U Mulandu ci Uno Izina Lyakwe Yeova Lyacindamila Kuli Yesu?

1-2. (a) I vyani vino Yesu wacisile usiku lino yatatala yamukoma pa wanda uwali nu kulondelelapo? (b) A mauzyo ci yano tumaasuka umu cipande cii?

PALI Cini manguzi, pa Nisani 14, umu 33 C.E., Yesu yali nu kumufutuka, kumupingula, kumubepezya, kumuma, alino nu kumukoma. Nupya patapisile ni nsita itali ukufuma pano wamalile ukuliila pamwi na atumwa yakwe icakulya umu muputule wa papela. Lyene Yesu wanenyile atumwa yakwe amazwi yamwi aakukomelezya. Nupya lino yatatala yafuma umu muputule wa papela, Yesu wapefile ipepo ilicindame sana. Tungabelenga ipepo lino Yesu wapefile muli Yoani icipande 17.

² Umu cipande cii, tumalola ivintu vino tungasambililako ukwi pepo lyakwe Yesu. I vyani vino Yesu wasakamile lino atatala wafwa? Uzye ipepo lyakwe lyalangilile ukuti i vyani ivyacindime sana kuli aliwe lino waombanga umulimo wa kusimikila pano nsi? Lekini tuzane masuko uku mauzyo yaa.

“IMANYISYA ANTU YAA IZINA LYAKO”

3. I vyani vino Yesu walanzile api zina lyakwe Yeova, nupya walozizye mwi? (Yoani 17:​6, 26)

³ Yesu walanzile umwi pepo lyakwe ukuti: “Imanyisya antu yaa izina lyako.” Yesu walanzile pa miku iili ukuti walenzile izina lyakwe Yeova ukumanyikwa uku yasambi yakwe. (Belengini Yoani 17:​6, 26.) Uzye walozizye umwi? Uzye wayanenyile izina lino yatamanyile? Asambi yakwe Yesu yali Ayuda, fwandi yamanyile ukuti izina lyakwe Leza a Yeova. Izina lii lyazanwanga imiku iingi umu Malembo a Ciebele. Fwandi Yesu atalandanga api zina lyakwe Leza lelo walandanga pali vino Leza waya. Yesu walenzile yamanye vino Yeova waya, kuli kuti ukulonda kwakwe, imilimo yakwe, alino ni miyele ino wakwata. Nupya Yesu sile aliwe wamanya ningo Yeova.

4-5. (a) Tungalangilila uli vino cikapiliula ukumanya ningo izina lya muntu? (b) Uzye asambi yakwe Yesu izile yamanya uli ningo izina lyakuti Yeova?

⁴ Elenganyini ukuti mu cilongano cinu mwaya dokota nupya eluda uwi zina lyakuti David. Nupya mwamanya umwina wiyo pa myaka iingi. Lelo uwanda umwi umi winu waya umu uzanzo nupya mukulondekwa dokota uwa kumwazwa. Lyene yamitwala uku cipatala kuno umwina wiyo akaomba nupya wamupususha. Vii vyalenga ukuti mutemelweko umwina nupya nga muvwa izina lyakwe cikalenga mwaiusha vino wamucitile. Umwina David a eluda uno mwamanya, nupya lyene a dokota uwamupuswishe.

⁵ Umu nzila ili imwi kwene, asambi yakwe Yesu yamanyile ukuti izina lyakwe Leza a Yeova. Lelo izina lii lizile iliya ilicindame sana kuli aliyo pano Yesu wayazwile ukumanya ningo Yeova. U mulandu ci uno tungalandila vivyo? A pa mulandu wakuti Yesu wakolanyanga Isi muli vyonsi vino walandanga nu kucita. Fwandi atumwa yakwe Yesu izile ‘yamanya’ ningo Yeova ukupitila mu kukutika kuli vino Yesu wasambilizyanga alino nu kulola vino wacitilanga antu.—Yoa. 14:9; 17:3.

