Mark

9 Bareinwõt Jesus ear ba ñan er: “Ij ba ñan kom̦ bwe jet iaan ro rej jutak ijin reban mej m̦ae iien renaaj m̦okta lo an Aelõñ eo an Anij* jino tõl.” 2 Jiljino raan tokãlik, Jesus ear bõk Piter, Jemes, im Jon im ãñinl̦o̦k erjel ñan juon tol̦ eutiej. Ereañ wõt rar pãd ijo. Innem rekar lo an oktakl̦o̦k, 3 nuknuk ko an rar oktak im ejjatõltõl im lukkuun mouj. Joñan aer mouj, ejjel̦o̦k armej ioon lal̦ in enaaj kar maroñ kõm̦m̦an bwe ren mouj ñan joñan in. 4 Bareinwõt rar lo an Ilaija im Moses kõnnaan ippãn Jesus. 5 Innem Piter ear ba ñan Jesus im ba: “Rabbai,* em̦m̦an ammim pãd ijin. Kwõn kõtl̦o̦k am kajutak jilu im̦õn kõppãd, juon ñan kwe, juon ñan Moses, im juon ñan Ilaija.” 6 Ilo m̦ool, Piter ear jaje en ita kõnke erjel kar lukkuun mijak. 7 Innem juon kõdo̦ ear itok ioer im kalbubuuk er, im ear wal̦o̦k juon ainikien jãn kõdo̦ eo im ba: “Eñin Nejũ, eo ejitõnbõro ippa, kom̦win roñjake e.” 8 Bõtab ilo jidimkij, ke rar reito reitak ejjel̦o̦k bar juon armej ijo rar loe ijello̦kun wõt Jesus.

9 Ke rar wanlal̦tak jãn tol̦ eo, ear lukkuun jiroñ er bwe ren jab ba ñan jabdewõt kõn men ko rar loi m̦ae iien Nejin armej* enaaj jerkak jãn mej. 10 Rar pokake naan kein an,* bõtab rar kõnnaan ippãn doon kõn ta mel̦el̦ein an ba bwe enaaj jerkak jãn mej. 11 Im rar kajjitõk ippãn im ba: “Ak etke skraib ran̦ rej ba bwe Ilaija enaaj aikuj itok m̦okta?” 12 Im eba: “Aet, em̦ool bwe Ilaija enaaj itok m̦okta im kõm̦m̦an bwe men otemjej ren ãinwõt kar m̦okta. Ak etke Jeje ko rej ba bwe Nejin armej enaaj aikuj iioon elõñ kain eñtaan ko im bwe armej renaaj kõjekdo̦o̦ne? 13 Ij ba ñan kom̦ bwe ilo m̦ool, em̦õj kadede an kar Ilaija itok, im rar kõm̦m̦an ñane ekkar ñan kõn̦aan ko aer, ãinwõt an jeje ko kwal̦o̦k kake.”

