‘Lomoren Yuk Kab Ro Rej Roñjake Yuk’
“Kwon kejbãrok yuk im men in katakin ko am. . . . Am kõmõn ein drein, kwo naj mõke lomoren yuk, kab ro rej roñjake yuk.”—1 TIMOTE 4:16.
1, 2. Ta eo ej kamakit Christian ro remol ñan air etal wõt ilo jerbal eo air in lomoren mour?
ILO JUÕN bukwon eo ejenolok ian ilo tueañ in Thailand, ruo ri belele Ri Kennan ro an Jehovah rej kajeoñ kajerbal kajin eo ekãl erro ar katak ibben ro uan juõn bwij ej bed ilo tol. Ñan air maroñ jaketo-jaketak news eo emõn kin Ailiñ in Anij ibben ri bukwon eo, ri belele ro ejjabto jen ke rar jino katak kajin Lahu.
2 “Ebin ñan kameleleik lañliñ im juburu eo kim ar bõke, ilo am jerbal ibwiljin armij rein ewõr air itoklimo,” leo ej kamelele. “Kimij lukkun eñjake am kobalok ilo an jejjet kitien Reveles̃õn 14:6, 7, keañ kin jibañ ko rekamõnõnõ ‘ñan ailiñ bwij im konono.’ Ewõr jejjo lain ko rej kejebel ailiñ ko ijoko news eo emõn ejañin kar toloñi, im ijin kar juõn iair. Elõñlok ri katak Bible ro jen am maroñ jerbal ibbeir aolep.” Alikar, ri belele rein rej kejatdikdik ñan lomoren ejjab ir wõt ak bareinwõt ro rej eoroñ ir. Einwõt Christian, jejjab aolep kejatdikdik ke ñan ad kõmmane ejja menin wõt?
“Ekkeini Am Kejbãrok Yuk Make”
3. Bwe jen lomoren ro jet, ta eo jej aikwij kõmmane mokta?
3 Ri jilek Paul ear kakabilek Timothy, “Ekkeini am kejbãrok yuk make im ñan menin katakin ko am,” im menin ej jerbal ñan Christian ro otemjej. (1 Timothy 4:16, New World Translation) Emol, ñan jibañ ro jet bõk lomor, jej aikwij moktata kejbãrok kij make. Ewi wãwen ad maroñ kõmmane menin? Juõn wãwen, jej aikwij bed wõt im ekkõl kin ien ko jej mour ie. Jesus ear kwalok juõn kakõlle im lelok bwe ri kalor ro an ren jelã kin ñããt eo “jemlokin jukjuk im bed in” ear jikrõktok. Ak, Jesus ear bareinwõt ba bwe jejamin jelã jejjet in ien eo ñe jemlokin enaj itok. (Matu 24:3, 36) Ewi wãwen ad aikwij emmakit ñan mol in?
4. (a) Ta lemnak eo jej aikwij bõke kin bwen ien in ebed an jukjuk im bed in? (b) Ta lemnak eo jej aikwij bõprae?
4 Kajjojo iad emaroñ kajitõk, ‘Ij kajerbal ke jabdewõt bwen ien eo ebed ñan jukjuk im bed in ñan lomoren ña make im ro rej eoroñ iõ? Ak ij lemnak ke, “Bwe ke jejjab jelã jejjet in ien eo ñe enaj itok jemlokin, ña make ijamin lemnak kake”?’ Lemnak in tok elik ekauwatata. Ejjab rejetak nan in rejañ eo an Jesus: “Kamol kom make bwe kom bojak, kinke ilo juõn awa eo komij jab lemnak kake bwe ej eñeo, Nejin armij ej itok.” (Matthew 24:44, NW) Emol ejjab ien eo in ñan luji itoklimo eo ad kin jerbal eo an Jehovah ak reilok ñan lal in ñan jokane ak juburu.—Luk 21:34-36.
