Ewi Wãwen An Ainemõn Eo Jen Christ Maroñ Iroij Ilo Buruõd?
“Im ainemõn jen Kraist en iroij ilo buruemi, ñõn eo emwij kir kom ilo juõn enbwin.”—DRI KOLOSSE 3:15.
1, 2. Ilo wãwen et eo “ainemõn jen Kraist” en iroij ilo buruen juõn Ri Christian?
IROIJ ION ej juõn nan enana ñan elõñ, kinke ej kõmman bwe jen lemnak kin jibed im jelã kilen eo ejjab emõn. Nanin kõketak eo an Paul ñan Ri Christian ro mõttan ilo Colossae, “Im ainemõn jen Kraist en iroij ilo buruemi,” emaroñ kõmman bwe jet armij ren lemnak bwe ejjab men in kõmmanwa. (Dri Kolosse 3:15) Kij jejjab bed ilo anemkwoj in kãlet ke? Etke jej aikwij kõtlok bwe jabdewõt men ak jabdewõt armij en iroij ilo buruõd?
2 Paul ear jab jiroñ Ri Colossae ro bwe ren kõtlok anemkwoj in kãlet eo air. Nan in Greek eo rej ukõte “iroij ion” ilo Dri Kolosse 3:15 ej ekkejellok ñan nan eo kin ampai eo ej lelok kawinin ilo jiai in ikkure ko ilo ran ko. Ro rej jiaik don kar wõr joñan air anemkwoj iloan rule ko an ikkure eo, ak ilo jemlokin, ampai eo ej beek wõn eo ear lore rule ko im kin menin wini jiai eo. Eindein, kij ewõr ad anemkwoj in kõmman elõñ bebe ko ilo mour, ak ke jej kõmman eindein, ainemõn eo jen Christ ien otemjej ej aikwij in “ampai” eo—ak, einwõt an ri ukok eo Edgar J. Goodspeed ukõte, “kilan eo ekajurtata” ilo buruõd.
3. Ta eo “ainemõn jen Kraist”?
3 Ta “ainemõn eo jen Kraist”? Ej anemkwoj eo jen inebata ko, jokane eo ituloa, eo jej bõke ñe jej oktak im ri kaloran Jesus im katak bwe Jehovah Anij im Nejin rej yokwe kij im buñburueir ibbed. Ke Jesus ear bojak in ilok jen ri kalor ro an, ear jiroñ ir: “Aõ ainemõn Ij lewoj ñõn kom. . . . En jab biuk buruemi, im en jab lelñoñ.” (Jon 14:27) Iumin enañin 2,000 yiõ ko, ri kabit ro retiljek uan enbwinin Christ rar lañliñ kin ainemõn in, im rainin ro rejetair, “sheep ro jet,” rej bõk kunair ie. (John 10:16, NW) Ainemõn in ej aikwij juõn men eo ej einwõt iroij im ewõr kajurin ilo buruõd. Ñe jej bed iumin elap melejoñ, emaroñ jibañ kij bõprae ad akã kin mijak ak bed ilo abañ eo etar jen joñan. Jen lale ewi wãwen an mol menin ñe jej jelmae ekajet jab jimwe, ñe inebata ej kabol kij, im ñe jej eñjake an ejelok tokjed.
Ñe Jej Jelmae Kõmman ko Rebwid
4. (a) Ewi wãwen an kar Jesus wõr an jelã kin kõmman in bwid ko? (b) Ewi wãwen an Ri Christian ro emmakit kin jorrãn eo rej bõke jen kõmman in bwid ko?
4 King Solomon ear loe: “Ñe juõn armij eor an maroñ ion bar juõn bwe en kejorran e.” (Ekklisiastis 8:9) Jesus ear jelã mol in nan kein. Ke ear bed ilañ, ear lo kõmman in bwid ko relap armij ear likit ion bar juõn. Ke ear bed ion lal, ear eñtan kin kõmman in bwid eo ej make wõt lap ke e, juõn armij eo ejelok an jerawiwi, rar naruõn kin blasphemy im likit bwe en mij einwõt juõn ri kõtõrãik kien. (Matu 26:63-66; Mark 15:27) Rainin, ej lap wõt kõmman ko rebwid, im Ri Christian ro remol elap jen joñan air bõk eñtan, ke “dri ailiñ ko otemjelok re naj kijirãte” ir. (Matu 24:9) Ak, meñe rar ion elõñ kamijak ko ilo camp in mij ko an Nazi im ilo Soviet Gulag, meñe rar jorrãn jen kumi in kõtõrãik kien, narueir kin men ko rejjab mol, im riap ko ñan kokkure ir, ainemõn eo jen Christ ear kejbãrok wõt air mãjojo. Rar kajeoñe Jesus, eo jej konono kake: “Eo ke ar konono nae E, e ar jab bar konono nae; ke E ar iñtan E ar jab kalelñoñ, a E ar mõke likit E ñõn Eo ej ekajet jime.”—1 Piter 2:23.
