Jerbal
2 Ilo raanin Kwõjkwõjin Pentekost* eo, ri-kal̦oor ro rar kobal̦o̦k ippãn doon ilo juon wõt jikin. 2 Innem ilo jidimkij, juon ainikien jãn lañ ear wal̦o̦k, ãinwõt ainikien kõto el̦ap, im aolep ro ilowaan m̦weo rar roñ, 3 im rar lo jet men ãinwõt reurur im jekjekier wõt lo. Men kein rar jeplõklõk im pãd ioon bõraer kajjojo, 4 im er aolep rar obrak kõn jetõb kwõjarjar.* Kõn men in, rar jino kõnono ilo kajin ko reoktak jãn doon,* ãinwõt an jetõb kwõjarjar* kõmaroñ er ñan kõnono.
5 Ilo iien in, ri-Ju ro rej kautiej Anij jãn aelõñ otemjej ipel̦aakin lal̦ rar pãd ilo Jerusalem. 6 Innem ke ear wal̦o̦k ainikien eo, juon jarlepju ear kobatok im rar lukkuun l̦o̦kjenaer kõnke kajjojo iaaer ear roñ an ri-kal̦oor ro kõnono ilo kajin ko aer. 7 Rar kanooj in bwilõñ im rar ba: “Lale m̦õk, ãinwõt ke aolep armej rein rej kõnnaan rej ri-Galili? 8 Innem etke kõj kajjojo jej roñ aer kõnnaan ilo kajin ko ad make?* 9 Jet iaad jekar itok jãn Partia, Midia, Ilam, Mesopotemia, Judia, Kapedosia, Pontõs im jikin ko ilo Eijia,* 10 Prijia im Pampilia, Ijipt im jikin ko ilo Libia me rej pãd iturin Sairine, im elõñ rar bar itok jãn Rom, jet iaad ri-Ju im ro jet ej ro rar oktak ñan kabuñ in ad, 11 im ebar wõr rar itok jãn Krit im Arebia. Jaar roñ an armej rein kõnono ilo kajin ko ad kõn jerbal ko rekabwilõñlõñ an Anij.” 12 Aolep armej rein rar kanooj bwilõñ im l̦o̦kjenaer, im rar ba ñan doon: “Ta in ewal̦o̦k?” 13 Bõtab, ro jet rar kajjirere kake er im ba: “Kumi ran̦e rekadek.”
14 Ak Piter ear jutak ippãn rijjilõk ro 11 im ear kõl̦l̦aaj ainikien im ba: “Kom̦ em̦m̦aan in Judia im kom̦ aolep armej in Jerusalem, kom̦win jel̦ã men in im kom̦win kanooj roñjake naan kein aõ. 15 Ilo m̦ool, armej rein rejjab kadek ãinwõt ami l̦õmn̦ak, kõnke ej 9 awa jim̦a ilo jibboñ.* 16 Bõtab men in ej kajejjet kũtien naan ko an ri-kanaan Joel, ke ear ba: 17 ‘“Ilo raan ko ãliktata,” Anij ej ba, “Inaaj lutõkl̦o̦k jetõb* eo aõ ioon aolep kain armej, im l̦adik ro im ledik ro nejũmi renaaj kanaan im likao ro ibwiljimi renaaj ellolo pijen im l̦al̦l̦ap ro ibwiljimi renaaj ettõn̦ak kõn ettõn̦ak ko, 18 im inaaj bar lutõkl̦o̦k jetõb* eo aõ ioon ri-karejar* ro aõ, em̦m̦aan im kõrã jim̦or, im renaaj kanaan. 19 Inaaj kwal̦o̦k menin kabwilõñlõñ ko ilo lañ im kõkal̦l̦e ko ilo lal̦: bõtõktõk, kijeek, im baat ko remijel. 20 Al̦ enaaj marok im allõñ enaaj bũrõrõ ãinwõt bõtõktõk m̦okta jãn an raan eo el̦ap im eaiboojoj an Jeova* itok. 21 Im aolep ro rej kũr etan Jeova* renaaj bõk lo̦mo̦o̦r.”’
