Mwaazwa Asambi Inu Ukupingulapo Ukulaombela Yeova

1-2. (a) U mulandu ci uno asambi ya Baibo yamwi yakasitookela? (b) I vyani vino tumasambilila umu cipande cii?

UZYE kwali ivintu vimwi ivyalenzile mwasitooka ukuya Inte Yakwe Yeova? Limwi mwelenganyanga ukuti yano mukaomba nayo, ya cuza inu, nanti ya lupwa inu yangamulesha. Nanti limwi mwelenganyanga ukuti mutanga mukwanishe ukulondela vino Leza akalonda. Ndi cakuti mwayuvwapo vivyo, ale imumanya vino asambi yakwe Baibo yakayuvwa ni cikalenga ukuti ciyatalile ukupingulapo ukuya Inte Yakwe Yeova.

² Yesu wamanyile ukuti ivintu vii vingalenga umuntu afilwe ukutandika ukuombela Yeova. (Mate. 13:​20-22) Lelo atatile ukwazwa yayo asitookanga. Wazwile asambi yakwe ukumanya ivya kwazwa antu aa musango uwo (1) ukumanya ivyalenganga yatalunduluka, (2) ukutemwa sana Yeova, (3) ukumanya ivicindamishe, na (4) ukucimvya intazi zino yakwatanga. Uzye tungaomvya uli vino Yesu wanenyile asambi yakwe lino tukuomvya ibuku lyakuti Mungaya ni Nsansa Manda Pe! pa kwazwa asambi ukupingulapo ukulaombela Yeova?

MWAAZWA UMUSAMBI WINU UKUMANYA IVIKULENGA ATALUNDULUKA

3. I vyani ivyalenzile citalile Nikodemasi ukuya umusambi wakwe Yesu?

³ Nikodemasi uwali intunguluzi Yayuda wakweti intazi iyalenzile cimutalile ukuya umusambi wakwe Yesu. Lino papisile sile imyezi 6 ukufuma pano Yesu watandikiile ukusimikila, Nikodemasi wizile ataila ukuti Yesu wali a Mesiya. (Yoa. 3:​1, 2) Nanti ciye vivyo, Nikodemasi wasoolwilepo ukuya kuli Yesu umu umfisolo pano ‘opanga Ayuda.’ (Yoa. 7:13; 12:42) Limwi welenginye ukuti wali nu kuta ukuya intunguluzi Yayuda ndi cakuti waya umusambi wakwe Yesu.a

4. Uzye Yesu wazwile uli Nikodemasi ukumanya vino Leza walondanga acita?

⁴ Nikodemasi wamanyile Masunde, lelo walondekwanga ukumwazwa pakuti angamanya vino Yeova walondanga ukuti acita. Uzye Yesu wamwazwile uli? Yesu waipeelishe ukuomvya insita yakwe ukulanda na Nikodemasi usiku. Nupya Yesu wanenyile Nikodemasi ivyakucita pakuti aye umusambi wakwe, ukuti walinzile ukulapila, ukubatiziwa umu manzi, nu kutaila Umwana wakwe Leza.—Yoa. 3:​5, 14-21.

5. Uzye tungazwa uli umusambi pakuti amanye ivikulenga atalunduluka?

⁵ Nanti cakuti umusambi wa Baibo akauvwikisha Malembo, limwi angalondekwa ukumwazwa ukumanya ivikulenga atalunduluka. Limwi vimwi ivingalenga atalunduluka, vingaya incito ino akaomba nanti ukucuziwa kuli ya lupwa lwakwe. Fwandi mwaipeelesha ukwazwa umusambi winu. Limwi mungamwama ukuti mukizizye pamwi. Ndi cakuti mukucita vii, cilalenga ukuti umusambi amilondolwele intazi zino akukwata. Mwakomelezya umusambi winu ukusenuka muno alinzile ukusenuka pakuti alanga ukuti watemwa Yeova, asi pakuti azanzye mwemwe.

