Ta Lemnak eo Am kin Mij?

MIJ ewõr an jitõb in kokkure eo ej jelet kij ke jej kõmmani makitkit ko ad ran otemjej, jekdon ewi joñan ad maroñ ejmour ak mweie. Mij emaroñ buñ iod ilo ien eo tok juõn jej kijone juõn ial ak babu ilo bed. Jorrãn rot in einwõt tarinae ko terrorist rar kõmmani ilo September 11, 2001, ilo New York City im Washington, D.C., rej kõmman menin ad kile bwe “dri kijirãt eo eliktata,” mij, ej bõk mour an armij jen jukjuk im bed otemjej/wãwen economy eo im jen aolep kumi in armij ro, jet ien ej bõk mour an thousand armij ilo jejjo wõt minute.​—1 Dri Korint 15:26.

Meñe mij emaroñ kanuij kalelñoñ, mij ej einwõt kabwilõñ armij. Ejelok jabdewõt men ej kalikar an laplok an armij wia newspaper ko ak an armij ro lale news ko ilo television jen report ko kin mij, elaptata kin oran eo elap oran armij ro rej mij im bed ilo wãwen ko rekalelñoñ. Einwõt armij rejjab mõk kin report ko kin mij, meñe mij jen tarinae, jorrãn ko rej make walok, kõtõrãik kien, ak nañinmij. Lemnak in kin mij elap an kabwokbwok ilo wãwen kalikar ilo kennan kake/eñjake ko rekajur me rej kalikari ilo mij an juõn armij eo elap tokjen im buñbuñ.

Aolepen menin jeban kariape. Armij rej bed wõt ilo air bwilõñ kin mij​—an ro jet mij. Bõtab, ñe rej jelmae mij eo air make, rej bõprae air lemnak kake bwe ren jab mijak ilo air kõttar. Mij eo ad make ej juõn un eo elõñ wõt iad jejjab kõnan kalmenlokjen kake.

Lakabwokbwok kin Mij ke?

Lemnak kin mij eo ad make jejjab kõnan ien otemjej im enaj eindein ien otemjej. Etke ej eindein? Ej kinke Anij ear likit ilo kij kõnan eo ñan mour indio. “E ar likit ien in drio ilo burueir,” Ekklisiastis 3:​11, ej ba. Kin menin, mol eo kin mij, ear ejaake juõn lakabwokbwok ituloa ilo armij, juõn jab errã eo ej wõnmanlok wõt. Ñan jerbal ijelman lakabwokbwok in im ñan lo tõbrak ilo kõnan eo ñan mour manlok wõt, armij rar kine aolep kain tõmak ko, jino jen katak eo kin an armij bwe ejjab mij ñan tõmak eo ilo an eo ear mij bwe ej bar lotak.

Ilo jabdewõt wãwen, mij ej juõn menin kainebata im kalelñoñ, im lelñoñ kin mij ej beddejake ijoko jabdewõt. Kin menin jej aikwij jab ilbõk bwe jukjuk im bed eo an armij ej lo bwe mij ej juõn menin kamijak. Juõn men, ej bwe mij ej kajedmatmat jibadbad eo ejelok tokjen kin juõn mour eo ej wujleplok ñan jibadõk mweie im kajur ion ro jet.

Kamakelok Ian ilo Hospital ñe ej Ebak An Mij ke?

Ilo ien ko remotlok, juõn armij eo ej nañinmij ak lap an kinejnej ekkã air kõtlok bwe en mij ilo belak ko remõn ilo mweo imõn. Eñin wãwen eo ekkã kõmmane ilo ien ko an Bible, im ej mol wõt ilo jet manit. (Jenesis 49:​1, 2, 33) Ilo wãwen kein, family eo ej kobatok ibben don, im ajiri ro rekoba ilo konono eo. Menin ej lelok ñan kajjojo uan family eo eñjake eo bwe leo ak lio en jab make buromõj im ej lelok kainemõn im bõk kunan ilo eddo im bõk kunan ilo liãjlol.

Menin ej juõn einjuõn eo elap ñe keidi ibben ta eo ej walok ilo juõn jukjuk im bed eo emo konono kin mij ie, kin eñjake ko rejjab emõn kin buromõj, im ajiri ro rejjab kobaik ir kinke enaj lap an eddo ñan ir. Mij ilo ran kein eoktak ilo elõñ wãwen ko, im ekkã an laplok an juõn make ian. Meñe elõñ renaj kõnan mij ilo moko imwiir, kin ainemõn im yokwe in kejbãrok eo an family eo, ñan elõñ men eo ebin ñan ir ej bwe rej mij ilo juõn hospital, im ekkã air makelok iair ilo eñtan, im likit ibbeir menin kamadmõd ko rekamijak. Ilo wãwen eo juõn, million rej mij ilo air jab jelã wõn ir​—armij ro rej mõn ir einwõt jar in armij, mij kin ñitta, nañinmij in AIDS, tarinae ikõtan armij in juõn ailiñ ñan don, ak baj kin wõt an lap jeramel.

Juõn Un ñan Etale

Bible ejjab kabwer kin kalmenlokjen kin mij. Ilo mol, Ekklisiastis 7:2 ej jiroñ kij: “Ilok ñõn iomin ro rej jõñ, emõn jen ilok ñõn imõn kwojkwoj: bwe eñeo jemlokõn armij otemjej.” Ñe jej jelmae mol eo kin mij, jemaroñ oktaklok jen wãwen ko jej lemnak kaki ak makitkit ko ad im lemnak kin an kadu ien mour. Menin emaroñ jibañ kij ñan mour ilo juõn wãwen eo elaplok tokjen jen ad baj mour wõt ilo mour eo ejelok men eo ej jitõñlok ñane ak ejelok ialin tel ak mour ilo juõn mour eo ejelok kobban/ejelok unin.

Ta lemnak eo am kin mij? Emwij ke am etale eñjake ko am, tõmak ko, kejatdikdik ko, im mijak ko kin jemlokin mour eo am?

Einwõt kin wãwen mour, wãwen mij men kein jimor rej ellãlok jen maroñ eo an armij ñan kamelele im jelã kake. Eo wõt ewõr an maroñ ilo menin ej Ri Kõmanman eo ad. Ibben ej “unin dren in mour,” im ñan e ej an “ial ko jen mij.” (Sam 36:9; 68:20) Meñe einwõt emenin ilbõk, juõn etale eo kin jet tõmak ko rebuñbuñ kin mij ilo etale Nan in Anij enaj kamol an kainemõn im kakajur jimor. Enaj kalikar bwe mij ejjab aikwij jemlokin men otemjej.

[Kareelel ilo page 4]

Maroñ eo kin mij ej jibañ kij mour ñan mour ko ad ilo juõn wãwen eo elaplok melelen