Kadkad In Tõmak Eo Am​—Melejoñe Kiõ

“Ro jatiõ, komin likit e menin lañliñ otemjej, ñe komij ion melejoñ ko kaju wãweir, bwe kom jelã menin kamol kadkad in tõmak eo ami ej jerbale kijenmij.”​—JAMES 1:2, 3, New World Translation.

1. Etke Christian ro rej aikwij kõtmene kin melejoñ ko kin tõmak eo air?

CHRISTIAN ro remol ejelok air kõnan bwe ren bõk eñtan, im rejjab bõk mõnõnõ kin air eñtan ak air kajook ir. Ak, rej likit ilo air lemnak nan kein ilañ jeje in James leo jein im jatin Jesus. Christ ear kalikar ñan ri kalor ro an bwe remaroñ kõtmene kin matõrtõr im abañ ko jet kin air bokake kien ko an Anij. (Matthew 10:34; 24:9-13; John 16:33) Mekarta, lañliñ emaroñ walok jen melejoñ rot kein. Ewi wãwen?

2. (a) Ewi wãwen an melejoñ ko kin tõmak eo ad maroñ walok lañliñ jeni? (b) Ewi wãwen an jerbal in kijenmij maroñ dedelok ilo wãwen eo ibbed?

² Juõn un elap ñan ad lo lañliñ ñe jej bed iumin melejoñ ko kin tõmak ej bwe men kein remaroñ kwalok leen eo emõn. Einwõt an James ba, jutak bin ilo jelmae melejoñ ko ak abañ ko “ej jerbale kijenmij.” Jemaroñ bõk tokjen jen kadkad in Christian eo eaorõk. James ear je: “A en wãppen an kijenmij jerbal, bwe komin wãppen wõt im eyu im enjelok ami aikwij.” (James 1:4) Kijenmij ewõr juõn men ej aikwij kõmmane, juõn “jerbal.” Men eo emwij kabbeiki kake ej ñan kõmman bwe kij jen dedelok ilo men otemjej, im jibañ kij bwe jen Christian ro jokkin wõt juõn im ritto. Kin men in, ad kõtlok melejoñ ko bwe ren etal ilo ial eo air ilo ad jab kajeoñ in kajerbal wãwen ko rejjab ekkar ñan jeje ko ñan an melejoñ ko tõbar juõn jemlok emõkaj, tõmak eo ad ej melejoñ im kametaltõl. Elañe ear jabwe ad inemõn, joij, ak yokwe ilo jerbale wãwen ko ak ibben armij ro rejetad, kijenmij emaroñ kõmman bwe en emõnlok kadkad in Christian eo ad. Aet, lajrak eo ej: Melejoñ ko rej kwalok kijenmij; kijenmij ej kalaplok kadkad ko kadkadin Christian; men kein rej unjen lañliñ.​—1 Peter 4:14; 2 Peter 1:5-8.

3. Etke jej aikwij jab jenliktak ilo mijak kin melejoñ ko kin tõmak?

³ Ri jilek Peter ear bareinwõt kalikar unin ad aikwij jab mijak ak jenliktak jen melejoñ ko kin tõmak eo ad. Ear je: “Ilo mol in komij kanuij lañliñ, meñe kiõ iumin jidik ien, elañe ej menin aikwij, kom ar eñtan kin elõñ menin melejoñ ko, bwe kadkad in tõmak eo ami emwij melejoñe, elaplok aorõkin jen gold eo ej jakolok meñe emwij kamole kin kijeek, jemaroñ lo bwe ej unjen nebar im aibujuij im kautiej ilo kwalok Jesus Christ.” (1 Peter 1:6, 7 NW) Nan kein elaptata air menin kakajur kiõ kinke “eñtan eo elap”​—ien eo ien nebar, aibujuij, kautiej, im ellã im mour​—elaplok an ebaktok jen ke jaar oktak im ri tõmak.​—Matthew 24:21; Rome 13:11, 12.

