Kwomaroñ ke Lukkun Mõnõnõ ilo Mol?
GEORGE ear yokyokwe jabdewõt armij kin juõn ettõñdikdik. Ñan e, mour kar juõn menin letok aorõk ñan lañliñ kake. Mõnõnõ eo an im tõmak eo an bwe emõn ekajurlok jen nana men kein rar an kakõlle—im ear laplok an eindein ke ear jino mõkajlok an eñtan ilo an rittolok. Mae ran eo ear mij, George rar jelã kake e einwõt juõn armij emõnõnõ. Kwoj mõnõnõ ke einwõt George? Kwoj watõk ke kajjojo ran ekãl einwõt juõn menin letok ñan lañliñ kake? Ak kõtmene eo kin juõn ran ekãl ej kõmman ke bwe en walok juõn eñjake in jab kea ak bõlen ñan inebata? Ewõr ke men en ej kwote yuk jen am mõnõnõ?
Mõnõnõ rej ukõte einwõt juõn bed eo emõn im ebwe an etto an bed. Rej kwalok kadkad in ikijen eñjake ko rej lajrak jen juburu ñan juõn lañliñ eo emũlal im kajur im kin juõn kõnan bwe bed eo emõn en wõnmanlok wõt. Mõnõnõ eo einwõt in ej lukkun bed ke?
Rainin, jukjuk im bed eo ej kalaplok lemnak eo bwe armij renaj mõnõnõ elañe ear bwe air mweie. Million armij rej wõnmanlok im boub ilo jibadbad ko air ñan mweie. Ilo air kõmman eindein, elõñ rej karmijete kõtan ko air im men ko jet elap tokjeir ilo mour. Einwõt lañ ko ilo juõn roñ in lañ, emakijkij air ekaiuriur, im edik ien air lemnak kin men eo rej kõmmane ak air ien ibben don. Ilo melele, “oran armij ro rej kakilen ir bwe rej einwõt buromõj kin inebata ej laplok wõt,” juõn report ilo Los Angeles Times ej ba, “im joñan dettan eo rej jino air eñtan kake ej diklok wõt. . . . Unokan inebata ko rej uno ko company in uno ko elap air wiakaki im elap an armij kõnan.” Million armij rej bõk uno ko remo ekkar ñan kien ak kajeoñ kadiklok inebata ko air ilo air idak alcohol. Jet rej etal wõt im kaikujkuj ñe rej inebata. Ilo juõn etale, “kõrã ro kar ro elaptata air kõnan etal im kaikujkuj einwõt mejelan abañ eo,” newspaper eo ilo Britain The Guardian ej ba. “Jilu alen an lõñlok kõrã ro jen emaan ro renaj kar kaikujkuj ke rar inebata.”
Bõtab, mõnõnõ eo emol jejjab loe ilo juõn imõn wia, juõn bato, juõn uno, juõn wã, ak juõn bank account. Mõnõnõ ejjab juõn men rej wiakake; ejelok wõnãn. Ia eo jemaroñ lo juõn menin letok eaorõk einwõt in? Jenaj konono kake ilo katak in tok juõn.