5. Ta wanjoñok ko Christian ri kennan ro mokta an Jehovah rar likiti?
5 Bar juõn wãwen jemaroñ kwalok bwe jej kejbãrok kij make ej ilo ad kijenmij ilo tiljek einwõt Christian ro. Ro ri karejaran Anij ilo ien ko remotlok rar debij wõt air kijenmij, meñe rar watõk kin kõtlok eo emõkaj ak jab. Elikin an elij wanjoñok ko an Christian ri kennan ro jinoin einwõt Abel, Enoch, Noah, Abraham, im Sarah, Paul ear loe: “Rar jab bõk jejjet in kitien kallimur ko, ak rar lo air ettolok im kar karuwaineneiki tok im keañ kaki ibwiljin armij ro bwe ir kar ruwamaejet im ro rej jokwe ilo eneo iumin jidik ien.” Rar jab lelok ir make ñan jabdewõt kõnan ko kin juõn mour ebidodo, im rar jab lelok ir make ñan ijjibed in mour etton ko ibelakiir, ak rar kijoror ilo air kõnan im reimanlok ñan “jejjet in kitien kallimur ko.”—Hebrews 11:13; 12:1, NW.
6. Ewi wãwen an kar lemnak eo an Christian ro ilo ebeben eo kein kajuõn jelet wãwen air mour?
6 Christian ro ilo ebeben eo kein kajuõn rar bareinwõt lo ir make einwõt “drua maijet” ilo lal in. (1 Piter 2:11) Meñe elikin air bõk lomor ilo jeebeplok eo an Jerusalem ilo 70 C.E., Christian ro remol rar jab bõjrak jen air kwalok nan ak jenlik ñan loan juõn wãwen jerbal in mour. Rar jelã bwe juõn lomor eo elap ear kõttar ro rar bed wõt ilo tiljek. Ilo mol, tok ñan yiõ eo 98 C.E., ri jilek John ear je: “Im lõl e jokolok im mõm ko an: a eo ej kõmõnmõn ankil an Anij ej berwõt in drio.”—1 Jon 2:17, 28.
7. Ewi wãwen an Ri Kennan ro an Jehovah kwalok kijenmij ilo ien kein?
7 Ilo ran kein Ri Kennan ro an Jehovah rar bareinwõt niknik ilo jerbal eo an Christian, meñe rej jelmae elap matõrtõr. Kijenmij eo air ear ejelok ke tokjen? Jab, bwe Jesus ear kamol ñan kij: “A eo e naj kijinmij ñõn jemlokõn, e in e naj mour,” meñe menin ej kamol bwe ej jemlokin jukjuk im bed in emor ak jemlokin mour eo an juõn armij ilo tõre in. Ilo jerkakbiji eo, Jehovah enaj kememej im nawõnãn ri karejar ro an otemjej rar tiljek ro rar mij.—Matu 24:13; Dri Hibru 6:10.
8. Ewi wãwen ad maroñ kwalok bwe jej kamolol kin kijenmij eo an Christian ro ilo ien ko remotlok?
8 Bareinwõt, jej mõnõnõ bwe Christian ro retiljek ilo ien ko remotlok rar jab lemnak wõt kin lomor eo air make. Emol kij eo emwij ar katak kin Ailiñ in Anij ikijen jibadbad ko air jej kamolol bwe rar kijenmij ilo air bõkmanlok jerbal eo an Jesus: “Inem komin ilok, im kõmõn dri ailiñ ko otemjej bwe ren dri kalora, . . . im katakin ir bwe ren bokake nan ko otemjej I ar jiroñ kom.” (Matu 28:19, 20) Toan wõt an ien emõn bed im bellok ñan kij, jemaroñ kalikar kamolol eo ad ikijen ad kwalok nan ñan ro jet ro rejañin roñ kin news eo emõn. Bõtab, kwalok nan ej buñten nee eo jinointata ñan kõmman ri kalor.
