Jisõs Ej Lotak Ilo Juõn Stebel

KWO jela ke wõn niñniñ in? Aet, ej Jisõs. Ej kap lotak ilo juõn stebel. Juõn stebel ej juõn jikin air likit men in mour ko ie. Meri ej kababu Jisõs ilo menjer eo, ijo me rej likit kiru ass im men in mour ko jet bwe ren mõña. Ak etke Meri im Josep rej ber ijin iben men in mour ko? Mwin ejjab juõn jikin emõn bwe juõn niñniñ en lotak ie, ej ke?

Jaab, ejjab. Ak eñin unin air ber ijin: Iroij in Rom eo, Sizar Au-gus’tõs, e ar kõmõn juõn kien bwe aolep armij ro rej aikwij in jeblak ñõn jikin kwelok eo r’ar lotak ie bwe ren jeje etair ilo juõn buk. Eokwe, Josep e ar lotak ijin ilo Bet’le-em. Ak ke irro Meri ar jeretok, e ar ejelok jikin air ber ijoko jabrewõt. Kin men in r’ar aikwij in itok ñõn ijin, iben men in mour ko. Im ilo ejja ran in wõt Meri e ar keutak Jisõs! Ak einwõt am kile, emõn an mour.

Kwoj lo ke sheperd ro rej itok in lo Jisõs? R’ar ber ilo melaj ko boñin eo im lale sip ko air, ke juõn maram e kanuij lap e ar romak i bellakeir. Kar juõn enjel! Sheperd ro r’ar lukkun mijõk. Ak enjel eo e ar ba: ‘Komin jab mijõk! Ij lewõj juõn nan emõn ñõn kom. Ranin, ilo Bet’le-em, Kraist Iroij eo e ar lotak. E naj lomoren armij ro! Kom naj lo an babu ilo juõn menjer, emwij kitimi kin nuknuk ko.’ Ilo ien in, elõñ enjel ro r’ar jere im jino nebar Anij. Inem sheperd rein r’ar jarõp mõkaj lok im bukõt Jisõs, im kiõ emwij air loe.

Kwo jela ke ta unin an lap tokjen Jisõs? Kwo jela ke lukkun wõn eo Jisõs? Kememij, ilo bwebwenato eo moktata in buk in kar jiroñ kij kin Manjien Anij. Nejin in e ar jerbal iben Jeova ke e ar kõmõnmõn lõñ im lõl im men ko jet otemjelok. Eokwe, enin Jisõs!

Aet, Jeova e ar bõk mour eo an Nejin jen lõñ im likite iloan Meri. Ilo ejja ien in wõt, juõn niñniñ e ar jino edrek iloan einwõt niñniñ ro jet rej edrek iloan lojien jiniir. Ak niñniñ in kar Nejin Anij. Tokelik, Jisõs e ar lotak ijin ilo juõn stebel ilo Bet’le-em. Kwoj kile ke kiõ unin an kar enjel ro lukkun mõnõnõ in maroñ kennanek armij ro bwe e lotak Jisõs?