Uzye Imuipekanya Ukuipeela Kuli Yeova?

1-2. I vyani vino umuntu alinzile ukucita lino atatala wabatiziwa?

APA myaka 5 iyatipitapo antu aingi yabatiziwa nu kuya ya Nte Yakwe Yeova. Aingi pali yaa yaya wa mutumwa Timoti, Uwasambilile icumi “ukufuma uku unya.” (2 Tim. 3:​14, 15) Yamwi yasambilile icumi ala aikolo. Umwanaci umwi uwa sambililanga Baibo na ya Nte Yakwe Yeova wizile abatiziwa lino wali ni myaka 97.

² Ndi cakuti mukasambilila Baibo nanti avyazi inu a Nte Yakwe Yeova, uzye mukwelenganya pa kubatiziwa? Nga vino mukulonda ale mwimika uyo usuma sana. Nomba lino mutatala mwabatiziwa mulinzile ukuipeela kuli Yeova. Icipande cii cimamwazwa ukumanya vino cikapiliula ukuipeela. Cimamwazwa nu kumanya umulandu uno cacindamila ukukana sitoka ndi cakuti imulinga ukubatiziwa .

UZYE UKUIPEELA CIKAPILIULA CANI?

3. Aweni yamwi aipeezile kuli Yeova umu nzila iiyele?

³ Baibo ikalanda ukuti antu aipeelanga mpiti yaombanga imilimo iiyele. Aina Izlaeli yali uluko ulwaipeezile kuli Yeova. Nomba Aina Izlaeli yamwi yaipeelanga umu nzila iiyele. Wakwe Aloni wazwalanga “icimanyililo ca muzilo,” cali iciyembelo cakwe goldi icayengesanga icali pa nkoleelo ya citambala. Iciyembelo cakwe goldi calangililanga ukuti waombanga umulimo uiyele, kuli kuti wali a simapepo mukalamba wa ina izlaeli. (Levi 8:9) Anazili nayo kwene yaipeelanga kuli Yeova umu nzila iiyele. Izwi lyakuti “Umunazili,” lyafuma ukwizwi lya Ciebele ilyakuti nazirʹ, ilikapiliula ukuti “Umusoololwe,” nanti “Uwaipeela.” Anazili yalondelanga amasunde yano Leza wayapeezile ukupitila muli Mose.—Mpe. 6:​2-8.

4. (a) I vyani vino umwina Klistu akatandika ukucita nga waipeela kuli Yeova? (b) Uzye cikapiliula cani “kuikana”? (Loliniko ni cikope.)

⁴ Ndi cakuti mwaipeela kuli Yeova ale mwasoolola ukuya umusambi wakwe Yesu nupya ale mwasoolola ukulacita icintu icicindame umu umi kuli kuti ukucita ukulonda kwakwe Leza. I vyani vino mulalondekwa ukucita nga mwaipeela? Yesu watiile: “Ndi cakuti umwi akulonda kundondela, alinzile kuikana.” (Mate. 16:24) Amazwi amu Cigiliki yano yasenula ukuti “alinzile kuikana” yakalozya nu mukuti “akaata ukusumba sana amano uku nsambu zino wakwata.” Fwandi ndi cakuti mwaipeela kuli Yeova, mutalaacita vyonsi ivikupusana nu kulonda kwakwe. (2 Kol. 5:​14, 15) Cii cikupiliula ukuti alinzile ukutaluka uku “Imilimo ya mwili wa luyembu,” Wakwe uzelele. (Gala. 5:​19-21; 1 Kol. 6:18) Uzye cii cilalenga ivintu umu umi ukutala? Awe foo, ndi cakuti mwatemwa Yeova mulalola ukuti amasunde yakwe yayelako uku kumucingilila. (Masa. 119:97; Eza. 48:​17, 18) Umwina Nicholas watiile: “Mungalola amasunde yakwe Yeova wa nsimbi zino yakaika umu vifungo izikalenga umuntu ukukana cita vino akulonda ukucita nanti wa nsimbi zino yakaomvya pa kucingilila ya cisama pakuti yatazanza antu.”