22 “Kom̦ armej in Israel, kom̦win roñjake naan kein: Anij ear lukkuun kaalikkar ñan kom̦ bwe e eo ear jilkintok Jesus ri-Nazeret ilo an kar kõjerbale ñan kõm̦m̦ani jerbal ko rel̦l̦ap im menin kabwilõñlõñ ko im kõkal̦l̦e ko ibwiljimi, im kom̦ jel̦ã kõn men in. 23 Anij ear jel̦ãl̦o̦k im̦aan bwe renaaj kar kalbuuji Jesus, im eñin kar karõk* eo an. Kom̦ar lel̦o̦k em̦m̦aan in ñan rijjerawiwi ro bwe ren dilaiki ilo jurõn al̦al̦, im kom̦ar m̦ane. 24 Bõtab Anij ear kõjerkakpejeiki ilo an kar karõl̦o̦ke jãn mej,* kõnke mej ejjab maroñ dãpiji. 25 Devid ear kwal̦o̦k kõn e ke ear ba: ‘Ij likũt Jeova* im̦aõ* iien otemjej, im kõnke ej pãd ituanbwijmaroñin peiũ, ijjãmin inepata. 26 Kõn men in, bũruõ ear m̦õn̦õn̦õ im tiõ ear kõnono ilo el̦ap lañlõñ im inaaj* mour ilo aõ kõjatdikdik, 27 kõnke kwoban likũt wõt ña ilo Lõb,* im kwoban kõtl̦o̦k bwe ãnbwinnin eo ej tiljek ñan kwe en kõt. 28 Kwaar kwal̦o̦k ñan eõ ial̦ eo ej tõll̦o̦k ñan mour, im kwõnaaj koobrak eõ kõn el̦ap lañlõñ ilo am̦ pãd epaak.’*
29 “Em̦m̦aan ran̦ jeiũ im jatũ, emãlim ñan aõ kõnono ñan kom̦ ilo peran kõn jim̦m̦aad Devid, eo ear mej im rar kalibwini, im lõb eo libõn epãd ippãd ijin ñan rainin. 30 Kõnke ear juon ri-kanaan im ear jel̦ã bwe Anij ear kallim̦ur ñane bwe enaaj kajijet juon iaan ro nejin ilo tũroon eo an, 31 ear jel̦ãl̦o̦k im̦aan kõn an Christ naaj jerkakpeje im ear kõnnaan kake, ear ba bwe eban pãdwõt ilo Lõb* im ãnbwinnin eban kõt. 32 Eñin ej Jesus, eo Anij ear kõjerkakpejeiki, im kõmij aolep ri-kam̦ool kõn men in. 33 Innem kõnke em̦õj bõklõñl̦o̦k ñan ituanbwijmaroñin pein Anij im ear bõk jetõb kwõjarjar* eo Jemãn ear kallim̦ur kake, em̦õj an kiiõ lutõktok men in ioom, ãinwõt ami loe im roñ. 34 Devid ear jab wanlõñl̦o̦k ñan lañ, bõtab e make ear ba, ‘Jeova* ear ba ñan aõ Irooj: “Kwõn jijet ituanbwijmaroñin peiũ 35 m̦ae iien inaaj likũt ro rej kõjdate eok bwe ren eran neem̦.”’ 36 Kõn men in, aolep armej in Israel ren kanooj in jel̦ã bwe Anij ear kõm̦m̦an bwe Jesus, eo kom̦ar m̦ane ilo ami dilaiki ilo jurõn al̦al̦, en Irooj im Christ.”
37 Ear lel bũrueer ke rar roñ men in, innem rar ba ñan Piter im rijjilõk ro jet: “Em̦m̦aan ran̦ jeim im jatim, ta eo kõmij aikuj kõm̦m̦ane?” 38 Piter ear ba ñan er: “Kom̦win ukel̦o̦k im kajjojo iaami en peptaij ilo etan Jesus Christ ñan jol̦o̦k jerawiwi ko ami, innem kom̦ naaj bõk jetõb kwõjarjar,* menin letok eo ejjel̦o̦k on̦ããn. 39 Kallim̦ur in ej ñan kom̦ im ro nejimi im ñan aolep ro rej pãd ettol̦o̦k, aolep ro Jeova* ad Anij emaroñ kũrtok er ñan ippãn.” 40 Innem ear wõnm̦aanl̦o̦k wõt im kõnnaan ñan er, im ear lõt an kwal̦o̦k naan ñan er, im ear jab bõjrak an kakeememej er im ba: “Kom̦win lo̦mo̦o̦ren kom̦ make jãn epepen in eankeke.”* 41 Kõn men in, ro rar m̦õn̦õn̦õ in pokake naan ko an rar peptaij, im ilo raan eo wõt enañin 3,000 armej rar kobal̦o̦k ippãer. 42 Innem rar wõnm̦aanl̦o̦k wõt im keini aer katak jãn rijjilõk ro, rar koba ippãn doon, kõjota ippãn doon im jar ippãn doon.
43 Rijjilõk ro rar kõm̦m̦an elõñ menin kabwilõñlõñ ko im kõkal̦l̦e ko, innem aolep armej ro rar lo men kein rar jino kautiej Anij. 44 Aolep ro rar erom rũttõmak rar koba ippãn doon im ajeji men ko m̦weieer ñan doon, 45 im rar wiakaki men ko m̦weieer im bwidej* ko aer im ajeji tõprak ko ñan aolep, ekkar ñan joñan eo kajjojo armej ej aikuji. 46 Im kajjojo raan er aolep rar pãd ilo tampel̦ eo, im rar m̦õñã ippãn doon ilo m̦õko im̦weer kajjojo. Rar lukkuun m̦õn̦õn̦õ in ajeji men ko kijeer ñan doon jãn tum̦wilal̦in bũrueer, 47 innem rar nõbar Anij im aolep armej rar m̦õn̦õn̦õ ippãer. Ilo ejja iien eo wõt, kajjojo raan Jeova* ear kalõñl̦o̦k uwaan rũttõmak rein ilo an kar kobaikl̦o̦k ro ear lo̦mo̦o̦ren er.