Kwoj Kamolol Ke Kin Dolul Eo An Jehovah?
“Ein drein Jehovah ej ba, ‘Lõñ ej Aõ tron, im lõl eran neiõ.’—AISEIA 66:1.
1, 2. (a) Kamol in vision et eo kin dolul eo an Jehovah kwo maroñ jitõñlok ñane? (b) Ia eo Jehovah ej jokwe ie?
KWOJ tõmak ke bwe Jehovah ewõr juõn an dolul? Elañe eindein, etke kwoj tõmak menin? Kwo maroñ uak: ‘Eokwe, ewõr juõn am Kingdom Hall. Ewõr juõn am dolul eo emõn kõrkan ibben juõn kumi in elder ro. Ewõr juõn am circuit overseer eo emwij kãlete eo ej ekkeini an lotok kim. Kemij bed ilo kwelok in assembly ko im convention ko emwij karõki. Ewõr juõn am ran office eo an Watch Tower Society ilo ailiñ eo am. Emol, aolepen menin im bar elõñlok men ko jet rej kamol bwe Jehovah ewõr juõn an dolul eo ej jerbal.’
2 Wãwen kein rej einwõt menin kamol an juõn dolol. Ak elañe aolepen men eo jej loe im kamolol kake ej bed ijin ion lal, jejjab bõk likiio in aolepen jelãlokjen eo kin dolul eo an Jehovah. Jehovah ear jiroñ Isaiah bwe lal ej eran neen wõt, ak lañ ko rej tron eo An. (Aiseia 66:1, New World Translation) “Lañ” et ko Jehovah ear jitõñlok ñani? Mejatoto in ad ke? Ñan mejatoto eo ilikin ke? Ak ñan bar jet level in mour ke? Isaiah ej konono kin jikin “jokwe eo eutiej, ekwojarjar im aibujuiij an Jehovah,” im ri psalm ej kwalok kin lañ kein einwõt “jikin eo emwij an jutak ijo ej jokwe ie.” Kin menin, “lañ ko” ilo Aiseia 66:1 ej jitõñlok ñan jikin eo an jitõb jejjab lo kin mejed ijo eutiejtata, ak laptata Jehovah ej bed ie.—Aiseia 63:15; Sam 33:13, 14.
3. Ewi wãwen ad maroñ ellã jen ad bere?
3 Kin menin, elañe emol ad kõnan melele im kamolol kin dolul eo an Jehovah, jej aikwij reilok ñan lañ ko. Im ijin ewõr juõn abañ ñan jet. Ke dolul eo an Jehovah ilañ jejjab lo kin mejed, ewi wãwen ad jelã bwe ej lukkun bed? Jet remaroñ jab lukkun jelã, bwilõñ, kin ‘ewi wãwen ad maroñ tõmak?’ Eokwe, ewi wãwen an tõmak ellã jen bere? Ialin key ko ruo rej an juõn boub ilo katak Nanin Anij im ekkeini bed ilo kwelok im bõk konan ilo kwelok ko an Christian. Inem ad lo maram in mol eo emaroñ jolok bere ko ad. Ear bar wõr ro jet ri karejeran Anij ear wõr air bere. Jen etale wãwen eo an ri karejar eo an Elisha ke king in Syria eo ear tarinaik Israel.—keidi John 20:24-29; James 1:5-8.
Juõn Eo Ej Lo Ri Karuwainene ro Ilañ
4, 5. (a) Ta abañ eo ear wõr ibben leo karejeran Elisha? (b) Ewi wãwen an kar Jehovah uak ñan jar eo an Elisha?
4 King eo an Syria ear jilkinlok juõn jarin tarina elap ilo boñ ñan Dothan bwe ren jibwe Elisha. Ke leo karejeran Elisha ear jerkak ke ej jibboñtata wõt im wõnnabõjlok, bõlen ñan kõkãl an mejatoto ion bõrwaj in mweo rej jokwe ie ilo tuiolap turear, ear lukkun lokjenan! Juõn jarin tarinae an ri Syria ro ibben ors ko im jariot ko rar kabol bukwon eo, rej kõttar in jibwe ri kanan eo an Anij. Ri karejar eo ear lamõj ñan Elisha: “Aõ masta! Ta eo jej aikwij kõmmane?” Alikar ilo an kadik ainiken im kin liki, Elisha ear uak: “Kwon jab mijak, bwe elõñlok ro rej bed ibbed jen ro rej bed ibbeir.” Ri karejar eo emaroñ kar bwilõñ, ‘Erri ir? Ij jab lo ir!’ Jet ien menin emaroñ bareinwõt ad abañ—likjap in lo kin mejen jelãlokjen, melele kin ri karuwainene ro ilañ.—2 Kiñ 6:8-16; Epesõs 1:18.
