Matu
5 Ke Jesus ear lo jarlepju in armej ro, ear wanlõñl̦o̦k ñan ioon tol̦ eo. Im ke ear jijet ijo, ri-kal̦oor ro an rar itok ñan ippãn. 2 Innem ear jino kõnnaan im katakin er, im ba:
3 “Em̦õn̦õn̦õ ro rej kile bwe rej aikuji tõl eo an Anij kõnke aer Aelõñin lañ.*
4 “Em̦õn̦õn̦õ ro rej bũrom̦õj kõnke naaj kaenõm̦m̦an er.
5 “Em̦õn̦õn̦õ ro ettã bũrueer* kõnke renaaj jolõte lal̦ in.
6 “Em̦õn̦õn̦õ ro relukkuun kõn̦aan* bwe en wõr wãnõk* kõnke naaj katõprak kõn̦aan in aer.
7 “Em̦õn̦õn̦õ ro rej kwal̦o̦k tũriam̦o kõnke naaj tũriam̦okake er.
8 “Em̦õn̦õn̦õ ro erreo bũrueer kõnke renaaj lo Anij.
9 “Em̦õn̦õn̦õ ro rej kõm̦m̦an aenõm̦m̦an* kõnke naaj n̦aetaer nejin Anij.
10 “Em̦õn̦õn̦õ armej ro me ro jet rej kaeñtaan er kõn aer kõm̦m̦ani men ko rewãnõk* kõnke aer Aelõñin lañ.
11 “Kom̦win m̦õn̦õn̦õ ñe armej rej kajook kom̦ im kaeñtaan kom̦ im rej riab im kwal̦o̦k elõñ kain naan ko renana n̦ae kom̦ kõn wõt ña. 12 Kom̦win kanooj lañlõñ im m̦õn̦õn̦õ kõnke ewõr ami jeraam̦m̦an el̦ap ilañ. Ãindein aer kar bar kaeñtaan ri-kanaan ro rar mour m̦okta jãn kom̦.
13 “Kom̦ij ãinwõt jo̦o̦l̦ ñan lal̦ in, bõtab el̦aññe ejako nemãn jo̦o̦l̦ eo, enaaj ewi wãween an bar jepl̦aak nemãn? Enaaj ejjel̦o̦k tokjãn jo̦o̦l̦ eo, men eo de eo remaroñ kõm̦m̦ane ej jonabõjl̦o̦k bwe armej ren jujuuri.
14 “Kom̦ij ãinwõt meram ñan lal̦ in. Juon bukwõn ejjãmin n̦ojak el̦aññe ej pãd ioon juon tol̦. 15 Ejjel̦o̦k armej ej ittil l̦aam̦ im kalbubuuki kõn iep.* Bõtab, rej likũti ilo jikin l̦aam̦ bwe en rome aolep ro ilo m̦weo. 16 Ilo ejja wãween in wõt, ami meram en romaak im̦aan armej bwe ren lo jerbal ko rem̦m̦an kom̦ij kõm̦m̦ani im nõbar Jememi ilañ.
17 “Jab l̦õmn̦ak bwe iar itõn jol̦o̦k Kien eo im naan ko an ri-Kanaan ro. Iar jab itõn julo̦k men kein, ak iar itok bwe in kajejjet kũtieer. 18 Ij ba ñan kom̦ bwe ãinwõt an lañ im lal̦ ban jako, ãindein ejjel̦o̦k juon iaan naan ko ilo Kien eo renaaj jako m̦ae iien aolepeer im jejjet kũtieer. 19 Jabdewõt eo ej rupe juon iaan kien kein me armej rej watõki bwe rejjab aorõk, im ej katakin ro jet bwe ren bar rupi, naaj watõke bwe ejekkar ñan Aelõñin lañ. Bõtab, eo ej pokake kien kein im katakin ro jet kaki, naaj watõke bwe ekkar ñan Aelõñin lañ. 20 Ij ba ñan kom̦ bwe el̦aññe ejjab l̦apl̦o̦k ami wãnõk jãn skraib im Parisi ro, kom̦ jãmin del̦o̦ñe Aelõñin lañ.
21 “Kom̦ jel̦ã bwe rekõn ba ñan ro ilo iien ko etto: ‘Kwõn jab uror bwe jabdewõt eo ej uror, naaj ekajete ilo jikin ekajet.’ 22 Ak ij ba ñan kom̦ bwe jabdewõt eo ejjab bõjrak jãn an kõjdate jein ak jatin, naaj ekajete ilo jikin ekajet. Jabdewõt eo ej kajooke jein ak jatin kõn naan ko reddo, naaj bõkl̦o̦ke ñan Im̦õn Ekajet eo El̦ap.* Jabdewõt eo ej ba, ‘Kwõbwebwe!’ naaj liaakel̦o̦k ñan kijeek ilo Kena.*
23 “Innem el̦aññe kwõj bõktok juon am̦ menin lel̦o̦k ñan lokatok eo im kwõj keememej bwe jeim̦ ak jatũm̦ ej inepata ippam̦, 24 kwõn likũti menin lel̦o̦k eo am̦ im̦aan lokatok eo, im ilo̦k ñan ippãn jeim̦ ak jatũm̦. Kwõj aikuj m̦okta kõm̦m̦an aenõm̦m̦an ippãn, innem ñe em̦õj, kwõmaroñ jepl̦aak im ajel̦o̦k menin lel̦o̦k eo am̦.
