Jen Anõke Jeova ilo An Tiljek im Jeorl̦o̦k Bõd

1, 2. (1) Etke jej kaorõk ro m̦õttad me retiljek im rej jol̦o̦k bõd? (2) Ta kajjitõk ko jenaaj etali ilo katak in?

KAIN armej rot eo me em̦ool an m̦õttaik kõj? Juon jeid im jatid kõrã etan Ashley ear ba bwe juon eo me em̦ool an m̦õttaik kõj ej pojak in jipañ kõj aolep iien im ej jol̦o̦k ad bõd ñe jej kõm̦m̦an bõd. Kõj aolep jej kaorõk ro m̦õttad me rej ãinwõt armej rot in. Rej jipañ kõj ñan kile bwe jej aorõk im ewõr tokjed.​—Jabõn Kõnnaan 17:17.

² Jeova ej eo M̦õttad me el̦aptata an tiljek im el̦ap jeorl̦o̦k bõd ippãn. Ejim̦we an kar ri jeje sam ba kõn E: “O Irooj [Jeova], kwõ jouj im kwõj jeorl̦o̦k jerawiwi; Kwõ obrak kõn jouj im yokwe eo am̦ el̦ap ñan ro otemjej rej jar ñan eok.” (Sam 86:5, UBS) Ewi wãween an juon armej kwal̦o̦k bwe etiljek im ej jol̦o̦k bõd? Ilo wãween et Jeova ej kwal̦o̦k bwe etiljek im ej jol̦o̦k bõd? Ta eo jemaroñ kõm̦m̦ane bwe jen kajjioñe e? Ilo ad naaj katak im lo uwaakin kajjitõk kein, men in enaaj kal̦apl̦o̦k ad yokwe Jeova, Eo im ej make wõt m̦ool an m̦õttaik kõj. Bareinwõt, men in enaaj kõm̦m̦an bwe jen maroñ epaakel̦o̦k wõt ro jeid im jatid ilo eklejia eo.​—1 Jon 4:7, 8.

JEOVA ETILJEK

3. Elemen am̦ naaj kar kwal̦o̦k kõn juon armej me etiljek?

³ Juon armej me etiljek ejjab el̦l̦o̦k jãn ro ej yokwe er. Ej kwal̦o̦k an yokwe er ilo an wõnm̦aanl̦o̦k wõt im jipañ im rejetake er. Ejjab baj kõm̦m̦ane wõt men in ilo iien ko rem̦m̦an ak ej bar ãindein ilo iien ko rapañ im repen. Baibõl̦ ej ba bwe Jeova ej juon “Anij in tiljek.” Innem, ejjel̦o̦k bar juon el̦apl̦o̦k an tiljek im ãinwõt E.​—Duteronomi 32:4.

4, 5. (1) Ilo wãween et Jeova ej kwal̦o̦k an tiljek? (2) Etke el̦ap an kakajoor kõj ñe jej l̦õmn̦ak kõn an Jeova tiljek wõt im jab ilo̦k jãn ri karejar ro an?

⁴ Ilo wãween et Jeova ej kwal̦o̦k an tiljek? Ej kõm̦m̦ane men in ilo an jipañ ri karejar ro an retiljek jabdewõt iien rej aikuj jipañ. Kiiñ Devid ej juon iaan ri karejar rein, im ear kam̦m̦oolol Jeova kõn an kar tiljek im jab ilo̦k jãn e. (Riit 2 Samuel 22:26, UBS.) Ke Devid ear iioon mãlejjoñ ko rel̦l̦ap, Jeova ear tõl e im kõjparok e, im bareinwõt lo̦mo̦o̦ren e. (2 Samuel 22:1) Devid ear make kile jãn wãween ko ear iiooni ilo mour eo an bwe Jeova etiljek. Jeova ejjab kwal̦o̦k an tiljek ilo naan wõt ak ilo an bar jipañ ri karejar ro an. Etke Jeova ear tiljek im jab ilo̦k jãn Devid? Kõnke Devid ear tiljek wõt ñan e. El̦ap an Jeova yokwe ri karejar ro an ñe rej tiljek ñan e. Kõn men in, Jeova ej tiljek ñan ro rej tiljek ñan e.​—Jabõn Kõnnaan 2:6-8.