‘Kejbãrok Katakin eo Am’
9. Ewi wãwen an juõn lemnak eo emol jibañ kij jino kõmman katak Bible?
9 Jerbal eo ad ekoba ejjab kwalok nan wõt ak bareinwõt katakin. Jesus ear kabbeik kij ñan katakin armij ro bwe ren lale men ko otemjej ear jiroñ kaki. Emol, ilo jet territory ko, jejjo rej einwõt kõnan katak kin Jehovah. Ak an wõr juõn lemnak ewan kin territory eo emaroñ kabañ jibadbad ko ad ñan jino katakin kin Bible. Yvette, juõn pioneer ilo juõn territory eo jet rar naetan ejelok leen, ear lo bwe ri lotok ro ñan jikin eo, ro ear ejelok lemnak wan rot in ibbeir, rar jino katak Bible ilo moko imwiir. Elikin an lio bõk juõn lemnak eo emol, Yvette bareinwõt ear lo armij ro rar kõnan katak Bible.
10. Ta bedbedin jerbal eo ad einwõt ri kaki in Bible?
10 Jet Christian remaroñ jaje ren et ñan air katak Bible ibben ro ewõr air itoklimo kinke rejjab eñjake bwe remaroñ kõmmane juõn katak. Emol, ewõr joñan maroñ eo ad einjuõn jen don. Ak ejjab aikwij lap ad kabel ñan lo tõbrak einwõt ri kaki ro an Nan in Anij. Ennan eo emol ilo Bible elap kajur in, im Jesus ear ba bwe ro einwõt sheep rejelã ainikien Shepherd eo emol ñe rej roñjake. Inem, jerbal eo ad, ej baj ñan lelok wõt ennan eo an Shepherd eo Emõn, Jesus, joñan wõt ad maroñ kalikare.—Jon 10:4, 14.
11. Ewi wãwen an maroñ laplok am wejepedik ilo jibañ juõn ri katak Bible?
11 Ewi wãwen am maroñ lelok ilo an laplok an bolemen ennan eo an Jesus? Ñan jinoe, en wõr am jelã kin ta eo Bible ej ba kake kin unintel eo komij etale. Kwoj aikwij make melele kin unintel eo mokta jen am maroñ katakin kake ñan ro jet. Bareinwõt, kajeoñ debij juõn mejatoto in kautiej ak jimjera ilo ien katak eo. Ri school ro, ekoba ro redik, elaplok an emõn air katak ñe rej jokane ilo air bed im ri kaki eo ej kwalok kautiej im joij ñan ir.—Jabõn Kennan Ko 16:21.
12. Ewi wãwen am maroñ lukkun lale bwe ri katak eo ej melele men eo kwoj katakin e?
12 Einwõt juõn ri kaki, kwoj jab kõnan baj lelok wõt mol ko ñan an ri school eo eliji ikijen an kwalok uak ko ilo an jab lukkun lemnak kaki. Jibañ e ñan melele men eo ej katak. Jelãlokjen eo an ri school eo, jelã eo an kin mour, im iminene eo an kin Bible enaj jelet jelãlokjen eo an kin ta eo kwoj ba. Kin menin, kwo maroñ kajitõkin yuk make, ‘Ej bõk ke aorõkin jeje ko kar eliji ilo menin katak eo?’ Kwo maroñ etale e kin kajitõk ko ejjab maroñ uaki ilo an baj ba wõt aet ak jab ak uak ko rej aikwij juõn kamelele. (Luk 9:18-20) Bareinwõt, jet ri school rej rumij in kajitõkin juõn ri kaki. Kin menin, remaroñ etal wõt ilo air jab lukkun jelã ta eo rej katakin ir kake. Rejañ ri school eo bwe en kajitõk kin kajitõk ko im bwe en jiroñ yuk ñe ejja lukkun melele jet un.—Mark 4:10; 9:32, 33.