5 Elisha ear jar bwe mejen leo karejeran en bellok. Ta eo ear walok tokelik? “Jehovah ear kabellok mejen likao eo; im e ar lolokjen; im, lo, tol eo eobrõk kin ors ko im jariot kijeek ko rej kabol Elisha.” (2 Kiñ 6:17) Aet, ear lo ri karuwainene ro ilañ, jarin tarinae ko an enjel ro rej kõttar in kejbãrok ri karejar eo an Anij. Kiõ ear maroñ melele kin liki eo an Elisha.
6. Ewi wãwen ad maroñ bõk jelã kin dolul eo an Jehovah ilañ?
6 Ewõr ke ad abañ jet ien kin melele einlok wõt eo an leo karejeran Elisha? Jej lo wõt ke wãwen ko ilo kaniek rej kamijak kij ak jerbal in Christian eo ilo jet ailiñ ko? Elañe dindein, jemaroñ ke kõtmene kin juõn vision eo einjuõn ñan kamaramlok kij? Jab, kinke ewõr ibbed juõn men eo ear ejelok ibben leo karejeran Elish—juõn book eiio eo ebed ie elõñ vision ko, Bible eo, eo emaroñ letok ñan kij melele kin loan dolul eo ilañ. Nanin kakõrmol in ej bareinwõt letok nanin kaiñi ko rej tel kij ñan kajimwe ad lemnak im ialin mour eo ad. Bõtab, jej aikwij jibadbad ñan bukõt melele im ejake ad kamolol kin karõk eo an Jehovah. Im bwe jemaroñ kõmmane menin ilo ad katak, koba ibben jar im kalmenlokjen.—Rom 12:12; Pilippai 4:6; 2 Timote 3:15-17.
Katak ñan Melele
7. (a) Ta abañ eo emaroñ wõr ibben jet kin katak Bible kin ? (b) Etke jibadbad ilo an juõn katak Bible ewõr tokjen?
7 An juõn katak emaroñ jab juõn jerammõn ekamõnõnõ ñan elõñ armij, einwõt ro rar jab lañliñ ilo air katak ilo school ak ejañin kar wõr juõn ien emõn ñan air bõk konair ir. Bõtab, elañe jekõnan melele im kamolol kin dolul eo an Jehovah kin mejen melele eo ad make, jej aikwij ejake kõnan eo ñan katak. Kwo maroñ ke lañliñ kin juõn ien mõñã enno ilo ejelok kar keboje? Einwõt jabdewõt ri kõmat eo enaj jiroñ yuk, elap jerbal ñan keboj juõn ien mõñã enno. Ak, emaroñ bõk jimettan awa ak diklok ñan kõmmane. Ilo bar juõn wãwenn, tokjen ko kin an juõn katak emaroñ aetokan aolepen ien mour eo an. An juõn katak emaroñ oktak im juõn men eo jej kataklok im lañliñ kake ñe jej lo wõnmanlok ko jej kõmmani. Ri jilek Paul ear jimwe an ba bwe jej aikwij kanuij lale kij make im katak eo ad im etal wõt im jerbale kij make ñan konono ilubũlej. Ekkeini ilo jibadbad ej menin aikwij, ak tokjen ko remaroñ ñan indio.—1 Timote 4:13-16.
8. Ta lemnak eo Jabõn Kennan ej kwalok bwe emõn?
8 Juõn emaan ri meletlet in etto ear ba: “Nejiõ maan [ak, kõrã], elañe kwo kõnan bõk nan ko aõ, im drebij kien ko aõ na ibõm, im ein drein kwon kajirlok lojilñõm ñan meletlet, im kabukot jelalokjen kin buruõm, aet elañe kwo naj kir ñõn maroñ in kili, im koutiej ainikiõm ñõn jelalokjen; Elañe kwo naj bukot e einwõt silver, im kabukot e einwõt mweiuk ko retino, inem kwo naj meletlet kake mijõk Jeova, im lo jelalokjen kin Anij.”—Jabõn Kennan 2:1-5.
9. (a) Ewi aorõk in gold ñe keidi ibben “jelãlokjen eo kin Anij”? (b) Ta ko jej aikwij kõmanmanilok ñan bõk jelãlokjen eo ejimwe?