⁵ Ñe jej l̦õmn̦ak kõn an Jeova tiljek wõt im jab ilo̦k jãn ri karejar ro an, men in ej lukkuun kakajoor kõj. Juon jeid im jatid em̦m̦aan im etiljek etan Reed, ear ba bwe eitoklimoen ñe ej riiti bwebwenatoun Devid im wãween an kar Jeova jipañe ilo iien ko reppen. Reed ear ba: “Ke Devid ear ko to ko tak im tilekek ilo roñ in tol̦ ko, Jeova ear lale im kõjparoke. Men in el̦ap an kakajoor eõ! Ej kakeememej eõ bwe jekdo̦o̦n ta apañ eo inaaj jelm̦aiki, im jekdo̦o̦n ewi joñan an nana, ak Jeova enaaj jipañ eõ toon wõt aõ naaj tiljek ñan e.” Ejjel̦o̦k pere bwe kwõj bar errã ilo naan kein an Reed.​—Rom 8:38, 39.

6. (1) Bar ta wãween ko jet im Jeova ej kwal̦o̦k an tiljek? (2) Etke men in ej jipañ ri karejar ro an?

⁶ Bar ta wãween ko jet im Jeova ej kwal̦o̦k an tiljek? Juon wãween ej ilo an l̦oore wõt kien ko an aolep iien. (Aiseia 46:4) Aolep pepe ko ej kõm̦m̦ani rej pedped wõt ioon kien ko an, im kien ko an rejjab oktak. (Malakai 3:6) Bar juon wãween Jeova ej kwal̦o̦k an tiljek ej bwe iien otemjej ej kajejjet kallim̦ur ko an. (Aiseia 55:11) Kõn an Jeova juon Anij etiljek, men in ej jipañ aolep ri karejar ro an. Etke jejaam̦ ba men in? Kõnke Jeova ear kallim̦ur bwe enaaj kajeraam̦m̦an ro rej tiljek ñan e. Innem, el̦aññe jej kate kõj ñan pokake kien ko an, jejel̦ã bwe enaaj kajejjet kallim̦ur in an im kajeraam̦m̦an kõj.​—Aiseia 48:17, 18.

JEN TILJEK ÃINWÕT JEOVA

7. Ta eo kwõmaroñ kõm̦m̦ane ñan kwal̦o̦k bwe kwõj tiljek ãinwõt Jeova?

⁷ Ta eo jemaroñ kõm̦m̦ane ñan kwal̦o̦k bwe jej tiljek ãinwõt Jeova? M̦oktata, jemaroñ kõm̦m̦ane juon men em̦m̦an ñan jipañ ro rej iioone apañ ko reppen. (Jabõn Kõnnaan 3:27, UBS) Ñan waanjoñak, ewõr ke juon ilo eklejia eo im kwõjel̦ã ke ebũrom̦õj im ebbeer, bõlen kõn an nañinmej, ak iioon jum̦ae jãn baam̦le eo an, ak kõn juon bõd ear kõm̦m̦ane? Eokwe, kwõmaroñ rõjañe im kakajoore ilo am̦ kwal̦o̦k ñan e ‘naan ko rem̦m̦an im rej naan in kaenõm̦m̦an.’ (Zekaraia 1:13)a (Lale kõmel̦el̦e eo itulal̦.) Ñe kwõj kõm̦m̦ane men in, kwõj kwal̦o̦k bwe kwõj tiljek ñan e im m̦ool in jeran. Kwõj ãinwõt armej eo me Baibõl̦ ej ba bwe ej ‘juon jeran ej eddãp wõt jãn juon jein im jatin.’​—Jabõn Kõnnaan 18:24.

