Katak 12

Jumae Jar In Jitõb Ro Renana

1. Jesus ear et ke ear wõnmaik jitõb ro renana?

MWIJIN wõt an baptais, Jesus Christ ear ilok ñan ene jemaden in Judea bwe en jar im kalmenlokjen ie. Ijo Satan Devil eo ear kajeoñ in kabo e bwe en rupe kien Anij. Bõtab Jesus ear karmijete kein kabo ko an Devil eo im ear jab bo ilo aujid ko an. Jesus ear jelmaik jitõb ro jet renana ke ear jerbal in kwalok nan i lal. Ak emakijkij an kar kauweik im jumaik ir.​—Luk 4:1-13; 8:26-34; 9:37-43.

2. Ta kajitõk ko jenaj etale?

² An Bible eo kamelele kin ien kein en menin kareel buruõd bwe ewõr jitõb ro renana. Rej kate in kajebwãbweik armij ro. Bõtab, jemaroñ jumae jar in jitõb rein renana. Ak rej itok jen ia? Etke rej kate in mone armij ro? Im rej kajerbal kõl rot ko ñan kõtõbar air kõnan? Am lo uak ko ñan kajitõk kein enaj jibañ yuk bwe kwon jumae jar in jitõb ro renana.

JITÕB RO RENANA​—JINOIR IM AIR MEJENKAJJIK

3. Ewi wãwen an kar Satan Devil eo jino walok?

³ Etto wõt moktalok jen an kar kõmanman armij ro Jehovah Anij ear kõmman elõñ jitõb ro. (Job 38:4, 7) Einwõt kar kamelele ilo Katak 6, juõn ian enjel rein ear kaddek juõn kõnan bwe armij ro ren kabuñ ñan e jen air kabuñ ñan Jehovah. Ilo an jibadbad ñan mejenkajjik in, enjel in enana ear jumaik im kariap Ri Kõmanman eo, im bar bõkmantak melele ñan kõrã eo moktata bwe Anij ear juõn ri riap. Inem, ekkar, bwe jitõb in jumae in en bõk ãt in Satan (ri jumae) Devil eo (ri ruruwe).​—Jenesis 3:1-5; Job 1:6.

4. Ewi wãwen an kar jet ian enjel ro jerawiwi ilo ran ko an Noah?

⁴ Tokelik, enjel ro jet rar kobalok ibben Satan Devil eo. Ilo ran ko an Noah juõn emaan ewãnik, jet ian enjel rein rar ellok jen jerbal ko air ilo lañ im bõk enbwinin kanniek bwe en bo burueir kin air kõnan belele ibben kõrã ro ilal. Ejelok bere bwe Satan ear kareel enjel rein bwe ren lor ialin jab bokake in. Men in ear tel ñan air neje ajiri ro reinjuõn naetan Nephilim, ro rar lej im ri ire. Ke Jehovah ear bõktok Ibwijleplep eo elap, ear kokkure armij ro im rar bo ilo nana kab nejin enjel ro renana. Enjel ro im rar jumae rar ko jen air jorrãn ilo air wutik enbwiniir ilo kanniek im jeblak ñan jikin bed an jitõb ro. Ak Anij ear bõpraik demon rein ilo an watõk ir einwõt ri bukwelok ro rej bed ilo marok. (Jenesis 6:1-7, 17; Jud 6) Bõtab, Satan, “iroij in demon ro,” im enjel ro an renana rar wõnmanlok wõt ilo air jumae. (Luk 11:15) Ta mejenkajjik eo air?

5. Ta mejenkajjik eo an Satan im demon ro an, im ta ko rej kajerbali ñan aujidi armij ro?

⁵ Mejenkajjik eo enana an Satan im demon ro ej bwe ren ukõt armij nae Jehovah Anij. Kin men in, ri nana rein rar tel biloik, kalelñoñ, im kokkure armij ilo aolepen bwebwenato ko an lal. (Reveles̃õn 12:9) Joñok ko kin ran kein rej kamol bwe elaplok an lej jumae ko an demon ro jen jabdewõt ien ko jet. Ñan aujidi armij ro, ekkã an demon ro kajerbal madmõd ko rekajju wãweier. Ewi wãwen an demon ro kajerbal aujid in, im ewi wãwen am maroñ jojomar kin kwe make?

