Katak 16
Ewi Wãwen Am Maroñ Ruaklok Ñan Anij
1. Ta wãwen kabuñ ko renañin einwõt juõn ilo elõñ kabuñ ko?
JUÕN RI ALUIJ ilo an jambo lok ñan juõn ailiñ in Asia ear bwilõñ kin kilen kabuñ ko ear lo ilo juõn temple an Buddha. Meñe ekjap ko kar jab kin Mary ak Christ, elõñ manit ko kar einwõt an mõn jar eo ilo ailiñ eo an. Ñan kõkkar, ear kile air kajerbal marmar ko im rar elijin men kin jar ko. Ro jet bareinwõt rar keidi men kein. Itu Rear ak itu Rilik, wãwen an ri kabuñ ro ruaklok ñan Anij ak ñan men ko rej kabuñ ñani renañin einwõt juõn.
2. Kar kameleleike jar einwõt ta, im etke elõñ armij rej jar?
2 Elaptata, elõñ rej kajeoñ in ruaklok ñan Anij ilo air jar ñan e. Emwij kameleleike jar einwõt “juõn ial in kennan jen armij ibben eo ekwojarjar ak eo erreo—Anij, anij ko, ijoko ilañ, ak ibben kajur ko reutiej.” (The New Encyclopædia Britannica) Bõtab, ñe rej kebake Anij ilo jar, jet rej lemnak wõt kin tokjen ñan ir make wõt. Ñan kõkkar, juõn ien juõn emaan ear kajitõk ibben juõn ian Ri Kennan ro an Jehovah: “Elañe kwoj jar kin iõ, abañ ko ilo family eo aõ, ilo jikin jerbal eo aõ, im kin ejmour eo aõ ren jako ke?” Alikar lein ear watõk bwe en kar eindein, ak elõñ rej jar im lo bwe abañ ko air rej wõnmanlok wõt. Kin men in jemaroñ kajitõk, ‘Etke jej aikwij ruaklok ñan ibben Anij?’
ETKE RUAKLOK ÑAN ANIJ
3. Jar ko ad en kar ñan wõn, im etke?
3 Jar ejjab juõn manit bajjek, im ejjab juõn ial in bõk ad aikwij wõt. Juõn un elap kin ad ruaklok ñan Anij ej ñan ad kebake e. Kin men in, jar ko ad ren kar ñan e wõt, Jehovah Anij. “Jeova ej ebak ñõn ir otemjej rej kir ñõn E,” ri jeje sam David ear ba. (Sam 145:18) Jehovah ej kir kij bwe jen kabukõt juõn bed e ainemõn ibben. (Aiseia 1:18) Ro rej bõk kir in rej errã ibben ri jeje sam eo ear ba: “A emõn iba bwe in kebakwoj ñõn Anij.” Etke? Kinke ro rej kebake Jehovah Anij renaj lo mõnõnõ eo emol im juõn bõklikit in ainemõn.—Sam 73:28.
4, 5. (a) Etke eaorõk ad jar ñan Anij? (b) Kain bed rot jemaroñ kaleke ibben Anij ikijen jar?
4 Etke jej jar ñan Anij elañe e ‘jelã men ko jej aikwiji mokta jen ad kajitõk ibben’? (Matu 6:8; Sam 139:4) Ad jar ej kalikar ad tõmak ilo Anij im jej reilok ñan e einwõt Unin “men in letok emõn im wãppen otemjelok.” (Jemes 1:17; Dri Hibru 11:6) Ebuñburuen Jehovah kin jar ko ad. (Jabõn Kennan Ko 15:8) E mõnõnõ in eoroñ nan in kamolol ko ad im nan in nebar ko, einwõt juõn jemen ej lañliñ ñe ej eoroñ nejin eo edik kwalok nan in kamolol ko an remol. (Sam 119:108) Ijo im ewõr juõn bed emõn ibben jemen im nejin, ewõr konono emãnãn ie. Juõn ajiri eo ej bõk yokwe, ekõnan kennan ibben jemen. Emol ejja einwõt kõta eo ad ibben Anij. Elañe emol ad kamolol kin men ko jar katak kin Jehovah im yokwe eo ear kwalok ñan kij, juõn kõnan elap enaj bed ibbed ñan kwalok buruõd ñan e ilo jar.—1 Jon 4:16-18.
