Mungapepa Uli Pakuti Leza Aasuka Mapepo Inu?
Yeova Leza akauvwa mapepo. (Masamu 65:2) Tungalanda nawe konsi kuno tuli pa nsita ili yonsi, umwizwi ilyuvwike nanti umu mwenzo. Yeova akalonda twamwama ukuti “Tata” nupya ali Tata umusuma wino twakwata. (Mateo 6:9) Yeova akatusambilizya ningo ivya kulapepa pakuti auvwa mapepo itu.
MWAPEPA KULI YEOVA LEZA UKUPITILA UMWI ZINA LYAKWE YESU
“Nkumunena cumi vino Tata alamupeela consi cino mulamulenga mwi zina lyane.”—Yoane 16:23.
Amazwi yakwe Yesu yakalanga ukuti Yeova akalonda twapepa kuli aliwe, ukwaula ukuomvya ivinkolanya, atakatifu, angeli nanti ivikolwe vitu ivyafwa, lelo ukupitila umwi zina lyakwe Yesu Klistu. Nga tukupepa kuli Leza kupitila muli Yesu tukalanga ukuti twamanya umulimo uno Yesu wakwata. Yesu walanzile ukuti: “Pasi umwi angiza kuli Tata suka wizila muli nene.”—Yoane 14:6.
MWALANDA UKUFUMA PANSI YA MWENZO
“Mwamutula amacuzi inu lyonsi.”—Masamu 62:8.
Nga tukupepa kuli Yeova, tulizile ukulanda wakwe vino tungalanda kuli tata uwaya nu kutemwa. Ukucila ukubelenga umwi buku lya mapepo nanti ukulanda vino twasungila, tulinzile ukulanda nawe umu mucinzi nupya ukufuma pansi ya mwenzo.
MWAPEPA UKULINGANA NU KULONDA KWAKWE LEZA
“Ndi twamulenga wene akatuvwa nu kutwasuka pali consi cino twalenga kulingana nu kulonda kwakwe.”—1 Yoane 5:14.
Muli Baibo, Yeova Leza watunena vino alatucitila na vino akalonda ukuti twamucitila. Pakuti Leza aasuka mapepo itu, tulinzile ukulapepa “ukulingana nu kulonda kwakwe.” Pa kucita vivyo, tulinzile ukulasambilila Baibo pakuti tumumanye ningo. Nga twacita vivyo amapepo itu yalamuzanzya.
I VYANI VINO TUNGAPEPELAPO?
Mwapepela Pali Vino Mukulondekwa. Tungapepa kuli Leza pali vino tukalondekwa cila wanda wakwe ivyakulya, ivyakuzwala, nu mwakwikala. Tungapepa nu kuti atupeele mano akupingulapo ningo pa vintu alino na maka ya kuzizimizya intazi. Tungapepa ukuti tuye nu tailo, atweleela alino nu kuti Leza atwaazwa.—Luka 11:3, 4, 13; Yakobo 1:5, 17.
Mwapepelako Yauze. Avyazi aatemwa ana yao yakauvwa ningo ndi cakuti ana yao ya kutemwana. Na Yeova kwene akauvwa ningo ndi cakuti ana yakwe ya kutemwana. Cacindama ukulapepelako ya witu, ana itu, amu lupwa, alino ni vyuza. Umusambi Yakobo walemvile ukuti tulinzile “kupepelana.”—Yakobo 5:16.
Mwataizya. Baibo ikalanda pali Kaumba ukuti: “Wene akamupeela imvula kufuma kwiyulu nu kuleka kuti vilimwa vikule pa nsita isuma. Wene akamupeela ivyakulya nu kuzuzya myenzo inu nu luzango.” (Milimo 14:17) Nga twelenganya pa vintu vino Leza watucitila, cilalenga twamutaizya lino tukupepa kuli aliwe. Tulinzile ukulanga ukuti tukataizya Leza lino tukumuvwila. “Mutende uno Klistu akapeela uwa kutungulula myenzo inu. Leza wamusolwile kuti mwikale mu mutende kwene uu, pano mwemwe vilundwa vya mwili onga. Nupya mulinzile mwataizya.”—Kolose 3:15.
