CIPANDE CA KUSAMBILILAMO 23
LWIMBO NA. 2 Wewe Yeova
Vino Izina Lyakwe Yeova Lyacindama Kuli Sweswe
“Yeova walanda wati: Mwemwe ya nte yane.”—EZA. 43:10.
VINO TUMASAMBILILAPO
Vino tungacita pakuti tulange ukuti Yeova u wa muzilo nu kuti vyonsi vino Satana walanda pali aliwe i vya ufi.
1-2. Uzye twamanya uli ukuti izina lyakwe Yeova lyacindama kuli Yesu?
IZINA lyakwe Yeova lyacindama sana kuli Yesu. Kutaaya umuntu ali wensi uwacisilepo wakwe vino Yesu wacisile pa kulenga izina lyakwe Yeova ukumanyikwa. Umu cipande icafumako, twasambilile ukuti Yesu waitemiilwe ukufwa pakuti alange ukuti Yeova u wa muzilo nu kuti vyonsi vino akacita i vilungame. (Mako 14:36; Aeb. 10:7-9) Nupya pa cisila ca myaka 1,000 iya kuteeka kwakwe, Yesu alaitemelwa ukupeela amaka kuli Yeova pano akalonda ululumbi lonsi ukuya kuli Yeova. (1 Kol. 15:26-28) Vino Yesu watemwa izina lyakwe Leza vikalangilila apaswe vino ucuza wakwe na Isi waya.
2 Yesu wizile pano nsi umwi zina lyakwe Isi. (Yoa. 5:43; 12:13) Walenzile alondezi yakwe yamanye izina lyakwe Isi. (Yoa. 17:6, 26) Wasambilizyanga antu nu kucita ivizungusho umwi zina lyakwe Yeova. (Yoa. 10:25) Yesu walenzile kuli Yeova ukuti asakamala asambi yakwe ‘pa mulandu ni izina lyakwe.’ (Yoa. 17:11) Ukwaula nu kutwisika izina lyakwe Yeova lyacindime sana kuli Yesu ukucila icintu icili consi. Uzye lyene umuntu angalanda ukuti umwina Klistu ndi cakuti atamanya izina lyakwe Leza nupya asiliomvya?
3. I vyani vino tumasambilila umu cipande cii?
3 Swe Ina Klistu, tukakolanya Yesu ndi cakuti tukulanga ukutemwa nu mucinzi ukwi zina lyakwe Yeova. (1 Pet. 2:21) Umu cipande cii, tumalola umulandu uno Yeova wapeelela antu aakasimikila “lyasi lisuma lii ilya Wene” izina lyakwe. (Mate. 24:14) Lyene tumasambilila na pali vino izina lyakwe Yeova lyacindamila kuli sweswe wenga na wenga.
“ANTU AKAAMILWA UKWI ZINA LYAKWE”
4. (a) U mulimo ci uno Yesu wapeezile asambi yakwe lino atatala waswilila ukwi yulu? (b) Iuzyo ci lino tumaasuka?
4 Lino Yesu atatala waswilila ukwi yulu, wanenyile asambi yakwe ukuti: “Mulapokelela maka lino umupasi wa muzilo uliza pali mwemwe, nupya mulaya inte zyane umu Yelusalemu, mu Yudeya monsi nu mu Samaliya alino nu kufika kuno insi yapela.” (Mili. 1:8) Fwandi lyasi lisuma lyali nu kusimikilwa konsi asi mu Izlaeli sile. Lino papisile insita, antu amu nsi yonsi yakweti ishuko ilya kuya alondezi yakwe Yesu. (Mate. 28:19, 20) Lelo Yesu walanzile ati: “Mulaya inte zyane.” Uzye asambi yaa apya yalondekwanga ukumanya izina lyakwe Yeova, nanti yali nu kuya sile inte zyakwe Yesu? Ivyacitike ivyalembwa umwi buku lya Milimo icipande 15 vikatwazwa ukwasuka iuzyo lilyo.
