Kwõmaroñ lo M̦õn̦õn̦õ Kiiõ
JUON raan, ejjel̦o̦k juon enaaj bar nañinmej, rũttol̦o̦k, ak mej. Men in emaroñ bar wal̦o̦k ñan mour n̦e am̦. Bõtab ejjab ãindein mour rainin kõnke mour in eobrak kõn apañ im wãween ko reppen. Ta ko remaroñ jipañ eok bwe kwõn m̦õn̦õn̦õ kiiõ? Baibõl̦ eo ej letok naanin tõl ko me remaroñ jipañ eok ñan lo juon mour elem̦õn̦õn̦õ kiiõ. Jen etale jet apañ ko ilo mour in im wãween an Baibõl̦ maroñ jipañ kõj kõn apañ kein.
JOKWANE KÕN MEN KO EWÕR IPPAM̦
Naanin kakapilõklõk jãn Baibõl̦: “Kom̦win jab arõk jããn ñan jidik ilo wãween ami mour ak kom̦win jokwane kõn men ko ewõr ippemi.”—Hibru 13:5.
Ilo lal̦ in rainin, elõñ men ko armej rej ba bwe ej aikuj wõr ad. Bõtab, Baibõl̦ ej ba bwe jemaroñ ‘jokwane kõn men ko ewõr ippãd.’ Ewi wãween?
Kõjparok jãn “arõk jããn.” Kõn wõt men in “arõk jããn,” armej rej kõm̦m̦an jabdewõt men meñe enaaj ko̦kkure ãjmour ko aer, baam̦le ko aer, jem̦jerã ko aer ippãn ro jet, m̦wilier, ak aer kautiej er make. (1 Timote 6:10) Ekabũrom̦õjm̦õj wõt men in! Juon eo ej yokwe jããn “ejãmin mat” ak po ñan an kõn̦aan.—Ekklisiastis 5:10.
Kaorõk armej, jab m̦weiuk. Em̦ool bwe m̦weiuk ko ewõr tokjãer. Bõtab, men kein rejjab maroñ yokwe ak kaorõk kõj. Armej ro wõt remaroñ kõm̦m̦ane men in. An wõr ‘juon jerad’ eo em̦ool ej jipañ kõj ñan jokwane im m̦õn̦õn̦õ ilo mour ko ad.—Jabõn Kõnnaan 17:17.
JEMAROÑ KÕM̦M̦AN BWE JEN LO M̦ÕN̦ÕN̦Õ KIIÕ ILO AD L̦OORE NAANIN TÕL KO ILO BAIBÕL̦
WÃWEEN KO ÑAN JIPAÑ ÑE EWÕR AM̦ NAÑINMEJ
Naanin kakapilõklõk jãn Baibõl̦: “Juon bõro em̦õn̦õn̦õ ej ãinwõt uno em̦m̦an.”—Jabõn Kõnnaan 17:22.
M̦õn̦õn̦õ ej ãinwõt “uno em̦m̦an” kõnke emaroñ jipañ kõj bwe jen kijenmej ñe jej nañinmej. Ak ewi wãween ad maroñ m̦õn̦õn̦õ ñe jenañinmej?
Kwal̦o̦k kam̦m̦oolol. El̦aññe jej l̦õmn̦ak wõt kõn ad eñtaan, “raan otemjej” enaaj nana ippãd. (Jabõn Kõnnaan 15:15) Ijoke Baibõl̦ ej ba, “Kom̦win kwal̦o̦k ami kam̦m̦oolol.” (Kolosse 3:15) Innem jen katak ñan kam̦m̦oolol kõn men ko rem̦m̦an ilo mour in meñe ilo men ko reddik. An aiboojoj an tulo̦k al̦, em̦m̦an an elladikdik, an juon eo ejitõnbõro ippãd ettõñdikdik, aolep men kein remaroñ kõm̦m̦an bwe jen lañlõñ im m̦õn̦õn̦õ.
Kõm̦m̦ani men ko ñan ro jet. Jekdo̦o̦n ñe ejjab em̦m̦an ãjmour eo ad, ak “el̦apl̦o̦k m̦õn̦õn̦õ ilo lel̦o̦k jãn bõk.” (Jerbal 20:35) Ñe ro jet rej kam̦m̦oolol kõj kõn ad kate kõj, elukkuun em̦m̦an ad mour itulowa, im men in ej kõm̦m̦an bwe jen jab l̦õmn̦ak kõn apañ ko ad. Jemaroñ kõm̦m̦an bwe en em̦m̦anl̦o̦k mour ko ad ilo ad jipañ ro jet bwe en bar em̦m̦anl̦o̦k mour ko aer.
KÕKAJOORL̦O̦K MOURIN M̦ARE EO AM̦
Naanin kakapilõklõk jãn Baibõl̦: “Kom̦win lukkuun lale ta ko raorõkl̦o̦k.”—Pilippai 1:10.
Rippãlele ro me jidik wõt aer jol̦o̦k iien ippãn doon, men in emaroñ kõm̦m̦an bwe ren ettol̦o̦k jãn doon. Kõn men in, l̦eo im lio rej aikuj watõk mourin pãlele eo aerro ãinwõt juon iaan men ko raorõkl̦o̦k ilo mour in.
Kõm̦m̦ani men ko ippãn doon. Ijello̦kun am̦ make kõm̦m̦ani men ko rem̦m̦an ippam̦, etke komiro ejjab kõm̦m̦an amiro bũl̦ããn ak karõk ñan kõm̦m̦ani men kein ippãn doon? Baibõl̦ ej ba, “Ruo rem̦m̦anl̦o̦k jãn juon.” (Ekklisiastis 4:9) Kõn men in, komiro maroñ kõmat ippãn doon, ekjerjaij ippãn doon, idaak dãn ko ippãn doon, ak pukot juon men komiro itoklimo kake im kõm̦m̦ane ippãn doon.
Kwal̦o̦k am̦ yokwe eo pãleem̦. Baibõl̦ ej rõjañ l̦eo im lio bwe ren yokwe im kautiej doon. (Epesõs 5:28, 33) Juon mejãn ettõñdikdik, ak atbo̦kwõj, ak juon menin lel̦o̦k jidikdik emaroñ lukkuun l̦ap an kõkajoore juon mourin m̦are. Im ñe ej itok ñan men ko rippãlele ro rej kõm̦m̦ani ilo aer babu ippãn doon, rej aikuj ba im kõm̦m̦ani wõt men kein ñan doon.—Hibru 13:4.