13. Ewi wãwen am maroñ jibañ ri katak eo ñan erom juõn ri kaki?
13 Juõn un eo elap tokjen ilo katak Bible ej ñan jibañ ri school eo bwe en erom juõn ri kaki. (Dri Galetia 6:6) Ñan jemlok in, einwõt juõn elij kin katak eo am, kwo maroñ kajitõk ibben bwe en kameleleik juõn point ñan yuk ilo wãwen ko rebidodo, im einwõt ñe ej kameleleik ñan juõn eo ej kab jinoin an roñjake. Tokelik, ñe ej maroñ bõk kunan ilo jerbal in kwalok nan, kwo maroñ kir e ñan an kobawõj ibbam ilo kwalok nan. E naj eñjake an einwõt jokõmman ilo an jerbal ibbam, im wãwen eo enaj jibañe eddeklok ilo liki mae ien ej bojak in etal ilo karõk eo an make ilo kwalok nan.
Jibañ Ri School eo ñan Erom Jeran Jehovah
14. Ta mejenkajjik eo moktata einwõt juõn ri kaki, im ta eo enaj wõr kunan ñan tõbare ilo jerammõn?
14 Mejenkajjik eo moktata an jabdewõt Christian ri kaki ej ñan jibañ ri school eo bõk jimjera eo an Jehovah. Kwo naj kõtõbrak menin ejjab ikijen nan ko am wõt ak bareinwõt ikijen joñok eo am. Katakin ikijen wanjoñok ewõr kajur in an jelet buruen ri school ro. Kõmman ko emaroñ lukkun ellaj air konono jen nan ko, elaptata ñe ej itok ñan ejaake kadkad ko kadkadin mour erro im kijejeto eo ej lujur ri school eo. Elañe ej lo bwe nan ko am im kõmman ko am rej jebar jen juõn kõtan eo emõn ibben Jehovah, emaroñ laplok an emmakit ñan an make kalek juõn kõtan eo einwõt in.
15. (a) Etke eaorõk bwe ri katak eo en ejaake kamakit eo ejimwe ñan karejar ñan Jehovah? (b) Ewi wãwen am maroñ jibañ ri katak eo ñan an etal wõt im kõmman wõnmanlok ilo jitõb?
15 Kwoj kõnan bwe ri school eo en karejar ñan Jehovah ejjab baj kin wõt an jab kõnan jakolok ilo Armageddon ak kinke ej yokwe e. Ilo am jibañ e kalek juõn emmakit eo emõn einwõt in, kwo naj ekkal kin kõbwebweien kijeek ko rejjab bwil me renaj ellã jen melejoñ ko in tõmak eo an. (1 Dri Korint 3:10-15) Juõn emmakit eo ebwid, einwõt juõn kõnan eo etarjen joñan bwe en emõnlok ñan yuk ak jabdewõt armij ro jet, ejamin lelok ñan e kajur eo ñan jumae kareelel ko rejjab mantin Christian ak kajur ñan kõmmane men eo ejimwe. Kememej, kwo jamin an ri kaki ñan indio. Ke ej wõr wõt ien ibbam, kwo maroñ kakajur e ñan an ebaklok wõt Jehovah ikijen an konono Nan in Anij ran otemjej im lemnak kake. Ilo wãwen in enaj etal wõt im bõk “joñok in nan ko rejmour” jen Bible im publication ko rej bedbed-ilo Bible eo elikin an jemlok katak eo etto am katak ibben.—2 Timote 1:13.
16. Ewi wãwen am maroñ katakin ri katak eo ñan an jar jen buruen?
16 Kwo maroñ bareinwõt jibañ ri school eo ñan eddek im ebaklok Jehovah ikijen am katakin e ñan an jar jen buruen. Ewi wãwen am maroñ kõmmane menin? Bõlen kwo maroñ jitõñlok e ñan joñok in jar eo an Jesus, bareinwõt ñan jar ko kin aolepen buru ko emwij jei ilo Bible, einwõt ko ilo Sam Ko. (Sam Ko 17, 86, 143; Matu 6:9, 10) Kobatok ibben menin, ñe ri school eo am ej roñjake am jar ñan kabellok im kil katak eo, enaj wõr an lemnak kin eñjake ko am ñan Jehovah. Kin menin, jar ko am rej aikwij ien otemjej jelet ettã buru im bellok, bareinwõt jokkin wõt juõn eo ilo jitõb im ilo eñjake.