5. Uzye atumwa na aonsi akalamba amu Yelusalemu yalangilile uli ukuti yalondanga antu yonsi yamanye izina lyakwe Yeova? (Loliniko ni cikope.)
5 Umu 49 C.E., atumwa na aonsi akalamba yakomenkine umu Yelusalemu pakuti yangalanzyanya ndi cakuti antu aatali Ayuda yalondekwanga ukuzembululwa nanti foo pakuti yaye Aina Klistu. Lino yamalilanga ukulanzyanya kuu, Yakobo umwina wakwe Yesu walanzile ati: “[Petulo] watalondolola ningo vino Leza pa muku wa kutandikilako wapiliukile uku yantu ya mu nko pakuti asoolole antu akaamilwa ukwi zina lyakwe.” I zina ci lino walandangapo? Nupya wambwile mazwi yakwe kasesema Amosi lino watiile: “Pakuti antu asyala yalonde Yeova kumwi na amu nko zyonsi ali kuti antu akaamilwa pi zina lyane, Yeova aliwe wavwanga.” (Mili. 15:14-18) Asambi yaa yataali nu kusambilila sile pali Yeova lelo yali nu ‘kulaamilwa ukwi zina lyakwe.’ Cii cikupiliula ukuti yali nu kulenga izina lyakwe Leza ukumanyikwa uku yantu nupya antu yali nu kuyamanya ukuti imililangako izina lyakwe.
Lino amwi iumba ilikatungulula mu manda ya Ina Klistu akutandikilapo yakomenkine, ilwike ukuti Aina Klistu yalinzile ukulaamilwa api zina lyakwe Leza (Lolini palaglafu 5)
6-7. (a) U mulandu ci uno Yesu wiziile pano nsi? (b) U mulandu ci na uze ucindame uno Yesu wiziile pano nsi?
6 Izina lyakwe Yesu likapiliula ukuti “Yeova a Kapususha,” nupya Yeova waomvizye Yesu ukupususha antu yonsi aataila Yeova na Yesu. Yesu wizile pano nsi nu kupeela umi wakwe pa mulandu wa yantu. (Mate. 20:28) Lino wapeezile umi wakwe ukuya ilambo, walenzile ukuti antu yelelwe imembu zyao nu kuya nu umi wa manda pe.—Yoa. 3:16.
7 Nomba u mulandu ci uno antunze yalondekelwanga ilambo? A pa mulandu ni vyacitike umu calo ca Edeni. Wakwe vino icipande icafumileko calanzile, avyazi akutandikilapo kuli kuti Adamu na Eva, yapondokiile Yeova nupya cii calenzile ukuti yapanye ishuko ilya kwikala amanda pe. (Utan. 3:6, 24) Lelo, Yesu wizile pano nsi umu kucita ivintu na vyuze ivyacizile na pa kupususha antu ayembu. Satana walanzile ivya ufi pali Yeova. (Utan. 3:4, 5) Fwandi antu yalondekwanga ukumanya ukuti pasi vino Yeova waluvyanyizye alino nu kumanya ukuti izina lyakwe i lya muzilo. Nupya Yesu ali muntu uwalinzile ukucita vivyo pa mulandu wakuti wimililangako Yeova nupya wacisile vyonsi ukulingana na vino Yeova walondanga ukuti acite.
Uzye umuntu angalanda ukuti u mulondezi wakwe Yesu ndi cakuti atamanya izina lyakwe Isi nupya asiliomvya?