5. (a)  Uzye mungaipeela uli kuli Yeova? (b) Uzye ukuipeela kwapusana uli nu kubatiziwa? (Loliniko ni cikope.)

⁵ Uzye mungaipeela uli kuli Yeova? Mulinzile ukumulaya ukuti mulamupepa wenga sile nupya ukucita ukulonda kwakwe ali cintu cino mulaika inkolelo umu umi winu. Ukwaula nu kutwisika ale mwalaya Yeova ukuti mulatwalilila ukumutemwa, ‘nu mwenzo winu onsi, nu umi winu onsi, na mano inu yonsi, na maka inu yonsi.’ (Mako 12:30) Lino mulaipeela kutalaya nanti umwi alalolako, suka sile Yeova. Nomba lino mulabatiziwa mulalanga antu yonsi ukuti mwaipeela. Fwandi nga mwaipeela ala mwalapa umulapo ucindame sana, nupya Yeova akalonda wensi uwalapa uku twalilila ukwikalilila uku mulapo kwene uu.—Kasa. 5:​4, 5.

UMULANDU CI UNO MULINZILE UKUIPEELELA KULI YEOVA?

6. I cani icikalenga umuntu aipeele kuli Yeova?

⁶ Icilalenga muipeele kuli Yeova apa mulandu wakuti mwamutemwa. Mutamutemwa pa mulandu na vino mukayuvwa sile. Lelo mwamutemwa pa mulandu wakuti “mwamanya ningo ukulonda kwakwe” nupya mwamanya nu “kwiluka kuno umupasi wa muzilo ukapeela” fwandi vino mwasambilila pali aliwe ivyalenga mu mutemwe sana. (Kolo. 1:9) Ukubelenga amalembo kwalenga (1) mumanye ukuti Yeova uwa cumi cumi, (2) Ukumanya ukuti ali mwineco wakwe Baibo na (3) Akaomvya icilongano cakwe pa kutungulula antu yakwe ndakai.

7. I vyani vino tulinzile ukulacita lino tutatala twaipeela kuli Yeova?

⁷ Aakuipeela kuli Yeova yalinzile ukumanya amasambililo ya kutandikilako aya muli Baibo nupya yalinzile ukulalondela vino Baibo ikalanda. Yalinzile ukulaezya na maka ukunenako yauze vino yakusambilila. (Mate. 28:​19, 20) Yalinzile ukutemwa sana Yeova nu kumupepa wenga sile. Ukwaula nu kutwisika namwe kwene avino mukalonda. Ndi cakuti mwatemwa sana Yeova mutalalola kwati mulinzile ukuipeela kuli Yeova pakuti muvwisye ningo yano yakamusambilizya Baibo, avyazi inu nanti wa cintu cimwi icakumwazwa ukuya wakwe ya cuza inu.

8. Uzye ukulondesya ukutaizya Yeova kungalenga uli muipeele kuli aliwe? (Masamu 116:​12-14)

⁸ Mulalondesya ukuipeela kuli Yeova nga mukwelenganya pali vino akamucitila. (Belengini Masamu 116:​12-14.) Baibo ikaama Yeova ukuti akapeela wa ca “upe consi icisuma nupya icimalilike.” (Yako. 1:17) Ni ca upe icacila upe onsi umwana wakwe uno watupeezile, kuli kuti Yesu. Elenganyini pali cii. Ilambo lyakwe Yesu lyalenga mukwate ucuza upalamisye sana na Yeova. Nupya mwakwata ni syuko ilya kwikala amanda pe. (1 Yoa. 4:​9, 10, 19) Ukuipeela inzila yakulangililmo ukuti mukataizya pali vino Yeova walanga ukutemwa alino na pa mapalo yano mulapokelela. (Malan. 16:17; 2 Kol. 5:15) Icisinka cii cikazanwa umwi sambililo 46, apa cisinka namba 4, umwi buku lyakuti Mungaya ni Nsansa Manda Pe! Umwaya na vidyo ya mamineti yatatu iyakuti Vino Mungapeela Mawila Kuli Leza.

UZYE UMULINGA UKUIPEELA NU KUBATIZIWA?