WÃWEN AN JAR IN JITÕB RO RENANA KATE IN TEL BILOIK YUK

6. Ta in anijnij, im ta mõttan wãwen ko an?

⁶ Ta in anijnij? Ej ñe juõn ej kobalok ibben demon ro, ak jitõb ro renana, kajjulok ak ikijen juõn ri madmõd. Anijnij ej jerbal ñan demon ro ilo ejja wãwen eo aujid ko rej jerbal ñan ri kakidudu ro: Ej kareel eo ekõnan. Im einwõt juõn ri kakidudu ej kajerbal kajjo kain aujid ko ñan kareel menin mour ko ilo aujid ko an, ejja wãwen in an jitõb ro renana kajerbal kajjo kain kein madmõd ko bwe armij ro ren bo. (Keidi Sam 119:110.) Jet ian men kein rej bubu, magic, kabukõt kakõlle ko, madmõd, anjin, bukõt jibañ jen ri anijnij ro, im kennan ibben ro remij.

7. Ewi joñan an jededlok anijnij, im etke emõn an eddeklok bar ilo ailiñ ko im rej ba rej Ri Christian?

⁷ Ejerbal aujid eo, bwe anijnij ej kareel armij ro ibelakin lal in. Ro rej mour ilo bulõn mãr ko rej jibadõk ri uno ro, im ri jerbal ro ilo jikin kwelok ko relap rej jibadõk ro ri jedjed iju. Ebar lap an wõnmanlok kamadmõd in anijnij ilo ailiñ ko im rej ba rej Ri Christian. Tõbrak in ekkatak ko rej kalikar bwe ilo United States wõt, enañin 30 magazine ko ewõr 10,000,000 copy in ñe rekoba aolep rej rejetaki anijnij ko rekajju wãweier. Ri Brazil rej jolok elaplok jen 500 million dollar ko kin kein anijnij ko ilo kajjojo yiõ. Bõtab, 80 percent ian ro rej keini air jibadõk jikin jerbale anijnij ko ilo ailiñ en rej Catholic ro emwij air baptais im rej keini ien Mass. Ke elõñ ri kaki in kabuñ rej bar anijnij, elõñ ro im rej niknik in kabuñ rej lemnak bwe air eindein ej emõn ibben Anij. Ak ej ke?

ETKE BIBLE EO EJ KANANAIK JERBAL IN ANIJNIJ

8. Ta kamelele ko an Jeje ko kin anijnij?

⁸ Elañe kwar katak bwe jet ian wãwen anijnij ak madmõd rej mõttan ialin kõtõbar jitõb ro remõn, kwonaj bwilõñ in katak kin ta eo Bible ej ba kin anijnij. Kar kakkõl ro don Jehovah: “Komin jab oktõk ñõn ro dimon rej ber ibeir, ak ro dri marmir; komin jab kabukõt ir, in erom men in jõjõik kake.” (Livitikõs 19:31; 20:6, 27) Book in Reveles̃õn ilo Bible ej kakkõl kin ãjinkij an “ro dri marmir” enaj ilo “lomalo eo ej urur kin kijeek im brimston; eñin mij [ñan indio] ken ka ruo.” (Reveles̃õn 21:8; 22:15) Jehovah Anij ejjab mõnõnõ kin jabdewõt wãwen anijnij. (Duteronomi 18:10-12) Etke ej eindein?

9. Etke jemaroñ kile bwe ennan in ran kein jen lal in jitõb ro rejjab jen Jehovah?

⁹ Jehovah ear jilkinlok jitõb ro remõn, ak enjel ro rewãnik, bwe ren kennan ibben jet armij ro mokta jen an kar dedelok Bible eo. Jen ien an dedelok, Nan in Anij ear letok nan in kaiñi ko armij ro rar aikwiji bwe ren karejar ñan Jehovah ilo emõn. (2 Timote 3:16, 17; Dri Hibru 1:1, 2) Ejamin le jen Nan eo an ekwojarjar im lelok ennan in kejelã ko ñan ri madmõd ro. Ilo ran kein ennan in kejelã ko otemjej jen lal in jitõb ro rej itok jen jitõb ro renana. Jerbal in madmõd emaroñ tel ñan an juõn ire ibben demon ak jitõb ro renana remaroñ bar miõk ibben. Kin men in, ilo yokwe Anij ej kakkõl kij bwe jen jab kobalok ilo jabdewõt wãwen madmõd. (Duteronomi 18:14; Dri Galetia 5:19-21) Bar juõn, elañe jej wõnmanlok wõt ilo ad anijnij ak madmõd mwijin ad bõk jelã kin wãwen an Jehovah lemnak kake, jej kalikar ad rejetake jar in jitõb ro rejumae im erom ri kijirãt ro an Anij.​—1 Samuel 15:23; 1 Kronikel 10:13, 14; Sam 5:4.

