Kõmman Bible Study ko Rej Wõnmanlok Part 10
Kamineneik Ri Katak Ro ñan Kwalok Nan Jen Em-ñan-Em
1 Ñe elder ro rej bebe bwe juõn ri katak Bible ej tellokin an erom juõn ri kwalok nan ejañin baptais, emaroñ jino an bõk kunan ilo jerbal in ilobwilij ibben congregation eo. (Lale Organized to Do Jehovah’s Will [Burukuk ñan Kõmanman Ankil an Jehovah], pp. 79-81.) Ewi wãwen jemaroñ jibañ ri katak eo ñan tõbar mejenkajjik eo ñan kwalok nan jen em ñan em?
2 Kebojak Ibben Don: Kebojak ej juõn men eaorõk ñan kõmmane. Kwalok ñan ri katak eo ia eo emaroñ lo ennan ko rej rejañ kaki ilo Ad Jerbal Ñan Ailiñ Eo im book in Reasoning (Kõmmanwa), im jibañ e ñan kãlet juõn ennan elamwan im ekeie ñan territory eo ilo bukwon eo. Jen jinoin, rejañ e ñan kajerbal Bible eo ilo jerbal in kwalok nan.—2 Tim. 4:2.
3 Ien kamelmel elap an wõr tokjen ñan juõn ri kwalok ekãl. Ke ri katak eo ej kamelmele ennan eo, kwalok ñan e kilen an emmakit ilo joij ñan uak ko me ekkã an walok ilo territory eo. (Kol. 4:6) Kamol ñan e bwe ri karejar ro rej Christian rejjab aikwij jelã uak eo ñan aolep kajitõk ko me juõn ri mweo emaroñ bõkmantak. Ikijen kajitõk kein, ekkã an emõn ñe ej ba bwe enaj etale mokta inem bar jeblak ñan bwebwenato ibben kin katak eo.—Ken. 15:28.
4 Kwalok Nan Ibben Don: Ien eo moktata ri katak eo ej bõk kunan ilo jerbal in jen em-ñan-em, kõtlok bwe en lale am kwalok ennan eo me komro jimor ar keboje. Inem kõmman bwe en bõk kunan. Jet ien, emaroñ emõn bwe ri kwalok eo ekãl en wõr jidik kunan ilo ennan eo, einwõt konono im kwalok jidik kin juõn eon. Lemnak kin kadkad ko kadkadin im maroñ ko an ri katak eo. (Pil. 4:5) En lap am nebar e ke kwoj kamineneik e ilo wãwen ko reoktak jen don ilo jerbal in kwalok nan.
5 Ej juõn men eaorõk ñan jibañ juõn ri kwalok ekãl ñan kajutak juõn schedule bwe en keini an bõk kunan ilo jerbal in kwalok nan, im bwe en kõmmane kajjojo week elañe emaroñ. (Pil. 3:16) Kõmman karõk ko ñan jerbal ibben don ilo jerbal in kwalok nan, im rejañ e ñan jerbal ibben ro jet bareinwõt me rej niknik. Joñok eo air im an kamao ibbeir enaj jibañ e ñan kaddeklok kabel ko an im enaj lo mõnõnõ ilo an kwalok nan jen em ñan em.