9 Kwoj kile ke wõn eo ebed eddo eo ibben ñan an kijenmij? ‘Elañe kwe’ elijinmen ke an walok. Im lale kajin in, ‘Elañe kwoj kabukot e einwõt mweiuk retino.’ Lemnak kin ro rej kabuk menin aorõk ko ibulõn bwidej ro iumin ebeben ko rar kõb in kabwok silver im gold ilo Bolivia, Mexico, South Africa, im ailiñ ko jet. Ear lap air jerbal, kajerbal kein kurubar im jabõl ko, ñan air kũbũj dekã ko bwe ren maroñ bõk mããl ko raorõk. Joñan an lap air kaorõk gold ilo juõn jikin kabwok gold ilo California, U.S.A., rar kũbũj 367 mail in roñ ko, im tõbar joñan mũlal in enañin juõn mail—ñan baj ellolo gold. Ak, kwo maroñ ke mõñã gold? Idak gold? En lomoren ke yuk ilo juõn ene jemaden elañe kwoj iten mij kin am kwoli im maro? Jab, aorõkin ej menin kõkkar wõt im kũne, ukõte ien otemjej einwõt an alikar ilo jikin wia ko an belakin lal. Mekarta, armij rej mij ñan e. Kiõ ewi joñan aorõkin jibadbad ñan bõk gold ko ilo jitõb, “jelãlokjen eo kin Anij”? Lemnak kake, jelãlokjen eo kin Iroij Kajur Põtata eo an ijoko otemjelok, dolul eo an, im karõk ko an! Ikijen menin, jemaroñ kajerbal kurubar jabõl ko ilo jitõb. Men kein rej publication ko rej bedbed ion Bible eo im rej jibañ kij ñan kũb ñan loan Nanin Anij im jela melelen.—Job 28:12-19.
Kõb ñan Maroñ Melele
10. Ta eo Daniel ear loe ilo juõn vision?
10 Jen kõmmane jet kõb ilo jitõb ñan ad jino bõk jelãlokjen eo kin dolul eo an Jehovah ilañ. Ñan juõn key in jelãlokjen, jen oktaklok ñan vision eo an Daniel kin Ran in Etto ko ion tron eo an. Daniel ej je: “I ar lalelok wõt mae ien ear wõr tron ko rar likiti im Ranin Etto ko rar jijet. Nuknuk ko an rar mouj einwõt snow, im kolan bõrar ear einwõt kool in sip erreo. Tron eo an ear urur kin kijeek; wheel ko an rar kijeek urur. Ear wõr kijeek ko rej toorlok im ilok jen iman mejen. Ear wõr joñoul tausan alen joñoul tausan rar jutak wõt iman Mejen. Jikin Ekajet eo ear jijet ilo jea eo an, im ear wõr book ko rar kabelloki.” (Daniel 7:9, 10) Kar wõn tausan rein rar kwalok nan ñan Jehova? Ilo melele ko ilo book eo New World Translation, ear kejerbal einwõt “kurubar” im “jabõl,” rej tel kij ñan melele ko einwõt ilo Sam 68:17 im Hibru 1:14. Aet, rein rej kwalok nan kar enjel ro ilañs!
11. Ewi wãwen an vision eo an Daniel maroñ jibañ kij melele nan ko an Elisha?
11 Bwebwenato eo ilo Daniel ejjab ba bwe ear lo aolep enjel ro retiljek im Anij ej kabbeik ir. Emaroñ bar million lõñlok. Ak emol jemaroñ kiõ kamolol kin unin an Elisha kar maroñ ba: “Elõñlok ro rej bed ibbed jen ro rej bed ibbeir.” Jarin tarinae eo an king in Syria eo, meñe enjel ro, rejatiljek, im dimon ro, rar iiet wõt jen jarin tarinae ko an Jehovah ilañ!—Sam 34:7; 91:11.
12. Ewi wãwen am maroñ kalaplok am jelã kin enjel ro?
12 Bõlen kwo naj kar kõnan kalaplok am jelã kin enjel rein, einwõt jerbal eo air ilo air karejar ñan Jehovah. Jen nanin Greek eo kin enjel, jemaroñ lo bwe rej ri keãñ kinke ej bareinwõt melelen “ri keãñ.” Bõtab, elõñlok men kin eddo ko air. Bõtab, ñan etale ta eo, kwoj aikwij kõb. Elañe ewõr am book eo Insight on the Scriptures (Jelãlokjen eo kin Jeje ko), kwo maroñ katak kin katak eo kin “Enjel ro,” ak kwo maroñ katak kin katak ko ilo ien ko lok ilo Imõniaroñroñ eo kin enjel ro. Kwo naj bwilõñ kin joñan am maroñ katak kin ro ri karejeran Anij ilañ im kamolol kin jurake eo air. (Revelesõn 14:6, 7) Bõtab, ilo dolul eo an Anij ilañ, jet jitõb rej jerbale jet kain karõk ko.