8. Elemen ad kwal̦o̦k bwe jej tiljek wõt ñan eo pãleed im bar ñan ro jet?

⁸ Elõñ bar wãween ko jet im jemaroñ kwal̦o̦k ad tiljek ñan ro jej yokwe im epaake er. Ñan waanjoñak, el̦aññe em̦õj ad m̦are, jejel̦ã bwe jej aikuj in tiljek wõt ñan eo pãleed. (Jabõn Kõnnaan 5:15-18, UBS) Jenaaj kõjparok kõj jãn jabdewõt men ko im renaaj tõll̦o̦k kõj ñan lejãn ak ellolo jãn eo pãleed. (Matu 5:28) Bareinwõt, jej kwal̦o̦k bwe jej tiljek ñan ro jeid im jatid ilo ad jab kananaik er ak ba men ko reriab kõn er. Im ñe ro jet rej ruruwe er jeban roñjake bwebwenato ko aer.​—Jabõn Kõnnaan 12:18, UBS.

9, 10. (1) Wõn eo el̦aptata ad aikuj tiljek ñan e? (2) Etke jet iien emaroñ pen ñan pokake Jeova? Kwal̦o̦k waanjoñak eo.

⁹ Eo im el̦aptata ad aikuj tiljek ñan e ej Jeova. Ta ko jemaroñ kõm̦m̦ani ñan kwal̦o̦k bwe jej tiljek ñan e? Ej ilo ad yokwe men ko Jeova ej yokwi im dike men ko ej diki. Im bareinwõt jej aikuj mour ilo wãween eo im ej kabuñbũruon Jeova. (Riit Amos 5:15, UBS.) El̦aññe jej kate kõj aolep iien bwe l̦õmn̦ak im kõm̦m̦an ko ad ren ekkar ñan l̦õmn̦ak ko an Jeova, enaaj pidodol̦o̦k ad pokake e.​—Sam 119:104, 112.

¹⁰ Jejel̦ã bwe jet iien emaroñ pen ñan ad pokake Jeova. Jemaroñ aikuj lukkuun kate kõj bwe jen tiljek wõt ñan e. Ñan waanjoñak, juon jeid im jatid jiroñ me ejjañin pãlele emaroñ kõn̦aan m̦are. Bõtab, unin an jañin m̦are ej kõnke ejjañin loe juon likao ilo eklejia eo im enaaj em̦m̦an an kõjparoke. (1 Korint 7:39) Armej ro ilo jikin jerbal remaroñ kajjioñ kapoiki im kappok l̦o̦k jeran. Im bõlen ilo iien in, emaroñ bũrom̦õj bwe emake iaan. Bõtab, em̦õj kadede an jek ilo bũruon bwe eban jerãik juon eo ejjab karejar ñan Anij ak m̦areiki armej rot in. Etke? Kõnke ekõn̦aan dãpij wõt an tiljek ñan Jeova. Kũrjin ro im rej ãinwõt jiroñ in rej joñak ko rem̦m̦an kõn aer tiljek wõt ñan Jeova. Jeova enaaj kajeraam̦m̦an aolep ro im rej tiljek ilo aer karejar ñan e ium̦win mãlejjoñ ko.​—Hibru 11:6.

JEOVA EJ JOL̦O̦K BÕD

11. Kain armej rot eo im el̦ap jol̦o̦k bõd ippãn?

¹¹ Kain armej rot eo im el̦ap jol̦o̦k bõd ippãn? Armej eo im ej jol̦o̦k bõd ejjab dãpij wõt an illu ippãn ro im rar kõm̦m̦ane juon men enana ñan e. Ejjab mel̦el̦ein men in bwe em̦m̦an wõt ippãn men eo enana ro jet rar kõm̦m̦ane im ej kõjekdo̦o̦ne men in. Ak ta mel̦el̦ein men in? Ej mel̦el̦ein bwe ej peek ñan jab dãpij wõt an illu n̦ae armej eo. Juon iaan men ko im rekanooj em̦m̦an kõn Jeova ej bwe el̦ap an jol̦o̦k bõd. Baibõl̦ ej ba bwe ej “jeorl̦o̦k jerawiwi” an ro rej m̦ool in ukel̦o̦k.​—Sam 86:5, UBS.

