1 Korint
15 Innem kiiõ, ro jeiũ im jatũ, ij kakeememej kom̦ kõn ennaan eo em̦m̦an iar kwal̦o̦k ñan kom̦, eo kom̦ar tõmake im kom̦ij wõnm̦aanl̦o̦k wõt im jutak pen kake. 2 El̦aññe kom̦ij dãpij wõt ennaan eo em̦m̦an iar kwal̦o̦k ñan kom̦, kom̦ naaj bõk lo̦mo̦o̦r. Bõtab el̦aññe kom̦ij jab, innem ejjel̦o̦k tokjãn ami kar oktak im rũttõmak.
3 M̦õttan men ko m̦oktata iar katakin kom̦ kaki me kar bar katakin eõ kaki, ej bwe Christ ear mej kõn jerawiwi ko ad, ãinwõt an Jeje ko ba; 4 im bwe kar kalibwini, innem ilo kar raan eo kein kajilu, ear bar mour, ãinwõt an Jeje ko ba; 5 im bwe ear wal̦o̦k ñan Sipas,* innem tokãlik ñan rijjilõk ro 12. 6 Ãlikin men in, ear wal̦o̦kl̦o̦k ñan elõñl̦o̦k jãn 500 rũttõmak ro ilo juon wõt iien, im enañin aolepeer rej mour wõt ñan rainin, ijoke jet iaaer em̦õj aer mej.* 7 Im ãlikin, ear wal̦o̦k ñan Jemes, innem tokãlik ñan aolep rijjilõk ro. 8 Ãliktata, ear wal̦o̦ktok ñan ña, ãinwõt ñe ña ij juon niñniñ eo ear l̦otak ak ejauñ an allõñ.
9 Ña ittãtata iaan rijjilõk ro, im ejjab tõllo̦kũ bwe ren n̦aeta rijjilõk kõnke iar kaeñtaan eklejia eo an Anij. 10 Meñe ãindein ak kõn wõt jouj eo el̦ap an Anij, ña ij juon rijjilõk, im ewõr tokjãn an kar kwal̦o̦k jouj eo an el̦ap ñan ña, kõnke el̦apl̦o̦k aõ jerbal jãn er aolep. Ak ilo m̦ool, ijjab kõm̦m̦ane men in kõn kajoor eo aõ make, bõtab unin aõ maroñ kõm̦m̦ane ej kõn wõt jouj eo el̦ap an Anij. 11 Innem meñe ña eo ak er eo rej kwal̦o̦k naan, kõmij aolep kwal̦o̦k kõn juon wõt ennaan im eñin ennaan eo kom̦ar tõmake.
12 Kiiõ el̦aññe jej kwal̦o̦k bwe Christ ear jerkak jãn mej, innem etke jet iaami rej ba bwe ro remej reban jerkakpeje? 13 El̦aññe m̦ool bwe ro remej reban jerkakpeje, innem mel̦el̦ein bwe Christ ejjañin jerkak jãn mej. 14 Ak el̦aññe Christ ear jab jerkak jãn mej, innem ejjel̦o̦k tokjãn ad kwal̦o̦k naan, im tõmak n̦e ami bareinwõt ejjel̦o̦k tokjãn. 15 Bareinwõt, el̦aññe m̦ool bwe ro remej reban jerkak jãn mej, mel̦el̦ein bwe Anij ear jab kõjerkak Christ jãn mej. Kõn men in, naaj watõk bwe kõj ri-kwal̦o̦k ro reriab kõn Anij kõnke ãinwõt jej riab ilo ad ba bwe ear kõjerkake Christ jãn mej. 16 El̦aññe ro remej reban jerkak jãn mej, mel̦el̦ein bwe Christ ear jab jerkak jãn mej. 17 Im el̦aññe Christ ear jab jerkak jãn mej, innem tõmak n̦e ami ejjel̦o̦k tokjãn, im kom̦ij pãdwõt ilo ami jerawiwi. 18 Bareinwõt, ri-kal̦oor ro an Christ im em̦õj aer mej,* renaaj jako ñan indeeo. 19 El̦aññe jej likũt ad kõjatdikdik ilo Christ ilo mour in wõt, innem el̦apl̦o̦k ad kabũrom̦õjm̦õj jãn jabdewõt armej.
