Mwatwalilila Ukulondela Yesu na pa Cisila ca Lubatizyo

1-2. A mapaalo cii yano umuntu aakapokelela nga twabatiziwa?

TUKAYA sana ni nsansa nga twabatiziwa nu kuya umu lupwa lwakwe Yeova. Yayo akwata ucuza upalamisye na Yeova yangazumilizya uku mazwi yakwe kalemba wa Masamu Devedi uwalanzile ukuti: “Alongo antu yano wemo wasolola, apakuti yangaikala umwi sano lyako.”—Masa. 65:4..

² Yeova akalonda swensi ukuya ya cuza yakwe. Nomba wakwe vino twasambilile amu cipande icafumako, akalonda ukuya cuza na antu akalonda ukuya ya cuza yakwe. (Yako. 4:8) Ndi cakuti mwaipeela kuli Yeova alino nu kubatiziwa mulapalama sana kuli aliwe. Nupya ukwaula ukutwisika ala ‘mupongolwela upolelelo nyanya wakwe cimwi.’—Mal 3:10; Yel 17:​7, 8.

3. I vyani vino Aina Klisitu aipeele nu kubatiziwa yakalondekwa ukulacita? (Kasambilizya 5:​4, 5)

³ Ulubatizyo icintu ca kutandikilako. Ndi cakuti mwabatiziwa mulaezya namaka ukwikalilila uku mulapo uno mwalafile, na lino mwakwata intazi izingezya utailo winu. (Belengini Kasambilizya 5:​4, 5.) Pa mulandu wakuti sweswe yasambi yakwe Yesu, tukalondela vino wacitanga alino na vino walanzile. (Mate. 28:​19, 20; 1 Pet. 2:21) Umu cipande cii tumasambilila pali vino tungacita pakuti twacita vino Yesu wacitanga alino na vino walandanga.

MWALONDELA YESU ASI MULANDU NI NTAZI ZINO MUKAKWATA

4. Umu nzila ci muno asambi yakwe Yesu yakasendelamo “kusenda icimuti” kucuziwilwapo? (Luka 9:23)

⁴ Mutalinzile ukulaelenganya ukuti nga mwabatiziwa mutalakwata intazi. Yesu walanzile ukuti asambi yakwe yalinzile ukuikana nu “kusenda icimuti” ca kucuziwilwapo yalinzile ukucita vii nu “kutwalilila” ukulondela Yesu. (Belengini Luka 9:23) Uzye Yesu walozyanga umu kuti alondezi yakwe yali nu kutwalilila ukulacula? Awe foo. Cino walandangapo icakuti yatali sile nu kulapokelela amapaalo lelo yali nu kulakwata ni intazi. Intazi zimwi zino yali nu kulakwata zyali nu kuya izitale sana.—2 Tim. 3:12.

5. Amapaalo cii yano Yesu walaya yayo yonsi akaipeelesya?

⁵ Limwi ya lupwa yakamukanya, nanti limwi mwapeela ivikwatwa vinu vyonsi uku kutungilila Uwene Wakwe Leza. (Mate. 6:33) Nga vino cili, mwaiusya ukuti Yeova akalola vino mukamuombela na ucisinka. (Aeb. 6:10) Mufwile mwasininkizya ukuti mazwi yano Yesu walanzile acumi akuti: “kusi nanti aumwi uwasya ing’anda nanti aina nanti ya kaci yakwe nanti nyina nanti isi nanti ana nanti ivyalo pa mulandu wane na pa mulandu wi lyasi lisuma, aatalapokelela ivingi ndakai ukucila pali vino wasya, kuli kuti mang’anda, aina, ya kaci yakwe, ya nyina, ana, ivyalo alino nu kucuziwa nupya nu ku nkoleelo alapokelela umi wa pe.” (Mako 10:​29, 30) Mu cumi amapaalo yano mwapokelela aingi ukuluta vino mwaomba. —Masa. 37:4.