4. Ewi wãwen an kar juõn brother eñjake kin melejoñ ko me e im ri kabit Christian ro jet rar iioni?

⁴ Ilo katak eo lok iman, jaar etale melejoñ ko bwen ri kabit ro rar jelmaiki jen 1914 im wõnmanlok. Men kein kar juõn bedbed ñan lañliñ ke? A. H. Macmillan ear kwalok lemnak in jej reiliklok ñane: “Emwij aõ lo elõñ melejoñ ko rebin rej itok ion dolul eo im melejoñ ko kin tõmak eo an ro rej bed ie. Kin jibañ eo an jitõb eo an Anij dolul eo ear wõnmanlok wõt im eddeklok. Emwij aõ lo emenin meletlet ñan kõttar an Jehovah kalikarlok melele eo ad kin men ko ilo Jeje ko jen ad lõkatip kin juõn lemnak ekãl. . . . Jekdon ta kajimwe ko emaroñ wõr ibbed ñan ad kõmmani jen ien ñan ien ilo lemnak ko ad, menin ejamin ukõt menin letok eo emõn kin binmour eo im kallimur eo an Anij kin mour indio. Inem ear ejelok menin aikwij ñan ad kõtlok an mõjnolok tõmak eo ad kin kõtmene ko ear jab jejjet kitieir ak oktak ko ilo lemnak.”​—The Watchtower, August 15, 1966, peij 504.

5. (a) Ta tokjen ko rar walok jen an kar bwen ri kabit ro etal ilo melejoñ ko? (b) Etke wãwen eo kin melejoñ ej aikwij kaitoklimoid kiõ?

⁵ Christian ri kabit ro rar ellã im mour jen melejoñ eo ilo ien eo 1914-19 rar anemkwoj jen kareelel eo ekajur an lal in im jen elõñ mantin kabuñ ko an Babylon. Bwen ri kabit ro rar wõnmanlok wõt einwõt juõn armij eo emwij karreoiki im kametaltõle, im ilo mõnõnõ lelok menin katok ko kin nebar ñan Anij im bõk liki eo bwe ir kar einwõt juõn armij Anij ear bõk ir. (Isaiah 52:11; 2 Korint 6:14-18) Ekajet eo ear ijjino ibben mweo imõn Anij, ak ejamin dedelok ilo juõn ien eo emwij karõke. Melejoñ im kamakitkiti armij ro an Anij ej wõnmanlok wõt. Ro rej kejatdikdik ñan air ellã im mour jen “eñtan eo elap” ej ebaktok einwõt mõttan “jar eo elap” rej bareinwõt melejoñe tõmak eo air. (Revelation 7:9, 14) Rej kõmmane menin ilo wãwen ko eierlok wõt men eo bwen ri kabit ro rar jelmae im bareinwõt ilo wãwen ko jet.

Ewi Wãwen Am Maroñ Bõk Melejoñ?

6. Ta juõn ian melejoñ ko relap elõñ rar iione?

⁶ Elõñ Christian ro rar lemnak kin aitwerõk eo ñan jutak bin ñan melejoñ ko ilo wãwen mõnmõn ko rej kajju ñan ir. Rej kememej report in: “[Ri tel ro an ri Jew] rar kirtok ro dri jilik, im dreñlok ir, rej jiroñ bwe ren jab konono ilo etan Jisõs, im rej kõtlok ir. Im rej ilok jen iman mejen ro dri bebe, im lõñliñ bwe emwij likit ir im tellokõn kin air iñtan kin Ãt eo.” (Jerbal 5:40, 41) Im bwebwenato eo ran kein kin armij ro an Anij, elaptata ilo ien tarinae ko an lal in, ej kalikar bwe elõñ ian Ri Kennan ro an Jehovah rej lukkun deñloke ir, im elaplok an nana, ilo pein armij ro rej matõrtõre ir.