5 Ñe jej kebake Anij eo Eutiej Tata, en ilo kautiej eo emol, ak ejelok unin ad lukkun inebata kin nan ko rejejjet ñan ad kajerbali. (Dri Hibru 4:16) Ad maroñ kebake Jehovah ebellok wõt aolep ien. Im ewi joñan ad jerammõn kin maroñ in ‘kwalok buruõd’ ñan Anij ilo jar! (Sam 62:8) Kamolol kin Jehovah ej tel ñan juõn bed eo emãnãn ibben, einwõt leo im ear tiljek Abraham ear mõnõnõ kin jimjera eo an ibben Anij. (Jemes 2:23) Ak ñe jej jar ñan Iroij eo Ekajur Bõtata ijoko otemjej, jej aikwij bokake nan in kaiñ ko an ñan maroñ kebake e.
AIKWIJ KO ÑAN RUAKLOK ÑAN ANIJ
6, 7. Meñe Anij ejjab watõk wõnãn ñan eoroñ jar ko ad, ta ko ej aikwiji jen kij ñe jej jar?
6 Jej aikwij money ke ñan kebake Anij? Elõñ armij rej kõllã ñan ri tel in kabuñ ko air bwe ren jar kin ir. Jet rej bar tõmak bwe ekkar ñan joñan air lelok naj ilo joñan eoroñ jar ko air. Bõtab, Nan in Anij ejjab kõkkar joñan money juõn ej aikwij lelok bwe en tellokin kebake Jehovah ilo jar. Men in letok ko an ilo jitõb im jerammõn ko kin juõn kõta ej bõk ilo jar rebellok kin ejelok wõnãn.—Aiseia 55:1, 2.
7 Inem, ta ej menin aikwij? Juõn buru ejimwe ej juõn ian menin aikwij elap. (2 Kronikel 6:29, 30; Jabõn Kennan Ko 15:11) Jen buruõd jej aikwij jerbale tõmak eo ad ilo Jehovah Anij einwõt ‘Eo ej roñjake jar’ im ej “eo ej lelok jinekjej ñan ro rej kabukõt e ilo mol.” (Sam 65:2; Hebrews 11:6, New World Translation) Jej bar aikwij juõn buru ettã. (2 Kiñ Ro 22:19; Sam 51:17) Ilo juõn ian wan joñok ko an, Jesus Christ ear kwalok bwe ilo ien ear kebaklok Anij, juõn ri tel owõj eo ettã buruen ear wãniklok jen juõn Pharisee eo ekemjãje. (Luk 18:10-14) Ilo ad kebake Anij ilo jar, jen kememej wõt bwe “jabrewõt eo e utiej buruen, ej men in jõjõik ñõn Jeova.”—Jabõn Kennan Ko 16:5.
8. Elañe jekõnan bwe Anij en uaki jar ko ad, jen kar karreoik kij make jen ta?
8 Elañe jekõnan bwe Anij en uaki jar ko ad, jenaj aikwij karreoik kij make jen mwil ko renana. Ke ri jilek James ear rejañ ro jet bwe ren ruaklok ñan Anij, ear bar kobaik: “Karreo peimi, kom dri jerawiwi; im kokwojarjar buruemi kom dri buru jibil.” (Jemes 4:8) Bar ro ri nana remaroñ deloñ ilo juõn bed in ainemõn ibben Jehovah elañe rej ukwelok im ellok jen kõmman ko air mokta. (Jabõn Kennan Ko 28:13) Jeban tellokin walok iman Jehovah elañe ejjab mol ad karreoiki ial ko ad. Nan in Anij ej ba: “Bwe mejen Jehovah rej lale ro remõn, im lojiliñin rej ñõn jar ko air; a turin mejen Jehovah ej ion ro rej kõmõn nana.”—1 Piter 3:12.
9. Ilo ad kebake Jehovah en ikijen wõn eo, im etke?
9 Bible eo ej ba: “Emol ejelok juõn armij dru wãnik ion lõl.” (Ekklisiastis 7:20) Kin unin kwomaroñ kajitõk: ‘Inem, en ewi wãwen, ad maroñ kebake Jehovah Anij?’ Bible eo ej uak: “Im elañe jabrewõt armij ej jerawiwi, juõn ar Dri Jojomar iben Jemer, Jisõs Kraist Dru Wãnik.” (1 Jon 2:1) Meñe kij ri jerawiwi, jemaroñ kebake Anij kin maroñ in kennan ikijen Jesus Christ, eo ear mij einwõt juõn binmour kin kij. (Matu 20:28) E wõt ial in kebake Jehovah Anij. (Jon 14:6) Jej aikwij kejbãrok ñe je ab kajettokjen katok in binmour eo an Jesus ilo ad beran in jerawiwi wõt. (Dri Hibru 10:26) Bõtab, elañe jej lukkun kate wõt in jab bwid ak jej jirullok wõt jet ien, je maroñ ukwelok im kajitõk ibben Anij kin jolok bwid. Ñe jej kebake e kin juõn buru ettã, enaj eoroñ kij.—Luk 11:4.
