Dizemba

Uzye Yeova wakwata amaka ya kutuutulula aafwe? Ee, wakwata amaka. A Leza wa “Maka Yonsi.” (Kuso. 1:8) Fwandi wakwata amaka ya kucimvya umulwani ali wensi kumwi sile ni mfwa. (1 Kol. 15:26) Na cuze icalenga tusininkizye ukuti Leza alatuutulula afwe icakuti wene asiilila. Wamanya intanda zyonsi nupya akazyama amazina pano zyapela. (Eza. 40:26) Nupya akaiusya yonsi aafwa. (Yobo 14:13; Luka 20:38) Wene angiusya ivintu vyonsi pali yano alatuutulula wakwe vino yalolekanga, ivyayacitiikile umu umi, alino na vino yelenganyanga. Ukwaula nu kutwisika, tungasininkizya ukuti Yeova alafikilizya ulayo uwakutuutulula aafwe pano wakwata amaka nupya akalondesya ukufikilizya. Lolini umulandu na uze uwalenga tutaile ulayo uu. Yeova watala watuutululapo antu yamwi. Mu nsita ino ivyalumbulwa muli Baibo vyacitikanga Yeova walenzile ukuti aonsi yamwi aacisinka ukwikako na Yesu yatuutulule aafwe. w23.04 9-10 ¶7-9

Ndi cakuti tukulondolwela umwi umu mucenjelo nupya itufuuka, antu yangaitemelwa ukukutika nupya tungatwalilila ukulanzyanya. Nomba ndi cakuti umuntu akulonda sile twapazyanya, tusitwalilila ukulanzyanya. (Mapi. 26:4) Lelo asi yonsi akacita vivyo, aingi yakakutika. Ivintu vikazipa ndi cakuti twatwalilila ukuya afuuke. Mwapepa kuli Yeova ukulenga amaka yakwe akumwazwa ukutwalilila ukuya afuuke lino mukwasuka amauzyo akome. Mwaiusya ukuti ukufuuka kungalenga ukuti mutapazyanya. Nupya ukufuuka alino nu kwasuka nu mucinzi kungalenga yano mukulanzyanya nayo yasenule imyelenganyizizye yao pali sweswe alino na pa cumi icaya muli Baibo. Lyonsi “mwaya aipekanye ukwasuka wensi” pali vino mwazumilamo, lelo “mwacita vivyo nu ufuuke alino nu mucinzi sana.” (1 Pet. 3:15) Mu cumi ukufuuka kwacindama sana. w23.09 19 ¶18-19

Lekini tulande pa vintu 4 ivingalanga ukuti umwi wateekela. Icakutandikilako, umuntu uwateekela asisoka zuwa. Akatwalilila ukuya umuteekele ndi cakuti yamwi yamusosya nupya asiswilizya uyi pa uyi. (Kufu. 34:6) Cakwe ciili, umuntu umuteekele akatwalilila ukuloleela ukwaula ukusoka. Ndi cakuti vimwi vyalengela ukucitika ukucila vino wenekelanga, umuntu uwateekela akatwalilila ukuloleela ukwaula ukuvwa uyi nanti ukusoka. (Mate. 18:​26, 27) Cakwe citatu, muntu muteekele asizukuwa ukucita ivintu. Nomba muntu umutekeele nga wakwata umulimo umwi ucindame akateekela lino akuomba umulimo uwo nupya asizukuwa ukuomba pakuti sile amale zuwa. Lelo akasininkizya ukuti wakwata insita iyakutantika ningo vino amaomba umulimo uwo. Lyene akalonda insita ilinge ino angaombelapo ningo umulimo uwo. Cakwe 4, umuntu muteekele akazizimizya intazi ukwaula ukuilizyanya. Lelo umuntu umuteekele akatwalilila ukuzizimizya nu kuombela Yeova ni nsansa asi mulandu ni intazi. (Kolo. 1:11) Aina Klistu yakalondekwa ukuya ateekele umu vintu vyonsi. w23.08 20-21 ¶3-6

Icintu icikalamba icilinzile ukutulenga ukucingilila imyenzo itu, a pa mulandu wakuti Yeova akatuceeceta. Cii cikupiliula ukuti aakalola ivingi muli sweswe nupya watumanya ukucila na vino sweineco twaimanya. Ukwelenganya sana pali vino aakatusambilizya kungatwazwa ukuya ni nsansa. (Yoa. 4:14) Ukucita vii kulalenga ukuti tutaazumilizya imiyele iipe nanti ivintu vino Satana akacita ukonona ucuza uno twakwata na Yeova. (1 Yoa. 5:​18, 19) Nga twapalama sana kuli Yeova, tulamutemelwako nu kumucindika. Pa mulandu wakuti tusilonda ukusosya Tata witu uwa kwi yulu, twapata imyelenganyizizye iipe ingalenga ukuti tuyembuke. Ya Marta, ya nkazi aakaikala uku Croatia yeziwe ukucita uzelele, yalemvile iyati: “Cantalile ukwelenganyapo ningo nu kumanya vino ningacita pa kucimvya amelenganyo aakulondesya ukucita iviipe. Lelo ukuya na katiina kuli Yeova kwancingiliile.” Uzye ukuya na katiina kuli Leza kwayacingiliile uli? Ya Marta yalanzile ukuti yelengiinye pali vino vingafumamo ndi cakuti yasoolola ukucita iviipe. Naswe kwene tungacita vino yacisile. w23.06 20-21 ¶3-4