7. Ñan joñan et eo jet Christian ro ilo ran kein rar kalikar tõmak?

⁷ Ikijen an Christian ro bõk matõrtõr, ejelok oktak ilo an lal in kõmman ikõtan bwen ri kabit ro im “sheep ro jet.” (John 10:16) Laltak iumin yiõ ko, ro uan jar kein ruo rej bõk melejoñ ko rebin ilo kalbuj im meñe kãlet bwe ren mij kin yokwe eo air ñan Anij im tõmak eo air ilo e. Jar kein jimor rar aikwiji jitõb eo an Anij, jekdon kin kejatdikdik eo air. (Keidi The Watchtower, June 15, 1996, peij 31.) Ilo yiõ ilo 1930 ko im 1940 ko ilo Nazi Germany, elõñ ro ri karejaran Jehovah, ekoba ajiri ro, rar kalikar tõmak eo einjuõn, im elõñ rar bõk melejoñ ñan joñan eo elaptata. Ilo ien ko ran kein, armij ro an Jehovah rar jelmae melejoñ eo kin matõrtõr ilo ailiñ ko einwõt Burundi, Eritrea, Ethiopia, Malawi, Mozambique, Rwanda, Singapore, im Zaire. Im kain melejoñ kein rej etal wõt.

8. Ewi wãwen nan ko an juõn brother in Africa kwalok bwe elõñlok men rej koba ilo melejoñ in tõmak eo ad jen baj kijenmij wõt iumin matõrtõr ilo wãwen deñdeñ?

⁸ Bõtab, einwõt an mwij ad loe, tõmak eo ad ej bareinwõt bõk melejoñ ilo wãwen ko ebin loi. Jet ian melejoñ kein rejjab lukkun kajju im bidodo kile. Lemnak kin wãwen am naj kar emmakit ñan jet ian men kein tok ilokan. Juõn brother ilo Angola eo ear wõr joñoul nejin ajiri ear bed ilo juõn congregation eo ilo juõn ien rar kabõjrake jen an maroñ konono ibben brother ro rar bõk eddo. Tokelik ear oktak im ro jet rar maroñ lolok congregation eo. Rar kajitõk ibben ewi wãwen an kar lo kilen najidik family eo an. Ear jab bidodo ñan an uak, im men eo deeo ear maroñ ba kar bwe wãwen eo ear bin. Ear maroñ ke najidik ajiri ro nejin kin joñan in juõn alen mõñã ilo juõn ran? Ear uak: “Eokwe, ebin. Kim ar katak ñan am bed ilo men eo ewõr ibbem.” Inem kin juõn ainikien eo eobrak kin tõmak ie, ear ba: “Ak ejjab men eo jej kõtmene kake in ke ilo ran kein eliktata?” Tõmak rot in ekabwilõñlõñ ilo lal in, ak ejjab juõn men eo ejeja ibwiljin Christian ro retiljek, ro rej lukkun liki bwe kallimur ko an Ailiñ eo enaj jejjet kitieir.

9. Ewi wãwen ad bõk melejoñ ekkar ñan 1 Korint 11:3?

⁹ Jar eo elap rej bareinwõt bõk melejoñ ikijen karõk ko rej theocratic (kien ko jen lañ). Congregation eo an Christian ibelakin lal rej tele ekkar ñan nan in kaiñi ko rekwojarjar im kien ko jen lañ. Melelen menin moktata kile Jesus einwõt Ri tel eo, eo emwij jitõñe einwõt Bõran congregation eo. (1 Korint 11:3) Mõnõnõ in kõtaik kij ñan e im ñan Jemen ej alikar ikijen tõmak eo ad ilo ijitõñ ko ilo theocracy im bebe ko rej kobalok ibben burukuk eo ad ilo kõmanmõn ankil an Jehovah. Bareinwõt, ilo kajjojo congregation ilo juõn bukwon, ewõr emaan ro emwij jitõñ ir ñan air tel. Rej emaan ro rejjab wãppen ro likjap ko air emaroñ alikar ad loi; ak jej bõk kõketak ñan ad kautiej overseer rein im kõtaik kij ñan ir. (Hebrew 13:7, 17) Jet ien kwoj lo ke bwe menin ebin? Menin ej lukkun juõn melejoñ ñan kwe ke? Elañe eindein, kwoj bõk ke tokjen jen melejoñ in kin tõmak eo am?