“IZINA LYAKO LINO WAMPEELA”

6. Uzye Yesu walozizye mwi lino walanzile ukuti Yeova wamupeezile izina lyakwe? (Yoani 17:​11, 12)

⁶ Umwi pepo lino Yesu wapefile, wapepileko asambi yakwe ukuti: “Yasakamale pa mulandu ni izina lyako lino wampeela.” (Belengini Yoani 17:​11, 12.) Uzye lyene capiliulanga ukuti Yesu wali nu kulaamwa ukuti Yeova? Awe foo. Iushini ukuti umwi pepo lino wapefile walozyanga ukwi zina lyakwe Yeova ukuti “izina lyako.” Fwandi izina lyakwe Yeova litiizile iliya izina lyakwe Yesu. Uzye lyene, Yesu walozizye mwi lino watile izina lyakwe Leza lyapeezilwe kuli aliwe? Ica nkoleelo, Yesu wimililangako Yeova nupya wamuvwangilangako. Wizile umwi zina lyakwe Isi nupya wacisile imilimo iya kuzungusha umwi zina lyakwe Isi. (Yoa. 5:43; 10:25) Cakwe ciili, izina lyakwe Yesu likapiliula ukuti “Yeova A Kapususya.” Fwandi umu upiliulo uwi zina lyakwe Yesu mwaya ni zina lyakwe Yeova.

7. Langililini vino Yesu walandilanga umwi zina lyakwe Yeova.

⁷ Pakuti tuvwikishe vino Yesu walandilanga umwi zina lyakwe Yeova, tulinzile ukwelenganya apa nkombe ino kateeka akatuma uku mpanga yuze. Kateeka akatuma inkombe ukuti yamuvwangilako uku mpanga yuze. Fwandi amazwi yano inkombe ikalanda yakafuma kuli kateeka. Umu nzila ili imwi kwene, Yesu wavwangilako Yeova nu kulanda na antu umwi zina lyakwe Yeova.—Mate. 21:9; Luka 13:35.

8. U mulandu ci uno Yeova walandiile ukuti Yesu wimililangako izina lyakwe lino Yesu atatala wiza pano nsi? (Kufuma 23:​20, 21)

⁸ Lino Yesu waombanga ngi Izwi, wavwangilangako Yeova ukupitila umu kunena ana yakwe Leza akwi yulu alino na antu ivya kucita. (Yoa. 1:​1-3) Yesu afwile ali malaika wino Yeova watumile umu kusakamala Aina Izlaeli lino yafumile umu Ijipti. Lino Yeova wanenanga Aina Izlaeli ukuvwila malaika, wayanenyile nu mulandu uno yalinzile ukucitila vivyo ukuti: A “pa mulandu wakuti akwimililako izina lyane.”a (Belengini Kufuma 23:​20, 21.) Yeova walanzile ukuti Yesu wimililangako izina lyakwe umu nzila yakuti aliwe wamuvwangilangako nupya ali muntu uwasininkizye ukuti vyonsi vino Yeova akacita i vilungame nu kuti u wa muzilo.

“TATA, CINDIKA IZINA LYAKO”

9. Uzye izina lyakwe Yeova lyacindime uli kuli Yesu? Londololini.

⁹ Wakwe vino itulandapo, izina lyakwe Yeova lyacindime kuli Yesu na lino atatala wiza pano insi. Na lino wali pano nsi, walangilile ukuti vyonsi vino wacitanga vyalangililanga vino izina lyakwe Yeova lyacindime kuli aliwe. Nupya lino wali umupiipi nu kumalila umulimo wakwe uwa kusimikila, Yesu wanenyile Isi ati: “Tata, cindika izina lyako.” Papo kwene sile, Isi waswike ni izwi ilya maka ati: “Indicindika, nupya kwene ndalicindika.”—Yoa. 12:28.

10-11. (a) Uzye Yesu walenzile uli izina lyakwe Yeova ukucindikwa? (Loliniko ni cikope.) (b) U mulandu ci uno izina lyakwe Yeova lilinzile ukucindikilwa nu kuya ilya muzilo?

¹⁰ Yesu nawe kwene walenzile izina lyakwe Isi ukucindikwa. Walenzile licindikwe uli? Wanenanga yauze pa miyele yakwe Yeova alino na pa vintu ivingi ivisuma vino akacita. Lelo kwali na vyuze vino wacisile pakuti izina lyakwe Isi licindikwe. Yesu walondekwanga ukulenga cimanyikwe ukuti vyonsi vino Yeova wacita i vilungame nu kuti izina lyakwe i lya muzilo. Yesu walangilile alondezi yakwe vino ukucita vii kwacindime lino wayasambilizye vino yalinzile ukulapepa. Watiile: “Tata witu uwa kwi yulu, leka izina lyako licindikwe.”—Mate. 6:9.

