Jehovah Ej Kajitõk Jen Kij Men Eo Ellã Jen Joñan Ke?
“Ta eo Jehovah ekõnan jen yuk ak bwe kwon jerbale ekajet jimwe im ñan yokwe joij im kwon ettã buru ilo am etetal ibben Anij?”—MICAH 6:8, New World Translation.
1. Ta eo emaroñ unin an jet jab karejar ñan Jehovah?
JEHOVAH ej aikwij an armij ro an ñan kõmman jet men ko. Ak elikin am readi nan ko ilañ jen kanan eo an Micah, kwomaroñ kajemlok bwe men in aikwij ko an Anij rej men in kõmmanwa. Mekarta, elõñ rejjab karejar ñan Ri Kõmanmõn eo ad Elap, im jet ro rar karejar ñan e rar bõjrak. Etke? Kinke rej lemnak bwe ej le jen joñan men ko Anij ej kajitõk bwe jen kõmmani. Ej ke? Ak abañ eo ej lemnak eo an armij eo ke kin men ko Jehovah ej aikwiji jen kij? Juõn bwebwenato ej letok melele kin men in.
2. Wõn eo kar Naaman, im ta eo ri kanan eo an Jehovah ear ba bwe en kõmmane?
2 Kapen in jar in tarinae eo an Ri Syria Naaman ear wõr nañinmij in leper ibben, ak kar jiroñ e bwe ear wõr juõn ri kanan ilo Israel eo emaroñ kejmour e. Inem Naaman im ri karejar ro an rar etal ñan Israel ñan mweo imõn ri kanan eo an Anij Elisha. Jen an dioj jen mweo imõn ñan wõnmaik ri lotok eo an, Elisha ear jilkinlok juõn ri karejaran ñan jiroñ Naaman: “Kwon ilen tutu ilo Jordan jiljilimjuõn alen, inem kõniekõm e naj bar itok iom, im kwo naj erreo.”—2 Kiñ Ro 5:10.
3. Etke Naaman ilo jinoin ear abwin kõmman men eo Jehovah ear kõnan bwe en kõmmane?
3 Elañe Naaman ear bokake men in aikwij eo me ri kanan eo an Anij ear jiroñ e, enaj kar mour jen nañinmij nana eo an. Kin men in, ear lap ke men eo Jehovah ear kajitõk bwe en kõmmane? Jaab. Bõtab, Naaman ear makoko in kõmman men eo Jehovah ear kajitõk. “Abana im Parpar, river ko i Damaskõs, re jab emõn jen river ko otemjej ilo Israel ke?” ear jumae. “In jab tutu iloir im erreo ke?” Kin nan kein, Naaman ear etal ilo illu.—2 Kiñ Ro 5:12.
4, 5. (a) Ta kar jinekjej eo kin an Naaman bokake, im ewi wãwen an kar emmakit ke ear bõke? (b) Ta eo jenaj etale kiõ?
4 Ta kar abañ eo an Naaman? Ear jab bwe men in aikwij eo ear bin. Ri karejar ro an Naaman ilo jelã kilen rar ba: “Elañe dri kanan eo e ar jiroñ yuk bwe kwon kõmõn jabrewõt men eo elap, kwo jamin kar kõmõne ke? etke e jab emõnlok ke e ar ba ñõn yuk, Kwon tutu, im kwo naj erreo?” (2 Kiñ Ro 5:13) Abañ eo kar lemnak eo an Naaman. Kar lemnak eo an bwe rar jab jerbal ibben ilo kautiej im kar kajitõk ibben bwe en kõmman juõn men ear watõke einwõt ejelok tokjen im men in kajookok. Bõtab, Naaman ear uak ilo emõn ñan nan in kakabilek eo an ri karejar ro an im ear tulok ilo River Jordan jiljilimjuõn alen. Lemnak kin lañliñ eo an ke “kõniekin e ar bar itok einwõt kõniekin juõn niñniñ, im ej erreo”! Ear obrak kin kamolol. Bareinwõt, Naaman ear keañ bwe jen ien eo manlok, ejamin kabuñ ñan jabdewõt anij ijellokin wõt Jehovah.—2 Kiñ Ro 5:14-17.