10. Ta melejoñ eo jej jelmae ikijen jerbal in kwalok nan?

¹⁰ Jej bareinwõt bõk melejoñ ilo jerammõn eo im menin aikwij eo ñan ekkeini bõk kunad ilo jerbal in kwalok nan eo. Ñan ellã jen melejoñ in, jej aikwij kile bwe bõk kunad ilo jerbal in kwalok nan ej kitibuj elaplok jen baj jidik wõt ad kwalok nan. Kememej nan in nebar eo an Jesus kin kõrã jeramel eo ejako belen eo ear lelok aolepen joñan eo ibben. (Mark 12:41-44) Jemaroñ kajitõkin kij make, ‘Ij lelok ke ilo wãwen in lok wõt ikijen jerbal in kwalok nan eo aõ?’ Kij aolep jen Ri Kennan ro an Jehovah ien otemjej, bojak ilo jabdewõt ien emõntok ñan kõtlok bwe meram eo ad en romak.​—Matthew 5:16.

11. Ewi wãwen an oktak ko ilo melele ak nan in kakabilek kin mwil maroñ einwõt juõn melejoñ?

¹¹ Bar juõn melejoñ jemaroñ jelmae ej ikijen joñan kamolol eo ad kin meram eo elaplok kin mol eo ilo Bible im kin nan in kakabilek eo class in ri karejar eo etiljek ej letok. (Matthew 24:45) Jet ien menin ej kir ñan ad kõmman kajimwe ilo mwilid make, einwõt ñe ej etal im alikar bwe ro rej kajerbal jikka rej aikwij bõjrak elañe rej kõnan bwe ren bed wõt ilo congregation eo.a (2 Korint 7:1) Ak bõlen melejoñ eo ej ilo ad bõk aikwij eo ñan ukõtlok itoklimo eo ad ilo kajañjañ ak ilo wãwen ko jet kin kamõnõnõ.b Jen kajitõkin ke meletlet eo kin nan in kakabilek eo rej letok? Ak jen kõtlok ke bwe jitõb eo an Anij en ãje lemnak eo ad im jibañ kij kõnak kadkad eo kadkadin Christian?​—Epesõs 4:20-24; 5:3-5.

12. Ta eo ej menin aikwij ñan kakajurlok tõmak elikin an juõn baptais?

¹² Iumin ebeben ko, oran ro ilo jar eo elap emwij an lõñlok, im elikin air baptais rej etal wõt im kakajurlok kõtan eo air ibben Jehovah. Menin ejelet elaplok jen baj bed wõt ilo juõn kwelok ko relap an Christian, etal ñan jet kwelok ko ilo Kingdom Hall eo, ak jet ien bõk kunair ilo jerbal in kwalok nan. Ñan wanjoñok: Juõn armij emaroñ ilo enbwin bed ilikin Babylon Elap, jukjuk im bed in kabuñ eo ewan an lal, ak emol ke an likiti na ilikin? Ej debij wõt ke men ko rej kalikar jitõbõn Babylon Elap​—juõn jitõb eo ej kajettokjen kien ko rewãnik an Anij? Edik ke an jerbale ilo tiljek mour erreo im mour in belele? Ej kwalok ke itoklimo eo an ilo tokjen ko ilo mweiuk elaplok jen tokjen ko ilo jitõb? Aet, ej bed wõt ke ilo an jab lipjinjin kin lal in?​—James 1:27.