25 “El̦aññe juon armej ej liaakel̦o̦k eok ñan kien kõnke kom̦uri ippãn, kwõn m̦õkaj im kõm̦adm̦õde apañ eo ke ejja wõr wõt iien m̦okta jãn amiro ilo̦k ñan im̦õn ekajet. Bõlen emaroñ jab liaakel̦o̦k eok ñan ri-ekajet eo, im ri-ekajet eo eban ba ñan ri-waj eo bwe en kalbuuji eok. 26 Ij ba ñan eok bwe kwoban diwõj jãn kalbuuj m̦ae iien em̦õj am̦ kõl̦l̦ãik aolepen m̦uri eo am̦.*
27 “Kom̦ jel̦ã bwe rekõn ba: ‘Kwõn jab lejãn.’* 28 Ak ij ba ñan kom̦ bwe jabdewõt eo ejjab bõjrak jãn an kalimjeke juon kõrã im mejkaiie kake, em̦õj an kadede lejãn ippãn lio ilo bũruon. 29 El̦aññe mejam̦ ituanmoon̦ ej kõm̦m̦an bwe kwõn jerawiwi, kwõn itũki im jol̦o̦ke. Em̦m̦anl̦o̦k ñe ejako juon iaan m̦õttan ko ilo ãnbwinnũm̦ jãn ñe ejako aolepen ãnbwinnũm̦ ilo Kena.* 30 Bareinwõt, el̦aññe pã n̦e peim̦ ituanmoon̦ ej kõm̦m̦an bwe kwõn jerawiwi, kwõn m̦wijiti im jol̦o̦ke. Em̦m̦anl̦o̦k ñe ejako juon iaan m̦õttan ko ilo ãnbwinnũm̦ jãn ñe ejako aolepen ãnbwinnũm̦ ilo Kena.*
31 “Bareinwõt, rekõn ba: ‘Jabdewõt em̦m̦aan eo ej jepel jãn kõrã eo pãleen, en lel̦o̦k ñane juon peba in jepel.’ 32 Ak ij ba ñan kom̦, el̦aññe jabdewõt em̦m̦aan ej jepel jãn kõrã eo pãleen meñe kõrã eo ear jab l̦õñ,* men in emaroñ kõm̦m̦an an kõrã in lejãn. Im jabdewõt eo ej m̦areik kõrã in me kar jepel jãne ilo wãween in, ej bar lejãn.
33 “Kom̦ bar jel̦ã bwe rekõn ba ñan ro ilo iien ko etto: ‘Kwõn jab kajje el̦aññe kwõjjab maroñ katõprake men eo kwõj ba, bõtab kwõn kajejjeti men ko kwaar kallim̦ur kaki im̦aan mejãn Jeova.’* 34 Ak ij ba ñan kom̦: Kom̦win jab kajje ñan jidik. Jab kajje kõn lañ kõnke ej tũroon eo an Anij, 35 jab kajje kõn lal̦ kõnke ej eran neen, jab kajje kõn Jerusalem kõnke ej ijo jikin Kiiñ eo eutiej, 36 im jab kajje kõn bõram̦ kõnke kwõjjab maroñ ukot juon iaan kool̦ ko ilo bõram̦ bwe en mouj ak kilmeej. 37 Men eo eaorõk in ej bwe ñe kom̦ij ba ‘Aet’ en aet, ak ñe ‘Jaab’ en jaab, kõnke jabdewõt naan kom̦ naaj bar ba ijello̦kun naan kein rej itok jãn eo enana.
38 “Kom̦ jel̦ã bwe rekõn ba: ‘Mãj on̦ããn mãj im ñi on̦ããn ñi.’ 39 Ak ij ba ñan kom̦: Kwõn jab jum̦aik juon armej nana. El̦aññe jabdewõt ej jeptake jepam̦ ituanmoon̦, kwõn bar oktak ñan ituanmiiñ bwe en bar jeptake. 40 Im ñe juon ej bõk eok ñan im̦õn ekajet bwe en bõk nuknuk eo am̦, eokwe kwõn bar lel̦o̦k ñane kopã eo am̦. 41 Ñe juon eo eutiej ej kõjerbal eok bwe kwõn ineeke juon men ium̦win juon m̦ail̦,* kwõn etal ippãnl̦o̦k ium̦win ruo m̦ail̦. 42 Ñe juon ej kajjitõk jipañ ippam̦, kwõn jipañe, im ñe juon ej kajjitõk bwe kwõn kam̦uriiki,* kwõn jab m̦akoko.
43 “Kom̦ jel̦ã bwe rekõn ba: ‘Kwõn yokwe ri-turum̦* im dike ro rej kõjdat eok.’ 44 Ak ij ba ñan kom̦: Wõnm̦aanl̦o̦k wõt im yokwe ro rej kõjdate kom̦, im jab bõjrak jãn ami jar kõn ro rej kaeñtaan kom̦. 45 Ilo wãween in, kom̦ij erom ro nejin Jememiwõj ilañ, eo ej kõtak al̦ ioon ro rem̦m̦an im ro renana, im ej kawõt ioon ro rewãnõk im ro rejjab wãnõk. 46 El̦aññe kwõj yokwe ro wõt rej yokwe eok, ta tokjãn? Ta ri-tõltõl eowõj ro rejjab bar kõm̦m̦ane men in ke? 47 Im el̦aññe kwõj yokyokwe wõt ro jeim̦ im jatũm̦, em̦m̦anl̦o̦k men eo kwõj kõm̦m̦ane jãn ro jet ke? Ta armej in aelõñ ko jet rejjab bar kõm̦m̦ane men in ke? 48 Kom̦ij aikuj in weeppãn ãinwõt an Jememiwõj ilañ weeppãn.