Umu Umi Witu Onsi Twasambilila Masambililo Aingi Kuli Kasambilizya Wapapelapela

VINO NASAMBILILE UKU YAVYAZI YANE

Pakasi ka mwaka wakwe 1957 na 1959, avyazi yane yafumile uku Italy nu kukukila uku Kindersley, mu Saskatchewan ku Canada. Patalengile, ya tata, ya mayo, tatalenzi, alino na ya kaci yane yaili izile iyasambilila icumi nupya yacitemilwe sana. Nkaiusha ukuti lino nali umwance naombanga sana na ya lupwa yane umu mulimo wa kusimikila, nupya insita zimwi nkalanda ala nkusekesha inti “Natandike upainiya wa nsita inono” ala indi ni myaka 8.

Avyazi yane yali apiina, lelo icintu cino isileko sana mano u kuombela Yeova. Wakwe, umu 1963 yakazizye ivintu ivingi pakuti yakazanweko uku ukongano wa mpanga izingi umu Pasadena, uku California, umu U.S.A. Umu 1972 twapisile makilomita 1,000 ukuya uku Trail ku Canada, pakuti tukasimikila ku antu aalandanga Ciitalian. Ya tata yaombanga umulimo wa kuzifya. Yakananga ukwingila incito izya kufola impiya izingi pakuti yaombesha umu umulimo wakwe Yeova.

Nkataizya pali vino avyazi yane yali icilangililo cisuma kuli nene alino nu ku yato wane yatatu. Vino avyazi yacitanga lino nali umwance vyansambilizye ivintu vino ndatwalilila ukulaiusha umi wane onsi. Yansambilizye ukuti ndi cakuti nkukolezya ivya Wene, Yeova alansakamala.—Mate. 6:33.

NATANDIKA UMULIMO WA NSITA YONSI

Umu 1980, natwaline na ya Debbie, nkazi uwatemilwe sana ukuombela Yeova. Twalondanga ukutandika umulimo wa nsita yonsi, fwandi ya Debbie yatandike ukuomba upainiya wa nsita yonsi lino papisile imyezi itatu ukufuma pano twatwaline. Pa cisila ca mwaka onga ukufuma pano twatwaline, twakukile uku cilongano ukwalondekwanga ya kasimikila, nupya nani nizile intandika upainiya wa nsita yonsi.

Pa cisila ca insita imwi, twizile itutovooka nupya twalondanga ukufumako. Inkoleelo twanenyileko umwangalizi wa ciputulwa. Watunenyile mu cikuuku ukuti: “Mukulenga intazi ino mukweti ukukulilako. Mukwika sile mano uku ntazi ino mukweti. Lelo ndi cakuti mwatandika ukwika mano uku visuma mulavilola.” Yaa ali mazwi akukomelezya yano twalondekwanga. (Masa. 141:5) Twacisile vino yalanzile nupya twizile itwiluka ukuti kwali ivisuma vino twaipakizyanga. Aingi umu cilongano yalondanga ukuombela sana Yeova, ukwikako sile na acance alino na akweti ya wao asi ya Nte. Lii lyali isambililo ilicindame sana kuli sweswe. Twasambilile ukulaika mano uku visuma nu kutaila ukuti Yeova alatwazwa ukuzizimizya intazi zino twali nu kukwata. (Mika 7:7) Twatandike ukuya ni nsansa nupya, nupya ivintu vizile iviya ningo.

Aina aatusambilizyanga umwi sukulu lyakwe ya painiya lino twatandikilepo ukuzanwako, yaombilepo uku mpanga zyuze. Lino yatulanzile ivikope na lino yalandanga pa ntazi na pa visuma vino yapaikizyanga lino yaombanga umishonali, calenzile ukuti naswe twalondesha ukuya ya mishonali. Fwandi twapingwilepo ukwimika uyo uwa umishonali.

Pakuti tufikilizye uyo uu, umu 1984 twakukiile uku cilongano icaomvyanga Icifrench umu Quebec ukwatalimfilile amakilomita 4,000 ukufuma uku British Columbia. Cii cikupiliula ukuti twalondekwanga ukusambilila intambi izipya alino nu lulimi luze. Intazi na yuze ino twakweti yali iya kuti insita izingi tulizyanga impiya. Pa nsita imwi twalyanga ivisela vino umulimi umwi watuzumilizye ukulatolelezya umu calo cakwe. Ya Debbie izile iyamanyikisha ivya kweleka ivisela umu nzila izipusanepusane. Asi mulandu ni ntazi zino twakwatanga, twatwalilile ukuzizimizya nupya twayanga ni nsansa. Nupya twasininkizye ukuti Yeova watusakamalanga.—Masa. 64:10.