5 Ilo bwebwenato in armij, Jehovah ear kajitõkin armij ñan bokake elõñ kain kien ko. Kimij kir yuk ñan etale jet iair. Ñe kwoj kõmmane, kajitõk ibbam make kin ewi wãwen kwonaj kar emmakit elañe Jehovah ear aikwij am kõmman men rot kein. Tokelik, jenaj etale ta eo Jehovah ej aikwij ad kõmmane ilo ran kein.
Ta eo Jehovah Ear Aikwij Air Kõmmane ilo Ien ko Remotlok
6. Ta eo kar kajitõk bwe armij ro ruo moktata ren kõmmane, im ewi wãwen kwonaj kar emmakit ñan nan in jiroñ rot kein?
6 Jehovah ear jiroñ armij ro ruo moktata, Adam im Eve, ñan neje, kejbãrok lal in, im iroij ion men in mour ko. Emaan eo im lio belen rar jerammõn in jokwe ilo juõn jikin kallip elap. (Jenesis 1:27, 28; 2:9-15) Ak kar wõr juõn men emo air kõmmane. Rar aikwij jab mõñã jen juõn wijki, juõn wijki elõñ leen ibwiljin wijki ko ilo jikin kallip in Eden. (Jenesis 2:16, 17) Ear jab le jen joñan men eo Jehovah ear kajitõk bwe ren kõmmane, ear ke? Kwo jamin kar lañliñ ke ñan kajejjet juõn jerbal einwõt in, kin kejatdikdik eo ñan mour indio ilo wãppen? Meñe juõn ri kabo ear walok ilo jikin kallip eo, kwo jamin kar karmijeteik ke nan ko an? Im kwo jamin kar errã ke bwe ear wõr an Jehovah jimwe ñan likit juõn kien kemo elamwan?—Jenesis 3:1-5.
7. (a) Ta eo kar jiroñ Noah bwe en kõmmane, im kain jumae rot ear iioni? (b) Ewi am lemnak kin men eo Jehovah ear kajitõk ibben Noah bwe en kõmmane?
7 Tokelik, Jehovah ear kajitõk ibben Noah bwe en kalek juõn wa einwõt juõn ial in deod jen ibwijleplep eo ibelakin lal. Ilo lemnak kin joñan lapin wa eo, alikar jerbal eo ear jab bidodo im bõlen rar kõmmane ilo air jelmae kajirere im jumae. Ak, ear juõn jerammõn elap an Noah ñan an maroñ lomoren family eo an, im bareinwõt elõñ menin mour ko! (Jenesis 6:1-8, 14-16; Dri Hibru 11:7; 2 Piter 2:5) Elañe kar lewõj juõn jerbal einwõt in, kwo jamin kar kate wõt yuk ñan kajejjete ke? Ak kwonaj kar kajemlok ke bwe men eo Jehovah ear kajitõk ear le jen am maroñe?
8. Ta eo kar kajitõk ibben Abraham bwe en kõmmane, im kin tokjen an kar bokake eo ear annañelok ta?
8 Anij ear kajitõk ibben Abraham ñan kõmman juõn men elap an bin, ear jiroñ e: “Kiõ kwon bõk ladrik eo nejõm, eo ej mõke wõt nejõm, Aisak, eo kwoj yokwe, im ilok ñõn ene Moraia; im ijo kwon katok kin e ilo katok kijeek.” (Jenesis 22:2) Ke Jehovah ear kallimur bwe Isaac, eo ejañin kar wõr nejin ilo ien eo, enaj wõr nejin, men in ear melejoñe tõmak eo an Abraham ilo maroñ eo an Anij ñan kajerkakbiji Isaac. Ke Abraham ear bojak in katok kake Isaac, Anij ear kejbãrok likao eo. Men in walok in ear annañelok ien eo ñe Anij enaj katok kake Nejin kin tokjen eo an armij otemjej im tokelik naj kajerkakbiji e.—Jenesis 17:19; 22:9-18; Jon 3:16; Jerbal 2:23, 24, 29-32; Dri Hibru 11:17-19.