Men eo Isaiah Ear Loe
13, 14. Ta eo Isaiah ear lo ilo vision, im ewi wãwen an kar menin jelet e?
13 Kiõ jen kũbũj jet men ko ilo vision eo an Isaiah. Ñe kwoj konono jepta 6, eon 1 ñan 7, kwo naj aikwij bwilõn. Isaiah ej ba bwe e “ar lo an Jehovah, jijet ion juõn tron,” im “serap ro rar jutak ilõñin.” Rar lamõj im keãñ kin aibujuij eo an Jehovh, wijtake kwojarjar eo an. Menin enaj jelet yuk meñe ilo am konono bwebwenato in. Ewi wãwen an kar Isaiah emmakit? “Inem I ar ba: ‘Wo ñõn ña! bwe ña juõn armij etton tien, im I jokwe iben ro dri ailiñ im tier retton: bwe meja rar lo Kiñ eo, Jehovah in inelip eo!’” Vision eo ear lukkun kabwilõñ e! Kwoj ke?
14 Inem ewi wãwen an kar Isaiah maroñ jelmae aibujuij in ear loe? Ej kemlele bwe juõn serap ear itok in kõtlok e ear ba: “Emwij bõklok am jab wãnik im jolok bwir eo am.” (Aiseia 6:7) Isaiah ear maroñ liki tiriamokake eo an Anij im ear kanuij eoroñ nan ko an Jehovah. Kiõ, kwo jamin kar kõnan kalaplok am jelã ke kin jitõb rein reutiejlok? Inem ta eo kwoj aikwij kõmmane? Kõb ñan elõñlok melele. Juõn menin jibañ ñan kajerbale ej Watch Tower Publications Index eo, im loor elõñ unjen kemlele ko ie ñan kalikarlok melele ko.
Ta eo Ezekiel Ear Loe?
15. Ta eo ej kalikar bwe ewõr liki ilo vision eo an Ezekiel?
15 Jen oktaklok ñan bar juõn wãwen jitõb in kõmanman. Ezekiel kar kejerammõn e ñan an bõk juõn vision in kakõrmol ke ear juõn ri kamakoko wõt ilo Babylon. Kabellok Bible eo am ñan Ezekiel jepta 1, eon ko jilu jinointata. Ewi wãwen an bwebwenato eo ijjino? Ej ba ke, ‘ilo juõn ien, ilo juõn ene ettolok . . .’? Jab, menin ejjab juõn inoñ ilo bwebwenato in inoñ ko. Eon 1 ej ba: “Kiõ ear itok yiõ eo kein kajoñoul jilu, ilo alliñ eo kein kemen, ilo ran eo kein kalalem in alliñ eo, ke I ar bed ibiljin armij ro rar ri kamakoko iturin river Chebar, lañ ko rar bellok im I ar jino lo vision eo an Anij.” Ta eo kwoj lo kin vision in? Ej letok juõn ran im jikin eo ejejjet. Tibdik kein rej jitõñlok ñan yiõ eo kein kalalem in ien kamakoko eo an King Jehoiachin, yiõ eo 613 B.C.E.
16. Ta eo Ezekiel ear loe?
16 Pein Jehovah ear itok ion Ezekiel, im ear jino lo juõn kakõrmol in vision ekabwilõñlõñ an Jehovah ion juõn tron ilo juõn jariot elap in lañ eo wheel ko ie rekanuj lap ibben mej ko rej kabol aolepen belakin. ..bwe ear wõr emen bull (menin mour) ko, juõn ej jutak ilo kajjojo wheel. Eñin wãwen lali: ir rar einlok wõt armij in lal. Im kajjojo ewõr emen turin mejen, im kajjojo iair ewõr emen pein. . . . Im kin wãwen turin mejeir, emen iair ewõr juõn turin mejen armij ibben juõn turin mejen laion ñan anbwijmaroñ, im emen iair ewõr juõn turin mejen juõn bull (menin mour) ñan anmiñ, emen iair ebareinwõt wõr turin mejen eagle.”—Ezekiel 1:5, 6, 10.