10. Ta in dikanij, im etke jen kar ellok jen e?

¹⁰ Juõn wãwen madmõd im ebuñbuñ ej dikanij​—kilen kabukõt ta kin ilju im men ak kin men ko renojak kin jibañ jen jitõb ro. Jet ian wãwen dikanij ej astrology (jedjed iju), kalimjek ball in glass eo, kamelele kin ettõnak ko, lale lopiden pein juõn, im kajerbal tarot card ko ñan dikanij. Elõñ rej watõk dikanij einwõt men in kamõnõnõ bajjek im ejelok jorrãn ie, ak Bible eo ej kalikar bwe ro rej dikanij im jitõb ro renana rej bõk pein don. Ñan wanjoñok, Jerbal 16:16-19 ej ba “jitõb õn marmir” ear kamaroñ juõn jiroñ bwe en “drikanij.” Bõtab, maroñ eo an ñan dikanij ear jako ke ar kajutaklok demon eo jen e.  Ealikar, dikanij ej juõn aujid demon ro rej kajerbale ñan annane armij ro ilo aujid eo air.

11. Ewi wãwen an juõn kajeoñ in kennan ibben eo emij naj tel e ñan juõn aujid?

¹¹ Elañe kwoj jañũt juõn eo ejitenburu ilo family eo am ak juõn jeram eo ebake yuk, ebidodo am naj maroñ reel kin bar juõn aujid. Juõn ri madmõd emaroñ lewõj kejelã ko rittino ak emaroñ kennan einwõt ilo ainikien eo emij. Kwon ekkõl! An juõn kate in kennan ibben ro remij enaj jemlok ilo juõn aujid. Etke? Kinke ro remij ejelok air maroñ kennan. Einwõt am naj ememej, Nan an Anij ealikar an ba bwe ilo ien mij juõn “ej jeblak ñõn lõl eo an; ilo ran eo lemnok ko an rejokolok.” Ro remij “ejelok air jela.” (Sam 146:4; Ekklisiastis 9:5, 10) Bar juõn, ilo mol ej demon ro im rar kajeoñe ainikien eo emij im lelok melele ko ikijen ri madmõd eo kin eo emwij an mij. (1 Samuel 28:3-19) Inem, “jabdewõt eo ej kajitõk kin ro remij” emwij an bo ilo aujid eo an jitõb ro renana im ej jerbal nae ankil an Jehovah Anij.​—Deuteronomy 18:11, 12, New World Translation; Aiseia 8:19.

JEN KAALTOK ÑAN IRE

12, 13. Ta kein kamol ko bwe demon ro renaj kate wõt in kabo im kabõnõnõik armij ro?

¹² Ñe kwoj bokake nan in kaiñi ko jen Nan in Anij kin madmõd, kwoj karmijete aujid an demon ro. (Keidi Sam 141:9, 10; Dri Rom 12:9.) Ej melelen bwe jitõb ro renana renaj bõjrak jen air kate in kabo yuk ke? Eban otem ban! Mwijin an kajeon in kabo Jesus jilu alen, Satan ear “ilok jen E mae bar juõn ien.” (Luk 4:13) Ilo ejja wãwen in, jitõb ro ebin burueir rejjab kaaltok wõt armij ak rej bar ire ibbeir.

¹³ Kememej ad kar etale wãwen Satan ear jumae ri karejaran Anij Job. Devil eo ear kõmman bwe en jako menin mour ko an im bwe en mij enañin aolep ro ri karejaran. Satan ear bar mõn ro nejin Job. Elikin, ear kõmman bwe Job make en bõk juõn nañinmij ekõmetak. Ak Job ear debij wõt an tiljek ñan Anij im bõk jerammõn elap. (Job 1:7-19; 2:7, 8; 42:12) Jen ien eo, demon ro rar kõmman bwe jet armij ro ren ban konono ak bilo im rej wõnmanlok wõt im mõnõnõ in kaeñtan armij ro. (Matu 9:32, 33; 12:22; Mark 5:2-5) Rainin, kejelã ko rej kwalok bwe demon ro rej kokkure jet armij ro kin mour in belele im kokkure ro jet bwe ren uriekãk. Rej kamakit ro jet ñan air uror im man ir make, men ko rej mõttan jerawiwi ko nae Anij. (Duteronomi 5:17; 1 Jon 3:15) Meñe eindein, elõñ thousand ro im rekin bo ibben jitõb rein renana rar maroñ ko im bõk anemkwoj jen ir. Ewi wãwen air kar eindein? Rar maroñ kin air bõk jet lajrak ko raorõk.