9. Umulandu ci uno mutalinzile ukuipeela pa mulandu wakuti auzo iyaipeela?

⁹ Limwi mukauvwa kwati mucili ukulinga ukuipeela nu kubatiziwa. Limwi muli muno mulinzile ukuombela pakuti mwacita ivintu ukulingana na vino Yeova akalonda nanti Limwi mukulondekwa insita pakuti mukomye utailo winu. (Kolo 2:​6, 7) Asambi yasilundulukila pamwi nupya asi acance yonsi akalinga ukuipeela nu kubatiziwa pa musinku uli umwi. Mwaezya ukulola muno mulinzile ukuombela nupya mutailinganya kuli yauze.—Gala 6:​4, 5.

10. I vyani vino mulinzile ukucita ndi cakuti mukulola kwati mutatala mwalinga ukuipeela nu kubatiziwa? (Loliniko na kambokosi kakuti “Ana Yano Avyazi Yao a Nte Yakwe Yeova.”)

¹⁰ Nanti sile alino mukulola kwati mutatala mwalinga ukuipeela kuli Yeova, mwatwalilila ukwelenganya pa kuipeela. Mwapepa kuli Yeova pakuti amwazwe ukulola muno mungaombela pakuti mungaipeela. (Filipi 2:13; 3:16) Ukwaula nu kutwisika Yeova alasuka ipepo linu nu kumwazwa.—1 Yoa. 5:14.

MULANDU UNO YAMWI YAKASITOOKELA UKUIPEELA NU KUBATIZIWA

11. Uzye Yeova akatwazwa uli ukuya acisinka?

¹¹ Antu yamwi yakasitooka nanti sile alino iyalinga ukuipeela nu kubatiziwa. Yakaelenganya ukuti, nga yabatiziwa yangayembuka nupya yangata ukuya ya Nte yakwe Yeova. Nga vino namwe mukaelenganya mwaiusya ukuti Yeova alamupeela vyonsi vino mukalondekwa ‘pakuti mwacita ivintu wa yantu aakapepa Yeova pakuti mwamuzanzya.’ (Kolo. 1:10) Nupya alamupeela amaka pakuti mwapingula ningo pa vintu. Pa mulandu wakuti wazwapo yamwi ukupingula ningo pa vintu fwandi namwe kwene alamwazwa. (1 Kol. 10:13) Pa mulandu wakuti yamwi yakafilwa ukupingula ningo pa vintu ali mulandu uno yakazingilwa umu cilongano cakwe Yeova. Yeova akaazwa antu yakwe Ukutwalilila ukuya acisinka.

12. I vyani vino tulinzile ukulacita pakuti twataluka uku kucita uluyembu?

¹² Pa mulandu wakuti tutamalilika ilingi tukatunkwa uku cita iviipe. (Yako. 1:14) Lelo tulinzile ukusoololapo vino tumacita lino twatunkwa. Icisinka icakuti mwemwe mulinzile ukupingulapo vino mumacita. Antu yamwi yakaelenganya ukuti yatanga yakwanisye ukuikanya, nomba uu ufi, mungakwanisya ukuikanya. Nanti sile alino mwatunkwa mulinzile ukupingulapo ukukana cita ivintu iviipe. Nga mukulonda ukutaluka uku kucita uluyembu mwapepa lyonsi. Mwaisambilizya izwi lyakwe Leza lyonsi. Mwazanwa uku kulongana. Mwaombako umulimo wa kusimikila. Ukucita vii lyonsi kulamwazwa ukutwalilila ukwikalila uku mulapo uno mwalafile. Nupya lyonsi mwaiusya ukuti Yeova alamwazwa.—Gala. 5:16.

13. I vyani vino tukusambilila kuli Jozefu?

¹³ Cilamwangukila ukutwalilila ukuya acisinka kuli Yeova nga mwamanyila limwi ivyakucita nga mweziwa. Baibo ikalanda pa antu atwalilile ukuya na ucisinka nanti icakuti yali antunze wakwe sweswe. Wakwe, muka Potifa wacitanga ivintu ivyali nu kulenga Jozefu ukucita nawe uzelele. Nomba Jozefu wamanyile limwi vino wali nu kucita. Baibo ikatunena ukuti “wakananga,” pa nsita imwi walanzile ukuti: “ningacita uli icintu icaipa vii nu kuyembukila Leza?” (Utan. 39:​8-10) Jozefu wamanyile limwi vino wali nu kucita lino atatala weziwa. Ukumanyila limwi kwamwazwile ukucimvya uwezyo.