Yesu wamanyile ukuti Yeova walondanga ukulenga izina lyakwe ukumanyikwa pakuti antu yangamanya ukuti Satana uwa ufi. Ali mulandu uno wanenyile alondezi yakwe ukupepa ukuti: “Tata witu uwa kwi yulu, leka izina lyako licindikwe.” (Mate. 6:9) Yesu wamanyile ukuti umulandu uu wakuma iviumbwa vyonsi. Kusi uwalenga izina lyakwe Leza ukucindikwa wakwe Yesu. Lino Yesu yamulemile uku yalwani yakwe umulandu ci uno yamupeezile? Yamupeezile umulandu wa kukana cindika izina lyakwe Leza. Yesu wamanyile ukuti ukupontela izina lyakwe Leza wali umulandu ukalamba sana. Fwandi uvwile uyi sana ukuti yamupeezile umulandu wa kupontela izina lyakwe Leza. Fwandi uli mulandu uno Yesu “uvwile sana uyi” Lino kwasyazile panono ukuti yamuleme.—Luka 22:​41-44. w24.02 11 ¶11

Umu lwilo lwitu ulwa ku umi, tulinzile ukutemwa Yeova na Yesu ukucila vino twatemwa ya lupwa itu. (Mate. 10:37) Cii cisikupiliula ukuti tulinzile ukwililako uku milimo uno twapelwa umu ulupwa. Lelo pakuti twazanzya Leza na Yesu tulinzile ukulaomba imilimo ino twapelwa ukuomba umu ulupwa. (1 Tim. 5:​4, 8) Ndi cakuti tukucita vivyo tulaya ni nsansa. Yeova wamanya ukuti amulupwa yangaya ni nsansa ndi cakuti ya iya na aci yakucindikana nu kutemwana, avyazi yakutemwa nu kusambilzya ana yao, alino ana nayo nga yakuvwila avyazi yao. (Efes. 5:33; 6:​1, 4) Nga mwemwe ya iya, aci, nanti ana mwataila ukusunda ukwaya muli Baibo, mutacita ivintu ukulingana na vino mukuyuvwa nanti vino antu aingi yakacita kuno mukaikala. Mwaovya sana impapulo zitu izikalanda pali Baibo. Umwaya vino tungacita pakuti twaomvya ivisinte vya muli Baibo. w23.08 28 ¶6-7

Ya nkazi yalinzile ukusambilila imilimo iingayazwa umu umi. Imilimo imwi ino umukazyana akasambilila lino acili umwance, ikatwalilila ukumwazwa umu umi wakwe onsi. Lekini tulande pa milimo imwi. Wakwe, mwasambilila ukubelenga nu kulemba ningo. Uku ncende zimwi, yamwi yakalola ukubelenga nu kulemba ukuti vitacindama uku mukazyana. Lelo ukulemba nu kubelenga vyacindama sana uku Ina Klistu yonsi. (1 Tim. 4:13) Fwandi mutaleka icili consi ukumulesya ukusambilila ukubelenga nu kulemba. I visuma ci ivilacitika nga mwacita vivyo? Ukubelenga nu kulemba kulamwazwa ukuzana incito nu kutwalilila ukuomba incito iyo. Kulamwazwa ukulaisambilizya Baibo ningo nupya mulaya ya kasambilizya yasuma. Ni cicindame icakuti, mulapalama kuli Yeova lino mukubelenga Izwi lyakwe nu kwelenganyapo.—1 Tim. 4:15. w23.12 20 ¶10-11

Mwalenga Yeova amwazwa ukucimvya mezyo. Pa mulandu wakuti tutamalilika, tukalwisyanya nu kucita iviipe lino tukulonda ukucita ivisuma. Satana akaezya ukulenga ivintu vyalukutalilako. Inzila yonga ino akaomvya i vya kuizanzya umwaya ivintu iviipe. Ivya kuizanzya vya musango uu vingalenga twaelenganya pa vintu ivingalenga tuye akowele na cico cingalenga tucite imembu izipisye. (Mako 7:​21-23; Yako. 1:14) Tukalondekwa ukwazwa ukufuma kuli Yeova pakuti tucimvye amezyo. Umwi pepo lya cilangililo, Yesu waomvizye amazwi ya kupaapata lino watiile: “Nupya utaleka tuponele umu kweziwa, lelo utupususye uku mwipe.” (Mate. 6:13) Nanti cakuti Yeova akalonda ukutwazwa, tulinzile ukumulenga. Tulinzile ukulacita ivintu kulingana na vino tukupepelapo. w23.05 6-7 ¶15-17