¹¹ U mulandu ci uno izina lyakwe Yeova lilinzile ukucindikilwa nu kuya ilya muzilo? A pa mulandu wakuti umu calo ca Edeni, Satana walanzile ivya ufi pali Yeova Leza. Satana walanzile ukuti Yeova u wa ufi nupya wimile ivisuma kuli Adamu na Eva. (Utan. 3:​1-5) Vino Satana walanzile vyapiliulanga ukuti Yeova asicita ivintu umu nzila isuma. Pa mulandu wakuti Satana walanzile ivya ufi pali Yeova, antu yangaelenganya iviipe pali Yeova. Lino papisile insita, umu manda yakwe Yobo, Satana walanzile ukuti yayo akaombela Yeova yakamuombela pa mulandu wakuti akayacitila ivintu ivisuma. Nupya Satana walanzile ati, kusi umuntu angatwalilila ukutemwa Yeova nu kutwalilila ukumuombela ndi cakuti wakwata intazi. (Yobo 1:​9-11; 2:4) Fwandi palondekwanga ukupita insita pakuti uwa ufi amanyikwe, nga Yeova nanti Satana.

“NKUPEELA UMI WANE”

12. I vyani vino Yesu waitemiilwe ukucita pa mulandu wakuti watemilwe izina lyakwe Yeova?

¹² Pa mulandu wakuti Yesu watemilwe Yeova, walondanga ukwezya apapezile amaka yakwe ukulenga izina lyakwe Yeova ukucindikwa alino nu kulilenga ukuya ilya muzilo. Watiile: “Nkupeela umi wane.” (Yoa. 10:​17, 18) Yesu waitemiilwe nu kufwilapo api zina lyakwe Yeova.b Antu yaili aakutandikilapo, kuli kuti Adamu na Eva yakanyile ukuvwila Yeova nu kusoololapo ukuya uku lusansa lwakwe Satana. Asi mulandu na vivyo, Yesu waitemiilwe ukwiza pano nsi nu kulanga ukuti watemilwe Yeova. Yesu walangilile vii lino watwalilile ukuya ni cuvwila kuli Yeova muli vino walandanga nu kucita. (Aeb. 4:15; 5:​7-10) Watwalilile ukuya uwa kaele ukufikila na lino wafwile apa cimuti ca kucuziwilwapo. (Aeb. 12:2) Vino wacisile vyalangilile ukutii watemilwe Yeova ni zina lyakwe.

13. U mulandu ci uno Yesu aliwe sile walinzile ukusinila Satana ukuti u wa ufi? (Loliniko ni cikope.)

¹³ Vyonsi vino Yesu wacitanga vyalangilile ukuti Satana u wa ufi, asi Yeova. (Yoa. 8:44) Yesu wamanyile ningo Yeova ukucila umuntu ali wensi pano nsi. Ndi cakuti pali vino Satana walanzile pali Yeova pali vimwi ivya cumi, Yesu nga wamanyile. Lelo Yesu watwalilile ukucingilila izina lyakwe Yeova. Na lino calolike kwati Yeova watamutazyela, Yesu waitemiilwe ukufwilapo nu kutwalilila ukuya uwa cisinka ukucila ukukanauvwila Yeova.—Mate. 27:46.c

“IMALA MULIMO UNO WAMPEELA”

14. Uzye Yeova walambwile uli Yesu pali vino wali na ucisinka?

¹⁴ Umwi pepo lino Yesu wapefile usiku lino atatala wafwa, walanzile ukuti: “Imala mulimo uno wampeela.” Wataile ukuti Yeova wali nu kumulambula pali ucisinka wakwe. (Yoa. 17:​4, 5) Ukutaila Yeova i cintu icicindame cino Yesu wacisile. Yeova atalesile ukuti Yesu atwalilile ukuya umwi lindi. (Mili. 2:​23, 24) Yeova watuutulwile Yesu nu kumupeela icifulo icikalamba ukwi yulu. (Filipi 2:​8, 9) Lyene, Yesu wizile atandika ukuteeka ngu Mwene umu Wene wakwe Leza. I vyani vino Uwene uu wali nu kucita? Umwi pepo lino watulangilile ivya kupepa mwaya amazwi aakatunena vino Uwene ulacita, ukuti: “Uwene wako wize. Kulonda kwako [Yeova] kucitike pano nsi nu kwi yulu.”—Mate. 6:10.