KILEN JUMAE JITÕB RO RENANA

14. Einwõt joñok eo an Ri Christian ro ilo Ephesus ilo century eo kein ka juõn, ewi wãwen am maroñ jumae jitõb ro renana?

¹⁴ Ta juõn wãwen kwomaroñ jumae jitõb ro renana im kejbãrok kwe make im family eo am jen aujid ko air? Ilo century eo kein ka juõn Ri Christian ro ilo Ephesus ro rekin anijnij mokta jen air erom ri tõmak ro rar lor juõn lajrak ejejjet. Jej konono bwe “elõñ ian ro r’ar kõmomu rej aini buk ko air, im tili iman mejen armij otemjej.” (Jerbal 19:19) Meñe kwojañin kajerbale anijnij ko, jolok jabdewõt men ko im ewõr mõttan kunair ie. Men in ej kakobaik book ko, magazine ko, video ko, poster ko, record kin al ko, im kein anijnij ko. Ebar kobatok ilo men in rej ekjap ko, marmar ko im men ko jet rej kõnake ñan karwaan, im menin letok ko jen ro im rej ri anijnij. (Duteronomi 7:25, 26; 1 Dri Korint 10:21) Ñan wan joñok: Juõn pea in ri belele ilo Thailand etto air kar abõnõnõ kin demon ro. Inem rar jolok men ko rej mõttan kein anijnij ko. Kar ta jemlok eo? Rar ainemõn jen an demon ro kokkure ir im jen ien in rar lukkun wõnmanlok wõt ilo tõmak.

15. Ñan jumae jar in jitõb ro renana, ta bar juõn lajrak e aorõk?

¹⁵ Ñan jumae jitõb ro renana, juõn menin aikwij ebar aorõk ñan jerbale ej lor nan in katak an ri jilek Paul kin kõnak aolepen kein tarinae ko an Anij. (Dri Epesõs 6:11-17) Ri Christian ro rej aikwij kabini kein jojomar ko air nae jitõb ro renana. Ta mõttan ko rej koba ilo men in? “Ion otemjej,” Paul ear ba, “emwij kwotõke kein tõrak in tõmak, ilo e kom naj maroñ in kwuni mõri kijeek otemjej an eo dri nana.” Ilo mol, joñan an kajurlok am tõmak, enaj laplok am naj maroñ jumae jar in jitõb ro renana.​—Matu 17:14-20.

16. Ewi wãwen am maroñ kakajur am tõmak?

¹⁶ Ewi wãwen am maroñ kakajur am tõmak? Ilo am wõnmanlok wõt in katak Bible im jerbali katak ko ilo am mour. Kajur in tõmak an juõn elap an wawa ion joñan an bin bedbedin​—jelãlokjen eo kin Anij. Kwojjab errã ke bwe jelãlokjen eo ejejjet eo kwar bõk im kadeloñ iburuõm ke kwar katak Bible eo ear kalek am tõmak? (Dri Rom 10:10, 17) Kin men in, ejelok bere, ilo am wõnmanlok wõt ilo katak in im kõmman bwe en am manit ñan keini ien kwelok ko an Ri Kennan ro an Jehovah, tõmak eo am enaj laplok an kajur. (Dri Rom 1:11, 12; Dri Kolosse 2:6, 7) Enaj juõn likepijñak ekajur nae jumae ko an demon.​—1 Jon 5:5.