Ndi cakuti atwalane yacindika ucuza wao na Isi uwa kwi yulu, cilalenga ukuti yalondesya ukuomvya ukusunda kwakwe, na cii cilayazwa ukucimvya intazi izya mu cupo izingalenga ukuti ukutemwa kwao kwacepelako. Yayo aaya na ucuza ukome na Yeova yakamukolanya nu kukolanya imiyele ino wakwata wakwe cikuuku, kuteeka umwenzo alino nu kweleela. (Efes. 4:32–5:1) Ndi cakuti atwalane yakulanga imiyele ii umu cupo cao, kutemwa kukakulilako. Nkazi uwizina lyakuti Lena uwataikala umu cupo pa myaka ukucila pali 25, watiile: “Cikaanguka sana ukutemwa nu kucindika umuntu uwatemwa vyakwe Leza.” Katulande pali yamwi aalembwa muli Baibo. Lino Yeova welenganyanga pali yano yali nu kuya avyazi yakwe Mesiya, wasoolwile sile Jozefu na Maliya ukufuma umu yana aingi yakwe Devedi. U mulandu ci? Pano yonsi yoili yakweti ucuza ukome na Yeova, nupya Yeova wamanyile ukuti yalakomya icupo cao pa mulandu na vino yamutemwa. w23.05 21 ¶3-4

Nanti cakuti Yesu, Intunguluzi itu waya umumalilike, antu yano akaomvya pano nsi apa kututungulula yene yatamalilika. Insita zimwi cingatutalila ukuyuvwila, sana sana ndi cakuti yatunena ukucita ivintu vino tutatemilwe. Apa nsita imwi, umutumwa Petulo camutalile ukuya ni cuvwila. Lino malaika wamunenyile ukulya inyama zino zitaali izisanguluke umu Masunde Yakwe Mose, Petulo wakanyile imiku itatu. (Mili. 10:​9-16) U mulandu ci uno wakanile? Pano walolanga ukuti vino yamunenyile ukucita vitaali ningo. Lelo umutumwa Paulo wene uvwilile vino ya eluda Aina Klistu amu Yelusalemu yamunenyile ukuya ukwi tempele na onsi 4 nu kuyaisangulula ukulingana nu lutambi pa kulangilila ukuti walondelanga masunde. Paulo wamanyile ukuti Aina Klistu yatatungululwanga na Masunde yakwe Mose. Nu kuti pasi iviipe ivili vyonsi vino wacisile. Lelo Paulo “wasenzile aonsi uwanda uwalondelilepo nu kuya isangulula ukulingana nu lutambi.” ( Milimo 21:​23, 24, 26) Vino Paulo uvwilile vyalenzile aina na ya nkazi ukutwalilila ukuya alemane.—Loma 14:​19, 21. w23.10 10 ¶15-16

Limwi mutanga mwelenganyepo nu kuti katiina nako kwene kangalenga ucuza ukukomelako. Nanti ciye vivyo, yayo aakalonda ukuya ya cuza yakwe Yeova yalinzile ukumutiina.Asi mulandu ni nsita iyatipita ukufuma pano twatandikile ukuombela Yeova, swensi kwene tulinzile ukutwalilila ukuya na katiina kuli aliwe. Uzye ukutiina Leza kukapiliula cani? Umuntu uwaya na katiina kuli Leza, u muntu uwatemwa Leza nupya aasilonda ukucita ivili vyonsi ivingalenga ucuza wakwe na Leza ukononeka. Kakwene aali katiina kano Yesu wakweti kuli Leza. (Aeb. 5:7) Yesu atatiinanga Yeova ukuti angamucitila icintu cimwi iciipe. (Eza. 11:​2, 3) Lelo Yesu watemilwe sana Yeova nupya walondesyanga ukulamuvwila. (Yoa. 14:​21, 31) Wakwe vino Yesu wacitanga, naswe kwene twatemwa sana Yeova pa mulandu wakuti waya a Leza uwaya nu kutemwa, uwaya na mano, uwaya nu mulinganya, nupya waya a Leza wa maka. Nupya twamanya ukuti watutemwa nu kuti akaikako sana mano kuli vino tukacita lino akutusambilizya. Tungalenga Yeova ukusoka nanti ukuya ni nsansa.—Masa. 78:41; Mapi. 27:11. w23.06 14 ¶1-2; 15 ¶5