9. Etke ear jab le jen joñan men eo Jehovah ear kajitõk ibben Abraham bwe en kõmmane?
9 Jet remaroñ lemnak bwe men eo Jehovah Anij ear kajitõk ibben Abraham ear le jen joñan an maroñe. Ak ear ke? Emol ke an jab kwalok yokwe elañe Ri Kõmanmõn eo ad, eo emaroñ kajerkakbiji ro remij, ej kajitõk ibbed ñan ad bokake e meñe ej melelen ad aikwij in mij? Jesus Christ im ri kalor ro an jinoin rar jab lemnak eindein. Rar mõnõnõ in eñtan kin deñdeñ, im meñe mij, bwe ren kõmanmõn ankil an Anij. (Jon 10:11, 17, 18; Jerbal 5:40-42; 21:13) Elañe wãwen ko rej aikwiji am kõmmani, kwonaj kar mõnõnõ ke in kõmman eindein? Lemnak kin jet men ko me Jehovah ear aikwiji jen ro rar errã bwe ren armij ro an.
Kien eo an Jehovah ñan Israel
10. Wõn ro rar kallimur ñan kõmman aolep men ko Jehovah ear kajitõk, im ta eo ear lelok ñan ir?
10 Ro jen line eo an Abraham ikijen Isaac nejin im eo jibwin Jacob, ak Israel, ear eddeklok ñan ailiñ in Israel. Jehovah ear kanemkwoj ri Israel ro jen air kamakoko ilo Egypt. (Jenesis 32:28; 46:1-3; 2 Samuel 7:23, 24) Ejjabto elikin ien eo, rar kallimur ñan kõmman jabdewõt men me Anij ear kajitõk bwe ren kõmmane. Rar ba: “Men otemjej Jeova e ar konono, kim naj kõmõni.” (Exodus 19:8) Ilo an jerbal ekkar ñan kõnan eo an Ri Israel ro bwe en tel ir, Jehovah ear lelok ñan ailiñ eo elõñlok jen 600 kien ko, ekoba Kien Ko Joñoul. Tokelik, kien kein an Anij, kar litoki ikijen Moses, kar jelã kake einwõt Kien eo.—Ezra 7:6, NW; Luk 10:25-27; Jon 1:17.
11. Ta kar juõn unin Kien eo, im ta jet ian kien ko me rar jerbal ñan kõtõbrake?
11 Juõn ian karõk ko an Kien eo kar ñan kejbãrok Ri Israel ro ilo air lelok kien ko remõn ikijen mour erreo, jerbal in business ko, im kakajiriri ajiri ro. (Exodus 20:14; Livitikõs 18:6-18, 22-24; 19:35, 36; Duteronomi 6:6-9) Nan in tel ko kar litoki ikijen ewi wãwen remaroñ jerbal ibben armij ro mõttair im bareinwõt men in mour ko. (Livitikõs 19:18; Duteronomi 22:4, 10) Men in aikwij ko ikijen kwojkwoj ko ilo kajjojo yiõ im kwelok ibben don ñan kabuñ rar jibañ ñan kejbãrok armij ro ilo jitõb.—Livitikõs 23:1-43; Duteronomi 31:10-13.
12. Ta kar un eo elaptata kin Kien eo?
12 Ri jilek Paul ear kwalok kin karõk eo elap kin Kien eo, ear je: “E ar koba kin jerawiwi ko, ñõn ien ine eo [Christ] ej itok Eo emwij kwalok kalimur ñõn E.” (Dri Galetia 3:19) Kien eo ear kakememej Ri Israel ro bwe rar jab wãppen. Inem, alikar, rar aikwij juõn men in katok ewãppen me emaroñ jolok jerawiwi ko air. (Dri Hibru 10:1-4) Inem Kien eo ear keboj armij ro ñan air bõk Jesus, eo ear Messiah eo, ak Christ. Paul ear je: “Ein drein kien juõn ar dri lale in tel kij ñõn Kraist, bwe jen wãnik kin tõmak.”—Dri Galetia 3:24.
