Kõttar Ilo Jerusalem

ARMIJ rein ijin rej ro dri kaloran Jisõs. R’ar bokake e im berwõt ilo Jerusalem. Im ilo ien eo rej jimor kõttar iben dron, juõn ainiken elap ej kobrok aolepen mweo. Ej einwõt ainiken juõn kõto elap. Inem kijeek ko re jino walok ion bõran kajojo ian dri kalor ro. Kwoj lo ke kijeek eo ion kajojo iair? Ta melelen men kein?

Ej juõn men in kabwilõñlõñ! Emwij an Jisõs jeblak iben Jemen i lõñ, im ej lutõklok jitõb kwojarjar an Anij ion ro dri kaloran. Kwo jela ke ta jitõb in ej kamõkit ir bwe ren kõmõne? Aolepeir re jino konono kin elõñ kajin ko, kaju wãweir.

Elõñ armij ro ilo Jerusalem rej roñ ainiken eo einwõt kõto ekajur, im rej itok in lale ta eo ej walok. Jet ian armij ro r’ar itok jen ailiñ ko jet ñõn kwojkwoj eo an dri Israel ro etan Pentikost. E kanuij bwilõñ dri lotok rein! Rej roñ an dri kalor ro konono ilo kajin ko air kin menko relap im remõn me Anij e ar kõmõni.

‘Armij rein rej jen Gal’i-li,’ armij ro rej ba. ‘Ekijkan air maroñ konono kin kaju kajin ko jen ailiñ ko kimij itok jen i?’

Piter e jutak kiõ bwe en kameleleik ir. Ej kalap ainiken im jiroñ armij ro kin wãwen air kar mõn Jisõs im bwe Jeova e ar kajerkakbiji jen ro re mij. ‘Kiõ Jisõs e ber i lõñ i anbijmaroñõn Anij,’ Piter ej ba. ‘Im e ar lutõktok jitõb kwojarjar eo emwij kalimur kake. Eñin unin ami lo im roñ men in kabwilõñlõñ kein.’

Eokwe, ilo ien eo Piter ej ba men kein, elõñ ian armij ro rej buromõj kake men eo r’ar kõmõne ñõn Jisõs. ‘Kimin et kiõ?’ rej kajitõk. Piter ej jiroñ ir im ba: ‘Komij aikwij in ukõt wãwen ami mour im baptais.’ Inem ilo ejja ran eo wõt, tarrin 3,000 armij rej baptais im erõm ro dri kaloran Jisõs.