataali umumalilike ukwamwa ukuti u mulungami, wakwe vino cali kuli Abulahamu. Tukasambililako kuli Lahabu ukuti cacindama ukulanga utailo muli vino tukacita. w23.12 5-6 ¶12-13

Swe Ina Klistu tusilonda sile ukumanya ivisambilizyo vya kutandikilapo ivyaya muli Baibo. Tukalonda ukusambilila ni “vintu kwene ivizike vyakwe Leza,” nupya umupasi wa muzilo ungatwazwa ukucita vivyo. (1 Kol. 2:​9, 10) Limwi mungatandikilapo ukulondelezya ivingamwazwa ukupalama sana kuli Yeova. Wakwe, mungalondelezya pali vino walanganga ukutemwa uku yaomvi yakwe aliko mpiti na vino vikalangilila ukuti wamutemwa. Mungaisambilizya na pali vino Yeova walondanga ukuti Aina Izlaeli ya mupepa nu kuvilinganya kuli vino akalonda ukuti twamupepa. Nanti limwi mungaisambilizya sana pa masesemo yano Yesu wafikilizye lino waombanga umulimo wa kusimikila pano nsi. Mulaipakizya ukuisambilizya apa malyasi amusango uu ala mu kuomvya Watch Tower Publications Index nanti Ibuku Ilya Kwazwa Inte Zyakwe Yeova Ukulondelezya Ivyeo. Ukuisambilizya sana kungakomya utailo winu nupya kungamwaza “kuzana vino ukumanya Leza kwaya.”—Mapi. 2:​4, 5. w23.10 18-19 ¶3-5

Izwi lino umutumwa Petulo waomvizye ilyakuti ‘ukutemwana sana’ likapiliula nu kuti ‘kukuzya ukutemwa.’ Amazwi alondelelapo umu cikomo cii yakalondolola vino ukutemwana sana kukatulenga ukucita. Ukutemwa kukavimba pa membu zya ina itu. Cii tungacikolanya kuli vino tungatoola insalu ituikonzolola nu kuivimba pali vino tusikulonda vyalolekela ku antu, ali vino nu kutemwa “kukavimba pa membu izingi” izya ina na ya nkazi asi sile izinono. Izwi lyakuti ‘ukuvimba’ lyaomviwa pa cikomo cii ku kulozya uku kwelela. Wakwe vivi kwene vino insalu ingavimba pali vino tusikulonda vyalolekela ku antu, ali vino nu kutemwa kukavimba pa utonte nu kukanamalilika ukwa ina itu na ya nkazi. Ukutemwa kuno twatemwa aina na ya nkazi kulinzile ukuya ukukome cakuti twaitemelwa ukuyelela ndi cakuti yatuluvyanya, nanti cakuti insita zimwi ukucita vivyo kukalondekwa ukuombesya. (Kolo. 3:13) Ndi cakuti twelela yauze, tukalanga ukuti twayatemwa sana nu kuti tukalonda ukuzanzya Yeova. w23.11 11-12 ¶13-15

Lino Umwene Yosiya wali ni myaka 26, watandiike ukuzifya itempele. Lino yaombanga umulimo uu yazanyile “ulupapulo lwa Masunde yakwe Yawe yano Yawe wapile Mose.” Lino umwene uvwile ivyalemvilwe umu lupapulo luu, papo kwene sile wacisile ivyali mu lupapulo. (2 Mila. 34:​14, 19-21) Uzye mungatemwa ukulabelenga Baibo lyonsi? Ndi cakuti ali vino mukacita, uzye mukaipakizya? Uzye mukalemba malembo yano yangamwazwa? Lino Yosiya wali ni myaka 39, atapingwile ningo pali vimwi ivyalenzile nu kuti afwe. Waitaile ukucila ukulenga utunguluzi kuli Yeova. (2 Mila. 35:​20-25) Kuli vimwi vino tungasambililako kuli vino wacisile. Asi mulandu ni myaka ino tukweti nanti myaka ino itumala umu cumi, tulinzile ukutwalilila ukupalama kuli Yeova. Tungacita vivyo ndi cakuti tukupepa lyonsi ukulenga utunguluzi, ukuisambilizya Baibo, alino nu kupokeleela ukwazwa ukufuma uku Ina Klistu aakula muli vyakwe Leza. Ukucita vii kulatwazwa ukukanaluvyanya sana nupya tulaya ni nsansa.—Yako. 1:25. w23.09 12 ¶15-16

Muli Baibo mwaya anaci aingi aatemilwe Yeova nupya amuombelanga. ‘Yaikaanyanga umu vicitwa nupya yali acumi muli vyonsi.’ (1 Tim. 3:11) Nupya ya nkazi acance yangasambililako na kuli ya nkazi aakula muli vyakwe Leza aya umu vilongano vino yayamo. Mwe ya nkazi acance, mwaelenganya pali ya nkazi yano mwamanya aakula muli vyakwe Leza yano mungakolanya. Mwalola imiyele yao isuma nupya mwaelenganya pali vino mungalanga imiyele iyo. Miyele icindame ino Umwina Klistu uwakula muli vyakwe Leza alinzile ukukwata ukuicefya. Ndi cakuti umwanaci waicefya, akaipakizya ucuza usuma na Yeova alino na yauze. Wakwe, umwanaci uwaicefya akalanga ukuti watemwa Yeova lino akulondela icisinte icikalanda pa kutungilila uumutwe uno Tata witu wikako. (1 Kol. 11:3) Icisinte cii cikaomba umu cilongano alino nu mu lupwa. w23.12 18-19 ¶3-5