14 Ke rar ro̦o̦ltok ñan ippãn ri-kal̦oor ro jet, rar lo juon jarlepju el̦ap ippãer, im ekar bar wõr skraib ijo rej akwããle ri-kal̦oor ro. 15 Bõtab ke armej ro wõj rar loe, rar bwilõñ, im rar ettõrl̦o̦k ñan ippãn im yokyokwe e. 16 Im ear kajjitõk ippãer im ba: “Ta eo kom̦ij akwããle er kake?” 17 Innem juon iaan armej ro ear ba: “Ri-Kaki, iar itõn bõktok l̦adik e nejũ ñan kwe kõnke em̦õj an juon jetõb ettoon mo̦k* n̦a ippãn im kõm̦m̦an bwe en jaje kõnnaan. 18 Jabdewõt iien ñe ej kaeñtaane, ej kõm̦m̦an bwe l̦adik in en patpat ilal̦. Im ekõm̦m̦an an m̦õrm̦õr lo̦ñiin im kij dekein ñiin im lukkuun m̦õjn̦o̦. Iar kajjitõk bwe ri-kal̦oor ran̦e am̦ ren kadiwõjl̦o̦k jetõb ettoon in jãne, ak rar jab maroñ.” 19 Innem ear ba: “Kom̦ armej in epepen in, ejjel̦o̦k ami tõmak. Ewi toon aõ aikuj pãd ippemi? Ewi toon aõ aikuj kijenmej ippemi? Kom̦win bõktok l̦adik n̦e ñan ippa.” 20 Innem rar bõkl̦o̦k l̦adik eo ñan ippãn, ak ke jetõb ettoon eo ej lo Jesus, ear kõm̦m̦an bwe l̦adik eo en lukkuun dibũbbũb. Im l̦adik eo ear okjak im ejjab bõjrak an eddãpilpil ioon lal̦, im an m̦õrm̦õr lo̦ñiin. 21 Innem Jesus ear kajjitõk ippãn jemãn l̦adik eo im ba: “Ewi toon an wal̦o̦k men in ñan l̦adik in?” Im ear ba: “Jãn ke ear dik tok ñan kiiõ. 22 Ekkã an jetõb ettoon eo kõm̦m̦an bwe en okjak ilo kijeek im ilo dãn ñan kõm̦m̦an bwe en mej. Ñe ewõr jabdewõt men en̦ kwõmaroñ kõm̦m̦ane, kwõn tũriam̦okake kõm̦ro im jipañ kõm̦ro.” 23 Im Jesus eba ñane: “Etke kwõj ba, ‘Ñe kwõmaroñ’? Eo ewõr an tõmak, emaroñe men otemjej.” 24 Im ilo m̦õkaj jemãn l̦adik eo ear kõl̦l̦aaj ainikien im ba: “Ewõr aõ tõmak! Ak kwõn jipañ eõ bwe en l̦apl̦o̦k aõ tõmak!”

25 Ke Jesus ear lo an juon jarlepju ekkaiuriurl̦o̦k ñan ijo ippãer, ear kauweik jetõb ettoon eo im ba: “Jetõb en̦ me ej kõm̦m̦an an juon jaje kõnnaan im jarroñroñ, ij jiroñ eok bwe kwõn diwõjl̦o̦k jãn l̦adik n̦e im jab bar mo̦k n̦a ippãn!” 26 Ãlikin an jetõb ettoon eo ellam̦õjm̦õj im kõm̦m̦an bwe l̦adik eo en lukkuun dibũbbũb, ear diwõjl̦o̦k jãne. Innem ear ãinwõt ñe l̦adik eo emej, im enañin aolep armej ro rar ba: “Emej!” 27 Bõtab Jesus ear jibwe pein l̦adik eo im kõjerkake, innem l̦adik eo ear jutak. 28 Ãlikin an kar Jesus del̦o̦ñ ilo juon em̦, ri-kal̦oor ro an rar itok ñan ippãn ke ej make iaan im kajjitõk: “Etke kõmar jab maroñ kadiwõjl̦o̦k jetõb ettoon eo?” 29 Innem eba ñan er: “Jar wõt emaroñ kõm̦m̦an bwe en diwõjl̦o̦k jetõb rot in.”

30 Innem rar ilo̦k jãn ijo im deblo̦ke Galili, bõtab ear jab kõn̦aan bwe jabdewõt en jel̦ã kake. 31 Unin an ãindein ej kõnke ear katakin ri-kal̦oor ro an im ear ba ñan er: “Naaj ketake Nejin armej ñan ro rej kõjdate e, im renaaj m̦ane. Meñe renaaj m̦ane, ak jilu raan tokãlik enaaj bar mour.” 32 Bõtab rar jab jel̦ã ta mel̦el̦ein men ko ear ba, im rar mijak in kajjitõk ippãn.