8. I vyani vino antu yonsi ataila muli Yesu yalinzile ukumanya?
8 Ayuda yonsi alino na ataali Ayuda aali nu utailo muli Yesu yalondekwanga ukumanya ukuti yali nu kupusukila muli Yeova Leza, Isi wakwe Yesu. (Yoa. 17:3) Nupya wakwe vino cali kuli Yesu, nayo kwene yali nu kumanyikilwa ukwi zina lyakwe Yeova. Nupya yalinzile ukumanya umulandu uno cacindamila ukulenga izina lyakwe Yeova ukucindikwa. Ukucita vii u kwali nu kulenga ukuti yapusuke. (Mili. 2:21, 22) Alondezi yakwe Yesu yonsi aali nu utailo yalondekwanga ukusambilila pali Yeova alino na Yesu. Fwandi tungalola umulandu uno umwi pepo lino Yesu wapefile washalikizye na mazwi aakuti: “Imanyisya antu yaa izina lyako nupya ndatwalilila ukulimanyisya, pakuti nayo yaatemwa antu yauze wakwe vino wantemwa na pakuti inje muli aliyo.”—Yoa. 17:26.
“MWEMWE YA NTE YANE”
9. Tungalanga uli ukuti izina lyakwe Yeova lyacindama kuli sweswe?
9 Fwandi alondezi yakwe Yesu yonsi acisinka yalinzile ukulenga izina lyakwe Yeova ukucindikwa. (Mate. 6:9, 10) Nupya yalinzile ukulalola izina lyakwe Yeova ukuti ali zina ilicindame sana ukucila mazina yonsi. Fwandi yalinzile ukucitapo vimwi. Nomba i vyani vino tulinzile ukucita pa kulenga izina lyakwe Yeova ukucindikwa nu kusinila Satana ukuti vyonsi vino walanzile pali Yeova i vya ufi?
10. I vyani vino tukabelenga umwi buku lyakwe Ezaya ivipande 42-44? (Ezaya 43:9; 44:7-9) (Loliniko ni cikope.)
10 Umwi buku lyakwe Ezaya ivipande 42 ukufika uku 44, tukasambilila pali vino tungacita pakuti tulenge izina lyakwe Yeova ukucindikwa. Umu vipande vii, Yeova wanena antu aasimupepa ukuti yalangilile ndi cakuti ya leza yao acumi. Wakwe vino cikaya umu cilye, wayanena ukuleta ya kamboni aakusinila ukuti ya leza yao acumi. Lelo kutaya kamboni ali wensi.—Belengini Ezaya 43:9; 44:7-9.
Kwaya inzila izingi zino tungalangilamo ukuti Yeova a Leza wa cumi (Lolini mapalaglafu 10-11)
11. I vyani vino Yeova wanena antu yakwe ivyaya pali Ezaya 43:10-12?
11 Belengini Ezaya 43:10-12. Yeova walanda pa yantu yakwe ukuti: “Mwemwe ya nte yane, . . . nupya nene indi Leza.” Nupya akalonda ukuti yasuke iuzyo lii ilyakuti: “Uzye kwaya Leza muze ukucila pali nene?” (Eza. 44:8) Twakwata ishuko ilya kwasuka iuzyo lii. Tukalanga ukuti Yeova a Leza wa cumi ukupitila muli vino tukalanda na vino tukacita. Izina lyakwe lyacila mazina yonsi. Nupya vino tukacita umu umi witu vikalanga ukuti twatemwa Yeova nupya twaya acisinka kuli aliwe nanti cakuti Satana akalenga ukuti citutalile ukucita vivyo. Nga tukucita vii, tukacindika izina lyakwe.
12. Uzye usesemo uwaya pali Ezaya 40:3, 5 wafikiliziwe uli?
12 Tukakolanya Yesu Klistu ndi cakuti tukulenga izina lyakwe Yeova ukucindikwa alino nu kunenako yauze pali Yeova. Ezaya wasoowile ukuti kwali umwi uwali nu ‘kupekanya inzila yakwe Yeova.’ (Eza. 40:3) Uzye vino wasoowile vyafikiliziwe uli? Yoani Kabatizya wapekanyizizye Yesu inzila, pano Yesu wiziile umwi zina lyakwe Yeova nupya walandilanga umwi zina lyakwe Yeova. (Mate. 3:3; Mako 1:2-4; Luka 3:3-6) Nupya usesemo walanzile ukuti: “Lulumbi lwakwe Yeova lulasokololwa.” (Eza. 40:5) Uzye cico cali nu kucitika uli? Lino Yesu wizile pano nsi wimililangako Yeova nupya cali kwati Yeova aliwe wizile pano nsi.—Yoa. 12:45.