17. Ta eo turin mej ko emen an Kerub ro rej jutak ikijen?
17 Ta kar menin mour kein emen? Ezekiel make ej jiroñ kij bwe ir kar kerub ro. (Ezekiel 10:1-3, 14) Etke ear wõr emen turin mejeir? Ñan jutak ikijen kemlele ko emen remõn an Iroij Kajur Põtata eo Jehovah. Turin mejen enjel eo kar juõn kakõllan meletlet eo eaetok an reimanlok. (Job 39:27-29) Turin mejen bull eo ear jutak ikijen ta? Kin kajur eo elap in kinwan im aeran, juõn bull in ire ewõr jelã kake bwe ej kotak lõñlok juõn ors im rittõr eo ion. Emol, bull ej juõn kakõllan kajur eo an Jehovah ejelok joñan. Laion eo kar kajerbale einwõt juõn kakõllan ekajet jimwe eo eberan. Eliktata, turin mejen armij eo ejejjete ñan an jutak ikijen yokwe eo an Anij, ke armij ej menin mour eo ej make wõt ilal me ej maroñ kalikar kadkad in ilo jelãlokjen.—Matu 22:37, 39; 1 Jon 4:8.
18. Ewi wãwen an ri jilek John kobaiktok ñan jelã eo ad kin dolul eo ilañ?
18 Ebar wõr vision ko jet remaroñ jibañ kij kadedelok pija eo. Men kein ekoba vision ko an John eierlok wõt ilo Bible book in Revelson. E, einnwõt Ezekiel, ej lo Jehovah ion juõn tron aibujuij im serub ko rej kobalok. Ta eo serub ko rej kõmmane? Rej elij nanin keãñ eo an serup ko ilo Aiseia jepta 6 im ba: “Ekwojar, ekwojar, ekwojarjar Jehovah Anij, Dri Kajur otem kajur, Eo ej mokta, im Ej kiõ im Ej itok.” Revelesõn 4:6-8) John ej bareinwõt lo juõn lamb iturin tron eo. Wõn eo ej jutak ikijen? Lamb eo an Anij, Jesus Christ.—Revelesõn 5:13, 14.
19. Ikijen katak in, ta eo emwij am jelã kake kin dolul eo an Jehovah?
19 Inem ikijen vision kein, ta eo emwij ad melele kake? Bwe dolul eo ilañ ijo eutiejtata ie ej Jehovah Anij ion tron eo an kobalok Lamb eo, Jesus Christ, eo ej Nan eo, ak Kakõlle ko. Inem emwij ad loe juõn ri karuwainene ilañ in enjel ro, ekoba serub ko im kerub ko. Ir rej mõttan juõn dolul eo elap, im burukuk eo ej jerbale karõk ko an Jehovah. Im juõn ian karõk ko ej kwalok nan kin news eo emõn ibelakin lal ilo ien in ien jemlokin.—Mark 13:10; Jon 1:1-3; Revelesõn 14:6, 7.
20. Ta kajitõk eo naj uake ilo katak in tok juõn?
20 Eliktata, ewõr ibbed Ri Kennan ro an Jehovah ion lal rej kwelok ilo Kingdom Hall ko air ñan air katak wãwen kõmanman ankilan Iroij Kajur Põtata eo. Emol, kiõ jemaroñ kamolol bwe elõñlok ro rej bed ibbed jen ro rej bed ibben Satan im ro rej kijirãte mol eo. Ej bed wõt kajitõk in, Ewi wãwen an dolul eo ilañ wõr an lok ilo kwalok nan eo kin news eo emõn kin Ailiñ eo? Katak in tok juõn enaj etale menin im men ko jet.
Kajitõk ko ñan Elij
◻ Ñan kamolol kin dolul eo an Jehovah, ta eo jej aikwij melele kake?
◻ Ta eo leo karejeran Elish ear wõr an jelã kake, im ewi wãwen an kar kanan eo rejañ e?
◻ En ewi wãwen ad aikwij lemnak kin katak eo an juõn armij?
◻ Ewi wãwen an Daniel, Isaiah, im Ezekiel letok tibdikin dolul eo ilañ?
[Pija eo ilo peij 5]
Tokjen ko jen an juõn armij katak Bible elaplok air ellãlok jen ko an juõn ien mõñã eo emõn kar keboje
[Pija eo ilo peij 7]
Juõn vision in ri karuwainene ro ilañ kar uak eo an Jehovah ñan jar eo an Elisha