6. Umulandu cii uno mulalondekwa ukutwalila ukulwisyanya nu “ulunkumbwa lwa mwili” pa cisila ca kubatiziwa?

⁶ Pa cisila ca kubatiziwa, mulalondekwa ukutwalilila ukulwisyanya nu “ulunkumbwa lwa mwili” (1 Yoa. 2:16.) Pano mulatwalilila ukuya yamwana Adamu apyana uluyembu. Insita zimwi mungayuvwa wakwe vino mutumwa Paulo wayuvwanga. Uwalemvile ukuti: “Nemo umu mwenzo wane nkazangila sana umu masunde yakwe Leza, lelo umu mwili wane nkalola isunde lyuze likulwisyanya ni sunde lya mu melenganyo nu kuntwala uku uzya wi sunde lya luyembu ilyaya umu mwili wane.” (Loma 7:​22, 23.) Insita zimwi, mungauvwa ukutoovoka pa mulandu wakuti ala mukulwisyanya nu luyembu. Nomba, ukwelenganya pali vino mwalavile Yeova lino mwaipeezile kuli aliwe kulamwazwa ukuya akome lino mwakwata uwezyo. Icisinka icakuti ukwiusya imilapo ino mwalafile kuli Yeova lino mwaipeezile kuli aliwe kulamwazwa ukuya asipe lino mwakwata mezyo. Umu nzila cii?

7. Uzye ukuipeela kuli Yeova kulamwazwa uli ukutwalilila ukuya acumi kuli aliwe?

⁷ Nga mwaipeela kuli Yeova ala mwaikana mweineco. Cii cikupiliula ukukana cita ivilondwa vya mwili alino ni miyele iipe ingasosya Yeova. (Mate. 16:24.) Lino mweziwa mutalalondekwa ukusakamala pali vino mumacita. Pano ala mwasoolola mpiti vino mulinzile ukucita kuli kuti ukutwalilila ukuya acisinka kuli Yeova. Mulatwalilila ukulondesya ukuzanzya Yeova. Mu nzila yuze tungati mulaya wakwe Yobo. Nanti cakuti wakweti intazi izingi, walanzile ati “ntalatala inte ukuvwanga ukuti nene muntu umwi uwakaele!”— Yobo 27:5.

8. Uzye ukwiusya ukuti mwaipeela kuli Yeova, kulamwazwa uli ukucimvya mezyo?

⁸ Ukwiusya ukuti mwaipeela kuli Yeova, kulamwazwa ukucimvya mezyo. Wakwe, uzye mungatandika ukulanga icintemwa kuli wino mutatwalana nawe? Ukwaula nu kutwisika mutanga mucite vivyo. Pano ale mwalaya Yeova ukuti mulatwalilila ukuya acisinka. Ndi cakuti mwacimvya imiyele iipe lino patatala palengela, mutalaacula ukuleka imiyele iyo iipe ukunkoleelo. Mulaataluuka uku “nzila ya antu aipe.”— Mapi. 4:​14, 15.

9. Uzye ukwiusya ukuti mwaipeela, kungamwazwa uli ukulunduka muli vyakwe Leza?

⁹ Nga ndi cakuti mwapeelwa incito ingalenga mwapuswa umu kulongana mungacita uli? Ukwaula nu kutwisika imumanya vino mungacita. Mungakana, pano ale mwasoola mpiti ukuti mutalazumila incito ingalenga mwapuswa umu kulongana. Fwandi ndi cakuti mwasoolola ningo mutalatunkwa ukuomba incito izingalenga mwavilwa ukuzanwa umu kulongana. Ukwelenganya pali vino Yesu wacitanga kungamwazwa pano lyonsi walondanga ukuzanzya isi. Wakwe Yesu, mutaleka icili consi calenga mwavilwa ukuzanzya Leza pano mwaipeela kuli aliwe.—Mate. 4:10; Yoa. 8:29.

10. Uzye Yeova alamwazwa uli ‘ukutwalilila ukulondela’ Yesu pa cisila ca kubatiziwa?

¹⁰ Vino mukacita ndi cakuti mwakwata intazi nanti mweziwa ukucita iviipe, vingalanga ndi cakuti mukalondesya ‘ukutwalilila ukulondela’ Yesu. Nupya mungasininkizya ukuti Yeova alamwazwa ukulondela Yesu. Baibo ikati: “Leza u wa cumi, nupya atalaleka ukuti mweziwe ukucila pali vino mungazizimizya, lelo lino mweziwa alapekanya inzila iyakuti mufumilemo pakuti mungazizimizya.” —1 Kol. 10:13.