5. Ñe jej roñ kin juõn kõmman ebwid eo ej walok ilo congregation eo, ta eo moktata jej aikwij lemnak kake?
5 Ilo juõn joñan eo elaplok an dik, jemaroñ tõmak bwe ewõr juõn eo ejjab emõn air kõmman ñane ilo congregation eo an Christian. Ilo wãwen in, jemaroñ eñjake einwõt kar Paul, eo ear ba: “Wõn latibñil e, im e jab bwil buruõ?” (2 Dri Korint 11:29) Ta eo jemaroñ kõmmane? Jej aikwij kajitõkin kij make, ‘Ej lukkun juõn kõmman e bwid ke?’ Ekkã ad jab jelã aolepen mol ko. Emaroñ kajur ad emmakit elikin ad roñjake juõn armij eo ej ba bwe ejelã. Kin un eo emõn, Bible eo ej ba: “Dri bwebwe eo, ej tõmak nan otemjej.” (Jabõn Kennan Ko 14:15) Inem jej aikwij kanuij kejbãrok.
6. Ewi wãwen ad emmakit ñan kõmman in bwid ko ewõr ad jelã kaki iloan congregation eo?
6 Ak, jen baj ba, bwe kwe eo kwoj bõk jorrãn kin juõn kõmman ebwid. Ewi wãwen an juõn armij eo ewõr ibben ainemõn eo jen Christ naj kar emmakit? Jemaroñ lo aikwij eo ñan konono ibben armij eo jej eñjake bwe ear kabwid kij. Tokelik, jen ad konono kin men eo ibben jabdewõt eo enaj roñjake, etke jejjab lelok men eo ñan Jehovah ilo jar im liki bwe enaj lale bwe en jerbal ekajet jimwe? (Sam 9:10; Jabõn Kennan Ko 3:5) Emaroñ bwe ñe jaar kõmman eindein, jenaj jokane ñan namejelan wãwen in ilo buruõd im “kejeklokjen.” (Sam 4:4) Ilo elõñ wõt wãwen ko, nanin kõketak eo an Paul enaj jerbal: “Im komin meamiwõr ñõn dron, im jeorilok nana jen dron, elañe iben jabrewõt iami eor ruõn iben bar juõn; im einwõt [Jehovah, NW] e ar jeorilok ami nana, en ein drein bareinwõt ami kõmõn ñõn dron.”—Dri Kolosse 3:13.
7. Ta eo jej aikwij kememej ien otemjej ilo jerbal ko ad ibben ro jeid im jatid?
7 Ak, jabdewõt men eo jej kõmmane, jej aikwij kememej bwe ke jejjab maroñ iroij ion ak bebe ion ta eo ear walok, jemaroñ iroij ion emmakit eo ad. Elañe jej uak ilo juõn wãwen eo ejjab jokkin wõt juõn ñan juõn kõmman ebwid, menin emaroñ kõmman juõn jorrãn eo elaplok ñan ainemõn eo ad jen kõmman in bwid eo make. (Jabõn Kennan Ko 18:14) Jemaroñ lõkatip im bõjrak jen ad kobalok ibben congregation eo mae ien jej eñjake bwe ekajet jimwe emwij an tõbrak. Ri jeje Sam ear je ñan ro rej yokwe kien ko an Jehovah “ejelok unin lõkatip ibeir.” (Sam 119:165) Mol eo ej, jabdewõt armij rej iion kõmman in bwid jen ien ñan ien. Jab kõtlok kain wãwen rot in bwe en jelet jerbal eo am ibben Jehovah. Jen men in, kõtlok ainemõn eo jen Kraist bwe en iroij ilo buruõm.