6. Uzye mungazwa uli umusambi wa Baibo ukulaomvya vino akusambilila? (1 Kolinto 16:13)

⁶ Ndi cakuti umusambi wa Baibo wasininkizya ukuti Yeova alamwazwa ukucita ukulingana na vino akalonda, alasipa nupya alaomvya vino akusambilila. (Belengini 1 Kolinto 16:13.) Pakuti mwazwe umusambi, mulinzile ukuya wakwe mwalimu. Mwalimu aakasambilizya ningo, asisambilizya sile umuntu vino alinzile ukucita lelo akamwazwa nu kuyuvwa ukuti angakwanisha ukucita ivintu vivyo. Umu nzila ili imwi kwene, kasambilizya wakwe Baibo asisambilizya sile umusambi vino Leza akalonda ukuti acita, lelo akaazwa nu musambi ukusininkizya ukuti Yeova angamwazwa ukusenuka muno alinzile ukusenuka umu umi wakwe. Mungacita uli vivyo?

MWAAZWA UMUSAMBI WINU UKUTEMWA SANA YEOVA

7. Uzye Yesu wazwile uli antu akutikanga kuli aliwe ukutemwa sana Yeova?

⁷ Yesu wamanyile ukuti ndi cakuti asambi yakwe yatemwa sana Yeova, yali nu kulacita vino yasambililanga. Insita izingi wayasambilizyanga pa vintu ivyali nu kuyazwa ukulatemwa sana Tata wao uwa kwi yulu. Wakwe, wakolinye Yeova uku monsi aakapeela ana yakwe ivintu ivisuma. (Mate. 7:​9-11) Yamwi akutikanga kuli Yesu yataakweti avyazi ayatemilwe. Mungelenganya vino antu yaya yayuvwile lino Yesu waomvizye icilangililo cakwe isi uwali sana ni cikuuku uwazengiile umwanakwe uwaswilile kuli aliwe pa cisila ca kucita ivintu ivipishe. Icilangililo cii, cayazwile ukulola vino Yeova waya sana ni cikuuku uku yana yakwe apano nsi.—Luka 15:​20-24.

8. Uzye mungazwa uli umusambi winu ukutemwa sana Yeova?

⁸ Namwe kwene mungazwa umusambi winu ukutemwa sana Yeova ndi cakuti mukulanda sana pa miyele ino Leza wakwata. Lyonsi lino mukusambilila, mwamwazwa ukulola vino, vino akusambilila vikalangilila vino Yeova watutemwa. Lino mukulanzyanya nawe api lambo, mwamwazwa ukumanya vino lingamwazwa. (Loma 5:8; 1 Yoa. 4:10) Ndi cakuti umusambi uvwikisha vino Yeova wamutemwa, cilamwazwa ukumutemelwako.—Gala. 2:20.

9. I vyani vyazwile ya Michael ukusenuka?

⁹ Elenganyini pali ya Michael aaku Indonesia. Yamanyile icumi lino yakulanga, lelo yatabatiziwe. Lino yali ni myaka 18, yaile uku mpanga yuze kuno yaile umu kuomba umulimo wa kupisha motoka. Lino papisile insita, izile iyatwalila umu Indonesia lelo yasile ulupwa lwao nu kutwalilila ukuombela uku mpanga yuze. Lyene, aci nu mwanao umukazyana yatandike ukusambilila Baibo nupya yalundulukanga. Lino ya nyina yakwe ya Michael yafwile, ya Michael yaswilile ukumwao pakuti yasakamala ya isi nupya yazumile ukutandika ukusambilila Baibo. Vino ya Michael yasambilile pa ciputulwa icikati “Londelezyini na Vyuze” umwi sambililo 27 umwi buku lyakuti Mungaya ni Nsansa Manda Pe! vyayafisile sana pa mwenzo. Lino ya Michael yelenginye pali vino Yeova wayuvwile lino umwanakwe waculanga, yalizile. Lino yuvwikishe api lambo, yaweni vino Yeova na Yesu yayatemwa, nupya yataizye api lambo nu kusenuka alino nu kubatiziwa.

