Mark

14 Kiiõ m̦õttan ruo raan bwe en jejjet iien Kwõjkwõjin Kijoone* im Kwõjkwõjin Bũreet Ejjab Kauwe.* Bũrij ro reutiej im skraib ro rar pukot kilen aer kõm̦m̦an ruõn Jesus bwe ren jibwe * im m̦ane. 2 Bõtab rar ba: “Jen jab kõm̦m̦ane men in ilo iien kwõjkwõj en̦, kõnke armej ran̦ remaroñ kõm̦m̦an poktak.”

3 Ke Jesus ear pãd ilo Betani, ear kõjota* ilo m̦weo im̦õn Saimõn, em̦m̦aan eo ekar lõba. Innem juon kõrã ear bõktok juon bõkã * in weil̦ eñaj im el̦ap on̦ããn kar kõm̦m̦ane jãn nard,* im kar jab kãreiki kõn jabdewõt. Ear kõpel̦l̦o̦ke bõkã eo im kapiti bõran Jesus kake. 4 Ke jet iaan armej ro ijo rar loe men in, rar inepata im rar ba ñan doon: “Etke ej ko̦kkure waan bõkã en̦? 5 Emaroñ kar wiakake bõkã en̦ kõn el̦apl̦o̦k jãn 300 denarii* im lel̦o̦k jããn ko ñan ro rejeram̦õl!” Kõn men in, rar kanooj matõrtõre kõrã eo.* 6 Bõtab Jesus ear ba: “Kom̦win jab el̦waj ñane. Etke kom̦ij kaabn̦õn̦õiki? Men in ear kõm̦m̦ane ñan ña ekanooj in em̦m̦an. 7 Ro rejeram̦õl rej pãd ippemi aolep iien, im kom̦ maroñ jipañ er jabdewõt iien kom̦ kõn̦aan. Ak ejjab aolep iien inaaj pãd ippemi. 8 Kõrã in ear kõm̦m̦an ekkar ñan joñan maroñ eo an. Ear kapit eõ kõn weil̦ eñaj bwe en kõpooj ãnbwinnũ ñe naaj kalibwin eõ. 9 Ij ba ñan kom̦ bwe ñe renaaj kwal̦o̦k kõn ennaan eo em̦m̦an ilo aolepen lal̦ in, naaj bar kwal̦o̦k kõn men in kõrã in ear kõm̦m̦ane bwe armej ren keememeje.”

10 Innem Judas Iskariõt, juon iaan rijjilõk ro 12, ear ilo̦k ñan ippãn bũrij ro reutiej bwe en kõnnaan ippãer ñan an ketake ñan er. 11 Ke rar roñ men ko ear ba, rar lukkuun m̦õn̦õn̦õ im rar kallim̦ur bwe renaaj lel̦o̦k jããn jelba ñane. Kõn men in, Judas ear jino pukot juon iien em̦m̦an ñan an ketake Jesus.

12 Ilo raan eo m̦oktata ilo Kwõjkwõjin Bũreet Ejjab Kauwe,* raan eo rekõn katok kõn menninmour ñan iien Kwõjkwõjin Kijoone eo, ri-kal̦oor ro an rar ba ñane: “Ia eo kokõn̦aan kõjota* ie ilo iien Kwõjkwõjin Kijoone eo bwe kõmin ilen kõpooje?” 13 Kõn men in, ear jilkinl̦o̦k ruo iaan ri-kal̦oor ro an im ear ba: “Komiro ilo̦k ñan Jerusalem, im juon em̦m̦aan ej kotak juon nien dãn enaaj iioone komiro. Komiro l̦oorel̦o̦k 14 ñan m̦weo enaaj del̦o̦ñl̦o̦k ie, im kom̦win ba ñan em̦m̦aan eo im̦õn m̦weo, ‘Ri-Kaki ej ba: “Ewi ruum̦ in an ri-lotok me imaroñ kõjota* ie ippãn ri-kal̦oor ro aõ ilo iien Kwõjkwõjin Kijoone eo?”’ 15 Em̦m̦aan eo enaaj kwal̦o̦k ñan kom̦ juon ruum̦ ekilep ej pãd ilõñ im epojak ñan ad kõjerbale. Kom̦win kab kõpooje kõjota eo ad ijen̦.” 16 Innem ri-kal̦oor ro rar ilo̦k im del̦o̦ñl̦o̦k ilo Jerusalem, im rar lo aolep men ko ãinwõt an kar ba. Innem rar kõpooji men ko ñan iien Kwõjkwõjin Kijoone eo.