MWAYA ATEEKELE NUPYA MWATWALILILA UKUPEPA
Insita zimwi tungasoka ndi cakuti tutapokeelile icasuko ku mapepo itu aakufuma pansi ya mwenzo. Uzye ala cikupiliula ukuti Leza atatusakamala? Awe foo! Lolini ivyalondelelapo ivyacitikile yamwi ivikulangilila ukuti tulinzile ukutwalilila ukupepa.
Ya Steve, ati yalandwapo mu cipande cakutandikilapo yatiile, “Ndi cakuti ntatwalilila ukupepa nga ntakweeti upaalilo wakuti ndaya ni insansa nupya.” I cani calenzile yasenuke? Yatandike ukusambilila Baibo nupya yasambilile umulandu uno cacindamila ukupepa nu kutwalilila ukucita vivyo kwene. Ya Steve yatiile, “Nkapepa kuli Leza nu kumutaizya pa wazwilizyo uno nkapokelela ukufuma uku yanji. Ndakai lyene naya ni nsansa.”
Nga ya Jenny yene ayuvwanga ukuti yatali acindame icakuti Leza anguvwa amapepo yao? Yalanzile ukuti, “Lino nayuvwanga uwa silesile napapasile Leza ukuti angavwe ukuvwikisya umulandu uno nayuvwilanga vivyo.” Uzye ukucita vivyo kwayavwile uli? Yalanzile ukuti, “Kupepa kuli Yeova kwangavwile ukulailola wakwe vino Leza akandola nanti icakuti mu mwenzo nayuvwanga uwa silesile, lelo asi vino wene akandola. Nupya kwangazwa ukukanatoovoka.” I visuma ci ivyacitike? Nupya ya Jenny yalanzile ukuti, “Ipepo lyangavwa ukulola Yeova ukuti umuntu uwa cumi cumi, uwaya nu kutemwa, Leza aakasakamala, Tata, nupya cuza aalatwalilila ukungavwa nga natwalilila ukucita vino akalonda.”
Ya Isabel yalanzile ukuti, “Nkalola ukuti Leza wasuka mapepo yane nga nalola umwanane Gerard akuipakizya umi nanti icakuti walemala”
Elenganyini nupya pali vino vyacitiikile ya Isabel. Lino yakweti indilwa, dokota wayanenyile ukuti umwana wino yali nu kuvyala wali nu kuya umulemale. Yavulunganyiziwe. Yamwi yayanenanga ukuti yaponye indilwa. Yalanzile ukuti, “Nuvwile kwati nimafwa sile.” Uzye yacisile uli? Yatiile: “Napefile kuli Leza pakuti angazwe.” Patalengile, izile iyakwata umwana umonsi Gerard nupya wali umulemale. Uzye ya Isabel yayuvwile ukuti Leza waswike amapepo yao? Ee. U mu nzila ci? Ya Isabel yalanzile ukuti, “Nga nalola umwanane aali ni myaka 14 akuipakizya umi nanti icakuti walemala, nkalola ukuti Leza wasuka amapepo yane nupya ali wila uno Yeova Leza wampela ucindamisye.”
Amazwi yaa akufuma pansi ya mwenzo yakalenga twaelenganya pa mazwi yano kalemba wa masamu walemvile akuti: “We Yawe [Yeova], uluvwa amapepo yakwe yao aicefya. Nawe ulayakomelezya.” (Masamu 10:17) Cacindama sana ukutwalilila ukulapepa kuli Leza!
Muli Baibo mwaya mapepo aingi yano Yesu wapepanga. Ipepo ilyamanyikwa sana alili lino wasambilizye asambi yakwe. I vyani vino tungasambililako?