MWAAZWA UMUSAMBI WINU UKUMANYA IVICINDAMISHE

10. Uzye Yesu wazwile uli asambi yakwe ukwika mano uku vintu ivicindamishe? (Luka 5:​5-11) (Loliniko ni cikope.)

¹⁰ Asambi yakwe Yesu aakutandikilapo ilwike ukuti Yesu wali ali Mesiya uwalavilwe, lelo yalondekwanga uwazwilizyo pakuti yakolezya umulimo wa kusimikila. Lino Yesu wamile Petulo na Andeleya ukuti yamulondela, ala aasambi yakwe ukufuma na mpiti. (Mate. 4:​18, 19) Petulo na Andeleya yacitanga uculuzi wa kukazya inswi nupya yaombelanga pamwi na Yakobo alino na Yoani. (Mako 1:​16-20) Lino Petulo na Andeleya “yasiile masumbo” nu kutandika ukulondela Yesu, yafwile yapekanyizye vino yali nu kulasakamala indupwa zyao. I vyani ivyayazwile ukwika sana mano uku mulimo wa kusimikila ukucila ukwika sana mano uku kupanga impiya izingi? Ibuku lyakwe Luka lyalanda ukuti Yesu wacisile icizungusho icalenzile yataile ukuti Yeova wali nu kulayasakamala.—Belengini Luka 5:​5-11.

11. Uzye tungaomvya uli ivyatucitikiile pakuti twazwe umusambi witu ukukomya utailo wakwe?

¹¹ Tutanga tucite ivizungusho wakwe vino Yesu wacisile, lelo tungalanda pa yantu yano Yeova wazwile aakolezizye ukulonda kwakwe umu umi wao. Wakwe, uzye mukwiusha vino Yeova wamwazwile lino mwatandike ukuzanwa umu kulongana? Mufwile mwalondolwelile amwingizye incito ukuti mutalaomba maawazi aingi pakuti incito inu itapumvyanya ukulongana. Lino mukunena umusambi winu ivyamucitikile, mwamulondolwela vino utailo winu wakomileko lino mwaweni vino Yeova wamwazwile lino mwasoolwilepo ukukolezya ukulamuombela.

12. (a) U mulandu ci uno tulinzile ukusendela ya kasimikila apusanepusane lino tukutungulula isambililo? (b) Uzye mungaomvya uli mavidyo pakuti mwasambilizya ningo asambi inu? Langililini.

¹² Nupya cikazipa ndi cakuti aina na ya nkazi yakunenako umusambi winu pali vino yasenwike pakuti yaombelanga Yeova. Fwandi lino mukutungulula isambililo lya Baibo mwaamako aina na ya nkazi ankulilo izipusanepusane. Mwayanena ukulondolola vino yasambilile icumi na vino yacisile pakuti yaleka ukuombela Yeova kuye ali cintu icicindame umu umi wao. Nupya mwatamba nu musambi winu mavidyo aaya umu ciputulwa icikati “Londelizyini na Vyuze” nanti icikati “Londelizyini” umwi buku lyakuti Mungaya ni Nsansa Manda Pe! Wakwe lino mukusambilila umwi sambililo 37, mungalandako apa visinte ivyaya muli vidyo ikati Yeova Alatupeela Vino Tukulondekwa.

MWAAZWA ASAMBI INU UKUCIMVYA INTAZI

13. Uzye Yesu wazwile uli asambi yakwe ukuipekanya uku kucuziwa?

¹³ Pa miku iingi Yesu wanenyile alondezi yakwe ukuti antu yali nu kuyacuzya, ukwikako sile na ya lupwa. (Mate. 5:11; 10:​22, 36) Lino Yesu wali umupiipi nu kufwa, wanenyile asambi yakwe ukuti limwi yali nu kuyakoma pa mulandu nu kupepa Yeova. (Mate. 24:9; Yoa. 15:20; 16:2) Wayanenyile ukuti yalondekwanga ukuya acenjele lino yakusimikila. Wakwe, wayanenyile ukukanapazyanya na antu alandanga iviipe pali vino yazumilemo nu kuya acenjele muli vino yalandanga nu kucita pakuti yangatwalilila ukusimikila.