Kien eo an Jehovah ear Eddo ke?
13. (a) Ewi wãwen an kar armij ro rejjab wãppen watõk Kien eo, im etke? (b) Kien eo kar lukkun eddo ke?
13 Meñe Kien eo ear “kwojarjar, im wãnik, im emõn,” elõñ rar watõke einwõt eddo. (Dri Rom 7:12) Kinke Kien eo ear wãppen, Ri Israel ro rar jab kajejjete. (Sam 19:7) Eñin unin ri jilek Peter ear naetan “men eo ro jimar kab kij je jab maroñ in kaberber kij kake.” (Jerbal 15:10) Emol, Kien eo make ear jab eddo, im air bokake enaj kar walok ilo tokjen ko ñan armij ro
14. Ta jet wanjoñok ko me rej kwalok bwe Kien eo ear wõr juõn tokjen emõn ñan Ri Israel ro?
14 Iumin Kien eo, ñan wanjoñok, rar jab kalbuji juõn ri kwot ak ear aikwij in jerbal ñan kõllã ruo alen ak elõñlok wõnãn men eo ear kwote. Ri jorrãn eo ear jab eñtan kin an jako mweien, im rar jab likit eddo eo ion armij ro elap air jerbal ñan jurake juõn karõk in kalbuj. (Exodus 22:1, 3, 4, 7) Mõñã ko rekauwatata ear mo air kañi. Pig, elañe ejjab emõn kõmate, emaroñ wõr nañinmij in trichinosis, im rabbit emaroñ wõr tularemia. (Livitikõs 11:4-12) Eindein lok, Kien eo ear kejbãrok armij ilo an kemo air uñũri ubõn ro remij. Elañe juõn armij ear uñũri ubõn juõn ri mij, ear aikwij in tutu im kwal nuknuk ko an. (Livitikõs 11:31-36; Bwinbwin 19:11-22) Ñe juõn ej kebojak ear aikwij in kalibubu bũdej eo, men in enaj kejbãrok an jededlok nañinmij ko, eo scientist ro rar loe ilo ran kein.—Duteronomi 23:13.
15. Ta eo ear kamol an juõn eddo ñan Ri Israel ro?
15 Ear jab le jen joñan an Kien eo aikwij an armij ro kõmmani. Ak ejjab eindein ad maroñ ba ikijen armij ro rar bõk jerbal eo ñan kamelele kin Kien eo. Ikijen rule ak kien ko rar likiti, A Dictionary of the Bible, eo James Hastings ear keboje, ear ba: “Kajjojo kien ilo Bible ear wõr elõñ nan in kaiñi ko jet me rar ekkejel ion. . . . Rar kajeoñ kõmman bwe Kien eo en jelet jabdewõt wãwen mour, im rar kõmman kien ko ñan tel aolep mwil ko mwilin armij. . . . Rar jibede ainikien bõklikit eo; im kajur eo emour in nan eo Ekwojarjar rar kõmmane bwe en jettokjen im bed iumin elõñ tibdik in kien ko jet.”
16. Ta eo Jesus ear ba kin kien im manit ko reddo an ri tel in kabuñ ko?
16 Jesus Christ ear kananaik ri tel ro an kabuñ ko me rar kõmman elõñ tibdik in kien ko, ilo an ba: “Bwe rej lukwoj ineki rerro, im iñtan kin an bõki, im likiti na i aieran armij: a ir mõke re jab kõnan kamõkiti kin juõn arriir.” (Matu 23:2, 4) Ear kalikar bwe kien im manit ko air kõmman in armij reddo, ekoba tibdik in kien karreo ko, ear kõmman bwe “nan in Anij jekron.” (Mark 7:1-13; Matu 23:13, 24-26) Ak, meñe mokta jen an kar Jesus itok ñan lal, ri kaki ro an kabuñ ilo Israel rar kabwid men ko Jehovah ear kõnan bwe armij ren kõmmani.
