En Keie Am Kwalok Nan ilo Jikin ko Ilobwilij
1. Ilo kajeoñe Ri Christian ro ilo ebeben eo kein kajuõn, ewi wãwen Ri Christian ro rainin rej kwalok nan ilo jikin ko ilobwilij, im kin ta tokjen ko?
1 Einwõt ri kalor ro an Jesus ilo jinoin, Ri Christian ro rainin rej kajeoñ in jaketo-jaketak news eo emõn ibben armij ro ilo jabdewõt jikin ko rej bed ie. (Jerbal 16:13; 17:17; 20:20, 21) Tokjen jibadbad ko air ñan kwalok nan ilo jikin ko ilobwilij, rej lo armij ro rej itoklimo ibwiljin ro rejamin kar iion ir ilo jerbal in kwalok nan jen em-ñan-em.
2. Etke jej aikwij kwalok lolokjen ñe jej kwalok nan ilo jikin ko ilobwilij, im ewi wãwen jemaroñ kõmman bwe en kwon?
2 Rej aikwij kwalok lolokjen ñe rej kwalok nan ilobwilij. Ekkã an emõn ñan jerbal ilo jab alikar. Ñan wanjoñok, elañe elõñ ri kwalok ro rej kwalok nan ilo ejja jikin eo wõt ak rej lolok ejja business ko wõt, jet armij remaroñ eñjake air abõnõnõ kin ad bed. Men in ej bõk jen jerbal eo ad eutiej im emaroñ kadiklok tõbrak ko ad. Ta eo jemaroñ kõmmane ñan bõprae an walok men in? Jet congregation ko me elõñ ibbeir jikin ko ñan kwalok nan ilobwilij rar lo bwe elap an jibañ elañe rej karõki ilo kajjojo territory ko. (1 Kor. 14:40) Bareinwõt, jemaroñ kalaplok emõnin jerbal eo ad ilo ad jerbal wõt ilo territory ko kar karõki ñan congregation eo ad elañe kar ejelok karõk ko jet me rar kõmmani ikijen Congregation Service Committee eo ñan jibañ bar juõn congregation.—Lale December 1998 Ad Jerbal Ñan Ailiñ Eo, p. 4, par. 13.
3. Ta wãwen eo ñan kebak armij jet rar lo bwe ekeie ñe rej kwalok nan ilobwilij?
3 Kebak Armij ro: Ke Jesus ear konono ibben juõn kõrã iturin juõn aebõjlõl, ear ijjino bwebwenato eo an kin jet wõt nan ko im ear kalaplok ke lio ear kwalok itoklimo eo an. (Jon 4:7-26) Wãwen in ñan kebak armij ebolemen bareinwõt rainin ilo jet wãwen ko. Jet ri kwalok ro rej lo bwe ñan air bõk juõn lemnak ejimwe kin jerbal in kwalok nan ilobwilij, ej juõn men emõn ñan bõk jejjo minute ko ñan yokyokwe armij im kwalok air itoklimo kake ir mokta jen air kwalok ennan eo kin Ailiñ eo. Rej bõkmantak juõn men me armij ro ilo bukwon eo rej itoklimo kake, me ekkã an tellok ñan juõn bwebwenato. Ñe ro jet rej kwalok inebata ko air, rej lukkun roñjake. Ejjabto, remaroñ kwalok nan in kainemõn ko jen Nan eo an Anij.—Rom 15:4.
4. Ewi wãwen jemaroñ kaddeklok itoklimo eo jej loe?
4 Kaddeklok Itoklimo eo: Kajjojo ien ewõr juõn bwebwenato emõn, jej aikwij kajeoñ in kõmman karõk ko ñan kaddeklok itoklimo eo. Ewi wãwen jemaroñ kõmmane men in? Ñe ebak ien am naj kabõjrak bwebwenato eo, kwomaroñ kwalok notebook eo am im ba: “Elap aõ mõnõnõ kin bwebwenato eo ad. Ewõr ke jabdewõt wãwen jemaroñ wõnmanlok ilo bar juõn ien?” Ak kwomaroñ ba: “I kõnan bwe kwon read juõn katak me ij jelã enaj kaitoklimoõm. I maroñ ke bõkwõj ñan mweo imõm ak office eo am?” Jet ri kwalok ro rej baj ba: “I maroñ ke bõk number in telephone eo am?” Men in ekkã an walok ilo juõn uak emõn.
5. Ta mejenkajjik eo en wõr ibbed ñe jej kwalok nan ilobwilij?
5 Elõñ armij ro me kar iion ir ilo jikin ko ilobwilij rar mõnõnõ in jino katak Bible. Kwomaroñ kõmmane katak eo ilo mweo imõn armij eo, ilo jikin jerbal eo an, ilo juõn jikin ekkar ilobwilij, ak ikijen telephone. Jen kõmman bwe en mejenkajjik eo ad in ñan jino Bible study ko ñe jej kwalok nan ilo jikin ko ilobwilij.