Ñe Inebata ej Kabol Kij
8. Ta jet ian men ko rej kõmman inebata, im ta eo emaroñ walok jen tokjen inebata eo?
8 Inebata ej juõn mõttan eo elukkun mol ilo mour ilo “ran (kein) eliktata.” (2 Timote 3:1) Emol, Jesus ear ba: “Komin jab inebata buruemi kin mour, ta eo kom naj mõña; ak kin enbwinemi ta eo kom naj balle.” (Luk 12:22) Ak ejjab aolep inebata rej jarjar jen lemnak kin mweiuk ko. Lot ear “lap an buromõj” kin mour in ejej eo ilo Sodom. (2 Piter 2:7) “Inebata eo kin congregation ko otemjej” ear kabole Paul.” (2 Corint 11:28, NW) Joñan an kar lap an Jesus inebata ilo joten eo mokta jen an mij “An menokadu ear oktak im einwõt biliñliñ in bõtõktõk ej wõtlok ion bũdej.” (Luk 22:44) Ealikar, ejjab aolep inebata ej kakõllan juõn tõmak emõjno. Bõtab, jabdewõt men eo ej kõmmane, elañe elap im to an bed inebata eo, emaroñ kwot ainemõn eo jen kij. Inebata ear lap an kokkure jet, im kõmman bwe ren eñjake air jab maroñ etal wõt im jerbale eddo ko air ilo air karejar ñan Jehovah. Bible eo ej ba: “Men in erro ilo buruen armij, ej kokmwil e.” (Jabõn Kennan Ko 12:25) Inem, ta eo jemaroñ kõmmane elañe inebata ej jelet kij?
9. Ta jet ian buñten nee ko remõn jemaroñ kõmmane ñan mejal jen inebata, ak ta eo ej kõmman inebata im jejjab maroñ jolok?
9 Ilo jet wãwen ko, bõlen jemaroñ bõk jet buñten nee ko rekeie. Elañe juõn abañ kin doctor ej bed ilo okran inebata eo, enaj menin meletlet ñan ad lemnak kake, meñe wãwen rot kein rej an armij eo make bebe.a (Matu 9:12) Elañe jeddo kin elõñ eddo ko, jemaroñ lelok jet ian men kein ñan ro jet. (Exodus 18:13-23) Ak, ta kin ro—einwõt ro jemen im jinen—me elap eddo ko air im rejjab maroñ liloki ñan ro jet. Ta kin juõn Christian eo ej jokwe ibben juõn mõttan eo ej jumae? Ta kin juõn family eo ebin an mour kin an jabwe money ak mour ilo juõn jikin eo ewõr tarinae ie? Alikar, jejjab maroñ jolok aolep unjen inebata kein ilo jukjuk im bed in. Ak, jej maroñ wõt kejbãrok ainemõn eo jen Christ ilo buruõd. Ewi wãwen?
10. Ta wãwen ko ruo juõn Ri Christian emaroñ bukõt ñan an mejal jen inebata?
10 Bukõt kainemõn ilo Nanin Anij ej juõn wãwen. King David ear je: “Ke elõñ lemnok ilo buruõ, Am nan in kainemõn ej kalõñliñ aõ.” (Sam 94:19) “Nan in kainemõn” ko an Jehovah jemaroñ loi ilo Bible eo. Ekkeini bõk kakabilek jen book in kakõrmol in enaj jibañ kij ñan kejbãrok ainemõn eo jen Christ ilo buruõd. Bible eo ej ba: “Kwon jolok inek eo am ion Jeova, im E naj baur yuk: E jamin likit ro remõn bwe ren makõtkit.” (Sam 55:22) Ilo juõn wãwen eo einlok wõt, Paul ear je: “Komin jab inebata kin jabrewõt; a ilo men otemjej kin jar im akwelap kab kamolol, kajitõk ko ami ren walok ñõn Anij. Im ainemõn jen Anij, eo ej elã jen jela otemjej, e naj kejbãrok buruemi im lemnok ko ami ilo Kraist Jisõs.” (Dri Pilippai 4:6, 7) Ilo ettã im ekkeini jar enaj jibañ kij kejbãrok ainemõn eo ad.
11. (a) Ewi wãwen Jesus kar juõn joñok emõn ilo wãwen jar? (b) En ewi wãwen ad lemnak kin jar?