20 Bõtab em̦õj an Christ jerkak jãn mej, im e eo m̦oktata ear jerkakpeje iaan ro rar mej.* 21 Ãinwõt an kar mej itok jãn juon armej, ãindein jerkakpeje ej itok jãn juon armej. 22 Ãinwõt an aolep armej mej kõn wõt Adam, ãindein aolep renaaj mour kõn wõt Christ. 23 Bõtab kajjojo ej jerkakpeje ekkar ñan laajrak in: Christ m̦oktata,* innem tokãlik ro doon Christ ilo iien eo enaaj pãd.* 24 Ãlikin men in, enaaj itok jem̦l̦o̦kin, ñe enaaj karo̦o̦ll̦o̦k Aelõñ* eo ñan Anij eo an, eo ej Jemãn, ãlikin an jol̦o̦k aolep kien ko im maroñ ko im kajoor ko. 25 Enaaj aikuj tõl ãinwõt juon kiiñ m̦ae iien Anij enaaj likũt aolep ro rej kõjdate ium̦win neen. 26 Innem naaj kajeepepl̦o̦ke ri-kõjdat eo ãliktata, eñin ej mej. 27 Anij ear “likũt men otemjej ium̦win neen.” Bõtab, ke ear ba bwe ‘men otemjej em̦õj likũt ium̦win neen,’ elukkuun alikkar bwe ejjab kitibuj Eo ear likũt men otemjej bwe ren pãd ium̦win maroñ eo an Christ. 28 Bõtab ñe em̦õj likũt men otemjej ium̦win maroñ eo an Nejin, innem Nejin enaaj kõttãik e make ñan Eo ear likũt men otemjej ium̦win maroñ eo an. Ilo wãween in, Anij enaaj men otemjej ñan armej otemjej.
29 Kõn men in, ta eo ro rej peptaij bwe ren mej renaaj kõm̦m̦ane? El̦aññe ro remej reban jerkakpeje ñan jidik, innem ewõr ke tokjãn aer peptaij ilo wãween in? 30 Bareinwõt, etke jej pãd ilo kauwõtata aolep iien?* 31 Raan otemjej ij jelm̦ae mej. Men in elukkuun m̦ool ãinwõt lañlõñ eo aõ kõn kom̦ ro jeiũ im jatũ, kom̦ eo rej ri-kal̦ooran Christ Jesus ad Irooj. 32 El̦aññe iar ire ippãn menninmour ko rellãj ilo Epesõs ãinwõt bar jet armej,* innem ewõr ke tokjãn men in ñan ña? El̦aññe ro remej reban jerkakpeje, innem “jen m̦õñã im idaak, bwe ilju jenaaj mej.” 33 Kom̦win jab kõtl̦o̦k an ro jet m̦on̦e kom̦.* Aetõl ro renana enaaj ko̦kkure m̦wil ko rem̦m̦an.* 34 Kom̦win ko̦ruj l̦õmn̦ak ko ami im kõm̦m̦ani men ko rejim̦we im bõjrak jãn ami kõm̦m̦an jerawiwi, kõnke jet iaami ejjel̦o̦k ami jel̦ã kõn Anij. Ij kõnnaan rot in ñan kõm̦m̦an bwe kom̦win jook.
35 Ijoke, enaaj wõr ej kajjitõk im ba: “Ewi wãween an ro remej naaj jerkakpeje? Enaaj kain rot ãnbwinnier?” 36 Kwe armej jajel̦o̦kjen̦! Men eo kwõj kalibwini ej aikuj mej m̦okta bwe en maroñ mour. 37 Ñe kwõj kalibwin juon men, bõlen juon ineen wiit ak ine ko jet, kwõjjab kalibwin kããn,* bõtab kwõj kalibwin juon ine. 38 Innem Anij eo ej kõm̦m̦an kããn* ine in ekkar ñan kõn̦aan eo an, im ej lel̦o̦k kããn* ine ko kajjojo. 39 Ejjab aolep kanniõk rej juon wõt, ewõr kanniõkin armej, ebar wõr kanniõkin kau, ewõr kanniõkin bao, im ewõr kanniõkin ek. 40 Ewõr ãnbwin ko ilañ, im ewõr ãnbwin ko ilal̦. Bõtab eoktak aiboojojin ãnbwin ko ilañ im ebar oktak aiboojojin ãnbwin ko ilal̦. 41 Ewõr aiboojojin al̦, ebar wõr aiboojojin allõñ, im ebar wõr aiboojojin iju ko. Ilo m̦ool, eoktak aiboojojin iju ko jãn doon.
