Uzye Kwaya Angeli Aipe?

Ee, akuno yaya. Uzye yafumile kwi? Iusyini ukuti Leza waumvile angeli ukuya na maka ya kuisoolwela ivyakucita. Pa cisila ca kuumba monsi nu mwanaci akutandikilapo, Adamu na Eva, ciumbwa cimwi ica mupasi citaomvizye ningo maka yakuisoolwela nupya caleesile ucipondoka pano nsi. Ciumbwa cii calenzile ukuti Adamu na Eva nayo yapondokele Leza. (Utandiko 3:1-7; Umbwilo 12:9) Baibo isyalanda mukulungatika izina lya ciumbwa cii ica mupasi nanti cifulo cino ciumbwa ci cakweti ukwi yulu lino citatala capondokela Leza. Nomba pa cisila ca kupondoka, Baibo ikaama iciumbwa cii ukuti Satana, icikapiliula ukuti “Kakaanya,” nupya cikaamwa nu kuti Ciwa, kulikuti “Kazewanya.”—Mateo 4:8-11.

Caulanda icakuti, ucipondoka utasilile papa kwene. Nu mu manda yakwe Nowa kwene, kwali angeli yamwi, “yano asile vifulo vyao vya ulasi, nu kuvifutatila” ukwi yulu. Yene izile pa mpanga ya pansi mu mwili wa antunze nu kutandika kucita iviipe, vino yataumbiilwe ukulacita.—Yuda 6; Utandiko 6:1-4; 1 Petulo 3:19, 20.

I vyani vyacitkile angeli yaa aipe? Lino Leza waleesile mulamba uku konona insi, angeli yaa yasangwike mu mwili wa mipasi nupya iyapita ukwi yulu. Lelo, Leza atayazumilizye ukuswilila kwi yulu pa “vifulo vyao vya ulasi.” Wayaposile maka nu kuyasumbila “mu kanda nu mu ulanda,” muno yakaama ukuti Tatali. (Yuda 6; 2 Petulo 2:4, NWT.) Viwa vii vikatungululwa na Satana ciwa, “mwanangwa wa mipasi yankota,” wiyo “akaezya kuomvya usomvi kuti aloleke wa mungeli wa luswepo.”—Mateo 12:24; 2 Kolinto 11:14.

Baibo ikasambilizya ukuti Uwene wa u Mesiya, uuteeko uwaya ukwi yulu, watandike ukuteeka umu 1914.a Kulingana ni vyacitike insita iiya, Satana ni viwa vyakwe yasumvilwe pano pa mpanga ya pansi. Iviipe ivikuya vikuvulilako sile pa mpanga ya pansi uusininkizyo wakuti Satana Ciwa akuombesya ukonona insi.—Umbwilo 12:9-12.

Lelo kwene, ivintu ivingi ivikucitika nupya ivikuya vikwipilako sile, vili wa unkalwe, vikulangilila sile ukuti impela ya utesi wakwe ciwa yatipalama sana. Likwene sile, viwa vii ivikacuzya antu vyasya vice vifumiziwepo. Lino Uwene wakwe Leza ulateeka insi pa myaka 1,000, iviwa vii vilakwata kasita na kauze ka kwezya antunze umuku wa kusyalikizyako. Lyene vilononwa umuyayaya.—Mateo 25:41; Umbwilo 20:1-3, 7-10.