Yeova akalonda iya ukulatemwa umuci wakwe nu kulamusakamala muli vino akalondekwa, vino akayuvwa, alino na muli ukapepa. ukuya na mano, ukucindika anaci, alino nu kuya akutailwa, vilamwazwa ukuya iya musuma. Pa cisila cakutwala, limwi mungakwata ana. I vyani vino mungasambilila kuli Yeova pa kuya isi umusuma? (Efes. 6:4) Yeova wanenanga Umwanakwe, Yesu ukuti wamutemilwe nupya wazangilanga muli aliwe. (Mate. 3:17) Ndi cakuti mwaya isi, mwasininkizya ukuti lyonsi mukunena ana inu ukuti mwayatemwa. Mwayataizya lyonsi pa visuma vino yakacita. Avyazi aakakolanya Yeova, yakaazwa ana yao ukukula muli vyakwe Leza. Mungaipekanyizizya limwi uku mulimo uu ndi cakuti muli nu kutemwa lino mukusakamala amu lupwa na amu cilongano, kulayanena ukuti mwayatemwa, alino nu kulayataizya.—Yoa. 15:9. w23.12 28-29 ¶17-18

Nanti cakuti sweswe aomvi yakwe Yeova acisinka, tukakwata intazi nupya tukalwala, wakwe vino caya uku yantu yonsi. Nupya tukazizimizya ukutukaanya nu kucuziwa ukufuma uku yantu aatatemwa Leza. Nanti cakuti Yeova asilesya iviipe ukutucitikila, walaya ukuti alaatwazwa. (Eza. 41:10) Ndi cakuti Yeova watwazwa, tungatwalilila ukuya ni nsansa, tungapingula ningo pa vintu, nu kutwalilila ukuya acisinka kuli aliwe na lino itukwata intazi iipisye. Yeova walaya ukutupeela cino Baibo ikaama ukuti “umutende wakwe Leza.” (Filipi 4:​6, 7) Umutende uu u mutende wa mu melenganyo uukaiza pa mulandu nu kukwata ucuza usuma na Yeova. Umutende uu “uwacila imyelenganyizizye yonsi” wazipa ukucila na vino tungelenganya. Uzye mwatala mwakwatapo umutende wa mu melenganyo pa cisila ca kupepa kuli Yeova? Mutende uno muvwile u “mutende wakwe Leza.” w24.01 20 ¶2; 21 ¶4

Ukutemwa Leza kukalenga twamulumbanya nu mwenzo onsi. Devedi wamanyile ukuti ukulumbanya izina lyakwe Yeova icili cimwi nu kumulumbanya. Nga tuvwa izina lyakuti Yeova cikalenga twaelenganya pali aliwe, vino waya, alino na vino akacita. Devedi walondanga izina lyakwe Isi ukuya ilya muzilo nu kulilumbanya. Walondanga ukulacita vii insita zyonsi nupya nu mwenzo wakwe onsi. Vikwene avino na Ina Levi yali pa nkoleelo umu kulumbanya Yeova. Yaicefizye nu kulanda ukuti kutali amazwi yano yali nu kuomvya pa kulumbanya izina lyakwe Yeova ilya muzilo. (Neemiya 9:5) Tusikutwisika ukuti ukuicefya kwa musango uu kwalenzile umwenzo wakwe Yeova ukuya nu luzango. w24.02 9 ¶6

Yeova atalalola ukuti mwafilwa ukufikilizya pa mulandu wakuti uyo uno mwimike utamulinzile. (2 Kol. 8:12) Mwasambilila kuli vino vyalenzile mufilwe ukufikilizya uyo. Mwaelenganya pali vino mwakwanisya ukufikilizya. Baibo ikati “Leza asi wa lufyengo uwakuti ailile umulimo winu.” (Aeb. 6:10) Fwandi namwe kwene mutalinzile ukwilila. Mwaelenganya pali vino mwakwanisya ukufikilizya, cingaya u kupanga ucuza usuma na Yeova, kutandika ukulanzyanya na yauze pali aliwe, nanti sile ukubatiziwa. Wakwe vino mwafikilizye mauyo yano mwimike uku cisila, mwatwalilila ukuombesya pakuti mukafikilizye uyo uno mwimika. Ndi cakuti Yeova wamwazwa, mungafikilizya uyo uno mwimika. Fwandi namwe kwene, lyonsi mwaezya ukulola vino Yeova akamwazwa nu kuti alatwalilila ukumwazwa lino mukuombesya pakuti mukafikilizye uyo uno mwimika. (2 Kol. 4:7) Ndi cakuti mutatoovwike, mulaipakizya mapaalo aingi sana.—Gala. 6:9. w23.05 31 ¶16-18

Yeova akalonda ukulanga antu akamuombela ukuti wayatemwa nupya akazangila muli aliyo. Amalembo yakalanda pa miku ili ino Yeova wanenyile Yesu ukuti akazangila muli aliwe. (Mate. 3:17; 17:5) Ukwaula nu kutwisika munguvwa ningo nga Yeova wamunena kuti akazangila muli mwemwe? Yeova asilanda naswe ukuomvya izwi lelo akalanda naswe ukuomvya Baibo. Lino tukubelenga amazwi asuma yano Yesu walanzile uku yasambi yakwe tukauvwa kwati Yeova akulanda naswe. Yesu wakolanyanga imiyele yakwe isi. Fwandi nga twabelenga pali vino Yesu wacitilanga asambi yakwe acisinka atali amalilike, tukalola ukuti Yeova akulanda naswe. (Yoa. 15:​9, 15) Ndi cakuti twakwata intazi cisipiliula ukuti Yeova ataleka ukuzangila muli sweswe. Fwandi ii ikaya insita yakulanga vino twatemwa Yeova na vino twamutaila.—Yako. 1:12. w24.03 28 ¶10-11