IEN KO ÑAN KENNAN IBBEN ANIJ
10. En ewi wãwen ad kajeoñe Jesus ñe jej jar, im ta ien ko rekkar bwe jen jar make lok iad?
10 Jesus Christ ear lukkun kaorõk bed eo an ibben Jehovah. Kin men in, Jesus ear karõke ien bwe en kennan ibben Anij ilo jar. (Mark 1:35; Luk 22:40-46) Emõn bwe jen kajeoñe joñok eo an Jesus im keini ien ad jar ñan Anij. (Dri Rom 12:12) Ekkar bwe jen jino kajjojo ran kin nan in jar ko, im mokta jen ad kiki, ejimwe ad maroñ kamolol Jehovah kin wãwen ran eo. Iloan ran eo, en juõn mejenkajjik ibbed bwe jen kebake Anij “ilo ien ko otemjej.” (Dri Epesõs 6:18) Jemaroñ bar jar jen buruõd, kin ad jelã bwe Jehovah emaroñ eoroñ kij. Ad kennan ibben Jehovah make iad enaj lap an jibañ kabin bed eo ad ibben, im ad jar ñan ibben Jehovah ran otemjej enaj kalaplok ad ruaklok ñan ibben.
11. (a) Etke family ko ren jar ibben don? (b) Ñe kwoj ba “Amen” ilo jemlokin ien am jar, ta melelen?
11 Jehovah ej bar eoroñ jar ko im rej kin jar in armij ro. (1 Kiñ Ro 8:22-53) Jemaroñ kebake Anij einwõt juõn family, im bõran ri mweo emaroñ tel. Men in ej menin kakajur kein lukwõj eo ñan juõn family, im Jehovah ej erom einwõt juõn eo emol ñan ajiri ro ñe rej roñ an jemeir im jineir jar ñan e ilo ettã buru. Ak ta elañe juõn ej tel ilo jar kin ro jet, einwõt ilo juõn ian kwelok ko an Ri Kennan ro an Jehovah? Elañe jej bed ie, jen lukkun eoroñ ennan, bwe en jimwe ad maroñ ba jen buruõd “Amen,” eo melelen “En eindein.”—1 Dri Korint 14:16.
JAR KO ME JEHOVAH EJ ROÑJAKI
12. (a) Etke Anij ejjab uak jet jar ko? (b) Etke jen kar jab lemnak kin kõnan ko ad make wõt ñe jej jar?
12 Jet remaroñ lemnak bwe Anij ejjab uaki jar ko air meñe rej jar ñan e ikijen Christ. Bõtab, ri jilek John ear ba: “Elañe jej kajitõk iben kin men eo ekar ñan ankil An, Ej roñjake kij.” (1 Jon 5:14) Kin men in, jenaj aikwij kajitõk ekkar ñan ankil an Anij. Ke elap an itok limo kin ejmour eo ad lor jitõb, jabdewõt men ko rej jelet ejmour in jitõb eo ad ejimwe ad maroñ jar kake. Jej aikwij jumaik kõnan eo ñan lor lemnak kin kõnan ko lor kanniek wõt. Ñan kõkkar, meñe ejimwe ad jar kin maroñ lolokjen im kijenmij ilo ad bõk nañinmij, inebata ko kin ejmour eo ad en kar jab binej jenkwon aikwij ko lor jitõb. (Sam 41:1-3) Ke ear kile an le jen joñan an inebata kin ejmour eo an, juõn kõrã Ri Christian ear kajitõk jibañ jen Jehovah bwe en kajimwe an lemnak kin nañinmij eo an. Kin men in, inebata kin ejmour eo an ear diklok wõt, im liin ear eñjake an bõk “maroñ eo e kanuij lap en jen Anij.” (2 Dri Korint 4:7) Kõnan eo an bwe en jibañ ro jet ilo jitõb ear laplok wõt, im ear erom juõn ri keañ kin Ailiñ eo ej full-time.