12. (1) Ewi joñan an Jeova jol̦o̦k bõd? (2) Ta mel̦el̦ein naan ko an Piter ke ear ba bwe Anij enaaj jeorl̦o̦k jerawiwi ko an juon armej?

¹² Ewi joñan an Jeova jol̦o̦k bõd? Baibõl̦ ej ba bwe Jeova ej “kanooj wũjlep in jol̦o̦k bõd ko.” Mel̦el̦ein men in bwe ñe Jeova ej jol̦o̦k bõd ej lukkuun m̦ool in jol̦o̦ke bõd eo im eban bar keememeje ak bõkm̦aantak. (Aiseia 55:7) Etke jejel̦ã bwe ñe Jeova ej jol̦o̦k an ro jet bõd ej lukkuun m̦ool in jol̦o̦ke bõd eo aer? Eokwe, l̦õmn̦ak kõn men eo ej kallim̦ur kake ilo Jerbal 3:19, UBS. (Riit.) Rijjelõk Piter ear ba bwe el̦aññe juon ri jerawiwi ej m̦ool in ukel̦o̦k ej kwal̦o̦k an bũrom̦õj kõn men eo enana ear kõm̦m̦ane. Ta eo armej in ej aikuj kõm̦m̦ane bwe Jeova en jol̦o̦k an bõd? Piter ear ba bwe armej in ej aikuj “ukel̦o̦k” im “oktak.” Juon eo im em̦ool an ukel̦o̦k ej pepe ilo bũruon bwe eban bar kõm̦m̦ani men ko renana. (Matu 3:8, UBS) Innem, ej oktak ak bõjrak jãn an kõm̦m̦ane men kein im ej kate joñan wõt an maroñ ñan kabuñbũruon Anij. El̦aññe ej kõm̦m̦ani men kein, innem Anij enaaj “jeorl̦o̦k jerawiwi” ko an. Ñe jej jeorel̦o̦k juon men jej iri ak jeore bwe en jako. Kõn men in, ñe Jeova ej jol̦o̦k bõd ko an ro jet, ej ãinwõt ñe ej iril̦o̦k ak jeoril̦o̦k bwe ren jako. Eñin wãween eo Jeova ej m̦ool in jol̦o̦k bõd.​—Hibru 10:22, UBS; 1 Jon 1:7.

13. Ta mel̦el̦ein an Jeova ba “iban bar keememej jerawiwi ko aer”? Im ta eo naan kein rej katakin kõj kõn Jeova?

¹³ Ak etke jejel̦ã bwe ñe Jeova ej jol̦o̦k an ro jet bõd eban bar keememeje ak bõkm̦aantak bõd eo aer? Jemaroñ jel̦ã kõn joñan an Jeova jol̦o̦k bõd jãn naan ko an ñan Jeremaia. Ear kwal̦o̦k juon kanaan ñan Jeremaia kõn ri kapit ro. (Riit Jeremaia 31:34.) Jeova ear ba: “Iar jol̦o̦k nana ko aer, im Iban bar keememej jerawiwi ko aer.” Innem, ñe em̦õj an Jeova jol̦o̦k ad bõd, ejako an l̦õmn̦ak kake. Ejjab dãpiji wõt bõd ko ilo bũruon m̦ae juon iien me emaroñ bõkm̦aantak im n̦aruod kaki. Jeova ej jol̦o̦k bõd ko ad im eban bar keememeji im bũkm̦aantak.​—Rom 4:7, 8, UBS.

14. Etke ñe jej kõl̦mãnl̦o̦kjen̦ kõn joñan an Jeova jol̦o̦k bõd, men in enaaj lukkuun kaenõm̦m̦an bũruod? Kwal̦o̦k bwebwenato eo.