13. Uzye tungakolanya uli Yesu?
13 Wakwe Yesu, naswe kwene sweswe inte zyakwe Yeova. Tukaamilwa api zina lyakwe Yeova nupya tukanena antu pa visuma vino wacita. Nomba pakuti tuye inte yakwe Yeova isuma, tulinzile nu kulenga antu yamanye vino Yesu wacita pa kulenga izina lyakwe Yeova ukucindikwa. (Mili. 1:8) Kutaya inte yakwe Yeova na yuze iingacila pali Yesu, nupya tukakolanya vino Yesu wacisile. (Kuso. 1:5) Nomba uzye izina lyakwe Yeova lyacindama uli kuli sweswe?
VINO IZINA LYAKWE YEOVA LYACINDAMA KULI SWESWE
14. Wakwe vino Masamu 105:3 ikalanda, uzye tukauvwa uli api zina lyakwe Yeova?
14 Twatemwa izina lyakwe Yeova. (Belengini Masamu 105:3.) Yeova akauvwa ningo ndi cakuti tukuzangila api zina lyakwe. (Yele. 9:23, 24; 1 Kol. 1:31; 2 Kol. 10:17) ‘Ukuilumbila muli Yeova’ kukapiliula ukuya ni cilumba pa mulandu wakuti Yeova a Leza witu. Tukacilola ukuti ishuko ukunenako yauze ukuti Yeova u wa muzilo nu kuti vyonsi vino akacita i vilungame. Tutalinzile ukuvwa insonyi ukunenako yano tukaomba nayo, yano tukasambilila nayo, ainamupalamano, alino na yauze ukuti sweswe Ya Nte Yakwe Yeova. Ciwa akalonda ukuti tute ukunena antu pali Yeova. (Yele. 11:21; Kuso. 12:17) Icisinka icakuti, Satana na ya kasesema ya ufi yakalonda ukuti antu yataomvya izina lyakwe Yeova. (Yele. 23:26, 27) Lelo ukutemwa kuno twatemwa Yeova kukalenga tutwalilile ukuya ni nsansa “uwanda onsi.”—Masa. 5:11; 89:16.
15. Uzye cikapiliula cani ukwamila api zina lyakwe Yeova?
15 Tukatwalilila ukwama api zina lyakwe Yeova. (Yowe. 2:32; Loma 10:13, 14) Ukwamila api zina lyakwe Yeova kwacila na pa kulimanya sile alino nu kuliomvya. Tukamanya ningo Leza, kumutaila, alino nu kulalenga uwazwilizyo nu utunguluzi kuli aliwe. (Masa. 20:7; 99:6; 116:4; 145:18) Tukanena antu api zina lyakwe Yeova na pa miyele yakwe nupya tukayakomelezya ukuti yalapile nu kutandika ukucita ivintu ivikazanzya Yeova.—Eza. 12:4; Mili. 2:21, 38.
