M̦ool eo kõn Ilju im Jekl̦aj
Kwõnañin ke kar l̦õmn̦ak kõn ta kobban ilju im jekl̦aj? Baibõl̦ eo ej kwal̦o̦k kõn men ko rel̦l̦ap renaaj wal̦o̦k ilo raan ko rej pãd im̦aan im aer naaj jelõt aolep armej ro ilo lal̦ in.
Jesus ear kõmel̦el̦e kõn wãween ad naaj “jel̦ã bwe epaaktok Aelõñ eo an Anij.” (Luk 21:31) Ear kanaan bwe ippãnl̦o̦k bar men ko jet, enaaj wõr tarin̦ae ko rel̦l̦ap, m̦akũtkũt lal̦ ko rel̦l̦ap, ñũta, im nañinmej ko rekapopo—men kein aolep me jej loi ilo raan kein.—Luk 21:10-17.
Baibõl̦ eo ej wõnm̦aanl̦o̦k wõt im kwal̦o̦k bwe “raan ko ãliktata” in an armej tõl enaaj alikkar ilo wãween kõm̦m̦an ko an armej ak, kõm̦m̦an ko aer renana. Kwõmaroñ riiti kõmel̦el̦e ko ilo 2 Timote 3:1-5. Ñe kwõj lo wãween im kõm̦m̦an kein rainin, ejjel̦o̦k pere bwe kwõnaaj errã bwe kanaan in ilo Baibõl̦ ejejjet ñan ta eo ej wal̦o̦k kiiõ.
Ta mel̦el̦ein men in? Epaak iien an itok Aelõñ eo an Anij ñan kõm̦m̦an oktak ko rel̦l̦ap me renaaj lukkuun jelõt mour ko ad ilo lal̦ in ilo juon wãween em̦m̦anl̦o̦k. (Luk 21:36) Ilo Baibõl̦ eo, Anij ej kallim̦ur kõn men ko rem̦m̦an renaaj wal̦o̦k ilo lal̦ in im ñan armej ro renaaj mour ie. Erkein ej jet iaaer.
WÃWEEN TÕL EO EM̦M̦AN
“Im em̦õj lel̦o̦k ñan e [Jesus] kajoor, aiboojoj, im bwe en Irooj, bwe aolep armej, ri-aelõñ ko, im ruwamãejet ro ren karejar ñan e. An kajoor ej juon kajoor ñan indeeo eo eban jako, im aelõñ eo an eban jorrããn.”—DANIEL 7:14.
Mel̦el̦ein men in: Kwõmaroñ mour ilo m̦õn̦õn̦õ ium̦win juon kien eutiejl̦o̦k me Anij ear kajutake im enãj tõl aolepen lal̦ in im eo Nejin enaaj Kiiñ.
ÃJMOUR
“Innem ri-jokwe ie ejãmin ba, ‘Inañinmej.’”—AISEIA 33:24.
Mel̦el̦ein men in: Kwõjjãmin bar nañinmej ak juon eo me ewõr utam̦we ko ej bũki ilo ãnbwin; kwõnaaj mour m̦aanl̦o̦k wõt im kwõjjãmin mej.
AENÕM̦M̦AN EL̦AP
“Ej kabõjrak tarin̦ae ko ioon aolepen lal̦.” —SAM 46:9, UBS.
Mel̦el̦ein men in: Eban bar wõr tarin̦ae ko rej kaamijak kõj im enaaj jako aolep men ko jej eñtaan kaki itok wõt jãn tarin̦ae kein.
LAL̦ ENAAJ OBRAK KÕN ARMEJ RO REM̦M̦AN
“Eo enana enaaj jako . . . Ro ettã bũrueer renaaj jolõt ãneo.”—SAM 37:10, 11.
Mel̦el̦ein men in: Enaaj ejjel̦o̦k armej ro renana, ak enaaj wõr wõt armej ro rej lukkuun kõn̦aan pokake Anij.
AOLEPEN LAL̦ IN ENAAJ JUON PEDETAIJ
“Im renaaj kalõk m̦õko, im jokwe ilo er; im renaaj kallib jikin kallib in kũreep, im m̦õñã jãn leen.”—AISEIA 65:21, 22.
Mel̦el̦ein men in: Enaaj aiboojoj aolepen lal̦ in. Anij enaaj kajejjet men eo jej jar kake bwe ankilaan en jejjet “ilo lal̦” in.—Matu 6:10.