14. Uzye tungazwa uli umusambi ukuipekanya uku kucuziwa? (2 Timoti 3:12)

¹⁴ Tungazwa umusambi wa Baibo ukuipekanya uku kucuzya ukupitila umu kumulondolwela vino yano akaomba nayo, ya cuza yakwe, nanti ya lupwa lwakwe yangalanda pali vino akusambilila. (Belengini 2 Timoti 3:12.) Yamwi yano akaomba nayo yangamuseka pa mulandu na vino akusambilila muli Baibo. Yauze nayo, kumwi sile na ya lupwa yangasusha vino wazumilamo. Cikazipa ukulanda zuwa pa kucuziwa nu musambi. Ukucita vii, kulaazwa umusambi ukumanya ivyakucita nanti ukulanda lino yauze yakumucuzya.

15. I vyani ivingazwa umusambi ukucimvya ukucuziwa ukukafuma kuli ya lupwa?

¹⁵ Ndi cakuti umusambi yakumucuzya kuli ya lupwa, mwamwazwa ukwelenganya pa mulandu uno ya lupwa lwakwe yasikulonda ukuti asambilila Baibo. Limwi ya lupwa lwakwe yangaelenganya ukuti vino Ya Nte Yakwe Yeova yakumusambilizya i vya ufi nanti limwi yakaelenganya ukuti Ya Nte Yakwe Yeova antu aipe. Nanti sile aa lupwa yakwe Yesu yataatemilwe umulimo uno Yesu waombanga. (Mako 3:21; Yoa. 7:5) Mwasambilizya umusambi winu ukutwalilila ukuya umuteekele alino nu kuya ni cikuuku kuli yauze alino na kuli ya lupwa.

16. Uzye tungazwa uli umusambi ukulanenako yauze pali vino wazumilamo mu nzila isuma?

¹⁶ Ndi cakuti ya lupwa ya musambi yakulonda ukusambilila vimwi pali Baibo, cingazipa ndi cakuti umusambi asikuyalondolwela vyonsi pa muku onga. Pano nga wacita vivyo amu lupwa yanguvwa ukasu nu kuta ukulondesha ukusambililapo na vyuze pali vino wazumilamo. Fwandi mwakomelezya umusambi ukulalondolwela ya lupwa ivyeo umu nzila iyakuti yalondesha ukuvwilapo na vyuze pa nsita yuze. (Kolo. 4:6) Limwi anganenako ya lupwa lwakwe ukuya pa jw.org. Ukucita vii kungayazwa ukusambilila ivingi pali Ya Nte Yakwe Yeova, pa nsita ino aineco yakulonda.

17. Uzye tungazwa uli umusambi ukwasuka mauzyo yano antu yamwi yakauzya pali Ya Nte Yakwe Yeova? (Loliniko ni cikope.)

¹⁷ Mungaomvya icipande icaya pa jw.org icikati “Mauzyo Yano Antu Yakauzya Sana” pakuti mwazwe umusambi winu ukuzana masuko uku mauzyo yano ya lupwa nanti yano akaomba nayo yanguzya. (2 Tim. 2:​24, 25) Lyonsi pa cisila ca kumala isambililo, mwapituluka umu ciputulwa icikati “Yamwi Yakalanda Ukuti” umwi buku lyakuti Mungaya ni Nsansa Manda Pe! Mwaazwa umusambi winu ukupekanya ivyasuko umu mazwi yakwe. Ndi cakuti cingalondekwa, mwamwazwa ukuzana inzila iya kulondolwelamo ningo vino wazumilamo. Ukucita vii, kulaazwa umusambi winu ukuya umusipe lino akulondolwela yauze vino wazumilamo.

18. Uzye mungakomelezya uli umusambi winu kulaombako umulimo wa kusimikila? (Mateo 10:27)

¹⁸ Yesu wakomelizye asambi yakwe ukulasimikila ilyasi lisuma uku yantu. (Belengini Mateo 10:27.) Ndi cakuti umusambi watandika zuwa ukunenako yauze vino akusambilila, cilalenga ukuti ataile sana Yeova. Mungazwa uli umusambi ukwimika uyo uu uwa kusimikila? Ndi cakuti umu cilongano yamanyisha ukuti kumaya kampeni iya kusimikila, mwakomelezya umusambi winu ukwelenganya pali vino angacita pakuti afikepo ukuya kasimikila. Mwalondolola umulandu uno cikaangukila yamwi ukutandika ukusimikila lino kuli kampeni iya kusimikila. Uyo uze uno angimika u kutandika ukulanda malyasi umu kulongana kwa mukasi ka mulungu. Lino akwezya ukufikilizya uyo wakwe uwa kulanda malyasi, alasambilila ivya kulondolola ningo vino wazumilamo.