Ta eo Jehovah Elukkun Kõnan Bwe Kwon Kõmmane
17. Etke Jehovah ear jab buñburuen kake men in katok kijeek ko an Ri Israel ro rejjab tiljek?
17 Ikijen ri kanan eo Isaiah, Jehovah ear ba: “Emwij Ao kõnan men in katok kijeek sip koman ko, im kioeo jen kiru emwij tãbi; im I jab mõnõnõ kake bõtõktõkin kau koman ko, ak lam ko, ak got koman ko.” (Aiseia 1:10, 11) Etke Anij ear jab buñburuen kake men in katok ko ear make kakien kake ilo Kien eo? (Livitikõs 1:1–4:35) Kinke armij rar jab jerbal ibben ilo kautiej. Kin men in, kar kakabilek ir: “Komin kwol kom, komin karreoik kom; komin jolok nana in kõmõn ko ami jen iman meja; en jokwõr ami kõmõn nana; komin katak in kõmõn emõn; komin kabukot men in jime; komin jibõñ ro dri kamakoko, komin ekajet kin ro ejoko jemeir, komin akwelap kin lio e joko belen.” (Aiseia 1:16, 17) Men in ejjab jibañ kij ñan kile ke ta eo Jehovah ekõnan jen ri karejar ro an?
18. Ta eo Jehovah ear lukkun kõnan bwe Ri Israel ro ren kõmmane?
18 Jesus ear kwalok ta eo Anij elukkun kõnan. Ear kõmman men in ke rar kajitõk ibben kajitõk in, “Ewi kien eo elap ilo kien ko?” Jesus ear uak: “Kwon yokwe [Jehovah] am Anij kin aolepen buruõm im kin aolepen am, im kin am lemnok otemjej. Eñin kien eo elap im mokta. Im eo ken ka ruo einwõt in, Kwon yokwe dri turõm im einwõt kwe. Kien otemjej im dri kanan rej kejil ilo kien kein ruo.” (Matu 22:36-40; Livitikõs 19:18; Duteronomi 6:4-6) Ri kanan eo Moses ear bõkmantak ejja point eo wõt ke ear kajitõk: “Ta eo Jeova am Anij ej kajitõk ibõm, elañe jab bwe kwon mijõk Jeova am Anij, im etal ilo ial ko An, im bwe kwon yokwe E, im korijer ñõn Jeova am Anij, kin aolepen buruõm, im kin aolepen am, bwe kwon bokake kien ko an Jeova, im nan in kaiñi ko An.”—Duteronomi 10:12, 13; 15:7, 8.
19. Ewi wãwen an kar Ri Israel ro kajeoñ in walok einwõt rekwojarjar, ak ta eo Jehovah ear ba ñan ir?
19 Jekdon bwid ko air, Ri Israel ro rar kõnan walok einwõt rekwojarjar. Meñe Kien eo ear aikwij air jitlok ilo Ran in Kilajrõk eo wõt ilo kajjojo yiõ, ear emakijkij air jino jitlok. (Livitikõs 16:30, 31) Ak Jehovah ear kauweik ir, ilo an ba: “E jab eñin jitlok eo I ar kãlete: jelate kworõk in jerawiwi, jelate toõn ine eo, im kõtlok ro emwij kamakokoik ir, im bwe komin ruji ine otemjej ke? E jab bwe kwon ajejlok kijõm iben ro rej kwuli, im bwe kwon ãñintok ñõn mweo imõm ro dri jeramel im rar jolok ir ke? elañe kwoj lo dri kelwan eo, bwe kwon kanuknuk e; im kwon jab tilekek jen kõniekõm ke?”—Aiseia 58:3-7.
20. Kin ta eo Jesus ear kauweik ri kabuñ ro re jelã mon?
20 Ri Israel ro me rar make kowãnik ir ear wõr ejja abañ eo wõt ibben ri kabuñ ri jelã mon ro, ñan ir Jesus ear ba: “Komin owõj kin ken ka joñoul an mint, im anis, im kõmmin, im kom ar jolok men ko relap an kien, ekajet im tiriamo, im tõmak: emõn bwe komin kar kõmõn men kein im jab jolok kõn jet.” (Matu 23:23; Livitikõs 27:30) Nan ko an Jesus rejjab jibañ kij ke ñan kile ta eo Jehovah ekõnan bwe jen kõmmane?