VINO MUNGACITA PAKUTI MUTWALILILE UKULONDELA YESU

11. I vyani vino mulinzile ukucita pakuti mutwalilile ukulondela Yesu? (Loliniko ni cikope.)

¹¹ Yesu waombelanga Yeova nu mwenzo onsi nupya wapepanga lyonsi. (Luka 6:12) Mungalanga ukuti mukutwalilila ukulondela Yesu pa cisila ca kubatiziwa nga mu kucita ivintu ivingalenga mutwalilile ukupalama kuli Yeova. Baibo ikati: “Asi mulandu na pano twafika ukulunduluka, lekini tutwalilile ukulunduluka vikwene.” (Filipi 3:16) Insita izingi mulauvwa malyasi akalanda pa ina na ya nkazi alundulula imiombele yao mu mulimo wakwe Leza. Yamwi yasoololapo ukuya ukwi Sukulu Lyakwe ya Kakosoola ya Wene nanti ukuya ukukalondekwa yakasimikila. Ndi cakuti mungakwanisya cingazipa ukwimika uyo wa musango uu. Antu yakwe Yeova yakalondesya sana ukulundulula imiombele yao umu mulimo wakwe Yeova. (Mili. 16:9) Nga ndi cakuti pa nsita ii mutanga mukwanisye ukucita vivyo? Nga vino cili, mutaelenganya ukuti akakwanisya ukuomba yacindama ukumucila. Pano icacindama uku Umwina Klistu ukutwalilila ukuzizimizya. (Mate. 10:22) Mutailila ukuti mukalenga Yeova ukuzanga nga mukuomba ukulingana na papezile amaka inu. Ukucita vivyo ukungalenga mutwalilile ukulondela Yesu pa cisila ca kubatiziwa.—Masa. 26:1.

12-13. I vyani vino mulinzile ukucita ndi cakuti mwata ukuvwa uluzango mu mulimo wakwe Leza? (1 Kolinto 9:​16, 17) (Loliniko na kambokosi aka kuti “Twalilini Ukusimula.”)

¹² I vyani vino mungacita ndi cakuti mwazana ukuti musi kupepa amapepo akufuma pansi ya mwenzo, nupya musi kuipakizya umulimo wakwe vino mwaipakizyanga mpiti? Nga ndi cakuti musi kuipakizya ukubelenga Baibo wakwe vino mwaipakizyanga mpiti? Ndi cakuti mwatandika ukuvwa vivyo pa cisila ca kubatiziwa mutalinzile ukulalola kwati Yeova atayanamwe. Pa mulandu wakuti tutamalilika insita zimwi vino tukayuvwa vikasenuka. Ndi cakuti mwalola ukuti mwatandika ukutoovoka mwaelenganya pi lyasi lya mutumwa Paulo. Nanti icakuti Paulo wezyanga ukukolanya Yesu insita zimwi wayuvwanga ukuti atakwanisyanga ukucita vino walondanga ukucita. (Belengini 1 Kolinto 9:​16, 17.) Watiile: “Ndi cakuti nkuomba umulimo uu umu kuitemelwa ala nkweti cilambu; lelo nanti cakuti nkuomba ukwaula ukuitemelwa, nalyo kwene ala ncili nu wangalizi uwapeezilwe kuli nene.” Nanti ciye vivyo Paulo watwalilile ukumalilila umulimo asimulandu na vino wayuvwanga insita zimwi.

¹³ Wakwe Paulo namwe kwene mutapingula pa vintu ukulingana na vino mukuyuvwa. Mwalondesya lyonsi ukucita ivisuma na lino citangwike ukucita vivyo. Ndi cakuti mwatwalilila ukucita ivisuma mulasenuka muli vino mukayuvwa. Fwandi ukuisambilizya Baibo ukupepa lyonsi ukuzanwa lyonsi umu kulongana alino nu kuomba umulimo wa kusimikila kulamwazwa ukutwalilila ukulondela Yesu na pa cisila ca kubatiziwa. Nga mukucita vii mulakomelezya ya kapepa yauzo.—1 Tesa. 5:11.