¹⁴ El̦aññe jej kõl̦mãnl̦o̦kjen̦ kõn joñan an Jeova jol̦o̦k bõd, men in enaaj lukkuun kaenõm̦m̦an bũruod. Jen lale juon bwebwenato an juon jeid im jatid kõrã me jen ba bwe etan in Eline. Ium̦win elõñ iiõ ear bukwel̦o̦k. Ak tokãlik ear bar jepl̦aaktok ñan m̦ool eo. Meñe em̦õj an bar jepl̦aak, ak Eline ej ba bwe ear jab lukkuun tõmak bwe em̦õj an Jeova jol̦o̦k an bõd. Ear l̦õmn̦ak bwe el̦apl̦o̦k an kar Jeova yokwe ro jet jãn e. Ak ke Eline ear kõl̦mãnl̦o̦kjen̦ kõn wãween an Baibõl̦ kwal̦o̦k joñan an l̦ap an Jeova jol̦o̦k bõd, men in ear kaenõm̦m̦an bũruon. Ñan waanjoñak, ke ear riiti Baibõl̦ ear kile bwe ñe Jeova ej jol̦o̦k bõd ej ãinwõt ñe ej kwal̦ kõj jãn jerawiwi ko ad bwe jen erreo. Innem, ejjab aikuj nana ad mour kõn bõd ko jaar kõm̦m̦ani ilo aolepen mour ko ad.b (Lale kõmel̦el̦e eo itulal̦.) Eline ej ba: “Iar kile bwe iar jab tõmak bwe Jeova emaroñ lukkuun jol̦o̦ke bõd eo aõ. Im iar l̦õmn̦ak bwe inaaj ineeke wõt ippa toõn wõt aõ mour. Ijel̦ã bwe enaaj bõk iien ñan jol̦o̦k eñjake kein rejjab jim̦we. Bõtab, kiiõ ij kile bwe imaroñ lukkuun epaake Jeova im ejakol̦o̦k aõ eddodo kõn bõd eo iar kõm̦m̦ane.” M̦ool bwe Jeova ej juon Anij el̦ap an yokwe im jol̦o̦k bõd!​—Sam 103:9, UBS.

JEN JOL̦O̦K BÕD ÃINWÕT JEOVA

15. Ilo wãween et eo jemaroñ anõke Jeova im jol̦o̦k an ro jet bõd?

¹⁵ Jemaroñ anõke Jeova ikijjeen ad pepe in jol̦o̦k an ro jet bõd kõn men ko renana rar kõm̦m̦ani ñan kõj. (Riit Luk 17:3, 4.) Keememej bwe ñe Jeova ej jol̦o̦k ad bõd, ejjab wõnm̦aanl̦o̦k wõt im l̦õmn̦ak kõn men ko jaar kõm̦m̦ani. Kõn men in, ñe jej jol̦o̦k an ro jet bõd, kõj bareinwõt jemaroñ bõjrak jãn ad l̦õmn̦ak kõn men ko renana rein rar kõm̦m̦ani ñan kõj im jab bar bõklõñtak men kein.

16. (1) Ñe jej jol̦o̦k an ro jet bõd ta mel̦el̦ein men in? (2) Bwe Anij en jol̦o̦k ad bõd, ta eo jej aikuj kõm̦m̦ane?

¹⁶ Ñe jej jol̦o̦k an ro jet bõd, mel̦el̦ein ke bwe em̦m̦an wõt ippãd men eo rar kõm̦m̦ane ñan kõj ak bwe jen kõtl̦o̦k aer kõm̦m̦ani men ko renana tok ñan kõj? Ejjab. Ej mel̦el̦ein bwe jej pepe ñan jab dãpij wõt ad illu ippãer. Im elukkuun aorõk bwe jen keememej bwe el̦aññe jekõn̦aan bwe Jeova en jol̦o̦k ad bõd, jej aikuj jol̦o̦k an ro jet bõd. (Matu 6:14, 15) Jeova ej keememej bwe kõj “bũñalñal” wõt. Kõn men in, ejel̦ã bwe kõj armej jejjab weeppãn. (Sam 103:14, UBS) Innem, ñe ro jet rej ba ak kõm̦m̦ani men ko renana ñan kõj, jej aikuj keememej bwe rejjab weeppãn ãinwõt kõj. Im jej aikuj m̦ool in jol̦o̦k aer bõd.​—Epesõs 4:32, UBS.