11 Jesus kar juõn joñok emõntata ilo wãwen in. Ilo juõn ien, ear ilo jar konono iben Jemen ilañ iumin elõñ awa ko. (Matu 14:23; Luk 6:12) Jar ear jibañ e ñan kijenmij ilo melejoñ ko elap air nana. Ilo joten eo mokta jen an mij, ear kanuij laplok an eñtan. Ewi wãwen an emmakit? E ar “kalaplok An jar.” (Luk 22:44) Aet, armij eo ewãppen Nejin Anij kar juõn armij in jar. Inem, en ewi joñan an laplok an ri kalor jab wãppen ro an aikwij ejaake manit in jar! Jesus ear katakin ri kalor ro an “ren jar ien otemjej, im jab ñatte.” (Luk 18:1) Jar ej konono eo emol im aorõk ibben Eo elaplok an jelã kin kij jen ad jelã kin kij make. (Sam 103:14) Elañe jej kõnan kejbãrok ainemõn eo jen Christ ilo buruõd, ejamin “jokwõr [ad] jar.”—1 Dri Tessalonika 5:17.
Anjo Ion Mõjno ko Ad
12. Kin ta un ko jet remaroñ eñjake bwe jerbal eo air ejettokjen?
12 Jehovah ej watõk kajjojo ro ri karejaran einwõt menin aorõk. (Haggai 2:7, NW). Mekarta, elõñ rej lo bwe ebin menin ñan air bõke. Jet remaroñ ebwer kin air rittolok, eddo ko an family, ak an jorrãnlok ejmour. Ro jet remaroñ eñjake an jab emõn ñan ir kinke rar ion eñtan ke rar ajiri wõt. Ak ro jet remaroñ eñtan kin bwid ko rar kõmmani ilo ien ko lok, im bere bwe Jehovah emaroñ jolok air bwid. (Sam 51:3) Ta eo emaroñ kõmman kin kain eñjake rot in?
13. Ta nan in kainemõn eo ewõr ilo Jeje ko ñan ro rej eñjake an ejelok tokjeir?
13 Ainemõn eo jen Christ enaj kamol ñan kij kin yokwe eo an Jehovah. Jemaroñ kajeblak ainemõn in ilo buruõd ilo ad kalmenlokjen kin mol eo bwe Jesus ejañin kar ba bwe aorõk eo ad rej joñwe ikijen keidi men eo jej kõmmane ibben men eo ro jet rej kõmmane. (Matu 25:14, 15; Mark 12:41-44) Men eo ear kalikar aorõkin kar tiljek. E ar jiroñ ri kalor ro an: “A eo e naj kijinmij ñõn jemlokõn, e in e naj mour.” (Matu 24:13) Jesus make armij rar “kejekron” e, ak ear jab bere bwe Jemen ear yokwe e. (Aiseia 53:3; Jon 10:17) Im ear jiroñ ri kalor ro an bwe ir bareinwõt ear yokwe ir. (Jon 14:21) Ñan kalikar menin, Jesus ear ba: “Re jab wia ruo bao sparro kin juõn penni ke? im juõn iair e jamin wutlok ion brij im Jememi e jab lale. A emwij bwini kolan bõrõmi otemjelok. Inem komin jab mijak, elap ami aurõk jen elõñ sparro.” (Matu 10:29-31) Juõn kamol eo eokmãnãn in yokwe eo an Jehovah!
14. Ta men in kamol eo ewõr ibbed bwe Jehovah ej kaorõk kajjojo iad?
14 Jesus ear bareinwõt ba: “Ejelok armij ej maroñ itok ñõn iba elañe Jema eo E ar jilkintok Iõ E jab ibertok e.” (Jon 6:44) Ke Jehovah ear ibertok kij ñan lor Jesus, Ej kõnan bwe jen mour. Jesus ear jiroñ ri kalor ro an: “Ein drein Jememiuij ej ber i lõñ E jab kõnan bwe juõn ian rein redrik en joko.” (Matu 18:14) Kin menin, elañe kwoj karejar kin juõn buru eyu, kwo maroñ lañliñ kin jerbal ko am remõn. (Dri Galetia 6:4) Elañe kwoj eñtan kin bwid ko kwar kõmmani ilo ien ko lok, kwon liki bwe Jehovah enaj jolok bwid “ilo juõn wãwen elap” ñan ro emol air ukwelok. (Isaiah 43:25; 55:7, NW) Elañe kin jabdewõt un ko jet kwoj eñjake am ebwer, kememej bwe “Jehovah ej ebak ñan ro erup burueir, im ro rej jorrãn ilo jitõb ej lomor.”—Psalm 34:18, NW.