Tokjen Jen Tõmak eo Emwij Melejoñe

13, 14. Ta eo jet rar kõmmane elikin air jino etal ilo ial in kabuñ eo emol?

¹³ Elañe emol ad kar ko jen Babylon Elap im bareinwõt diojtok jen lal, inem jen jab reilok ñan men ko ilik. Ilo an errã ibben nan in kaiñi eo jej loe ilo Luke 9:62, ñan an jabdewõt iad reiliklok emaroñ melelen an luji jerammõn eo ñan an juõn eo ej armij in Ailiñ eo an Anij. Jesus ear ba: “Ejelok armij ekar ñõn ailiñ in Anij, elañe ej likit pein ion plau, im okõtõklik.”

¹⁴ Ak jet ro rar oktak im Christian ilo ien ko remotlok im jen ien eo emwij air kõtlok ir make ñan air etal ilo jitael ko an jukjuk im bed in. Rar jab jumae jitõbõn lal in. (2 Peter 2:20-22) Menin kamad ko an lal in emwij air nome itoklimo im ien ko air, im kin menin kabañ wõnmanlok eo air. Jen air kejbãrok lemnak ko air im burueir bwe ren bin wõt ilo Ailiñ in Anij im kwojarjar eo an, im likit men kein mokta ilo mour, emwij air oktaklok ñan air jibadõk mejenkajjik ko kin mweiuk. Mae ien rej emmakit im kwalok tõmak eo air emõjno im ukõt ial eo air ilo air bukõt nan in kakabilek eo ekwojarjar, rej bed ilo kauwatata in luji kõtan eo air eaorõk ibben Jehovah im dolul eo an.​—Revelation 3:15-19.

15. Ta eo ej menin aikwij ñan bed wõt im bõk buñburu jen Anij?

¹⁵ An lo kij bwe jemmõn im bed ilo line in ellã im mour jen eñtan eo elap eo ej mõkaj an ebaktok ej atartar ion ad kejbãrok ad erreo, kõmman bwe ren ‘kwoli im kamouj nuknuk ko air ilo bõtõktõkin Lam.’ (Revelation 7:9-14; 1 Korint 6:11) Elañe jejjab kejbãrok wõt juõn jutak eo erreo im kwojarjar iman mejen Anij, jerbal eo ad ekwojarjar ejamin emõn. Emol, kajjojo iad ej aikwij kile bwe kadkad in tõmak eo ad emwij melejoñe enaj jibañ kij ñan kijenmij im bõprae ad jab kamõnõnõik Anij.

16. Ilo wãwen et ko riap ko emaroñ kamol an juõn melejoñ kin tõmak eo ad?

¹⁶ Jet ien, jikin kõmman news ko im ri kien ro rej kwalok ennan ko rejjab mol im rej menin kananaik armij ro an Anij, bwid air kwalok kin tõmak in Christian ko ad im wãwen ad mour. Menin ejjab aikwij kailbõk kij, kinke Jesus ej kwalok bwe ‘lõl e ar kijirãte ir, bwe re jab jen lõl.’ (John 17:14) Jen kõtlok ke bwe ro Satan ej telbiloik ir ren kalelñoñ im kõmman an rup buruõd im kõmman bwe jen jook kin news eo emõn? Jen kõtlok ke bwe riap ko kin mol eo ren jelet ad ekkeini ad bed ilo kwelok ko im jerbal in kwalok nan eo ad? Ak jen jutak bin wõt ke im beran im kalaplok wõt ad beek bwe jen etal wõt im keañ kin mol eo kin Jehovah im Ailiñ eo an?