Jerbal ñan Lomoren Ajiri ro Nejim
17. Ewi wãwen an jemen im jinen ajiri ro maroñ jibañ ajiri ro nejiir bed wõt ion ial eo ñan mour indio?
17 Ibwiljin ro jekõnan lomoren ir, bwebõta, rej ro uan family eo ad. Juõn oran eo elap in jemen im jinen ajiri ro remol im “bin ilo tõmak eo.” Ak ro jet, emaroñ jab toktoklok okran mol eo ilo burueir. (1 Peter 5:9, NW; Dri Epesõs 3:17; Dri Kolosse 2:7) Elõñ wõt ian jodikdik rein rej ilok jen wãwen mour in Christian eo ñe rej ebaklok ak bed ilo air reritto. Elañe kwe juõn jemen im jinen ajiri, ta eo kwo maroñ kõmmane bwe tokjen eo en maroñ diklok an eindein? Moktata, kwo maroñ jerbal im ejaake juõn mejatoto in family eo emõn. Juõn mour in family eo emõn ej ejaake bedbed eo ñan juõn lemnak emõn kin maroñ, kamolol kin menin aorõk ko rejimwe, im kõtan eo ekamõnõnõ ibben ro jet. (Dri Hibru 12:9) Kin menin, lukjak eo ebak iloan family eo emaroñ bũdej eo emõn eo jimjera eo an ajiri ro ibben Jehovah emaroñ eddek. (Sam 22:10) Family ko rekajur rej jerbal ibben don einwõt juõn wõt—meñe jemen im jinen ajiri ro rej aikwij karmijeteik ien ko air remaroñ kajerbali ñan tokjen eo air make. Ilo wãwen in kwo maroñ ikijen wanjoñok katakin ajiri ro nejim ñan kõmman bebe ko rejimwe ilo mour. Jemen im jinen ajiri ro, men eo elaptata ajiri ro nejimi rej aikwiji jen kom, ejjab tokjen ko kin mweiuk, ak kwe—ien eo am, kajur, im yokwe. Kwoj lelok ke men kein ñan ajiri ro nejim?
18. Ta kain kajitõk ko jemen im jinen ajiri ro rej aikwij jibañ ajiri ro nejiir ñan lo mejelan?
18 Christian jemen im jinen ajiri ro rej aikwij jab bed ilo lemnak in bwe ajiri ro nejiir renaj make oktak im bareinwõt Christian. Daniel, juõn elder im jemen lalem ro nejin, ej loe: “Jemen im jinen ajiri ro rej aikwij bõk ien ñan jibañ jolok berbere ko ajiri ro nejiir rej bõki ilo school im ijoko jet. Rej aikwij ilo inemõn jibañ ajiri ro nejiir ñan air lo uak ko ñan kajitõk ko einwõt kein: ‘Jej lukkun mour ke ilo ien in jemlokin ien? Lukkun juõn wõt kabuñ eo emol ke? Etke jet ri school ro mõttam ro einwõt remõn ejjab emõn am tel am ibbeir? Aolep ien ebwid ke babu ibben don mokta jen belele?’ ” Jemen im jinen ajiri ro, komij aikwij atartar ion Jehovah ñan kajerammõn jibadbad ko ami, bwe e bareinwõt ewõr an itoklimo ilo emõn eo ñan ajiri ro nejimi.
19. Etke emõntata bwe jemen im jinen ajiri ro ir make ren katak ibben ajiri ro nejiir?
19 Jet jemen im jinen ajiri ro remaroñ bed ilo eñjake in bwe ejabwe ñe ej itok ñan air katak ibben ajiri ro nejiir make. Bõtab, ej aikwij jab eindein eñjake eo ami, bwe ejelok juõn ej bed ilo juõn wãwen eo emõnlok ñan katakin ajiri ro nejim jen kom. (Dri Epesõs 6:4) Katak ibben ajiri ro nejimi make enaj kõtlok am jelã ta eo ilo burueir im lemnak ko air. Men ko rej kwalok ej jen burueir ke ak kinke ej juõn eddo? Rej lukkun tõmak ke men eo rej katak? Jehovah ej juõn men eo elukkun mol ñan ir ke? Kom maroñ lo uak in kajitõk kein im ko jet elap tokjeir elañe komij katak ibben ajiri ro nejimi.—2 Timote 1:5.
