3 | Vino Malyasi Aya Muli Baibo Yangamwazwa

BAIBO IKALONDOLOLA UKUTI . . . Aonsi na anaci aali na ucisinka yali “wakwe sweswe.”—YAKOBO 5:17.

Vino Cikupiliula

Muli Baibo mwaya amalyasi ya cumi cumi aakalanda pa onsi na anaci ayuvwanga ivipusanepusane. Lino tukubelenga pali vino vyayacitikiile limwi tungazana ukuti yamwi yakweti intazi wakwe zino tukweti.

Vino Vii Vingatwazwa

Swensi kwene tukalonda ukumanya ukuti yauze iyamanya vino tukuyuvwa. Sana sana ndi cakuti tukucula uku ulwale wa mu melenganyo. Lino tukubelenga Baibo tukasambilila pa yantu aelenganyanga nu kuyuvwa wakwe vino tukayuvwa. Ni cikacika icakuti nga twamanya ukuti na yauze kwene yacuzile wakwe vino tukucula, cikalenga tutalola ukuti twaya swenga lino twasakamikwa nu kusoka.

Muli Baibo mwaya amazwi yano yamwi yalanzile lino yayuvwanga ukuti yali yonga. Uzye namwe mwatala mwalandapo ukuti, ‘Ntange ntwalilile ukwikala vii’? Vikwene ali vino Mose, Eliya, na Devedi yalanzile.—Mpendwa 11:14; 1 Yamwene 19:4; Masamu 55:4.
Baibo ikatunena pa mwanaci uwi zina lyakuti Hana uuvwanga “ulunda wakwe cimwi” pa mulandu wakuti atakwatanga ana nupya umuci muze wamucuzyanga.—1 Samueli 1:6, 10.
Baibo ikatunena pa monsi uwi zina lyakuti Yobo wino tungakolanya. Nanti cakuti wali umonsi uwa utailo, uvwile sana ulanda nu kulanda ukuti: “Nemo napata umi wane, nsilonda ukwikalilila pano nsi.”—Yobo 7:16.

Ukusambilila pali vino antu yaa amuli Baibo yacimvizye imyelenganyizizye iipe, kungalenga naswe kwene tukwate amaka yano tukalondekwa pakuti tucimvye intazi.

Vino Baibo Ikaazwa Antu Ya Kevin

Vino Ulwale Uwa Kuvwa Ulanda Insita Zimwi nu Kuvwa Insansa Insita Zyuze Watandike (Bipolar Disorder)

“Izile iyanzana nu ulwale uwa kuvwa ulanda insita zimwi nu kuvwa insansa insita zyuze ala ntatala nafisya ni myaka 50. Kwali insita imwi ino nayuvwanga ukuti ningacimvya intazi ili yonsi ino ningakwata umu umi. Nomba insita zimwi zyene nuvwanga ukuti umi utacindama.”

Vino Baibo Yangazwa

“Umuntu wenga uwalembwa muli Baibo wino ningakolanya u mutumwa Paulo. Wacisile vimwi ivyalenzile ayuvwa uwa silesile. Ukucila ukutwalilila ukwelenganya pali vino wacisile, Paulo watandike ukuzanwa na ya cuza amusakamalanga. Ndi cakuti ulwale uu wandema, ukukanamalilika kwane kukansakamika nu kundenga nayuvwa uwa silesile. Wakwe Paulo, nasambilila ukuti ukuya na ya cuza akalonda ukungazwa kukalenga ntatovooka.”

“Umuomvi na muze uwalembwa muli Baibo aakanteekezya u Mwene Devedi. Ilingi uvwanga ulanda pali vino vyamucitikilanga. Ningamukolanya pa mulandu wakuti insita zimwi nkacita nu kulanda ivintu vino nkaiza nkulanguluka. Amazwi yano Devedi walanzile aya umu Masamu 51 yakanteekezya. Umu cikomo 3, Devedi walanzile ukuti: “Nazumila ukuti naifizye na vyonsi vino nacisile inkaviusya.” Amazwi yaa yakulondolola sile vino nkayuvwa ndi cakuti indi nu ulanda, icikalenga nu cintalile ukwelenganya ivisuma pali nemwineco. Niwisye amazwi yakwe Devedi aya pa cikomo 10 akuti: “We Leza, mpeko umwenzo wa kuyela uwike munondi umwenzo upya uposye.” Nani kwene vikwene ali vino nkacita lino nkupepa kuli Leza ukuti angazwe nailola umu nzila ipusaneko. Pa cikomo 17 paya amazwi aakanteekezya sana. Pakati: “Usisula umwenzo uwakutontelela mu kuzenzuka.” Cikomo cii cikalenga nsininkizye ukuti Leza wantemwa.

Ukwelenganya pa malyasi ya muli Baibo na pali vino Leza wangazwa, kukakomya utailo wane uwakuti ivintu vilazipa uku nkuleelo. Nkalola malayo ya muli Baibo ukuti acumi cumi nupya ukucita vivyo kukalenga ukuti ntatovooka.”