Lino Umwene Uziya wizile aya sana na maka, watile ukutaizya pa vintu vyonsi vino Yeova wamucitile. I vyani vino tukusambililako? Tulinzile ukulaiusya ukuti imilimo ino twakwata na vyonsi vino twakwata a Yeova uwatupeela. Ukucila ukulayuvwa pali vino tukakwanisya ukucita, tulinzile ukuleka Yeova aliwe acindikwa. (1 Kol. 4:7) Tulinzile lyonsi ukulaiusya ukuti tutamalilika nupya tukalondekwa ukusundwa. Umwina aali ni myaka umu ma 60 walemvile ukuti: “Nasambilila ukuti ntalinzile ukusoka nanti ukutoovoka ndi cakuti yamwi yalola ukuti nkuluvyanya. Ndi cakuti yamwi yansunda pali vino induvyanya, nkaezya ukuombelapo nu kutwalilila ukuombela Yeova.” Ndi cakuti tukuvwila Yeova nu kutwalilila ukuya aicefye, tulaya ni nsansa.—Mapi. 22:4. w23.09 10 ¶10-11

Aina Klistu aakutandikilako yalondekwanga ukuzizimizya. Yakwatanga intazi zino antu aingi pa nsita iya yakwatangako, lelo yakwatanga ni ntazi zyuze pa mulandu wa kuti yali Aina Klistu. Yatayacuzyanga sile uku ntunguluzi zya mapepo izya Ayuda alino na ku aalasi Aina Loma, lelo yayacuzyanga na kuli ya lupwa yao kwene. (Mate. 10:21) Nupya yalondekwanga ukusininkizya ukuti yasikubepwa ni visambilizyo vya ufi ivya yasangu aalondanga ukuleta amalekano umu cilongano. (Mili. 20:​29, 30) Lelo, aina yaa na ya nkazi yazizimizye. (Kuso. 2:3) I cani icayazwile ukuzizimizya? Yelenginye pa yantu aalembwa muli Baibo aazizimizye, wakwe Yobo. (Yako. 5:​10, 11) Yapefile kuli Yeova ukuti ayapeele amaka. (Mili. 4:​29-31) Nupya yatwalilile ukwiusya ukuti Yeova wali nu kuyalambula ndi cakuti yazizimizya. (Mili. 5:41) Naswe kwene tungazizimizya ndi cakuti tukusambilila pa yantu aazizimizye aalembwa muli Baibo nu mu mpapulo zitu alino nu kwelenganya pali vino yacitanga. w23.07 3 ¶5-6

Yeova na Yesu yatalatala yatutazyele. Umutumwa Petulo walondekwanga ukupingulapo ningo pa cisila ca kukana Klistu. Uzye wali nu kuta ukuya umusambi wakwe Klistu nanti wali nu kutwalilila? Yesu walenzile Yeova ukuti aazwe Petulo ukutwalilila ukuya nu utailo ukome. Yesu wanenyile Petulo pali vino wamupepileko nu kulanga vino wataile ukuti Petulo wali nu kusyala akukomelezya aina yakwe. (Luka 22:​31, 32) Ukwelenganya sana pa mazwi yakwe Yesu kwali nu kwazwa sana Petulo. Lino tukupingulapo pa vintu vimwi ivicindame umu umi, Yeova angaomvya ya kacema aakatusakamala ukutwazwa ukuya nu utailo ukome. (Efes. 4:​8, 11) Wakwe vivi kwene vino Yeova wazwile umutumwa Petulo na atumwa yauze, avino naswe kwene alatupeela vino tukalondekwa ndi cakuti twika sana mano uku mulimo wa kusimikila. w23.09 24-25 ¶14-15

Yeova akalola nu tuntu utunono tuno tukacitila antu yauze. Akalola ukuti tuntu tuto twacindama sana nu kuti i nkongole ino alinzile ukuwezya. Ndi cakuti mwalipo aomvi akatumikila nanti ya eluda, Yeova akaiusya vino mwaombanga nu kutemwa kuno mwakweti ukwalenzile mwalondesya ukumuombela. (1 Kol. 15:58) Nupya akalola vino mwatwalilila ukulanga ukutemwa kuli aliwe. Yeova akalonda ukuti swensi kwene twatwalilila ukutemwa Yeova alino na antu yauze. Tungatemelwako Yeova ndi cakuti tukubelenga Izwi lyakwe nu kwelenganyapo alino nu kulalanda nawe umwi pepo. Tungatemelwako aina na ya nkazi ndi cakuti tukuyazwilizya umu nzila izipusanepusane. Lino ukutemwa kwitu kukukomelako, tulaya tukupalama sana kuli Yeova alino nu ku ina na ya nkazi. Nupya tulatwalilila ukuipakizya ucuza usuma nayo amanda pe! w23.07 10 ¶11; 11 ¶13; 13 ¶18