13. Einwõt emwij kalikare ilo Matu 6:9-13, ta jet ian men ko rej tellokin ad kakobaiki ilo jar ko ad?
13 Bar ta jemaroñ bar kadeloñ ilo jar ko ad bwe Jehovah en mõnõnõ in eoroñ kij? Jesus Christ ear katakin ri kalor ro an kin wãwen jar. Ilo joñok eo kin jar emwij je ilo Matu 6:9-13, ear kõkkar juõn lajrak in men ko rej tellokin ad jar kaki. Ta ko ren laptata ilo jar ko ad? Etan Jehovah Anij im Ailiñ eo an ren laptata. Ebar jimwe ad kajitõk kin aikwij ko ad lor kanniek. Ebar lap tokjen ad kajitõk kin jolok bwid kin jerawiwi ko ad im bwe jen jab bo ilo kabo ko im ri nana eo, Satan Devil eo. Jesus ear jab kõnan bwe jen elijin men wõt, einwõt ñan bõk iminene in ba ak ejej kobban melelen ibbed. (Matu 6:7) Ewi joñan ebak eo ikõtan ruo elañe juõn ajiri en kar kajerbal ejja ñan ko wõt aolep ien ke ej kennan ibben jemen?
14. Ijellokin ad jar kin aikwij ko, jen kar jar kin ta?
14 Ijellokin kajitõk im akwelap ko jen buru, jej aikwij kwalok jar ko kin nebar im kamolol. (Sam 34:1; 92:1; 1 Dri Tessalonika 5:18) Jemaroñ bar jar kin ro jet. Jar kin ro jeid im jatid maan im kõrã ilo jitõb, ro rej bõk jorrãn ak matõrtõr ej kalikar ad itok limo kin ir, im ebuñburuen Jehovah in roñ kin ad itok limo rot in. (Luk 22:32; Jon 17:20; 1 Dri Tessalonika 5:25) Ilo mol, ri jilek Paul ear je: “Komin jab inebata kin jabrewõt; a ilo men otemjej kin jar im akwelap kab kamolol, kajitõk ko ami ren walok ñõn Anij. Im ainemõn jen Anij, eo ej elã jen jela otemjej, e naj kejbãrok buruemi im lemnok ko ami ilo Kraist Jisõs.”—Dri Pilippai 4:6, 7.
KIJENMIJ WÕT ILO JAR
15. Ta eo jen ememej wõt elañe einwõt ejelok uak ñan jar ko ad?
15 Meñe kwoj bõk wõt jelã eo kin Anij, kwomaroñ bõk juõn eñjake kin ejelok uak ñan jar ko am jet ien. Emaroñ eindein kinke ejjab ien eo ejejjet ñan Anij bwe en uak kajitõk eo am. (Ekklisiastis 3:1-9) Jehovah emaroñ kõtlok bwe juõn men en wõnmanlok wõt ilo jidik ien, ak ej uak jar ko im ejelã ien eo emõntata ñan uaki.—2 Dri Korint 12:7-9.
16. Etke jen kijenmij wõt ilo jar, im ewi wãwen men in e maroñ jelet bed eo ad ibben Anij?
16 Ad kijenmij wõt ilo jar ej kalikar joñan mol in buruõd kin kajitõk ko ad ñan Anij. (Luk 18:1-8) Ñan wanjoñok, jemaroñ kajitõk jibañ jen Jehovah bwe jen anjo ion juõn men im je mõjno ie. Ilo ad kijenmij wõt ilo jar im mour ekkar ñan kajitõk ko ad, jej kwalok ad mol. Jej aikwij lukkun kalikar ad mol ilo jar im kajitõk jibañ ko ad. Elaplok an aorõk bwe jen jar im kijenmij ñe jej iion kabo. (Matu 6:13) Ilo ad wõnmanlok wõt im jar ñe jej kate im jatõr kin kõnan ko renana, jenaj lo wãwen an Jehovah jibañ kij. Men in enaj kalek tõmak eo ad im kakajur bed eo ad ibben.—1 Dri Korint 10:13; Dri Pilippai 4:13.