14. I vyani vino tulinzile ukucita pakuti twakana nga tweziwa?

¹⁴ Uzye mungacita uli pakuti mwakolanya Jozefu? Mulinzile ukupingulapo likwene vino mulinzile ukucita nga mweziwa. Mwakana papo kwene sile ndi cakuti umwi wamunena ukucita vino Yeova wapata. (Masa. 97:10; 119:165) Nga mukucita vivyo mulakwanisya ukucimvya matunko. Pano mulaamanya ivyakucita.

15. Uzye umuntu angalanga uli ukuti ‘akalondesya’ sana ukuombela Yeova? (Aebele 11:6)

¹⁵ Limwi mwemo mwasininkizya ukuti mwamanya icumi nupya mukalonda ukuombela Yeova nu mwenzo winu onsi, nomba kuli vimwi ivikulenga mwasitooka ukuipeela kuli Yeova nu kubatiziwa. Ukucita wakwe vino Umwene Devedi wacisile kungamwazwa. Mwanena Yeova ukuti: “Ncecete, we Leza, ulole umwenzo wane, unjezye pakuti umanye vino nkaelenganya. Lola ndi cakuti nimpita umu nzila iipe ntungulule umu nzila ya umi wape.” (Masa. 139:​23, 24) Yeova akapaala “yayo aakamulondesya.” Ndi cakuti mukuombesya ukuti mu kaipeele nu kubatiziwa ala mukulanga Yeova ukuti mu kulondesya sana ukuya pali yayo “aakamulondesya”.—Belengini Aebele 11:6.

MWAPALAMA SANA KULI YEOVA

16-17. Uzye Yeova akapalamika uli ana yano avyazi yao a Nte yakwe Yeova? (Yoani 6:44)

¹⁶ Yesu walanzile ukuti ndi cakuti umwi waya umusambi wakwe, ala Yeova uwatamuleeta. (Belengini Yoani 6:44.) Ukumanya vii kukalenga twauvwa ningo sana nupya cii cikatwazwa. Yeova akalola ivintu ivisuma umu antu yano akapalamika kuli aliwe. Akalola yonsi wenga na wenga ukuti ‘antu ya muzilo,’ nanti “antu yakwe aiyele.” (Malan. 7:6.) Vikwene ali vino namwe kwene akamulola.

¹⁷ Nga avyazi inu a Nte Yakwe Yeova. Limwi mungaelenganya ukuti mukaombela Yeova pa mulandu wakuti avyazi inu avino yakacita nu kulola ukuti asi a Yeova uwamuleta umwi uvi. Nomba Baibo ikalanda ukuti: “Palamini kuli Leza, nawe alapalama kuli mwemwe.” (Yako. 4:8; 1 Mila. 28:9) Ndi cakuti mwapalama sana kuli Yeova nawe alapalama. Yeova asitupalamika sile kuli aliwe lino tuli aingi. Lelo akatupalamika kuli aliwe wenga na wenga ukwikako sile na yano avyazi yao a Nte Yakwe Yeova. Ndi cakuti twapalama kuli Yeova, lyene nawe alapalama kuli sweswe wakwe vino tukazana pali Yakobo 4:8.—Linganyiniko na Tesalonika 2:13.

18. I vyani vino tulasambilila umu cipande icilondelilepo? (Masamu 40:8)

¹⁸ Nga mwaipeela kuli Yeova nu kubatiziwa, mulalanga ukuti mukakolanya Yesu. Waitemelwanga ukucita vyonsi vino isi wamunena ukucita. (Belengini Masamu 40:8; Aeb. 10:7) Mu cipande icilondelilepo, tulasambilila pa vintu ivingatwazwa ukutwalilila ukuombela Yeova pa cisila ca kubatiziwa.