15. (a) Ewi wãwen an Satan kajeoñ in kwote ainemõn eo ad? (b) Ta liki eo ilo Jehovah emaroñ wõr ibbed?
15 Ejelok men en emõnlok Satan enaj kõnan kõmmane jen an kwote yuk kin ainemõn eo am. E eo ej unjen jolet in jerawiwi eo kij otemjej jej irire ibben. (Dri Rom 7:21-24) Emol ej kõnan bwe kwon eñjake bwe jab wãppen eo am ej kõmman an jab emõn jerbal eo am ñan Anij. Jab kõtlok bwe Devil eo en kamõjnoiklok yuk! Kwon ekkõl kin kilen ko ej kõmmani, kõtlok bwe am jelã kin menin en kõmman bwe kwon beek ñan am kijenmij. (2 Dri Korint 2:11; Dri Epesõs 6:11-13) Kememej, “Anij elap jen buruer im E jelã men otemjelok.” (1 Jon 3:20) Jehovah ejjab lo wõt likjap ko ad. Ej bareinwõt lo kõmman im karõk ko ad. Inem, kwon jokane, ilo nan ko an ri jeje psalm: “Bwe Jehovah e jamin karmijeteik armij ro an, im ejamin ilok jen menin jolet eo an make.”—Psalm 94:14, NW.
Burukuk ilo Ainemõn eo Jen Christ
16 Paul ear je bwe jej aikwij kõtlok bwe ainemõn eo jen Christ en iroij ilo buruõd kinke “emwij kir kom ilo juõn enbwin.” Christian ri kabit ro Paul ear jeje ñan ir kar kir ir bwe ren mõttan enbwinin Christ, einwõt bwen ri kabit ro rainin. “Sheep ro jet” mõttair rej burukuk ibbeir einwõt “juõn wõt bwij” iumin “juõn shepherd,” Jesus Christ. (John 10:16) Ibben don, juõn “bwij” in million armij ro ibelakin lal rej likit ainemõn eo jen Christ bwe en iroij ilo burueir. Ad jelã bwe jejjab make iad menin ej jibañ kij ñan kijenmij. Peter ear je: “Eo komin jutõk jumae [Satan] im bin ilo ami tõmak, bwe kom jela bwe iñtan kein, ro jeiõmi im jãtõmi rej ber i lõl, rej iñtan kaki.”—1 Piter 5:9.
17 Inem, kij otemjej, jen etal wõt im ejaake ainemõn, leen in eaorõk leen jitõb kwojarjar eo an Anij. (Dri Galetia 5:22, 23) Ro Jehovah ej lo ir bwe ejelok air mãr, notair, im ilo ainemõn renaj etal im bõk kajerammõn eo kin mour indio ilo juõn paradise ion lal, ijo kwojarjar enaj jokwe ie. (2 Piter 3:13, 14) Ewõr jabdewõt un eo ibbed ñan kõtlok ainemõn eo jen Christ bwe en iroij ilo buruõd.
[Kamelele ko itulal]
a Ilo jet wãwen ko, inebata emaroñ walok ak laplok kin jet kain nañinmij, einwõt eñtan kin clinical depression.
Kwoj Kememej Ke?
• Ta eo ainemõn jen Christ?
• Ewi wãwen ainemõn jen Christ emaroñ iroij ilo buruõd ñe jej jelmae kõmman in bwid ko?
• Ewi wãwen an ainemõn jen Christ maroñ jibañ kij jerbale inebata?
• Ewi wãwen an ainemõn eo jen Christ kainemõn kij ñe jej eñjake an ejelok tokjed?
16. Ilo wãwen et eo jejjab make iad ke jej kate kij kijenmij?
17. Ta eo ewõr ibbed im ej kamakit kij bwe jen kõtlok bwe ainemõn jen Christ en iroij ilo buruõd?
[Pija]
Iman mejen ro rar naruõn, Jesus ear lelok e make ñan Jehovah
[Pija]
Einwõt juõn jemen eo ej yokwe im ej atbokwõj ilo mãnãn, kainemõn eo an Jehovah emaroñ kameoeo inebata eo ad