17. Ewi wãwen ad maroñ bõk tokjen ad kautiej wõt jar ilo ad karejar ñan Anij?
17 Ad kate in kalaplok ad jar ilo jerbal eo ad ekwojarjar ñan Jehovah Anij, enaj jibañ kij ñan kile bwe jejjab karejar ñan e kin kajur eo ad wõt. Jehovah ej E eo im ej kõtõbrak men otemjej. (1 Dri Korint 4:7) Ad kile men in enaj jibañ kij bwe jen ettã buru im kõmanmõnlok bed eo ad ibben. (1 Piter 5:5, 6) Aet, ewõr melele ko rekeie ibbed bwe jen kijenmij wõt ilo jar. Jar ko ad remol im jelã eo eaorõk kin wãwen ruaklok ibben Jemed ilañ eo ej yokwe enaj kõmman bwe mour eo ad en lukkun mõnõnõ.
KILEN KONONO IBBEN JEHOVAH EJ KITIBUJ ROÑJAKE
18. Ewi wãwen ad maroñ roñjake Anij?
18 Elañe jekõnan bwe Anij en roñjake jar ko ad, jej aikwij roñjake men ko ej ba. (Zechariah 7:13, NW) Ejako an jilkinlok kejelã ko an ikijen ri kanan ro an im ealikar an jab kajerbal kajur in anijnij ko. (Duteronomi 18:10-12) Ak jemaroñ roñjake Anij ilo ad katak Nan eo an, Bible eo. (Dri Rom 15:4; 2 Timote 3:16, 17) Einwõt ad aikwij bõk iminene kin mõñã ko remõn lor kanniek ñan kij, emwij rejañ kij bwe jen “ijole milk emõn im erreo wõt kin nan eo.” Kaddek juõn kõnan ñan ijole mõñã ko lor jitõb ilo am konono Nan in Anij aolep ran.—1 Peter 2:2, 3, NW; Jerbal 17:11.
19. Ta tokjen ad kalmenlokjen kin men ko jej konono kake ilo Bible eo?
19 Kalmenlokjen kin ta eo kwoj konono kake ilo Bible eo. (Sam 1:1-3; 77:11, 12) Melelen lukkun lemnak kaki. Kwomaroñ kõkkar men in einwõt ñe lojed ej meme mõñã ko. Kwomaroñ meme mõñã ilo jitõb ilo am kakobaiki ibben men ko emwij am jelã kake. Ewi wãwen katak eo ej jelet mour eo am, ak lemnak kin ta ko ej kwalok kin kadkadin Jehovah im wãwen kõmman ko an. Ilo wãwen in kin am make katak, kwomaroñ bõk ekan ko lor jitõb ko me Jehovah ej letoke. Men in enaj kalaplok am ruaklok ñan Anij im naj jibañ yuk wõnmaik abañ ko rej walok jen ran-ñan-ran.
20. Ewi wãwen ad keini ien kwelok ko an Ri Christian emaroñ jibañ kij bwe jen ruaklok ñan Anij?
20 Kwomaroñ bar ruaklok ñan Anij ilo am eoroñ Nan eo an ilo air kennan kake ilo kwelok ko an Ri Christian, einwõt Ri Israel rekin kweloklok ibben don ñan eoroñ Kien Anij. Ri kaki ro ilo ien en rar kamelele alikar ke rar readi Kien eo, im ilo wãwen in jibañ ri roñjake ro bwe ren melele im bõk juõn kõnan ñan jerbale men ko rar roñ. Men in ear tel ñan juõn lañliñ elap. (Nihimaia 8:8, 12) Kin men in en juõn am manit bwe kwon keini ien kwelok ko an Ri Kennan ro an Jehovah. (Dri Hibru 10:24, 25) Men in enaj jibañ yuk bwe kwon bõk melele inem kajerbal jelãlokjen eo kin Anij ilo mour eo am, eo enaj bõktok mõnõnõ ñan yuk. Am koba ibben jimjãn jimjatin in Ri Christian ro ibelakin lal enaj jibañ yuk bwe kwon bedwõt ilo am ebake Jehovah. Im einwõt jenaj lo, kwonaj maroñ lo jokane eo emol ibwiljin ro don Anij.
ETALE JELÃLOKJEN EO AM
Etke kwoj aikwij ruaklok ñan Jehovah?
Ta jet ian menin aikwij ko bwe jen maroñ ruaklok ñan Anij?
Ta men ko kwomaroñ kakobaiki ilo jar ko am?
Etke kwoj aikwij kijenmij wõt ilo jar?
Ewi wãwen am maroñ roñjake Jehovah rainin?
[Pija eo ilo peij 157]