20. Ewi wãwen an jemen im jinen ajiri ro kõmman bwe katak eo an family eo en kalañliñ im wõr tokjen?
20 Ewi wãwen am maroñ kejbãrok wõt program in katak eo an family eo elañe emwij am jinoe? Joseph, juõn elder im jemen juõn ladik im ledik, ej ba: “Einwõt aolep Katak ko kin Bible, katak eo an family eo ej aikwij kalañliñ, juõn men eo aolep rej reimanlok ñane. Ñan tõbar menin ilo family eo ad, jejamin kalap ad bin ñan kajejjet ien. Katak eo ad emaroñ juõn awa aetokin, ak meñe jet ien emaroñ joñoul wõt minute, ak jej katak wõt. Juõn men ej kõmman bwe en juõn wãwen eo ej kalikar katak eo ad ilo week eo ñan ajiri ro ej bwe jej jerbal ikijen book eo My Book of Bible Stories.a (Aõ Book in Bwebwenato ko ilo Bible) Mũlalin tokjen eo ej walok jen an alikar im melele kake elaplok tokjen jen jet paragraph ko jej etali.”
21. Ñããt eo jemen im jinen ajiri ro remaroñ katakin ajiri ro nejiir?
21 Bwebõta, katakin ajiri ro nejim ejjab wõr joñan ñan ien katak ko. (Duteronomi 6:5-7) Ri Kennan eo ilo Thailand kar kwalok kake ilo jinoin ej ba: “Ij lukkun kememej wõt wãwen an kin Jema bõk iõ ibben ilo jerbal in kwalok nan, ilo bicycle ko waam, ñan ijoko retolok ilo territory eo an congregation eo am. Emol, kar joñok eo emõn im air katakin kim iumin aolep jabdewõt wãwen ko rar jibañ kim beek ñan am deloñ ilo kwalok nan full-time. Im katak ko rar bed wõt im bolemeir. Ij jerbal wõt ijoko rettolok!”
22. Ta eo enaj walok jen am ‘kejbãrok yuk im men in katakin ko am’?
22 Ejjabto juõn ran, ilo ien eo ejejjet, Jesus enaj itok in jerbale ekajet eo an Anij ion jukjuk im bed in. Inem ien in elap enaj ellãlok ñan loan bwebwenato ijoko otemjelok, ak ri karejar ro retiljek an Jehovah renaj etal wõt im karejar ñan e ilo air kalimjeklok lomor eo ej indio. Kwoj kejatdikdik ke ñan am bed ibwiljiir, koba ibben ajiri ro nejim im ri school in Bible ro? Inem kememej: “Kwon kejbãrok yuk, im men in katakin ko am. Kwon berwõt ilo men kein: bwe ilo am kõmõn ein drein, kwo naj mõke lomoren yuk, im kab ro rej roñjake yuk.”—1 Timote 4:16.
[Kamelele eo itulal]
a Jeje in Watchtower Bible im Tract Society in New York, Inc.
Kwo Maroñ Ke Kamelele?
• Ta eo ej aikwij bwe en lemnak eo ad, ke jejjab jelã jejjet in ien ekajet eo an Anij?
• Ilo wãwen et ko jemaroñ ‘kanuij lale menin katakin ko ad’?
• Ewi wãwen am maroñ jibañ juõn ri katak ñan erom jeran Jehovah?
• Etke eaorõk bwe jemen im jinen ajiri ro ren bõk ien ñan katakin ajiri ro nejiir?
[Pija ilo page 27]
Katak ej laplok tokjen ikijen juõn mejatoto eo ewõr kautiej im jimjera ie
[Pija ilo page 30]
Jerbale bwebwenato ko in Bible, einwõt Solomon ej ekajet ruo kõrã rekijoñ, ej kõmman bwe katak ko an family eo ren kalañliñ