Worwor Ko i Jersualem

LALE mõk jerbal eo rej kõmõne ijin. Dri Israel ro rej boup in kaleki worwor kein i Jerusalem. Ke Kiñ Neb-u-kad-nez’zar e ar kokkure Jerusalem 152 yiõ ko lok man, e ar rupi worwor ko im tili aur ko an jikin kwelok eo. Dri Israel ro r’ar jab bar kalek worwor ko ke r’ar jeblak mokta jen Babilõn.

Ilo am lale, ewi wãwen armij ro r’ar lemnõk ke r’ar jokwe ijin iomin aolepen yiõ kein im ejelok worwor in kabol jikin kwelok in air? R’ar jab jokane. Enaj kar biruru an dri kijirat ro air itok im kokkure ir. Ak kiõ, lein Ni-hi-mai’a ej jibañ armij ro bwe ren bar kalek worwor ko. Kwo jela ke wõn in Ni-hi-mai’a?

Ni-hi-mai’a ej juõn dri Israel eo me e ar itok jen jikin kwelok in Shu’shan, ijo me Mor’di-keai im Ester rej jokwe ie. Ni-hi-mai’a e ar jerbal iloan imõn kiñ eo, inem bwelen e ar jeran Mor’di-keai im Liroij Ester. Ak Baibel eo ejjab ba bwe Ni-hi-mai’a e ar jerbal ñõn leo belen Ester, Kiñ E-has-u-i’rõs. E ar jerbal ňõn kiň eo tok juõn, Kiñ Ar-ta-xerx’es.

Kememij, Ar-ta-xerx’es ej kiñ eo emõn me e ar lelok ñõn Ez’ra mõnni eo elap bwe en jeblak kake ňõn Jerusalem im kõkãl tempel eo an Jeova. Ak Ez’ra e ar jab kalek worwor ko emwij rupi an jikin kwelok eo. Jen lale wãwen an kar Ni-hi-mai’a kõmõne jerbal in.

Emotlok 13 dre yiõ jen ke Ar-ta-xerx’es e ar lelok mõnni eo ňõn Ez’ra bwe en kõkãl tempel eo. Kiõ, Ni-hi-mai’a ej dri ititõk eo ňõn Kin Ar-ta-xerx’es. Melelen men in bwe ej lelok ňõn kiň eo wain eo limen, im kejbarok bwe ejelok en kajeoň in poiseni kiň eo. Ej juõn jerbal e kanuij lap tokjen.

Eokwe, juõn ran Ha-ne’nai, leo jein im jatin Ni-hi-mai’a im lõmaro jet jen enen Israel rej item lotok Ni-hi-mai’a. Rej kennanek e kin abañ ko me dri Israel ro rej ioni, im bwe worwor ko an Jerusalem re jeebeplok wõt. Men in ej lukkun kaburomõj Ni-hi-mai’a, im ej jar ñõn Jeova kake.

Juõn ran, kiñ eo ej kile bwe Ni-hi-mai’a e buromõj, im ej kajitõk: ‘Etke kwo buromõj?’ Ni-hi-mai’a ej jiroñ e bwe ej kinke Jerusalem e lukkun jorran im worwor ko re jebeeplok. ‘Ta eo kwoj kajitõk?’ kiñ eo ej ba.

‘Kwon kotellok iõ bwe in ilok ñõn Jerusalem,’ Ni-hi-mai’a ej ba, ‘bwe in bar kalek worwor ko.’ Kiñ Ar-ta-xerx’es e lukkun joij. Ej ba bwe Ni-hi-mai’a e maroñ ilok, im ej jibañ e ain alal ko bwe ren ekkal kaki. Ni-hi-mai’a ej itaklok wõt Jerusalem ak ej kennanek armij ro lemnõk ko an. Rej mõnõnõ, im ba: ‘Jen jino ekkal.’

Ke dri kijirat ro an dri Israel rej lo an jino jutak worwor eo, rej ba: ‘Je naj ilem mõn ir, im kabwijrak jerbal in ekkal eo.’ Ak Ni-hi-mai’a ej roñjake men in, im ej lelok ñõn dri jerbal ro jãji im mõri. Inem ej ba: ‘Komin jab mijõk dri kijirat ro ar. Komin tõrinae kin ro jeõmi im jatõmi, kin ro ro nejõmi, kin limaro belõmi, im kin mokko imõmi.’

Armij ro re kanuij beran. Rej dror ken tõrinae ko air ituriir bwe ren bojak ran im boñ, ke rej ekkal wõt. Kin men in, elikin 52 wõt ran e drerelok worwor ko. Kiõ armij ro re maroñ jokwe iloan jikin kwelok eo im ejelok air uõta. Ni-hi-mai’a im Ez’ra rej katakin armij ro kin kien Anij, im armij ro re mõnõnõ.

Ak wãwen air mour ejjab einwõt kar mokta jen an kar dri Babilõn bõk dri Israel ro bwe ren dri kamakoko. Kiñ in Põrsia eo ej iroij ion armij ro im rej aikwij jerbal ñõn e. Ak Jeova e ar kalimur bwe e naj jilkintok juõn kiñ ekãl, im bwe kin in e naj bõktok ainemõn non armij ro. Wõn kiñ in? Ekijkan an naj bõktok ainemõn ñõn lõl? Tarrin 450 yiõ ko re motlok mokta jen air bar jela jabrewõt kin kalimur in. Inem e lotak juõn niñniñ eo me e kanuij lap tokjen. Ak men in ej bar juõn bwebwenato.