Yoswa na Ina Gibyoni

Ilyasi pa vyacitike umu musumba uwa Yeliko lyasalangine umu misumba yonse iya mu Kenani. Aene aali umu misumba iyo yapangine ukuti yaombele pamwi pakuti yalwisye Aina Izlaeli. Lelo Aina Gibyoni yene yacisile ivipusaneko. Yazwazile ivyakuzwala ivilepoke, iyaya kuli Yoswa nu kumuneena iyati: ‘Tufumile uku mpanga iya kutali. Tuvwa pali Yeova na vyonsi vino wamucitile uku Ijipti nu ku Moabu. Tulaini ukuti mutalatuzanza, nupya tulaya aomvi inu.’

Yoswa wataile vino yalanzile nupya wazumile ukuti atalayazanza. Pa cisila ca manda yatatu, Yoswa wamanyile ukuti yatikalanga uku mpanga iya kutali. Iikalanga umu mpanga iya Kenani. Yoswa uzizye Aina Gibyoni ukuti: ‘Umulandu ci uno mwatubepiile?’ Nayo yaswike iyati: ‘Tuvwile intete. Itumanya ukuti Yeova Leza winu akumulwila. Twapaapata mutatukoma.’ Yoswa wacisile ukulingana na vino walavile nupya atayakomile.

Patalengiile, aene 5 aa mu Kenani na asilika yao yatiinyizye Aina Gibyoni. Yoswa na asilika yakwe yapisile usiku onsi pakuti yakazwe Aina Gibyoni. Ulwi watandike katondotondo pa wanda uwalondelilepo. Aina Kenani yutuukile umu ntunga izipusanepusane. Lelo Yeova walenganga ukuti konsi kuno yutuukila kutoonye imvula iya mawe iipisye sana. Yoswa walenzile kuli Yeova ukuti alenge ilanzi limilile. I cani calenzile Yoswa alenge kuli Yeova ukuti ilanzi limilile lino icintu cico citatazile icicitikapo? Apa mulandu wakuti Yoswa wataile sana Yeova. Ilanzi litawile limilile uwanda wonsi kufikila lino Aina Izlaeli yacimvizye aene aa mu Kenani ni vita vyao.