Uwanda umwi, yatuutumile foni. Yatwamile ukuya umu kuombela apa Bethel iya ku Canada. Uku cisila twalemvile kalata iya kulengelapo ukuya ukwi sukulu lya Gilyadi, fwandi tutamanyile ivya kucita. Lelo twazumile ukuya uku Bethel. Lino twafisile pa Bethel tuzizye umwina Kenneth Little, uwali muli komiti ya musambo ukuti, “Nga kalata lya ku Gilyadi ino twalemvile?” Umwina Little waswike ati, “Tulamanya ivya kucita ndi cakuti yamwama.”

Lino papisile umulungu onga izile itwama uku Gilyadi. Fwandi twali nu kusoololapo. Umwina Lilttle wanenyile ati: “Asi mulandu nu mulimo uno mungasoololapo, insita zimwi mungatandika ukwelenganya ukuti fwandi nga twasoolwilepo uwa. Kutaya umulimo uwacindama ukucila uze nupya Yeova angapaala umulimo uli onsi.” Twazumile ukuya ukwi sukulu lya Gilyadi, nupya pa myaka iingi twaweni ukuti mazwi yano umwina Little walanzile acumi. Insita zimwi tukaomvya mazwi yaa uku kukomelezya yauze aakusoololapo umulimo uno yangaomba.

UMISHONALI

Twatemilwe ukuya pa yasambi 24 aali umwi sukulu lya Gilyadi ilyalenga 83 ilyayelile umu Brooklyn, uku New York umu Epuleo 1987. Umwina Ulysses Glass nu mwina Jack Redford aliyo yatusambilizyanga sana. Imyezi 5 yasizile zuwa, nupya twamazile isukulu pa 6 Sepetemba, umu 1987. Yatutumile ukuya umu kuombela uku Haiti pamwi na ya John Goode na aci yao ya Marie.

Ukufuma umu 1962 lino ya mishonali yayanenyile ukufuma umu mpanga ya Haiti kutaali nanti a mishonali wenga wino yatumanga uku mpanga yii. Lino papisile imilungu itatu ukufuma pano twamaliile isukulu, twaile umu kuombela uku cilongano ca mu Haiti umwali ya kasimikila 35 nupya icayelile umu myamba. Pa nsita iya twali ance, twalondekwanga ukusambilila ivingi nupya twikalanga umu ng’anda yakwe ya mishonali swenga. Antu aingi yali apiina nupya yatamanyile ukubelenga. Lino twikalanga kuku, antu aali umu ncende ino twikalangamo izile iyaya sana nu unkalwe pa mulandu ni vikanza vya miteekele. Antu yalondanga ukufumyapo uteeko uwateekanga, kwali ivimvulunganya, nupya kwali ni mvula ya cimuza icipishe.

Twasambilile ivingi uku ina na ya nkazi amu Haiti, aali akome muli ukapepa nupya aali ni nsansa. Aingi ivintu vyayatalilanga, lelo yatemilwe Yeova nu mulimo wa kusimikila. Kwali nkazi umwi aatamanyile ukubelenga lelo wamanyile malembo 150 uku mutwe sile. Ivyacitikanga cila wanda vyatukomelezyanga ukutwalilila ukulasimikila ilyasi lya Wene pano twamanyile ukuti ilyasi lii i lilalenga intazi zino antu yakakwata ukufumiziwapo. Tukauvwa ningo sana ukulola asambi yano twatandikilepo ukusambilila Baibo nayo iza yaya ya painiya ya nsita yonsi, ya painiya aiyele, alino na ya eluda.

Lino twali umu Haiti twamanyine nu umonsi uwali a mishonali umu ceici ca Ina Klistu ataile mu yatakatifu, nupya twatandike ukusambilila nawe Baibo. Lino papisile imyaka imwi napokelile kalata ino ntenekelanga ukufuma kuli aliwe. Walemvile ati: “Nkubatiziwa pa ukongano wa ciputulwa uno tuli nu kukwata. Nkulonda ukuswilila uku Haiti pakuti nkaye umu kuomba upainiya uiyele uku ncende kuno naombanga umishonali uku ceici ca Ina Klistu ataila mu yatakatifu.” Nupya vikwene ali vino wacisile pa myaka iingi pamwi nu muci wakwe.

