Kajerbal Tract ko ñan Ijjino Bwebwenato ko
1 Kwojjab errã ke bwe ñan an keie am kwalok nan elap an wawa ion am ijjino bwebwenato ko? Aitwerõk eo ej ñan ba juõn men eo me enaj kaitoklimoen armij eo im bwe en bõk kunan. Ewi wãwen emaroñ bolemen ad kõmmane men in?
2 Elõñ ri kwalok ro rar lo bwe kin jejjo nan ko remõn, ñe rej lelok juõn ian tract ko ad rej wawa ion Bible eo emaroñ ijjino bwebwenato ko. Unin tel ko rej kaitoktoklimo, im pija ko raibujuij im kõmejmej. Juõn tract ejjab iabuñ armij, im kõmman bwe armij eo en lemnak bwe elõñ kamelele ko ej aikwij readi. Ak, ennan ko rejejjet ilo tract ko rekaitoktoklimo im jemaroñ kajerbali ñan jino juõn Bible study.
3 Juõn Ri Kennan ear eñjake ilo wãwen in: “Ilo lal in eboub, ekkã an armij jab kõnan bõk ien ñan read, ak juõn tract ej bwe an aetok ñan kwalok kin juõn ennan eaorõk ak ejjab lap an aetok ñan kabwer juõn armij jen an readi. Elõñ tract ko iar readi, im eliktata iar katak mol eo.” Jab bere kajur in Nan in Anij einwõt kar kamelele kake ilo ennan kein rekadu.—Hib. 4:12.
4 Buñten Nee ko Emen Rebidodo: Elõñ rar lo tõbrak ilo air kajerbal juõn wãwen kebak armij elamwan. (1) Kwalok jet tract ko ñan juõn armij im kajitõk ibben ta eo ej kaitoklimoen. (2) Elikin an armij eo kãlet juõn, bõkmantak juõn kajitõk ebolemen kar keboje me ej kwalok kin juõn point elap ilo tract eo. (3) Ñan uake kajitõk eo, read juõn paragraph ak eon ekkar jen tract eo. (4) Elañe ej emõn an uak, wõnmanlok im bwebwenato kin kobban tract eo ak jitõñlok ñan juõn katak ilo Jen Kõmmõne brochure eo ak juõn katak ilo Knowledge book eo me ej letok ennan ko jet. Ilo wãwen in kwomaroñ mõkaj im jino juõn Bible study. Nan in rejañ kein tok renaj jibañ yuk ñan kebojak kin ta eo kwomaroñ ba ñe kwoj kajerbal emen ian tract ko ad.
5 Kwomaroñ bõkmantak unin tel in tract eo “Wõn eo Elukkun Iroij ion Lõl?” einwõt juõn kajitõk.
◼ Elañe armij eo kwoj konono ibben ej uak “Anij” ak I jaje,” read sentence ko ruo ilo jinoin peij 2 im paragraph eo mokta ilo peij 3. Kalikar 1 Jon 5:19 im Reveles̃õn 12:9. Meñe armij eo ej tõmak ilo Satan Devil eo ak jab ak ej kamole kilan ilo lal in, kwomaroñ kõmmanwa ibben kin ennan ko iumin unin tel eo edik “Juõn Men in Kamol Jen Wãwen Ko an Lõl” ñan kowõnmanlok bwebwenato eo am. Elañe ej kwalok an itoklimo, ba bwe kwoj mõnõnõ in kameleleik e kin ia eo Devil eo ear itok jen ie, im kajerbal point ko jen peij 3 im 4 ilo tract eo.
6 Tract eo “Ta Kejatrikrik eo kin Ro Rejitenburu Rej Mij?” emaroñ mõkaj an kaitoklimoen armij. Kwomaroñ ijjino juõn bwebwenato ilo am ba:
◼ “Kwoj lemnak ke bwe jenaj bar lo ro rejitenburu ibbed im rej mij?” Elikin armij eo ej uak, jitõñlok ñan paragraph eo kein karuo ilo peij 4 ilo tract eo im readi Jon 5:28, 29. Inem kameleleik e bwe enaj juõn men in jibañ ñan melele kin kamelele eo iumin unin tel eo edik mokta ilo tract eo. Ba bwe kwoj mõnõnõ in bwebwenato ibben kake.
7 Tract eo “Mõnõnõ kin Mour in Family” ej kaitoklimoen family ko otemjej. Ilo am kajerbale, kwomaroñ ba:
◼ “Bõlen kwoj errã bwe family ko rej bed iumin ijjibed ko. Ta eo kwoj lemnak jemaroñ kõmmane ñan kakajurlok lukluk in family ko?” Elikin ej uak, jitõñlok e ñan point ko ilo paragraph eo mokta ilo peij 6. Kãlet juõn ian eon ko ilo peij 4 im 5 ilo tract eo, im kameleleik e kin ta melelen. Inem tilmaake juõn katak kin Bible ilo ejelok wõnãn.
8 Bõlen kwomaroñ kajerbal tract eo “Etke Kwomaroñ Liki Bible eo” ibben ennan in:
◼ “Enañin aolep armij rar roñ kin bwebwenato eo kin Cain im Abel, eo jemaroñ loe ilo book eo moktata ilo Bible. Bwebwenato eo ilo Jenesis ej bareinwõt konono kin lio belen Cain. Kwo nañin lemnak ke ear itok jen ia?” Kajerbal paragraph eo eliktata ilo peij 2 ilo tract eo ñan kwalok uak eo. Kameleleik e bwe tract eo ej bareinwõt konono kin kamelele ko raorõk ilo Bible kin ta eo enaj walok ilo ilju im jeklaj eo ad. Jinoe ilo paragraph eo kein kajilu ilo peij 5, wõnmanlok ilo bwebwenato eo, im kajerbal eon ko ñan rejetake.
9 Jaketo-jaketak tract in Bible ko ej juõn wãwen emwij kamole im ekeie ñan kwalok kin news eo emõn. Kinke ebidodo ñan am bõki ibbam, kwomaroñ kajerbali ilo keie ilo jerbal eo jen em-ñan-em im ñe kwoj kwalok nan ilo jabdewõt ien emõn tok. Tract ko rej kõmman juõn jerbal eaorõk ñan kajejjet jerbal in kwalok nan eo ad. Kwon bõk ibbam kajju kain tract ko, im kwon anemkwoj in kajerbali ñan ijjino bwebwenato ko.—Kol. 4:17.