Vyakucita pa Kutungulula Ningo Kukomaana Kwa Kuya mu Mulimo

Wakwe vino caya uku kulongana konsi, kukomaana ukwa kuya umu mulimo wa kusimikila nako Yeova wa kwikako pakuti twacincinzyanya mu kutemwa nu mu kuomba imilimo isuma. (Aeb. 10:24, 25) Kukomaana kwa kuya mu mulimo wa kusimikila kulinzile ukuya mamineti 5 kufika kuli 7, mu nsita kwene ii mulinzile ukuya ukwankanya ya kasimikila, kuyalanga ukwa kuombela alino nu kupepa. (Lyene ndi cakuti kukomaana kuli pa cisila ca kulongana ale kulinzile ukwipimpala sana.) Aakutungulula alinzile ukupekanya ivyeo ivingazwa akuomba umulimo wa kusimikila uwanda uo. Wakwe , ndi cakuti ya kasimikila aingi yaile sile umu mulimo wa kusimikila pampela ya mulungu wafumako, pa cibelusi cakonkapo kungaya sile ukulanda vino tungalazyanya nu muntu wino tukusimikilako. A malyasi ci yauze angazipa ukulanzyanyapo?

• Tungaomvya ivyeo vya kutulangilila ivya kusimikila ivyaya umu kabuku kakuti Swe Ina Klistu nu Mulimo Witu

• Vino mungaomvya ivyacicitiike ku ncende iyo pa kutandika ukulanzyanya na antu

• Vino mungacita ndi cakuti umwi walanda ivingacilikila ukulanzyanya ivyaseeka sana

• Vyakulanzyanya nu muntu uwazumila ukuti kutaya Leza, uwazumila ukuti vintu vyasangwike sile, umuntu akalanda ululimi luze nanti umutu uwaya umu mipepele yuze itaseeka uku ncende inu

• Vyakuomvya ivya pa webusaiti ya jw.org, pa JW Library^® app, nanti Baibo

• Vyakuomvya viombelo ivyaya pa Viombelo Vino Tukaomvya pa Kusambilizya

• Inzila izyakuomvya pa kusimikila, wakwe ukusimikila pa foni, kulemba makalata, kusimikila ukukazanwa antu aingi, kuswilila nanti ukutungulula masambililo ya Baibo

• Kwiusya pa kuicingilila, kusenula imilanzyanyizizye, vyakucita nga yatusosya nanti vyuze ivikolineko

• Mungalanzyanya pi sambililo nanti vidyo ikulondolola isambililo lya mu kabuku kakuti Mwawelenga nu Kusambilizya Ningo

• Vya kukomelezya nu kwazwa yano mu kuomba nayo mu mulimo

• Ilembo ilikalanda pa mulimo wa kusimikila nanti vyakukomelezya ivyazwile yamwi lino yaombanga umulimo wa kusimikila