17. Ta menin kamol eo emaroñ lujur kij ñan ad etal wõt im kwalok tõmak?

¹⁷ Ekkar ñan jejjet kitien in kanan eo ilo Bible, jej kiõ mour ilo ien jemlokin. Kõtmene ko ad rej bedbed ion Bible kin juõn lal ekãl im wãnik renaj lukkun oktak im juõn mõnõnõ eo emol. Mae ien eo ran en ej itok, kij otemjej jen jerbale tõmak eo ebin ilo Nan in Anij im kamol ad tiljek ilo ad jab bõjrak ilo ad kwalok nan kin news eo emõn kin Ailiñ eo ibelakin lal. Lemnak kin thousand ri kalor ro rej baptais week otemjej. Ejjab juõn un eo emõn ñan kij ke ñan kamolol bwe inemõn eo an Jehovah ikijen an bõktok ekajet eo an emaroñ walok tokjen ilo lomor eo an elõñlok wõt armij? Jejjab lañliñ ke bwe Anij ear kõtlok jerbal in lomor eo bwe en wõnmanlok wõt ikijen jerbal in kwalok nan eo an Ailiñ eo? Im jejjab mõnõnõ ke bwe emwij an million bõk mol eo im rej kalikar tõmak eo air?

18. Ta bebe eo am ikijen karejar ñan Jehovah?

¹⁸ Ewi toan an naj melejoñ in tõmak eo ad kiõ wõnmanlok wõt jejjab maroñ ba. Ak joñan in jej lukkun jelã kake: Jehovah emwij an karõk ran eo ñan an etale lañ ko im lal eo kiõ renana. Ilo kõtan in manlok, jen beek ñan ad kajeoñe kadkad eo eaorõk kadkadin tõmak eo emwij melejoñe me Ri Kowãppen tõmak eo ad, Jesus, ej kalikare. Im jen anõk joñok eo an bwen ri kabit ro reritto im an ro jet rej beran ilo air jerbal ibwiljid.

19. Ta eo kwo maroñ liki bwe enaj anjo jen lal in?

¹⁹ Jen beek ñan ad jab bõjrak in keañ kin news eo emõn eo ej indio ñan ailiñ ko, bwij ko, konono ko, im armij ro otemjej ilo karejar ibben enjel eo ej kãke iolapen lañ. Kõtlok bwe ren roñjake an enjel eo keañ: “Komin mijõk Anij im lelok aibujuij ñõn E, bwe auõ in ekajet eo An e mottok.” (Revelation 14:6, 7) Ñe ran in ekajet eo ekwojarjar ej walok, ta naj tokjen eo ikijen kadkad in tõmak eo ad emwij melejoñe? Enaj jamin juõn anjo aibujuij ke​—bõk lomor jen jukjuk im bed in ñan loan lal eo ekãl ewãnik an Anij? Ilo ad kijenmij ilo melejoñ ko kin tõmak eo ad, jenaj maroñ ba einwõt ri jilek John: “Im eñin anjo eo j’ar anjo kake ion lõl, ar tõmak.”​—1 John 5:4.

[Kamelele ko itulal]

Kwoj Kememej Ke?

◻ Ewi wãwen bwe melejoñ ko kin tõmak eo en maroñ juõn men eo ej naunin ñan lañliñ?

◻ Ta jet ian melejoñ ko kin tõmak eo ad emaroñ jab bidodo kile?

◻ Ewi wãwen ad maroñ bõk tokjen jen kijenmij ilo melejoñ ko kin tõmak eo ad jej lo tõbrak ie?

[Pija ko ilo peij 17]

A. H. Macmillan (line eo iman jen anmiñ) iturinlok ien eo ke e im ri tel ro an Watch Tower Society rar kalbuji ir ilo jab jimwe

E kar juõn eo ear etal ñan convention eo ilo Detroit, Michigan, 1928

Ilo yiõ ko an eliktata, Brother Macmillan ear kalikar wõt an tõmak

[Pija eo ilo peij 18]

Einwõt family in, elõñ Christian ro ilo Africa rar kwalok juõn kadkad in tõmak eo emwij melejoñe