Aina Gibyoni Yaacenjiile

ANTU amu misumba iyaeliile umu mpanga ya Kenani yaaipekinye ukulwa na ina Izlaeli. Yelenganyanga ukuti yangacimvya aina Izlaeli. Nomba antu amu musumba wa Gibyoni yene asi vino yelenganyanga foo. Yene yaazumile ukuti Leza aliwe walwilanga aina Izlaeli inkondo, nupya yataalondanga ukulwa na Leza. Uzye watuumanya vino aina Gibyoni yaacisile?

Yaipanzile ngati yaafumile ukutali sana. Lyene aonsi yamwi iyazwala ivizwalo ivilepooke ni ndyatu izikuuzuluke. Nga yalonga ni mifuko yao itulooke pali yapunda yao, nupya yasenda umukaate uume. Lyene yaaile kuli Yoswa nu kumuneena yati: ‘Tufumile uku mpanga ya kutali sana, pano tuuvwa pali Leza winu uwa maka sana, Yeova. Tuuvwa ivintu vyonsi vino wamucitiile umu Eguputo. Acino intunguluzi ziitu zyatuneenyile ukuti tusende ivyakulya tupite ulwendo ulutali nu kwiza-muneena ukuti vii: “Sweswe yazya inu. Tulaini ukuti mutaliiza umu kulwa naswe.” Lolini ni vizwalo vitu vino vyalepooka pa mulandu nu lwendo kwene utali, nu mukate uno twasenzile uuma nu kuuma.’

Yoswa ni ntunguluzi zyuze yazumiile vino aina Gibyoni yaayaneenyile. Lyene yalavile ukuti yatalaya yakalwe nayo. Nomba lino paapisile amanda yatatu, yuvwile ukuti aina Gibyoni iikalanga sile apiipi.

Yoswa uzizye aina Gibyoni ati: ‘I cani cino mwatuneeniile ukuti mwafumile uku mpanga ya kutali?’

Aina Gibyoni iyasuka yati: ‘Twacisile vivyo pano tuuvwa ukuti Leza winu Yeova walavile ukumupeela impanga yonsi kwene iya Kenani. Fwandi tuvwile sana intete ukuti mungatumoola.’ Nomba aina Izlaeli yasunzile ulayo, nupya yatuumoozile aina Gibyoni. Yaayacisile ukuya aomvi yao.

Umwene wa Yelusalemu wasosile sana pa mulandu wakuti aina Gibyoni yuvwananga na aina Izlaeli. Lyene waneenyile aene a mitundu yuze yani (4) ukuti: ‘Izini mungazwe ukulwa na ina Gibyoni.’ Nupya vivyo kwene avino aene yonsi pamwi yasano (5) yaatandike ukulwisya Gibyoni. Nga lyene vino aene yaa yaatandike ukulwisya Gibyoni, uzye tungati aina Gibyoni yaacenjile pa kutandika ukuvwana na ina Izlaeli? Tuli nu kusambilila pali cii.