Kwomaroñ ke Jibañ?
1 Ien otemjej Jehovah ej bukõt wãwen ko ñan jibañ ri karejar ro an retiljek. (2 Kron. 16:9; Ais. 41:10, 13) Ilo an keidi e ñan juõn shepherd eo ej yokwe, Isaiah ear je: “E naj atbokwoji lam ko kin pein, im jiburlipi, im E naj ailili kõrai ro.” (Ais. 40:11) Lemnak kin jet ian wãwen ko jemaroñ kajeoñe itoklimo eo ej yokwe an Jehovah.
2 Jibañ Ro Rekãl: Jemaroñ jibañ ro rekãl ilo ad kirtok ir ñan bõk kamao ko rekõketak ibbed. (Ken. 13:20) Ilo an kememej tok wãwen eo ro jet rar jibañ e ke ear jino koba ibben congregation eo, juõn brother ear ba: “Elõñ alen, juõn family ear kobaik iõ ilo katak in family eo air. Ke iar wõnmanlok, ruo ri belele ro rej pioneer ekkã air kir iõ ñan jerbal aolepen juõn ran ibbeir ilo kwalok nan. Ien otemjej kim ar lañliñ kin bwebwenato ko remõn ilo jitõb.” Ear kobaik: “Mokta jen aõ oktak im juõn Ri Christian, ekkã aõ bukõt men in kamõnõnõ ko ilo boñin Friday im Saturday. Ak ien ko ij jolok ibben ro jeiõ im jatiõ ej kabwe aikwij eo aõ kin kamao ko remõn.” Itoklimo eo ej yokwe an congregation eo ear jibañ brother in ñan an bin wõt ilo tõmak, im kiõ ej jerbal einwõt juõn uan family in Bethel.—Kol. 2:6, 7.
3 Kalek Don: Jemaroñ lo juõn ien emõn ñan lelok jibañ ñe ro jeid im jatid rej jelmaik wãwen ko rebin. Kwomaroñ ke karõk ibben juõn ri kwalok e mõjno ñan kwalok nan ikijen kajerbal telephone ak kir e ñan etal ibbam ñan juõn Bible study, ak bõlen ilo am bõktok ri katak eo ñan mweo imõn? Juõn jemen ak jinen me elõñ ro nejin redik emaroñ ke aikwij jibañ ñe ej bõk kunan ilo jerbal in kwalok nan? Ewõr ke ro rejookok me renaj kõnan bõk jibañ ñe rej bar jeblak ibben ro rej itoklimo ak ñe rej bõk kunair ilo wãwen ko jet ilo jerbal in kwalok nan? Itoklimo eo ej yokwe kin ro jeid im jatid enaj kamakit kij ñan bukõt wãwen ko jemaroñ kalek ir.—Rom 14:19.
4 Ke jej kajeoñe itoklimo eo ejoij an Jehovah kin ri karejar ro an, jenaj kakajur don, jibañ karuaklok ro ilo congregation eo ilo yokwe, im kaibujuij Jemed ilañ.—Ep. 4:16.