17 Ke ear jota, e im rijjilõk ro 12 rar itok ñan ijo. 18 Innem ke rej jijet ilo juon tebõl̦ im m̦õñã, Jesus ear ba: “Ij ba ñan kom̦ bwe juon iaami me ej m̦õñã ippa enaaj ketak eõ.” 19 Ke rar roñ an ba men in, rar bũrom̦õj, im kajjojo iaaer ear kajjitõk ippãn im ba: “Ejjab ña, ejim̦we ke?” 20 Ear uwaak im ba: “Juon iaamiiañ Joñoul Ruo, armej eo ej kattu ilo bowl in ilo ejja iien eo wõt ij likũt peiũ ie. 21 Nejin armej* enaaj mej ekkar ñan Jeje ko, bõtab jerata ñan em̦m̦aan eo enaaj ketake Nejin armej! Enaaj kar em̦m̦anl̦o̦k ñane ñe en kar jab l̦otak.”

22 Ilo ejja iien eo wõt rej m̦õñã, ear bõk juon bũreet im jare. Innem ear kõrrãjete ñan elõñ m̦õttan im lel̦o̦k ñan er im ba: “Kom̦win bõke im kañe. Men in ej kõkkar kõn ãnbwinnũ.” 23 Bareinwõt, ear bõk juon cup im jare im kam̦m̦oolol Anij. Ãlikin, ear lel̦o̦ke ñan er im rar aolep idaak jãne. 24 Innem ear ba: “Wain in ej kõkkar kõn bõtõktõkũ, im ej kapene ‘bujen eo’ an Anij. Bõtõktõkũ enaaj to̦o̦rl̦o̦k kõn elõñ armej. 25 Ij jiroñwaj kom̦ bwe ijjãmin bar idaak wain m̦ae iien inaaj idaak wain kããl ilo Aelõñ eo an Anij.”* 26 Innem ãlikin aer al im nõbar Anij, rar diwõjl̦o̦k im etal ñan Tol̦ Olive.

27 Im Jesus ear jiroñl̦o̦k er im ba: “Kom̦ aolep naaj buñ, ãinwõt an Jeje ko ba: ‘Inaaj m̦an jabõt eo, im jiip ko renaaj ejjeplõklõk.’ 28 Bõtab ãlikin aõ naaj jerkak jãn mej, inaaj etal im̦aamil̦o̦k ñan Galili.” 29 Ak Piter ear ba ñane: “Jekdo̦o̦n ñe aolep renaaj buñ, ak ña, ijjãmin.” 30 Innem Jesus ear ba: “Ij ba ñan kwe bwe rainin, ilo naaj buñniin, m̦okta jãn an ikkũr kako ruo kõttan, jilu alen am̦ naaj kaarmejjeteik eõ.” 31 Bõtab Piter el̦akkar ba: “Ijjãmin kaarmejjeteik eok jekdo̦o̦n ñe inaaj aikuj mej ippam̦.” Ri-kal̦oor ro jet rar bar jino ba ejja men in wõt.