17. Ta eo emaroñ jipañ eok ñan jol̦o̦k bõd eo an armej eo im ear kõmetak eok?

¹⁷ Jejel̦ã bwe ejjab aolep iien epidodo ñan jol̦o̦k an ro jet bõd. Men in ear bar pen ippãn jet iaan ri kapit ro ilo raan ko an Paul. Ear wal̦o̦k apañ ko ikõtaaer im rar aikuj kõm̦adm̦õdi. (Pilippai 4:2, UBS) El̦aññe ewõr juon jeid im jatid em̦m̦aan ak kõrã ilo eklejia eo im ear kõmetak ak kallu eok, ta eo emaroñ jipañ eok ñan jol̦o̦k aer bõd? Kwõmaroñ anõke joñak eo an Job. L̦õm̦aro jilu Elipaz, Bildad, im Zopar ren kar kaenõm̦m̦ane Job kõnke ej m̦õttaer. Jãn aer ãindein, rar kananaiki im n̦aruon im ba bwe ear kõm̦m̦ani men ko renana. Men in ear lukkuun kõmetak bũruon Job. (Job 10:1, UBS; 19:2) Tokãlik, Jeova ear jiroñl̦o̦k l̦õm̦arein jilu bwe ebõd men eo rar kõm̦m̦ane im rej aikuj etal ñan ippãn Job im katok kõn jerawiwi ko aer. (Job 42:7-9) Bõtab, ewõr juon men Jeova ear ba ñan Job bwe en kõm̦m̦ane. Ta eo ear ba? Ear ba bwe Job en jar kõn l̦õm̦arein jilu. Job ear kõm̦m̦ane men in, im Jeova ear kajeraam̦m̦ane kõn an kar jol̦o̦k an rein bõd. (Riit Job 42:10, 12, 16, 17.) Ta eo kwõmaroñ katak jãn men in? Ej bwe ñe kwõj jar kõn armej eo im ear kõmetak im kallu eok, men in emaroñ jipañ eok bwe en jako am̦ illu ippãn armej in.

KAL̦APL̦O̦K WÕT AM̦ KATAK KÕN JEOVA IM ANÕKE

18, 19. Ta eo jen wõnm̦aanl̦o̦k wõt im kõm̦m̦ane?

¹⁸ El̦ap ad m̦õn̦õn̦õ ke jaar kal̦apl̦o̦k ad katak kõn Jeova im wãween ko jet rem̦m̦an kõn e. Jaar katak bwe ej juon eo im epidodo kepaake, ejjel̦o̦k kalijekl̦o̦k ippãn, ejouj, ej juon ri mel̦el̦e, etiljek, im ej jol̦o̦k bõd. Ebar lõñ men ko jet jemaroñ katak kaki kõn kain Anij rot Jeova. Jelukkuun jeraam̦m̦an bwe jenaaj wõnm̦aanl̦o̦k wõt im katak kõn Jeova ñan indeeo. (Ekklisiastis 3:11) Jej errã ilo naan ko an rijjelõk Paul ke ear ba: “El̦ap wõt an Anij m̦weiie! Em̦wilal̦ wõt an mãlõtlõt im jel̦ãl̦o̦kjen̦!” Jemaroñ ba ejja men in wõt kõn yokwe eo an Anij im wãween ko jiljino kõn e me jaar etale ilo katak in im ilo katak ko ruo m̦oktal̦o̦k.​—Rom 11:33, UBS.

¹⁹ Jen wõnm̦aanl̦o̦k im kal̦apl̦o̦k wõt ad katak kõn Jeova im wãween ko rem̦m̦an kõn e. Jen kõl̦mãnl̦o̦kjen̦ kõn men kein, im bar kajjioñe Jeova ilo mour ko ad. (Epesõs 5:1) El̦aññe jej kõm̦m̦ane men in, enaaj l̦apl̦o̦k ad yokwe Jeova, im jej kab baj naaj epaakel̦o̦k wõt e. Bareinwõt, enaaj l̦apl̦o̦k ad errã ippãn ri jeje sam ke ear al: “Em̦m̦an ippa bwe in kepaak waj ñan Anij.”​—Sam 73:28.