33 Innem rar tõparl̦o̦k bukwõn eo etan Kaperneum. Im ke ear pãd ilowaan juon em̦, ear kajitũkin er im ba: “Ta eo kom̦ar akwããl kake ilo ial̦ eo ad tok?” 34 Bõtab rar jab keroro kõnke ilo kar ial̦ eo aer tok, rar akwããl kõn wõn eo eutiejtata iaaer. 35 Innem ear jijet im kũrtok rijjilõk ro 12, im ear ba: “El̦aññe jabdewõt iaami ekõn̦aan bwe en m̦oktata, e eo ej aikuj pãd ãliktata im ej aikuj jerbal ñan aolep.” 36 Im ear bõktok juon ajri im kajutake ibwiljier, innem ear likũt pein ioon aeran ajri eo im ba ñan er: 37 “Jabdewõt eo ej karwaineneik juon eo edik ãinwõt ajri in kõn wõt eta, ej bar karwaineneik ña. Im jabdewõt eo ej karwaineneik ña, ejjab karwaineneik wõt ña, ak ej bar karwaineneik Eo ear jilkintok eõ.”

38 Jon ear ba ñane: “Ri-Kaki, kõmar lo juon armej ej kadiwõjl̦o̦k jetõb ko rettoon* ilo etam̦, im kõmar kajjioñ kabõjrake kõnke ejjab juon iaad.” 39 Bõtab Jesus eba: “Kom̦win jab kajjioñ in kabõjrake kõnke ejjel̦o̦k en̦ ej kõm̦m̦an menin bwilõñ ilo eta, innem kajju oktak im kõnanaik eõ. 40 Jabdewõt eo ejjab jum̦aik kõj, ej rejetake kõj. 41 Im jabdewõt eo ej lewaj limõmi aebõj* kõnke kom̦ij ri-kal̦ooran Christ, ij ba ñan kom̦ bwe armej in enaaj jeraam̦m̦an. 42 Bõtab jabdewõt eo ej kõm̦m̦an bwe en jako an rein reddik tõmak ilo ña, enaaj kar em̦m̦anl̦o̦k ñe rej lukwõje juon dekein irir* ekilep ilo kõnwaan im jol̦o̦ke ilo lo̦meto.

43 “El̦aññe peim̦ ej kõm̦m̦an bwe kwõn jerawiwi, kwõn m̦wijitil̦o̦k. Em̦m̦anl̦o̦k ñe kwõnaaj el̦l̦ã im mour meñe ejako rãjetin peim̦ jãn ñe ewõr ruo peim̦ ak kwõdel̦o̦ñ ilo Kena,* ijo kijeek eo ie ejaje kun. 44 *—— 45 Innem ñe neem̦ ej kõm̦m̦an bwe kwõn jerawiwi, kwõn m̦wijitil̦o̦k. Em̦m̦anl̦o̦k ñe kwõnaaj el̦l̦ã im mour meñe ejako rãjetin neem̦ jãn ñe ewõr ruo neem̦ ak kwõdel̦o̦ñ ilo Kena.* 46 *—— 47 Bareinwõt, ñe mejam̦ ej kõm̦m̦an bwe kwõn jerawiwi, kwõn jol̦o̦ke. Em̦m̦anl̦o̦k ñe kwõj el̦l̦ã im del̦o̦ñ ilo Aelõñ eo an Anij meñe erãjet mejam̦ jãn ñe ewõr ruo mejam̦ ak rejol̦o̦k eok ilo Kena,* 48 ijo ejaje mej likaakrak ko ie, im kijeek eo ie ejaje kun.

49 “Anij enaaj aikuj lutõk kijeek ioon armej rein ãinwõt an juon armej illutõk jo̦o̦l̦ ilo m̦õñã. 50 Jo̦o̦l̦ el̦ap an em̦m̦an, bõtab el̦aññe ejako nemãn jo̦o̦l̦ eo, enaaj ewi wãween an bar jepl̦aak nemãn? Kom̦win ãinwõt jo̦o̦l̦ ko me ej wõr wõt nemeer, el̦aññe kom̦ij ãindein, kom̦ naaj aenõm̦m̦an wõt ippãn doon.”