21. Ewi wãwen ri kanan eo Micah ear kwalok ta eo Jehovah ej im ejjab kõnan bwe jen kõmmane?
21 Ñan kalikar ta eo Jehovah ej im ejjab kõnan bwe jen kõmmane, ri kanan eo an Anij Micah ear kajitõk: “Ibben ta eo in jelmae Jehovah? Ibben ta eo in badikdik iman Anij in lañ? In jelmaik e kin men in katok kijeek kin kon in cow ko dettair juõn yiõ ke? Jehovah enaj buñburuen kake thousand sheep koman ko ke, kin ñoul thousand ko in oil rej torlok? In katok kin manjiõ ke kin aõ jumae, leen lojiõ kin jerawiwi ko aõ? Emwij an jiroñ yuk, O armij in lal in, ta ko remõn. Im ta eo Jehovah ekõnan jen yuk ak bwe kwon jerbale ekajet jimwe im ñan yokwe joij im ñan etetal ilo ettã buru ibben Anij?”—Micah 6:6-8, NW.
22. Ta eo Jehovah elap an kar kõnan bwe ro rej bed iumin Kien eo ren kõmmane?
22 Inem, ta eo Jehovah ear kõnan bwe ro rej bed iumin Kien eo ren kõmmane? Emol, rar aikwij yokwe Jehovah Anij. Bareinwõt, ri jilek Paul ear ba: “Bwe aolepen kien e jejit ilo juõn nan, eñin; Kwon yokwe dri turum im einwõt kwe.” (Dri Galetia 5:14) Eindein lok, Paul ear jiroñ Christian ro ilo Rome: “Eo ej yokwe dri turin e ar kajejit kien. . . . Yokwe e men in kajejit kien.”—Dri Rom 13:8-10.
Ejjab Le Jen Joñan
23, 24. (a) Etke en jab le jen joñan men eo Jehovah ej kajitõk bwe jen kõmmane? (b) Ta eo jenaj etale kake ilo katak in tok?
23 Jejjab bwilõñ ke bwe Jehovah ej juõn Anij elap an yokwe, joij, im tiriamokake? Eo ej juõn wõt nejin ear keotak, Jesus Christ, ear itok ñan lal ñan kautiej yokwe eo an Anij—ñan katakin armij bwe ren jelã ewi aorõkiir ñan Jehovah. Ñan kõmman wanjoñok kin yokwe eo an Anij, Jesus ear ba ikijen bao sparrow ko: “Juõn iair e jamin wutlok ion brij im Jememi e jab lale.” Inem ear kajemlok: “Inem komin jab mijõk, elap ami aurõk jen elõñ sparro.” (Matu 10:29-31) Emol, en jab le jen joñan jabdewõt men juõn Anij in yokwe rot in ej kajitõk bwe jen kõmmane!
24 Bõtab, ta eo Jehovah ekõnan bwe jen kõmmane ilo ran kein? Im etke jet rej lemnak bwe ej le jen joñan men eo Anij ekõnan bwe jen kõmmane? Ilo ad etale kajitõk kein, jenaj maroñ lo etke ej juõn jerammõn elap ñan kõmman jabdewõt men Jehovah ej kajitõk jen kij.
Kwo Maroñ ke Uak?
◻ Etke jet rej abwin karejar ñan Jehovah?
◻ Ewi wãwen men in aikwij ko an Jehovah rar einjuõn jen don ilo aolepen yiõ ko?
◻ Kar ewi un ko unin Kien eo?
◻ Etke ejjab le jen joñan men eo Jehovah ej kajitõk bwe jen kõmmane?
[Pija eo ilo peij 18]
Kien ko kõmman in armij, einwõt tibdik in kien karreo ko, rar kõmman bwe en eddo air kabuñ