Etke Rej Ilok Jen Kabuñ ko?

ILO tu-iolap in ebeben eo kein ka19, rar jab roñ an juõn ri jokwe ilo Prussia (kiõ tueañ in Germany) ba bwe ejjab mõttan jabdewõt kabuñ ko. Ilo mol, ilo an baj oktak jen juõn kabuñ elap ñan juõn kabuñ ej einjuõn ilo wãwen ko an ej kõmman bwe policeman ro ren kejjad e. Elap an oktak jen ien ko mokta!

Rainin, elõñ ri Germany ro rej bõjrak jen kabuñ ko. Rar report bwe, 1 jen 4 ej ba bwe ejelok an kabuñ. Juõn wãwen einlok wõt in jemaroñ loe ilo Austria im Switzerland. Elañe ro uan ej einwõt bõtõktõkin mour an juõn kabuñ, inem, einwõt ri jeje in ri Germany eo Reimer Gronemeyer ear ba, “Ej torlok bõtõktõkin kabuñ ko ilo Europe ñan mij.”

Etke Rej Kejekdon Kabuñ

Etke elõñ rej kejekdon kabuñ ko? Ekkã wõt, kin kilan money, elaptata ilo ene ko ro uan rej aikwij kõllã owõj in kabuñ. Elõñ rej kajitõk, ‘Etke ij aikwij lelok ñan kabuñ eo money eo elap aõ kar jerbal ñan bõke?’ Kin joñan mweie im kajur eo an kabuñ elõñ rej diojlok. Rej errã ibben Cardinal Joachim Meisner ilo 1, Germany, eo ear ba bwe mweie eo an kabuñ emaroñ kar karele ñan an lap wõt an mõdjake mweiuk ko im “jab bwe an lukkun lemnak kin tõmak ilo Christ.”

Jet rej ilok jen kabuñ eo air kinke ejjab kaitoktoklimo, im ejjab maroñ kabwe aikwij ko air ilo jitõb. Rej eñtan kin ñitta eo ri kanan Amos ear kanan kake, “juõn ñitta, jab kin bread, im maro, jab kin den, ak kin air roñjake nan ko an Jehovah.” (Amos 8:11) Kin air bõk jidik wõt tokjen jen kabuñ eo air, rej ebwer jene.

Meñe abañ ko jej ioni remol, emmakit eo ejimwe in ke ñan bõjrak jen aolep kabuñ ko. Kalmenlokjen kin juõn emaan eo ekwõle ej lo juõn men eo einlok wõt bread. Bõtab, ke ej kajeoñ in kañe, ej lo bwe ej kõmman jen kijen jidpãn. En kar bõjrak ke jen an lemnak in kañe ñan kaju buruen kin an kwõle? Jaab, enaj kar bukõt jet lukkun mõñã ko. Eindeinlok, elañe juõn kabuñ ejjab kabwe aikwij ko ilo jitõb an ro uan kabuñ eo, ren kar bõjrak ke jen kabuñ? Ejamin kar menin meletlet ke ñan air bukõt juõn wãwen ñan kaju burueir kin air kwõle ilo jitõb?