UKU EUROPE NU KU AFRICA

Yatutumile ukuya mu kuombela uku ncende zya mu Europe kuno umulimo wa kusimikila watandike ukuombwa. Umu 1992 twafisile umu Ljubljana, uku Slovenia, umupiipi nu ku ncende kuno avyazi yakulile lino yatatala yakukila uku Italy. Pa nsita iya ala kucili inkondo uku ncende ino yamanga ukuti Yugoslavia. Umusambo wa mu Vienna uku Austria alino na maofesi aali umu Zagreb, Croatia, Belgrade, alino na Serbia ali yano yangalilanga umulimo wa kusimikila umu ncende iya. Fwandi lyene cila mpanga yali nu kuikwatila iofesi lya musambo.

Cii capiliulanga ukuti twali nu kusambilila ululimi luze alino ni ntambi izipya. Antu aaku ncende yii yalandanga ukuti, “Jezik je težek,” icikapiliula ukuti “Ululimi lwakoma.” Nupya i ca cumi ululimi luu lwali ulukome. Twayanga ni nsansa ukulola vino aina na ya nkazi yaitemelwanga ukulondela ukusenuka ukwa mwi uvi, nupya twaweni na vino Yeova wayapaazile. Nupya twailolile vino Yeova lyonsi akalungika ivintu pa nsita ilinge. Lino twali umu Slovenia twasambilile ivintu ivingi nupya vino twasambilile vyatwazwile ukuzizimizya intazi zino twakwatanga.

Kwali intazi na zyuze zino twali nu kukwata. Umu 2000 yatutumile uku Côte d’Ivoire, umu West Africa. Lyene umu Novemba 2002, yatunenyile ukutukila uku Sierra Leone pa mulandu ni nkondo iyali umu Côte d’Ivoire. Lino yatunenyile ukuya uku Sierra Leone ala alino inkondo iyaliko pa myaka 11 yasizile. Catutalile ukufuma umu Côte d’Ivoire lilyo kwene sile. Lelo vino twasambilile vyatwazwile ukutwalilila ukuya ni nsansa.

Twatwalilile ukwika mano uku yantu aingi alondeshanga ukusambilila icumi, alino nu ku ina na ya nkazi azizimizye inkondo pa myaka iingi. Yali apiina lelo yalondeshanga ukupeelako yauze vino yakweti. Nkazi umwi wapeezileko ya Debbie ivyakuzwala. Lino ya Debbie yalondanga ukukana, wayanenyile ati: “Lino kwali inkondo, aina na ya nkazi yatwazwile. Naswe kwene tukulonda ukumwazwa.” Twalondeshanga ukulayakolanya.

Lyene twizile ituswilila uku Côte d’Ivoire, lelo kwizile ukuya ivimvulunganya ivyalenzile kuye unkalwe. Fwandi umu Novemba 2004 twafumile umu mpanga yii nu kukwela indeke nupya cila muntu wasenzile icola icafinyile makilogilamu 10. Nupya twaile itulaala pa nkambi ya asilika, lyene uwanda uwalondelilepo twapisile ni ndeke ukuya uku Switzerland. Lino twafisile pa musambo usiku sana, amuli Komiti wa Musambo na ya kasambilizya Umwi Sukulu Lya Mulimo Lyakwe ya Eluda na Aomvi Aakatumikila pamwi na ya mama yao yatupokelile nu kutukukula, yatupekanyizizye ivyakulya ivikaye, na macokoleti aaku Switzerland. Twayuvwile ukuti yatutemwa sana.

Yatutumile umu kuombela uku Ghana nupya twizile ituswilila uku Côte d’Ivoire pa cisila cakuti vimvulunganya vyacepako. Vino aina na ya nkazi yali ni cikuuku kuli sweswe vyatwazwile ukuzizimizya intazi zino twakweti. Ya Debbie nani twaweni vino aina na ya nkazi yaya nu kutemwa, fwandi twalondanga ukulayataizya. Lino papisile insita, twizile itwiluka ukuti intazi zino twakwatanga zyatusambilizye ivintu ivicindame sana.