Umwina Klistu wensi alinzile ukuisoolwela vino alinzile ukulwaziwa. Nomba lino akulwaziwa, alinzile ukulondela masunde yamwi aa muli Baibo wakwe isunde lyakuti mwataluka uku wazi nu ku mipasi. (Mili. 15:20; Gala. 5:​19, 20) Lelo muli vimwi ivyasyala alinzile ukuisoolwela. Nomba asi mulandu ni nzila ino twatemwa ukulwaziwilwamo, tulinzile ukucindika insambu zino aina na ya nkazi yakwata izyakuipingwila vino yalinzile ukulwaziwa. Fwandi tulinzile ukulaiusya ivisinka vii 4: (1) Uwene Wakwe Leza sile uulapozya indwala zyonsi. (Eza. 33:24) (2) Umwina Klistu wensi alinzile ukusoolola imilwazizye isuma iingamuzizpila. (Loma 14:5) (3) Tusilonda ukupingula antu yauze nanti ukucita ivintu ivingayuvwisya uyi. (Loma 14:13) (4) Aina Klistu yakalanga ukutemwa nupya yakamanya ukuti umutende uwa mu cilongano wacindama sana ukucila vino cila muntu akaelenganya.—Loma 14:​15, 19, 20.w23.07 24 ¶15

Uzye mukauvwa uli pali ucuza uno mwakwata na Yeova? Ukwaula nu kutwisika mukauvwa ningo! Nupya mutaya mwenga. Antu aliko mpiti nayo kwene yuvwanga wakwe vino mukauvwa. (Masa. 104:​33, 34) Aingi yaipeelesya ukuombela Yeova. Vikwene avino cali nu ku Yanazili aliko mpiti umu nsita ya ina Izlaeli, nanti “uwaipeelesya.” Izwi li likaomviwa pa kulondolola aina izlaeli aipeezile ukuombela Yeova umu nzila iiyele. Masunde Yakwe Mose yazumilizye umonsi nanti umwanaci ukulapa umulapo uwakuti wali nu kuya umu Umunazili pa nsita imwi. (Mpe. 6:​1, 2) Uwalapa umulapo uu wali nu kulalondela amasunde yamwi yano aina izlaeli yatalondelanga. Nomba i cani icali nu kulenga umwina izlaeli ukulonda ukuya Umunazili? Ukwelenganya pa mapaalo yano yali nu kupokelela alino nu kutemwa Yeova ukwayazwanga ukulapa umulapo uu.—Malan. 6:5; 16:17. w24.02 14 ¶1-2

Ilingi Baibo nga yalanda pali ucisinka nanti ukutemwa kwa cumi, ikalanda pa kutemwa kuno Leza akalanga kuli ya cuza yakwe. Izwi lili limwi kwene likaomviwa nu ku kulondolola ukutemwa kuno aomvi yakwe Leza yakalanga. (2 Sam. 9:​6, 7) Ucisinka witu ungatwalilila ukukomelako lino insita ikuya ikupita. Lekini tulole vino ucisinka wakwe Danieli wizile ukomelako. Kwayanga insita zimwi mu umi wakwe Danieli lino walondekwanga ukulanga ukuti wali na ucisinka kuli Yeova nanti foo. Uwezyo umwi utale wamucitikile lino wali ni myaka ukucila pali 90. Aomvi akwi sano yapasile Danieli nupya yatacindike na Leza wino wapepanga. Fwandi yapanzile ukumukoma. Yalenzile umwene ukupanga isunde ilyali nu kwezya Danieli nga wali na ucisinka kuli Leza nanti uku mwene. Cino Danieli wali nu kucita pa kulanga ukuti wali uwa cisinka uku mwene, u kuta ukupepa Yeova pa manda 30. Danieli wasoolwilepo ukuya uwa cisinka kuli Yeova.—Dan. 6:​12-15, 20-22. w23.08 5 ¶10-12

Yeova akalonda twatwalilila ukutemwa aina na ya nkazi. (1 Yoa 4:7) Ndi cakuti umwina nanti nkazi watusosya, tulinzile ukutaila uku atatusosizye uku mufulo sile nupya tulinzile ukwiusya ukuti nawe kwene akaezya na maka ukucita vino Yeova akalonda. (Mapi. 12:18) Leza watemwa aomvi yakwe acisinka asi mulandu na vino yakaluvyanya. Nanti sile alino twaluvyanya akatwalilila ukuya cuza witu nupya asitwalilila ukutusokela. (Masa. 103:9) Tukauvwa ningo sana pali vino Yeova akatwelela nupya tukalondesya sana ukumukolanya! (Efes. 4:32–5:1) Lino impela ikuya ikupalama, tulinzile ukuya sana ivyuza uku ina na ya nkazi. Tulinzile ukwenekela ukucuziwa. Insita zimwi yangatutwala umu cifungo pa mulandu nu utailo witu. Ndi cakuti ivintu vii vya tandika ukucitika tulalondekwa sana aina.—Mapi. 17:17. w24.03 15-16 ¶6-7