“MWAYEZYA . . . MWAIKAKO MANO”

14. I vyani vino mulinzile ukwikako sana amano nupya umulandu cii? (2 Kolinto 13:5)

¹⁴ Ukutwalilila ukuyezya pa cisila ca kubatiziwa kulamwazwa ukulola muno mulinzile ukuombela. (Belengini 2 Kolinto 13:5.) Cila wanda mwaika amano nu kulola ndi cakuti mukuisambilizya, mu kuzanwa uku kulongana lyonsi, alino nu kuombako umulimo wa kusimikila. Mwaelenganya pali vino mungacita pakuti mwaipakizya ivintu vii. Mwayuzya amauzyo wakwe ‘Uzye ningalondolola masambililo akutandikilako amuli Baibo? Uzye kuli vino ningacita pakuti naipakizya umulimo wa kusimikila? Uzye nkapepa mapepo amukulungatika nupya yakalanga ukuti na taila sana Yeova? Uzye nkazanwa lyonsi umu kulongana? Uzye ningacita uli pakuti na aasukapo alino nu kwika sana amano pa kulongana?’

15-16. I vyani vino mukusambilila kuli vino umwina wacimvizye uwezyo?

¹⁵ Icintu icicindame cino mulinzile ukucita ukumanya muno mulinzile ukuombela. Ivyacitikile umwina Robert vingatwazwa ukuvwikisya icisinka cii watiile: “Lino nali ni myaka umupipi na 20 natandike ukuomba incito iyakuomba amanda yamwi. Uwanda umwi pa cisila ca kwinuka umwanaci uno twaombanga nawe watandike ukunena ukuti ningaya uku ng’anda ukwakwe. Vino wacitanga vyalanganga ukuti walondanga ukucita uzelele nani. Pa kutandika nalondanga umwakubepekezya nomba lino papisile insita nizile nkana nu kumunena umulandu uno nakaniile.” Umwina Robert wacimvizye itunko lii, nupya vikwene avino walondekwanga ukucita. Nomba lino papisile insita watandike ukwelenganya ukuti atacisile ukulingana na vino walondekwanga ukucita. Watiile: “Ntakanyile zuwa wakwe vino Jozefu wacisile kuli muka Potifa. (Utan. 39:​7-9) Campezizye mano pali vino cantalile ukukana. Vii ivyacitike vyalangilile ukuti nalondekwanga ukukomya ucuza wane na Yeova.”

¹⁶ Ukucita wakwe vino umwina Robert wacisile kulamwazwa. Nanti icakuti mwakwanisya ukucimvya uwezyo, mwayuzya muti, ‘Uzye nakwanisye ukukana papo kwene sile nanti papisileko insita?’ Nga mwalola ukuti muli muno mulinzile ukuombela mutalinzile ukutoovoka. Mwaya nu luzango ngamwamanya muno mulinzile ukuombela. Mwapepa lyonsi nu kucita vyonsi vino mungacita pakuti mwacita ivitu ukulingana nu kulonda kwakwe Yeova.—Masa. 139:​23, 24.

17. Uzye vino Robert watwalilile ukuya uwa cisinka walenzile uli izina lyakwe Yeova ukucindikwa?

¹⁷ Kuli ivintu ivingi vino tungasambilila kuli ya Robert. Yalanzile nu kuti: “Lino nakanyile ukuya uku mwanaci wii walanzile ukuti, ‘Vino umuze wamunenyile vyali ivya cumi.’ Namuzizye muno walozizye. Walondolwile ukuti cuza wakwe, uwali Nte Wakwe Yeova mpiti, walanzile ukuti ya Nte acance yakacita ivipe umu umfisolo nga yakwata isyuko. Fwandi wanenyile cuza wakwe ukuti wali nu kunjezya pakuti alole nani nga vino nali. Nizile nuvwa ningo sana ukumanya ukuti nalenzile izina lyakwe Yeova ukucindikwa.”

18. I vyani vino mukulondesya ukucita pa cisila ca kubatiziwa? (Loliniko na kambokosi kakuti “Ivipande Vili Vino Mulaipakizya.”)

¹⁸ Nga mwaipeela kuli Yeova nu kubatiziwa, alamwalanga ukuti mukulonda ukulalenga izina lyakwe Leza ukucindikwa na lino ivintu ivitala. Nupya mwaiusya ukuti Yeova akamanya intazi zino mukakwata alino na mezyo yano mukakwanisya ukucimvya. Alamupaala pali vino mukatwalilila ukuya acisinka. Mwataila ukuti alaomvya umupasi wakwe pakuti mukakwanisye ukucita vivyo. (Luka 11:​11-13) Ndi cakuti Yeova wamwazwa mulatwalilila ukulondela Yesu pa cisila ca kubatiziwa.