32 Innem rar etal ñan juon jikin etan Getsemane, im ear ba ñan ri-kal̦oor ro an: “Kom̦win jijet ijin bwe ij etal im jar.” 33 Im ear bõk Piter im Jemes im Jon ippãnl̦o̦k, im ear jino an kanooj bũrom̦õj im lukkuun inepata. 34 Im ear ba ñan er: “Joñan aõ bũrom̦õj, inañin mej wõt jidik. Kom̦win pãdwõt ijin im ekkõl wõt.”* 35 Innem ear wõnm̦aanl̦o̦k jidik jãn ijo rej pãd ie, im ear buñpedo ioon bwidej im jar. Ear jar ñan Anij im ba bwe ñe em̦m̦an, en jab kõtl̦o̦k an eñtaan, 36 im ear ba: “Abba,* Jema, kwõmaroñe men otemjej. Kwõn bõk cup * in jãn ña. Bõtab en ekkar ñan kõn̦aan n̦e am̦ im jab kõn̦aan e aõ.” 37 Ke ear ro̦o̦ll̦o̦k erjel ej kiki, im ear ba ñan Piter: “Saimõn, kwõj kiki ke? Ta kwõjjab maroñ ekkõl wõt* ium̦win juon wõt awa ke? 38 Kom̦win ekkõl wõt im jab bõjrak jãn ami jar bwe kom̦win jab po ilo kapo. An* ekõn̦aan ak kanniõk em̦õjn̦o̦.” 39 Innem ear bar etal im jar, im ear ba ejja naan ko wõt. 40 Im ke ear bar ro̦o̦ll̦o̦k, erjel ej kiki kõnke rebane mejãer. Kõn men in, rar jaje ren ba ta ñane. 41 Innem ke ear jepl̦aakl̦o̦k alen eo kein kajilu, ear ba ñan er: “Etke kom̦ij kiki im kakkije ilo iien rot in eaorõk? Ebwe n̦e ami kiki! Ejejjet iien kiiõ! Ij ba ñan kom̦ bwe m̦õttan wõt jidik renaaj liaakel̦o̦k Nejin armej ñan ippãn rijjerawiwi ro. 42 Kom̦win jerkak bwe jen etal. Reilo̦k m̦õk! L̦eo ej itõn ketak eõ n̦e emoottok.”

43 Ej kõnono wõt ak em̦õkaj an Judas, juon iaan rijjilõk ro 12, tõpartok ijo. Juon jarlepju in armej rar itok ippãntok kõn jãje im al̦al̦. Bũrij ro reutiej im skraib ro im ri-tõl ro an ri-Ju ro rar jilkintok armej rein. 44 Em̦õj an kar eo ear ketake lel̦o̦k juon kõkal̦l̦e rar errã kake, ke ear ba: “Eo inaaj mejenmaiki, eñin ej armej eo kom̦ij pukote. Kom̦win lale bwe en jab ko ñe kom̦ij bõke im kalbuuji.” 45 Innem Judas ear kajjul̦o̦k ñan ippãn im ba, “Yokwe eok Rabbai!”* im ear mejenmaiki. 46 Innem armej ro rar jibwe Jesus im bõke bwe ren kalbuuji. 47 Bõtab juon iaan ro rar jutak ijo ear kadiwõjtok jãje eo an im jek lo̦jilñin ri-karejar* eo an bũrij l̦apl̦ap eo. 48 Jesus ear jiroñl̦o̦k armej ro im ba: “Etke kom̦ij itok kõn jãje im al̦al̦ ñan ami itõn kalbuuji eõ ãinwõt ñe ña juon ri-ko̦o̦t? 49 Aolep raan iar pãd ippemi ilo tampel̦ en̦ im katakin armej ie, ak etke kom̦ar jab bõk eõ im kalbuuji eõ? Men kein aolep rej wal̦o̦k bwe en jejjet kũtien Jeje ko.”

50 Innem aolep ri-kal̦oor ro rar etal jãne im ko. 51 Bõtab ewõr juon likao ej kõn̦ak juon kopã elukkuun em̦m̦an ear l̦oorel̦o̦k Jesus, ak armej ro rar bar kajjioñ jibwe. 52 Bõtab ear ko jãn er im ewõtlo̦k kopã eo an ak ej lowa wõt.*