16. Uzye tungalanga uli ukuti Satana uwa ufi?
16 Tukaitemelwa ukucula pakuti izina lyakwe Yeova lilumbanyiziwe. (Yako. 5:10, 11) Ndi cakuti twatwalilila ukuya acisinka kuli Yeova na lino tukucula, tukasinila Satana ukuti u wa ufi. Umu manda yakwe Yobo, Satana walanzile pa yantu akaombela Yeova ukuti: “Umuntu ali nu kupeela vyonsi vino wakwata pa mulandu nu umi wakwe.” (Yobo 2:4) Nupya Satana walanzile ukuti antu yangapepa sile Yeova ndi cakuti ivintu vikuyapitila ningo nu kuti nga yakwata intazi yangata ukumuombela. Yobo walangilile ukuti vii i vya ufi. Ndakai, naswe kwene tungalangilila ukuti vino Satana walanzile i vya ufi ndi cakuti twatwalilila ukuombela Yeova asi mulandu tukucula nanti ndi cakuti Satana watuletela intazi. Tungasininkizya ukuti Yeova alatwalilila ukutusakamala pa mulandu ni zina lyakwe.—Yoa. 17:11.
17. Ukulingana na 1 Petulo 2:12, iinzila ci na yuze ino tungalumbanyizizyamo izina lyakwe Yeova?
17 Tukaombesha pa kulanga ukuti twacindika izina lyakwe Yeova. (Mapi. 30:9; Yele. 7:8-11) Pa mulandu wakuti tukaamilwa api zina lyakwe Yeova nu kumwimililako, tungalenga izina lyakwe ukulumbanyiziwa nanti kusuulwa. (Belengini 1 Petulo 2:12.) Fwandi tulinzile ukulalumbanya Yeova muli vino tukalanda na muli vino tukacita. Ndi cakuti twacita vivyo, nanti cakuti tutamalilika tulalenga izina lyakwe Yeova ukucindikwa.
18. Iinzila ci na yuze ino tungalangilamo ukuti izina lyakwe Yeova lyacindama kuli sweswe? (Loliniko na futunoti.)
18 Tukalola ukuti izina lyakwe Yeova lyacindama sana ukucila vino antu yakaelenganya pali sweswe. (Masa. 138:2) U mulandu ci uno ukucitila vii kwacindamila? A pa mulandu wakuti ndi cakuti tukucita ivintu ivikazanzya Yeova, antu aingi yasitemwa nupya yangalanda iviipe pali sweswe.a Yesu waitemiilwe ukufwa imfwa iya muzewanya pa mulandu ni zina lyakwe Yeova. Yesu “ataasakamile pa kuzewana” nanti pali vino antu yelenganyanga pali aliwe. (Aeb. 12:2-4) Wisile amano uku kucita ukulonda kwakwe Leza.—Mate. 26:39.
19. Uzye mukalola uli izina lyakwe Yeova, nupya u mulandu ci?
19 Twatemwa ukuombela Yeova nupya tukauvwa ningo ukwamwa ukuti Ya Nte Yakwe Yeova. Pa mulandu na vii, tukaitemelwa ukuzizimizya umuzewanya onsi ungiza pali sweswe. Izina lyakwe Yeova lyacindama sana kuli sweswe kucila na vino antu yakaelenganya pali sweswe. Fwandi lekini tutwalilile ukulalumbanya izina lyakwe Yeova asi mulandu ni ntazi zino Satana angatuletela. Ndi cakuti tukucita vii, tulalanga ukuti izina lyakwe Yeova lyacindama sana kuli sweswe, wakwe vino lyacindama kuli Yesu Klistu.
LWIMBO NA. 10 Lumbanyini Yeova Leza Witu!
a Nanti sile a Yobo uwali nu utailo watandike ukwelenganya sana pali vino antu yelenganyanga pali aliwe lino aonsi yatatu yalanzile ukuti kwali iviipe vimwi vino wacisile. Pa kutandika, lino waponzizye ana yakwe ni vintu vyonsi vino wakweti, “Yobo aatayembwike nanti ukupeela Leza umulandu.” (Yobo 1:22; 2:10) Nomba lino yatandike ukumubepezya ukuti wacisile iviipe, watandike ukulanda “ivya cilandelande.” Wisile sana mano uku kuipokolola ukucila ukulenga ukuti Yeova aliwe acindikwe.—Yobo 6:3; 13:4, 5; 32:2; 34:5.