15. I vyani na vyuze vino Yesu alacita?

¹⁵ Likwene sile, Yesu alalwishanya na alwani yakwe Leza nupya alonona umwipe pa Amagedoni. (Kuso. 16:​14, 16; 19:​11-16) Lyene pa cisila cakwe vivyo, alasumbila Satana umu “ciwina icaula impela,” muno atalakwata amaka akucita icili consi. (Kuso. 20:​1-3) Yesu alalenga kuye umutende nupya alalenga antu ukuya amalilike lino alateeka umu myaka 1,000. Alatuutulula afwe. Alalenga insi yonsi ukuya paladaise. Yeova alafikilizya ukulonda kwakwe.—Kuso. 21:​1-4.

16. I vyani ivilacitika pa cisila ca myaka 1,000 iya kuteeka kwakwe Klistu?

¹⁶ I vyani vino tungenekela ukucitika pa cisila ca kuteeka pa myaka 1,000? Uluyembu luno antu yapyana nu kukanamalilika vilafumiziwapo. Antunze yatalalondekwa ukulenga ukuti yelelwe imembu zyao pa mulandu ni lambo nanti ukulondekwa uwa kuyavwangilako nanti ya simapepo. Nupya umulwani wa kushalikizyako kuli kuti “imfwa,” alafumiziwapo. Mu malindi mutalaya antu. Afwe yalatuutululwa. Antu yonsi pano nsi yalaya amalilike.—1 Kol. 15:​25, 26.

17-18. (a) I vyani vilacitika pa cisila ca kuteeka kwa myaka 1000? (b)  I vyani vino Yesu alacita lino insita ilafika iyakuti amalile ukuteeka? (1 Kolinto 15:​24, 28) (Loliniko ni cikope.)

¹⁷ I vyani na vyuze ivilacitika pa cisila ca myaka 1,000 iya kuteeka kwakwe Klistu? Pa nsita yii, kulacitika icintu iciiyele. Kutalaya umuntu ali wensi alaatwisika ukuti Yeova uwa muzilo nupya a Leza uwaya nu mulinganya. U mulandu ci? Umu calo ca Edeni Satana walanzile ukuti Yeova u wa ufi nu kuti asiteeka antu pa mulandu wakuti wayatemwa. Ukufuma liili kwene yayo aacindika Yeova yatwalilila ukulenga izina lyakwe ukucindikwa. Fwandi pa cisila ca kuteeka kwa myaka 1000, Izina lyakwe Yeova lilacindikwa. Nupya cilamanyikwa uku yantu ukuti Yeova a Tata uwaya nu kutemwa.

¹⁸ Pa cisila ca myaka 1,000 iya kuteeka kwakwe Yesu, antu yonsi yalamanya ukuti vyonsi vino Satana walanzile pali Yeova i vya ufi. I vyani vino Yesu alacita lino insita ilafika iyakuti amalile ukuteeka? Uzye alacita wakwe vino Satana wacisile nu kupondokela Yeova? Awe foo. (Belengini 1 Kolinto 15:​24, 28.) Yesu alaswilizya Uwene kuli Isi. Nupya alatandika ukuteekwa na Yeova. Yesu wapusanako na Satana pano wene waipeelesha ukusha vyonsi pa mulandu wakuti watemwa Yeova.

19. Uzye izina lyakwe Yeova lyacindama uli kuli Yesu?

¹⁹ Fwandi tungalola umulandu uno Yeova wapeelile Yesu izina lyakwe. Yesu walangilila vino Isi waya. Nomba uzye izina lyakwe Yeova lyacindama uli kuli Yesu? Lyacindama kuli Yesu ukucila icintu icili consi. Waitemiilwe ukufwila api zina lii nupya alaitemelwa ukupeela vyonsi kuli Yeova pa cisila ca myaka 1,000 iya kuteeka kwakwe. Uzye tungakolanya uli Yesu? Tulaasuka iuzyo lii umu cipande icilondelilepo.