53 Kiiõ rar ãñinl̦o̦k Jesus ñan ippãn bũrij l̦apl̦ap eo, im aolep bũrij ro reutiej im skraib ro im ri-tõl ro an ri-Ju ro rar kweilo̦kl̦o̦k. 54 Bõtab Piter ear pãd ettol̦o̦k im l̦oorel̦o̦k Jesus ñan ñe retõpar mel̦an m̦weo im̦õn bũrij l̦apl̦ap eo. Innem Piter ear jijet ippãn ri-jerbal ro an m̦weo im kõmmããn̦ãn̦ iturin juon kijeek. 55 Kiiõ bũrij ro reutiej im aolep ro uwaan Im̦õn Ekajet eo El̦ap an ri-Ju* rar kappok armej bwe ren riab n̦ae Jesus bwe en wõr unin aer liaakel̦o̦k ñan mej. Bõtab, rar jab ellolo kein kam̦ool. 56 Meñe elõñ armej rar riab n̦ae e, bõtab kõmel̦el̦e ko aer rar oktak jãn doon. 57 Bareinwõt, jet armej rar jutak im riab n̦ae e im ba: 58 “Kõmar roñ an l̦ein ba, ‘Inaaj rupe tampel̦ in me kõm̦m̦anin pein armej. Innem ium̦win jilu wõt raan ak inaaj bar kalõk juon tampel̦, ijo wõt ke ejjab kõm̦m̦anin pein armej.’” 59 Meñe rar ba men kein ak kõmel̦el̦e ko aer rar oktak jãn doon.

60 Innem bũrij l̦apl̦ap eo ear jutak ijo iol̦apl̦ap im ear kajjitõk ippãn Jesus im ba: “Etke kwõjjab uwaak? Ta kein rej n̦aruom̦ kaki?” 61 Bõtab ear jab keroro im uwaake ñan jidik. Innem bũrij l̦apl̦ap eo ear bar kajjitõk ippãn im ba: “Kwe ke Christ, Nejin Eo Eutiejtata?” 62 Im Jesus ear ba: “Aet, im kom̦ naaj lo an Nejin armej jijet ituanbwijmaroñin pein Eo Ekajoor,* im an naaj itok ilo kõdo̦ ko ilañ.” 63 Ke bũrij l̦apl̦ap eo ear roñ men in, ear kekõl nuknuk ko an make, im ear ba: “Jejjab aikuj bar kappoktok ri-kam̦ool. 64 Kom̦ij roñ wõt an kõnono n̦ae Anij. Ta ami l̦õmn̦ak kiiõ?”* Im aolepeer rar ba bwe ej aikuj mej. 65 Innem jet rar jino kaplouki im pinej mejãn im baiti, im rar ba ñane: “Ñe kwe juon ri-kanaan, kwõn kwal̦o̦k wõn eo ej jeptake eok!” Im ri-jerbal ro an im̦õn ekajet eo rar jeptake im bõke.

66 Ke Piter ear pãdwõt ijo itulal̦ ilo mel̦an m̦weo, juon iaan jiroñ ro rej jerbal ñan bũrij l̦apl̦ap eo ear itok. 67 Im ke ear lo an Piter kõmmããn̦ãn̦ iturin kijeek eo, ear kalimjeke im ba: “Kwe eo juon kwaar pãd ippãn Jesus, ri-Nazeret en̦.” 68 Bõtab ear kariabe jiroñ eo im ba: “Ijaje kajjien l̦een̦ im ijjab mel̦el̦e ta n̦e kwõj kõnnaan kake.” Innem Piter ear etal jãn ijo ñan iturin kõjãmin wõrwõr eo. 69 Im jiroñ eo ear bar loe, im ear ba ñan armej ro rej jutak ijo im ba: “Em̦m̦aan n̦e ej bar juon iaaer.” 70 Bõtab Piter ear bar kariabe. Innem ãlikin jidik iien, armej ro rej jutak ijo rar bar jino aer kõnnaan ñan Piter im ba: “Lukkuun m̦ool ke kwe juon iaaer kõnke elukkuun alikkar ke kwe ri-Galili.” 71 Bõtab Piter ear kajje im ba: “Jerata en itok ioõ el̦aññe ij riab. Ijaje kajjien l̦õn̦e kom̦ij kõnnaan kake!” 72 M̦õjin wõt an kõnnaan ak ekkũr kako alen kein karuo, im Piter ear keememejtok an kar Jesus ba ñane im ba: “M̦okta jãn an ikkũr kako ruo kõttan, jilu alen am̦ naaj kaarmejjeteik eõ.” Innem ear kanooj eddotok bũruon im ear jino jañ.