Kolosse
3 Bõtab, el̦aññe kar kõmour kom̦ ippãn Christ, innem kom̦win wõnm̦aanl̦o̦k wõt im pukot men ko an lañ, ijo Christ ej jijet ie ilo tuanbwijmaroñin pein Anij. 2 Kom̦win l̦õmn̦ak wõt kõn men ko ilañ, im jab men ko ilo lal̦ in. 3 Bwe kom̦ar mej, im mour eo ami ear n̦ojak ippãn Christ, eo ej juon wõt ippãn Anij. 4 El̦aññe enaaj wal̦o̦k Christ, eo ej ad mour, innem kom̦ naaj bareinwõt wal̦o̦k ippãn ilo aiboojoj eo an.
5 Kõn men in, kom̦win lukkuun jol̦o̦k m̦õttan ko ilo ãnbwinnimi im ewõr l̦õmn̦ak ko an lal̦ in ie ãinwõt l̦õñ,* men ko rettoon, kõn̦aan eo ekajoor ñan pãd ippãn juon, kõn̦aan ko rej bõktok jorrããn, im arõk, eo ej m̦õttan kabuñ ñan ekjab. 6 Illu eo an Anij enaaj itok ioon ro rej kõm̦m̦ani men kein. 7 Eñin wãween ami kõn kõm̦m̦an* m̦okta ilo kar mour ko ami.* 8 Bõtab kiiõ kom̦ij aikuj bareinwõt julo̦k men kein jãn kom̦: kwi, illu, nana, naan ko reddo, im en jab diwõjtok jãn lo̦ñiimi naan ko renana. 9 Kom̦win jab riab ñan doon. Kom̦win utũk mour* eo m̦okta kab kõm̦m̦an ko an, 10 im kõn̦ak mour eo ekããl, eo ej kããll̦o̦k wõt ikijjeen jel̦ãl̦o̦kjen̦ eo ejim̦we ekkar ñan nemãmeen Eo ear kõm̦anm̦ane. 11 Ilo mour eo ekããl, ejjel̦o̦k oktak ikõtaan ri-Grik im ri-Ju, ro rej m̦wijm̦wij im ro rejjab m̦wijm̦wij, ruwamãejet, ri-Sitia,* ri-kõm̦akoko im ri-anemkwõj; bwe Christ ej otemjej ilo men otemjej.
12 Kõnke kom̦ij kããlõt in Anij, ro rekkwõjarjar im ej yokwe er, kom̦win kõn̦ak tũriam̦o im yokwe, jouj, ettã bõro,* ineem̦m̦an, im meanwõd. 13 Kom̦win kijenmej wõt ippãn doon im m̦õn̦õn̦õ in jol̦o̦k an doon bõd jekdo̦o̦n ñe ewõr unin an juon inepata n̦ae bar juon. Ãinwõt an kar Jeova* m̦õn̦õn̦õ in jol̦o̦k bõd ko ami, kom̦ij aikuj bareinwõt kõm̦m̦ane ejja wãween in wõt. 14 Koba ippãn aolep men kein, kom̦win kõn̦ak yokwe bwe yokwe ej kein loklok eo eweeppãn im ej kõm̦m̦an bõrokuk.
15 Bareinwõt, kom̦win kõtl̦o̦k bwe aenõm̦m̦an eo an Christ en irooj ilo bũruomi,* bwe kar kũr kom̦ ñan aenõm̦m̦an in bwe kom̦win juon wõt ãnbwin. Kom̦win kwal̦o̦k ami kam̦m̦oolol. 16 Kom̦win kõtl̦o̦k bwe naan eo an Christ en lukkuun pãd ilo kom̦ bwe kom̦win mãlõtlõt. En jab bõjrak ami katakin im rõjañ* doon kõn al ko,* nõbar Anij, kwal̦o̦k kam̦m̦oolol ilo ami al kõn al in kabuñ,* im kom̦win al jãn bũruomi ñan Jeova.* 17 Jabdewõt men kom̦ij kõm̦m̦ane, ilo naan ak ilo kõm̦m̦an, kom̦win kõm̦m̦an men otemjej ilo etan Irooj Jesus, im kam̦m̦oolol Anij Jemãd ikijjeen e.
18 Kom̦ kõrã ro, kom̦win kõttãik kom̦ ñan l̦õm̦aro pãleemi, bwe men in ej juon men ekkar im̦aan mejãn Irooj. 19 Kom̦ l̦õm̦aro, kom̦win wõnm̦aanl̦o̦k wõt im yokwe lim̦aro pãleemi im kom̦win jab kũtõtõ ippãer.* 20 Kom̦ ajri ro, kom̦win pokake jememi im jinemi ilo men otemjej kõnke men in ej kabuñbũruon Irooj. 21 Kom̦ ro jemãer, kom̦win jab kalluuk* ro nejimi kõnke ren jab ebbeer.* 22 Kom̦ ri-karejar* ro, kom̦win pokake irooj ro ami* ilo men otemjej, im en jab ilo iien ko wõt rej lo kom̦ ñan kabuñbũruon armej,* bõtab kom̦win kõm̦m̦ane men in kõn bõro em̦ool im kõn mijak Jeova.* 23 Jabdewõt men kom̦ij kõm̦m̦ane, kom̦win kõm̦m̦ane kõn aolepen bũruomi im ami kajoor, ãinwõt ñe kom̦ij kõm̦m̦ane ñan Jeova* im jab ñan armej, 24 bwe kom̦ jel̦ã bwe Jeova* enaaj lewaj menin jolõt eo ñan kom̦ ãinwõt juon jinõkjeej ñan kom̦. Kom̦win ri-kõm̦akoko ñan Irooj eo, Christ. 25 Armej eo ej kõm̦m̦ani men ko renana, naaj n̦aon̦ããn kõn men ko renana ear kõm̦m̦ani, im ejjel̦o̦k kalijekl̦o̦k ilo men in.