KATAK KO KÕN TAITÕL̦IN BOK IN | JEMAROÑ KE BAR MOUR ÃLIKIN AD MEJ?
Ta eo Ej Wal̦o̦k Ãlikin an Juon Mej?
“Iar l̦õmn̦ak ewõr jilu jikin ko me ro remej rej etal ñani. Iar l̦õmn̦ak rej etal ñan lañ, hell, ak purgatory.a (Lale kõmel̦el̦e eo itulal̦.) Ijel̦ã bwe iar jab lukkuun juon rũm̦m̦an bwe in etal ñan lañ ak lukkuun juon rinana bwe in etal ñan hell. Bõtab, ear jab lukkuun alikkar ñan ña ta in purgatory. Ijjañin kar loe an Baibõl̦ kwal̦o̦k kõn men in. Ij roñ wõt an armej ba.”—Juon em̦m̦aan etan Lionel.
“Ikar katak bwe aolep ro remej rej etal ñan lañ, ak iar jab lukkuun tõmak men in. Iar l̦õmn̦ak bwe mej ej jem̦l̦o̦kin aolep men, im ro remej reban bar mour.”—Juon em̦m̦aan etan Fernando.
Em̦õj ke am̦ l̦õmn̦ak ippam̦ make im ba, ‘Ta eo ej wal̦o̦k ñan ro remej? Ro rejitõnbõro ippãd rej ke eñtaan juon jikin? Jenaaj ke bar loe er? Ewi wãween ad maroñ jel̦ã bwe jenaaj bar loe er?’ Jouj im l̦õmn̦ak kõn ta eo Baibõl̦ ej ba kõn men kein. M̦oktata, jen etale ta eo Baibõl̦ ej ba kõn ro remej. Innem, jenaaj etale kõjatdikdik eo me Naanin Anij, Baibõl̦, ej kwal̦o̦k kake.
Ta eo ej wal̦o̦k ñan ro remej?
UWAAK EO JÃN BAIBÕL̦: “Bwe ro remour rejel̦ã bwe renaaj mej; a ro remej ejjel̦o̦k aer jel̦ã, im ebar ejjel̦o̦k menin lel̦o̦k ñan er; rejjab ememej er. Jabdewõt eo peim̦ ej loe bwe en kõm̦m̦ane, kwõn kõm̦m̦ane kõn am̦ maroñ; bwe ejjel̦o̦k jerbal, ak menin l̦õmn̦ak, ak jel̦ã, ak mãlõtlõt, ilo Sheol, ijo kwõj ilo̦k ñane.”b (Lale kõmel̦el̦e eo itulal̦.)—Ekklisiastis 9:5, 10.
Naan in Sheol ak Hedis rej jitõñl̦o̦k ñan lõb, ijo armej rej etal ñane ñe rej mej. Ñe rej pãd ijin, ejjel̦o̦k men en̦ rejel̦ã im ejjel̦o̦k men en̦ rej kõm̦m̦ane kõnke remej. Ewi wãween an kar em̦m̦aan eo etiljek etan Job l̦õmn̦ak kõn Sheol? Job ear luuji aolep men ko m̦weien im aolepen ajri ro nejin ilo juon wõt raan. Ãlikin men in, ear eñtaan kõn an kar wõt aolepen ãnbwinnin. Kõn men in, ear kajjitõk ippãn Anij im ba: “O em̦m̦an Kwõn n̦ooj eõ ilo Sheol, im kõjparok eõ ilo ittino.” (Job 1:13-19; 2:7; 14:13) Elukkuun alikkar bwe Job ear jab l̦õmn̦ak bwe Sheol ej juon jikin bwil ak juon jikin me enaaj l̦apl̦o̦k an eñtaan ie. Ear l̦õmn̦ak kõn Sheol ãinwõt juon jikin kakkije.
Ebar wõr juon wãween jemaroñ katak kõn ta eo ej wal̦o̦k ñan ro remej. Jemaroñ etale kõmel̦el̦e ko jãn eoon ko ilo Baibõl̦ me rej kwal̦o̦k kõn armej ro 8 me rar bar mour ãlikin aer kar mej.—Lale bo̦o̦k eo etan “Armej ro 8 me Baibõl̦ Ej Kwal̦o̦k bwe Rar Jerkak jãn Mej.”
Ejjel̦o̦k juon iaan rein 8 rar kõnnaan kõn aer kar etal ñan lañ ak eñtaan ilo juon jikin. Ñe armej ro me rar jerkak jãn mej rar pãd ilo jikin kein, renaaj kar baj ba wõt ñan ro jet kõn men in. Bareinwõt, enaaj kar pãd ilo Baibõl̦ bwe aolep ren loe. Bõtab, ejjel̦o̦k eoon ilo Baibõl̦ ej kõnnaan kõn men in. Armej ro 8 me rar jerkak jãn mej rar jab ba jabdewõt kõn men in. Etke? Kõnke ilo tõre eo rar mej, ejjel̦o̦k jabdewõt men en̦ rar jel̦ã. Ej ãinwõt ñe rar kiki im lukkuun ettoñ. Ilo m̦ool, jet iien Baibõl̦ ej kõjerbal naan in kiki ñan waanjoñak ñe juon armej emej. Ñan waanjoñak, ke rũkarejar ro retiljek rar mej ãinwõt Stipen, Baibõl̦ ej ba bwe rar “kiki.”—Jerbal 7:60.
Ak, ewõr ke kõjatdikdik ñan ro remej? Remaroñ ke ruj jãn aer kiki ilo kõkkar?
a Purgatory ej tõmak eo bwe ñe juon ej mej, jitũbõn ak añin ej etal ñan juon jikin im eñtaan ie ium̦win jidik iien. Unin ej ñan karreoiki jãn jerawiwi ko an m̦okta jãn an etal ñan lañ.
b Naanin Hibru eo “Sheol” im naanin Grik eo “Hedis” rej jim̦or jitõñl̦o̦k ñan “Lõb.” Jet ukokin Baibõl̦ ko rej kõjerbal naan in “hell.” Bõtab, mel̦el̦e eo kõn an ro remej etal im bwil ak eñtaan ilo kijeek ejjab itok jãn Baibõl̦.