Muli Baibo mwaya mwalyasi aakalanda pa yacance aali ivyuza vyakwe Yeova nupya yano yali ni nsansa umu umi. Wenga pa yacance yayo a Devedi. Lino Devedi wali umwance wasoolwilepo ukuombela Yeova nupya wizile aya umwene uwa cisinka. (1 Yamw. 3:6; 9:​4, 5; 14:8) Ukuisambilizya apa umi wakwe Devedi na vino wali na ucisinka, kungamwazwa sana. Nanti limwi mungaisambilizyako pali vino Mako nanti Timoti yacisile. Mulazana ukuti yatandike ukuombela Yeova ala yacili acance nupya yatwalilile ukumuombela na ucisinka. Vino mukacita ndakai i vilalenga mukaye ni nsansa uku nkoleelo nanti foo. Ndi cakuti mwataila Yeova ukucila ukuitaila, Yeova alamwazwa ukulapingula ningo pa vintu. Ukucita vii kulalenga muye ni nsansa alino nu umi usuma. Mwaiusya ukuti Yeova akataizya pali vino mukamuombela. Kutaya icintu cuze cino tungacita icingalenga tuye ni nsansa ukucila pa kuombela Tata witu uwa kwi yulu uwaya nu kutemwa. w23.09 13 ¶18-19

Umutumwa paulo wamanyile ukuti aina na ya nkazi yatali amalilike. Wakwe, Aina Klisitu ali mu cilongano ca mu Yelusalemu yatazumile ukuti Paulo nawe wali umusambi. (Mili. 9:26) Yamwi yalandanga iviipe pali aliwe pakuti yate ukumutaila. (2 Kol. 10:10) Paulo waweni iviipe vino eluda wacisile ivyali nu kulenga yauze ukutoovoka. (Gala. 2:​11, 12) Nupya Mako cuza wakwe wacisile vino atenekelanga. (Mili. 15:​37, 38) Limwi paulo nga watile ukuzanwa na antu yaa. Nomba watwalilile uku yalola ukuti aina yakwe nupya watwalilile ukuya umucincile umu mulimo wakwe Leza. I cani cazwile paulo ukuzizimizya? Paulo watemilwe aina na ya nkazi. Ukutemwa kuno paulo wakweti kwalenzile aika amano uku visuma vino aina yacitanga. Ukutemwa u kwalenzile ukuti Paulo acite ukulingana na mazwi aali umwi lembo lilelo. w24.03 15 ¶4-5

Muli Baibo mwaya amalyasi aingi aakalangilila umulandu uno ukufuuka kwacindamila. Elenganyini pali vino vyacitikiile Isaki. Lino wikalanga umu Gelali umusumba uwa Ina Filisti, antu yamuvwilanga uzuwa fwandi yazisile ivifula vya manzi vino aomvi yakwe Abulahamu isi yimvile. Ukucila ukutandika ukulwisyanya nayo, Isaki wafumilepo nu kuya uku cifulo cuze kuno waile aimba ivifula. (Utan. 26:​12-18) Nomba Ina Filisti yalanzile ukuti na yaya kwene yali amanzi yao. Nanti icakuti cali vii Isaki watwalilile ukuya nu mutende. (Utan. 26:​19-25) I cani calenzile ukuti atwalilile ukuya umufuuke nanti icakuti yamucuzyanga? Ukwaula nu kutwisika, Isaki wasambilile uku ya vyazi yakwe, walolanga vino Abulahamu watemilwe umutende na vino Sala wali ‘umuteekele nupya umufuuke.’—1 Pet. 3:​4-6; Utan. 21:​22-34. w23.09 15 ¶4

Yeova watumile Umwana wakwe iyeli ukwiza pano nsi ku kusambilizya antu apa Wene wakwe alino nu kupeela umi wakwe ilambo pakuti atukulule uku luyembu ni mfwa. Lyene Yesu watuutulwilwe nu kuswililila ukwi yulu ukuya umu kuteeka ngu Mwene uwa Wene wakwe Leza. Baibo ikalanda sana pali vino Yeova alafikilizya ukulonda kwakwe alino na vino alalenga izina lyakwe ukucindikwa ukuomvya Uwene uno Klistu ali mwene. Ukulonda kwakwe Yeova kutanga kusenuke. Walaya ukuti vyonsi kwene vilacitika ukulingana na vino walanda. (Eza. 46:10; Aeb. 6:​17, 18) Uku nkoleelo insi ilaya paladaise nupya ana yakwe Adamu na Eva alungami yalaya amalilike “nu longo amanda pe.” (Masa. 22:26) Lelo kwaya na vyuze vino Yeova alafikilizya. Alalenga aomvi yakwe ukuya alemane pano nsi nu kwi yulu. Lyene aomvi yakwe Yeova yonsi acisinka yalalondela utunguluzi wakwe. (Efes. 1:​8-11) Uzye cisikumizungusya ukulola inzila isuma uno Yeova akafikilizizyamo ukulonda kwakwe? w23.10 20 ¶7-8