17. Bar ta ial ko jet juõn emaroñ aikwij kõmmane ilo an jumae jar in jitõb ro renana?

¹⁷ Bar ta lajrak ko jet juõn eo ej kate emaroñ bõk ñan jumae jar in jitõb ro renana? Ri Christian ro ilo Ephesus rar aikwij bõk jibañ kinke rar jokwe ilo juõn jikin im eobrak kin jerbal an demon. Kin men in, Paul ear jiroñ ir: “Komin jar ilo ien ko otemjej ilo Jitõb.” (Dri Epesõs 6:18) Ke jej mour ilo juõn lal eobrak kin demon ro, ad lukkun jar kin jibañ jen Anij elap an aorõk ñan jumae jitõb ro renana. (Matu 6:13) Jibañ ilo jitõb im jar an elder ro ilo congregation eo an Ri Christian enaj lap an jibañ ilo menin.​—Jemes 5:13-15.

KATE WÕT ILO AM TARINAIK JITÕB RO RENANA

18, 19. Ta eo juõn emaroñ kõmmane elañe demon ro re bar kabõnõnõik e?

¹⁸ Bõtab, meñe jet rar lor lajrak kein, rar abõnõnõ wõt kin jitõb ro renana. Ñan kalikar, juõn emaan ilo Côte d’Ivoire ear katak Bible eo ibben Ri Kennan ro an Jehovah im ear kokkure aolep marmar ko an. Elikin ien in, ear emõn an wõnmanlok, ear wujleplok an mour ñan Jehovah, im kar baptais e.  Ak juõn week elikin an baptais, demon ro rar bar jino in kabõnõnõik e, im ainikien ko rar jiroñ e bwe en jolok tõmak eo an ekãl. Elañe menin ear walok ñan yuk, ej melelen bwe kwar luji an Jehovah kejbãrok yuk ke? Ejjab aikwij eindein.

¹⁹ Meñe leo ewãppen Jesus Christ ear wõr jibañ ekwojarjar ibben, ear roñ wõt ainikien jitõb eo enana Satan Devil eo. Jesus ear kwalok wãwen eo ñan kõmmane ñe eindein. Ear jiroñ Devil eo: “Kwon ilok, Setan!” (Matu 4:3-10) Ilo ejja wãwen in, kwon kalikar am jab kõnan eoroñ ainikien ko jen lal an jitõb ro renana. Jumae jitõb ro renana ilo am kir Jehovah kin jibañ. Aet, jar ilo ainikien elaj im kajerbal etan Anij. Jabõn Kennan Ko 18:10 ej ba: “Etan Jeova juõn imõn bar e kajur; dru wãnik ej kone inem ejelok an uõta.” Leo ej Ri Christian ilo Côte d’Ivoire ear kõmmane men in, im jitõb rein renana rar bõjrak jen air kabõnõnõik e.​—Sam 124:8; 145:18.

20. Ñan elij, ta eo kwomaroñ kõmmane ñan jumae jitõb ro

²⁰ Jehovah ear kõtlok bwe jitõb ro renana ren bed wõt, ak ej kwalok wõt an kajur, elaptata kin ro don, im rej kwalok wõt etan ilo aolepen lal. (Exodus 9:16) Elañe kwoj bed ebake wõt Anij, kwojamin aikwij mijak jitõb ro renana. (Bwinbwin 23:21, 23; Jemes 4:7, 8; 2 Piter 2:9) Kajur eo air ewõr joñan. Rar bõk kaje ilo ran ko an Noah, kar jolok ir jen lañ ilo ien kein ad, im kiõ rej kõttar ekajet eo eliktata. (Jud 6; Reveles̃õn 12:9; 20:1-3, 7-10, 14) Ilo mol, rej wũdiddid kin jorrãn eo air ej itok. (Jemes 2:19) Inem meñe jitõb ro renana rej kate in kareel yuk kin jet ian aujid ko ak rej ire ibbam ilo jabdewõt wãwen, kwomaroñ jumaik ir. (2 Dri Korint 2:11) Karmijete jabdewõt wãwen anijnij, jerbale nan in katak jen Nan in Anij, im kabukõt buñburu eo an Jehovah. Jab rumij ilo am kõmmane menin, kinke am mour ej atartar ion am jumae jar in jitõb ro renana!

ETALE JOÑAN JELÃLOKJEN EO AM

Ewi wãwen an jitõb ro renana kajeoñ in tel biloik armij ro?

Etke Bible eo ej kananaik anijnij?

Ewi wãwen juõn emaroñ bõk anemkwoj jen jar in jitõb ro renana?

Etke kwoj aikwij kate wõt in jumae jitõb ro renana?

renana?

[Pija eo ilo peij 110]

Ewi wãwen am watõk anijnij ilo jabdewõt wãwen?