MWATAILA UMUSAMBI WINU UKUTI AKULONDA AZANZYA YEOVA

19. Uzye Yesu walangilile uli ukuti wataile asambi yakwe, nupya tungamukolanya uli?

¹⁹ Lino Yesu atatala waswilila ukwi yulu, wanenyile asambi yakwe ukuti yalaya pamwi nupya. Yatuvwikishe muno Yesu walozizye lino watiile wali nu kuya pamwi nayo ukwi yulu. Nanti cakuti yatuvwikishe vyonsi, Yesu wasininkizye ukuti yalondeshanga ukuzanzya Yeova. (Yoa. 14:​1-5, 8) Wamanyile ukuti yalondekwanga insita iya kuvwikisha ivintu vimwi, wakwe upaalilo wa kwi yulu. (Yoa. 16:12) Wakwe Yesu, naswe kwene tungasininkizya ukuti asambi itu yakalondesha ukuzanzya Yeova.

20. Uzye nkazi uwa ku Malawi walangilile uli ukuti wataile umusambi wakwe?

²⁰ Tukatwalilila ukutaila ukuti asambi itu yakalonda ukulacita ivisuma. Elenganyini pali vino vyacitikile nkazi Chifundo uwa ku Malawi. Ya Chifundo yatandike ukusambilila Baibo nu mwanaci uwi zina lyakuti Alinafe umwi buku lyakuti Mungaya ni Nsansa Manda Pe! nupya umwanaci wii wapepanga uku Katolika. Lino yamazile ukulanzyanya umwi sambililo 14, ya Chifundo yuzizye umusambi wao pali vino welenganyanga pa kuomvya ivilubi pa kupepa. Ya Alinafe yasosile nu kulanda ukuti: “Nene mfwile ukuipingwila!” Lyene ya Chifundo yelenginye ukuti limwi ya Alinafe yamata ukusambilila Baibo. Lelo yateekile nu kutwalilila ukusambilila na ya Alinafe nu kutaila ukuti uku nkoleelo yali nu kwiluka ukuti ukuomvya ivilubi pa kupepa kutaya ningo. Lino papisile imyezi imwi, ya Chifundo yuzizye umusambi iuzyo ilyaya umwi sambililo 34, ilikati: “Uzye ukusambilila Baibo nu kusambilila pali Leza wa cumi, Yeova, ikumwazwa uli?” Ya Chifundo yalanzile pali vino Ya Alinafe yaswike ukuti, “Yalanzile pa visinka ivingi sana, nupya pa visinka vivyo pali ni cisinka icalandanga ukuti Ya Nte yasicitako ivintu vino Baibo yalanda ukuti iviipe.” Patalengile, ya Alinafe yatiile ukuomvya ivilubi nupya yabatiziwe.

21. Uzye tungazwa uli asambi itu ukupingulapo ukulaombela Yeova?

²¹ Nanti cakuti Yeova “aakalenga ukuti cimele,” naswe kwene twakwata umulimo wa kwazwa umusambi ukulunduluka. (1 Kol. 3:7) Kwaya na vyuze vino tukasambilizya umusambi ukulunda pali vino Leza akalonda acita. Tukamwazwa ukutemwa sana Yeova. Nupya tukamukomelezya ukulanga ukuti watemwa Yeova lino akukolezya kumuombela umu umi wakwe. Tukamusambilizya nu kutaila Yeova ukuti aliwe angamwazwa ndi cakuti wakwata intazi. Ndi cakuti tukulanga ukuti twataila asambi itu, cilalenga yasininkizye ukuti nayo kwene yangakwanisha ukwikala ukulingana na vino Yeova akalonda nupya yalalondesha ukumuombela.