Lino Ayuda afumile uku Babiloni yafisile, patalengile yatandike ukukwata intazi, wakwe, vino yali nu kulasakamala indupwa zyao, ivimvulunganya ivyali umu uteeko wa Pesya, nupya yayacuzyanga uku antu aali umu mpanga izyali umu mupipi. Vii vyalenzile yamwi ciyatalile ukwika mano uku mulimo wakukuula itempele lyakwe Yeova cipya cipya. Acino Yeova watumile ya kasesema yaili, Hagai na Zekaliya, pakuti yakazwe antu ukuya acincile nupya umu kupepa Yeova. (Hag. 1:1; Zaka. 1:1) Lino papisile imyaka umupipi na 50, Ayuda aaswilile uku Yelusalemu yalondekwanga ukukomeleziwa nupya. Ezila uwamanyikisye ukukopolola Masunde, waile uku Yelusalemu ukufuma uku Babiloni uku kukomelezya antu ukulakolezya ukupepa Yeova umu umi wao. (Ezila 7:​1, 6) Wakwe vivi kwene vino masesemo yakwe Hagai na Zekaliya yazwile antu yakwe Leza aaliko mpiti ukutwalilila ukutaila Yeova lino yali ni ntazi, naswe kwene ndakai yangatwazwa ukutwalilila ukutaila Yeova asi mulandu ni ntazi zino tungakwata.—Mapi. 22:19. w23.11 14-15 ¶2-3

Tukalanga uli ukuti twatemwa aina na ya nkazi? Inzila yonga ino tukacitilamo vivyo, u kuyateekezya. Ndi cakuti tuli ni cikuuku uku ina na ya nkazi ‘tungatwalilila ukuteekezyanya.’ Tungacita uli pakuti tutwalilile ukulatemwana sana? Tungacita vivyo ndi cakuti tukuombesya ukwelela yauze. U mulandu ci uno cacindamila sana ndakai ukutwalilila ukutemwana? Petulo walanzile ukuti: “Impela ya vintu vyonsi yatipalama. Fwandi, . . . mwatemwana sana.” (1 Pet. 4:​7, 8) Vino impelelekezyo ya nsi ii ipe ikuya ikupalama, i vyani vino tungenekela? Yesu wanenyile alondezi yakwe ukuti: “Antu amu nko zyonsi yalamupata pa mulandu wi zina lyane.” (Mate. 24:9) Pakuti tutwalilile ukuya acisinka kuli Yeova asi mulandu nu kutupata, tulinzile ukutwalilila ukuya alemane. Ndi cakuti twatwalilila ukutemwana, Satana alavilwa ukutupatukanya pano “ukutemwa u kukalemanya ningo sana antu.—Filipi 2:​1, 2. w23.11 13 ¶18-19

Izwi lyakwe Leza lyakwata sana amaka. Likalenga antu ukumanya Yeova na vino waya nupya likalenga twamanya ivintu ivicindame. Antu yata ukutaila ufi wakwe Satana pa mulandu wakuti yatandika ukulola ivisuma vino Yeova akayacitila. Ivintu ivisuma vino yakaipakizya vyavula sana. (Eza. 40:26) Antu aingi yamutaila pa mulandu wakuti waya nu mulinganya. (Malan. 32:4) Yakasambililako ivintu ivingi uku mano yano wakwata. (Eza. 55:9; Loma 11:33) Nupya yakateekeziwa nga yamanya ukuti waya nu kutemwa. (1 Yoa. 4:8) Lino yakupalama kuli Yeova, upaalilo wao uwa kwikala amanda pe ukakulilako. Isyuko sana ukuombako umulimo uu wakwazwa antu ukupalama kuli Yeova. Ndicakuti tukucita vii Yeova alatulola ukuti “tukaombela pamwi” nawe.—1 Kol. 3:5. w24.02 12 ¶15

Ndi cakuti mukasambilila Baibo nanti avyazi inu a Nte Yakwe Yeova, uzye mukwelenganya pa kubatiziwa? Nga vino mukulonda ale mwimika uyo usuma sana. Nomba lino mutatala mwabatiziwa mulinzile ukuipeela kuli Yeova. Uzye mungaipeela uli kuli Yeova? Mulinzile ukumulaya ukuti mulamupepa wenga sile nupya ukucita ukulonda kwakwe ali cintu cino mulaika inkolelo umu umi winu. Ukwaula nu kutwisika ale mwalaya Yeova ukuti mulatwalilila ukumutemwa, ‘nu mwenzo winu onsi, nu umi winu onsi, na mano inu yonsi, na maka inu yonsi.’ (Mako 12:30) Lino mulaipeela kutalaya nanti umwi alalolako, suka sile Yeova. Nomba lino mulabatiziwa mulalanga antu yonsi ukuti mwaipeela. Fwandi nga mwaipeela ala mwalapa umulapo ucindame sana, nupya Yeova akalonda wensi uwalapa uku twalilila ukwikalilila uku mulapo kwene uu.—Kasa. 5:4. w24.03 2 ¶2; 3 ¶5