YATUTUMA UMU KUOMBELA UKU MIDDLE EAST

Umu 2006, twapokelile kalata ukufuma uku maofesi yakalamba muno yatunenyile ukuya umu kuombela uku Middle East. Nupya twali nu kukwata intazi, ukusambilila ivingi, nu kusambilila indimi zyuze alino ni ntambi. Twali nu kusambilila ivintu ivingi uku ncende yii kuno antu isile sana amano ku vya mapolitiki ni vya mapepo. Twatemilwe sana ukuvwa indimi izipusanepusane umu vilongano alino na vino aina na ya nkazi yali alemane pa mulandu wakuti yalondelanga utunguluzi uwa mwi iuvi. Nupya twatemilwe sana pali vino aina na ya nkazi yazizimizyanga ukucuziwa kuli ya lupwa, kuli ya kasukulu yauze, kuli yano yaombanga nayo, alino nu ku inamupalamano.

Twazanilwe uku ukongano uwali umu 2012 mu Tel Aviv uku Israel. Ukongano uu u wali uwakutandikilapo kuno antu yakwe Yeova aingi sana yazanyilwe ukufuma pa Pentekositi 33 C.E. Uwanda uu wazifile sana nupya tutalilila!

Umu myaka iya, yatutumile umu kutandalila impanga muno yalesizye umulimo witu. Twasenzileko impapulo zimwi, twaomvileko umulimo wa kusimikila, nupya twazanyilweko uku maukongano anono. Asilika aali ni vyanzo yali umu miseo, lelo twayuvwile acingililwe lino twapitiile pamwi na ya kasimikila yamwi.

TWASWILILA UKU AFRICA

Umu 2013 yatupeezile umulimo uze, yatunenyile ukuya umu kuombela apa musambo wa mu Kinshasa uku Congo. Impanga yii isuma lelo mwaya sana upiina alino ni vimvulunganya. Lino yatutumile twalanzile ukuti, “Twamanya vino antu yakaikala umu Africa; nupya ituipekanya.” Lelo kwali ivingi vino twalondekwanga ukusambilila, sana sana vino twali nu kulapita umu ncende muno imiseo itaali ningo. Lelo kwali ivisuma ivyacitikanga vino twikangako mano, wakwe vino aina na ya nkazi yazizimizyanga nu kuya ni nsansa asi mulandu ni ntazi zino yakwatanga, vino yatemilwe umulimo wa kusimikila, na vino yaombeshanga ukuzanwa uku kulongana alino nu ku maukongano. Twailolile vino antu aingi yasambilile icumi pa mulandu nu kwazwa kwakwe Yeova. Apa myaka iingi ino twaombelanga umu Congo twasambilile ivintu ivingi sana nupya twapanzile ni vyuza ivyali kwati a lupwa lwitu.

Uku kusila kwa mwaka wakwe 2017, yatupeezile umulimo uwa kuya umu kuombela uku South Africa. Umusambo uu ali musambo ukalamba sana uno twaombelapo ukucila imisambo yonsi ino twaombelapo, nupya imilimo ino yatupeezile yali ipya kuli sweswe. Nupya kwene, twalondekwanga ukusambilila ivingi lelo ivyatucitikile uku cisila vyatwazwile ukulaomba imilimo yii. Twatemwa aina na ya nkazi aatwalilila ukuzizimizya pa myaka iingi. Tukaya ni nsansa ukulola kuno aina na ya nkazi amu lupwa lwa pa Bethel yakuombela pamwi asi mulandu ni nkulilo izipusanepusane alino ni ntambi. Twailolela vino Yeova akapaala antu yakwe nu mutende pano antu yakwe yazwala untu upya nupya yakalondela ivisinte vya muli Baibo.

Pa myaka iingi nemo na ya Debbie twaomba imilimo iingi sana, nupya twasenukanga ukulingana ni ntambi zino twazana, alino nu kusambilila indimi zyuze. Ivintu vitangwike lelo twailolela vino Yeova akatulanga ukutemwa ukupitilila umwi iuvi lyakwe alino na ina na ya nkazi. (Masa. 144:2) Twataila ukuti ivintu vino twasambilila umu mulimo wakwe Yeova vyalenga tuye aomvi yakwe Yeova asuma.

Nkataizya sana pali vino avyazi yane yankuzizye, vino mamane akantungilila, alino na pali vino nasambilila uku ina na ya nkazi umu nsi yonsi. Nemo na mamane tulatwalilila ukusambilila ivintu na vyuze vino Kasambilizya Wapapelapela akatusambilizya.