42 Ejjel̦o̦k oktak jãn ñe ro remej rej jerkakpeje. Kar kalibwin ãnbwin ko rewabanban, bõtab ñe renaaj jerkakpeje, reban wabanban. 43 Ke kar kalibwini, ear kajjookok, bõtab ke ear jerkakpeje, ear aiboojoj. Ke kar kalibwini, ear m̦õjn̦o̦, bõtab ke ear jerkakpeje, ear kajoor. 44 Ke kar kalibwini, ãnbwinnin ear kanniõk im bõtõktõk, bõtab ke ear jerkakpeje, ãnbwinnin ej juon jetõb. El̦aññe ewõr ãnbwin ej kanniõk im bõtõktõk, ebar wõr ãnbwin ej jetõb. 45 Jeje ko rej ba: “Adam, armej eo m̦oktata, ear erom juon armej eo emour.” Adam eo ãlik ear erom juon jetõb eo ej lel̦o̦k mour. 46 Bõtab, ãnbwin eo ilo jetõb ejjab wal̦o̦k m̦okta. Ãnbwin eo me ej kanniõk im bõtõktõk ej wal̦o̦k m̦okta, im tokãlik ãnbwin eo ilo jetõb. 47 Em̦m̦aan eo m̦oktata ej jãn lal̦ in im kar kõm̦anm̦ane jãn bũñal, bõtab em̦m̦aan eo kein karuo ej jãn lañ. 48 Ro kar kõm̦anm̦an er jãn bũñal rej ãinwõt eo kar kõm̦anm̦ane jãn bũñal, im ro ilo lañ rej ãinwõt eo ear itok jãn lañ. 49 Im ãinwõt ad bõk nemãmeen eo kar kõm̦anm̦ane jãn bũñal, jenaaj bar bõk nemãmeen eo ear itok jãn lañ.
50 Ijoke, ro jeiũ im jatũ, ij ba ñan kom̦ bwe kanniõk im bõtõktõk ejjab maroñ jolõte Aelõñ eo an Anij, im ãnbwin eo ej wabanban ejjab maroñ jolõte juon men eo ejjab wabanban. 51 Roñjake m̦õk! In kwal̦o̦k ñan kom̦ juon men ettino im eokkwõjarjar: Jeban aolep kiki ilo mej, bõtab kõj aolep jenaaj oktak 52 ilo iien en̦ wõt, aet ilo bũkkinkwõle ilo rom,* ilo naaj jilel eo ãliktata. Jilel eo enaaj jañ, innem ro remej renaaj jerkakpeje ilo juon ãnbwin eo ejjab wabanban, im jenaaj oktak. 53 Ãnbwin eo ewabanban enaaj bõk juon ãnbwin ejjab wabanban, im eo emaroñ mej enaaj erom juon eo ejjãmin mej. 54 Ñe ãnbwin eo ewabanban ej bõk juon ãnbwin ejjab wabanban, im eo emaroñ mej enaaj erom juon eo ejjãmin mej, innem enaaj jejjet kũtien naan kein kar jei: “Naaj jol̦o̦k* mej ñan indeeo.” 55 “Mej, epãd ia am̦ anjo̦? Mej, epãd ia kajoor eo am̦ ñan kaeñtaan?” 56 Kajoor eo ej kõm̦m̦an mej ej jerawiwi, im kajoor eo an jerawiwi ej itok jãn Kien eo.* 57 Bõtab jen kam̦m̦oolol Anij kõnke ear letok anjo̦ ñan kõj ikijjeen Jesus Christ ad Irooj!
58 Kõn men in, kom̦ ro jeiũ im jatũ rejitõnbõro ippa, kom̦win jutak pen im tõt wõt. Aolep iien kom̦win poub wõt ilo jerbal eo an Irooj, im kom̦ jel̦ã bwe ejjab jejtokjãn ami kõm̦m̦ani jerbal ko an Irooj.