Yonsi aya umu cupo yakakwata intazi. Baibo ukwaula nu kupita umu mbali yalanda ukuti atwalane “yalakwata intazi umu mili yao.” (1 Kol. 7:28) U mulandu cii? Apa mulandu wakuti antu yaa yasiiya amalilike nupya yakakwata imiyelele ipusane pusane na vino yakatemwa navyo vikapusana pusana. Incende zino yakakulilako zikapusana pusana. Insita zimwi yangacita vimwi vino yatacitanga lino yatali yatwalane. I vintu vii vingalenga umu cupo muye intazi. Icakuti yangaombela pamwi ukumala intazi insita zimwi yangapeelana imilandu nanti icakuti yonsi iyaluvyanya. Nupya yangatandika ukwelenganya ukuti ukutaana sile ukungamala intazi. Nomba uzye ukutaana kungamala intazi? Yeova akalonda atwalane ukutwalilila ukuya pamwi nanti icakuti cikuyatalila ukuya pamwi na yano yatwalana nayo. w24.03 16 ¶8; 17 ¶11

Pacisila ca kuipeela nu kubatiziwa, upaalilo winu uwakwikala amanda pe pano nsi watwalilile kukomelako, lino mwatwalilile ukusambilila na vyuze alino nu kukula muli vyakwe Leza. (Aeb. 5:13–6:1) Limwi ivyalembwa pali Loma 5:​2-4 vyamicitikilapo. Mwakweti intazi izipusanepusane, lelo mwazizimizye nupya mwatwalilila ukulola vino Yeova wamulanganga ukuti wamutemwa. Pa mulandu wakuti mwataila sana Leza, calenga musininkizye ukuti alafikilizya vyonsi vino walaya. Upaalilo winu wakomelako ndakai ukucila vino wali mpiti. Waya uwa cumi cumi kuli mwemwe. Upaalilo wakuma vyonsi vino mukacita umi winu onsi nupya walenga musenuke muli vino mukacitila ulupwa lwinu, vino mukapingulapo, alino na vino mukaomvya insita inu. Umutumwa Paulo walanzile pa cintu na cuze icicindame pa upaalilo uno mukakwata ndi cakuti mwaya ivyuza vyakwe Leza. Walenga musininkizye ukuti vyonsi vino mukapaalila vilafikiliziwa.—Loma 15:13. w23.12 12-13 ¶16-19

Ndi cakuti twakwata intazi vino tukayuvwa, ukwelenganya, na vino tukacita visiya wakwe vino vikaya lyonsi. Wakwe viivi kwene vino uwato ukasunkana sana nga kuli maimbi avino naswe kwene cikaya nga twakwata intazi. Uzye Yeova akatwazwa uli ndi cakuti twatandika ukusakamikwa sana? Watulaya ukuti alatupeela umutende. Ndi cakuti icimuza cakatuka pali yemba uwato ukatandika ukusunkana sana. Nomba uwato ukakwata ivintu vimwi umu mbali ivikaazwilizya uwato ukuta ukusunkana sana. Ivintu vii vikalenga uwato ukutwalilila ukupita ningo nu kucingilila antu ali umu wato. Nomba ivintu vii vikaomba ningo ndi cakuti uwato ukuya inkoleelo. Vikwene avino na Yeova akatwalilila ukutukomya nga twatwalilila ukuya acisinka kuli aliwe lino tuli ni ntazi. w24.01 22 ¶7-8

Ndi cakuti muvwa intete, mwayuzya imuti, ‘i vyani vino Yeova wacita?’ Mwaelenganya pali vino waumba. Wakwe, ukwelenganya pali vino Yeova akasakamala ivyunyi na maluwa, ivintu vino ataumvile umu cata cakwe nupya ivitanga vimupepe, kungatwazwa ukutaila sana ukuti alatusakamala. (Mate. 6:​25-32) Nupya mwaelenganya na pali vino Yeova wacitila ya kapepa yakwe. Mungaisambilizya pa yantu aalembwa muli Baibo aali nu utailo, nanti pa yaomvi yakwe Yeova ayako ndakai. Kulunda pali vii, mungelenganya na pali vino Yeova akamusakamala. Uzye wamwazwile uli ukumanya icumi? (Yoa. 6:44) Uzye wasuka uli mapepo inu? (1 Yoa. 5:14) I visuma ci vino mukaipakizya cila wanda pa mulandu ni lambo ilya Mwanakwe?—Efes. 1:7; Aeb. 4:​14-16. w24.01 4 ¶6; 7 ¶17