Kwal̦o̦k Naan ilo Jeban Ial̦ ko ilo Wãween eo Ekeie
1. Ta wãween eo im jemaroñ kajjioñe Jijej kake?
1 Jijej ear jab ãliklik in kwal̦o̦k naan ippãn jabdewõt armej ear iion er ilo jeban ial̦ ko ak ilo lo̦bwilej. (Luk 9:57-61; Jon 4:7) Ear kõn̦aan kõnono kõn ennaan eo eaorõk ippãn elõñ armej ro im ear maroñ tõpar er. Rainin, kwal̦o̦k naan ilo jabdewõt jikin ko im armej ro rej itoitak ie ej juon wãween eo em̦m̦antata. Kõnke jemaroñ tõpar elõñl̦o̦k armej ro im jipañ er bõk jel̦ãl̦o̦kjen̦ eo kõn Anij. (JK. 1:20) Enaaj l̦apl̦o̦k ad lo tõprak el̦aññe jej kepaak armej ro im kajerbal lol̦o̦kjen̦ ilo ad kõm̦m̦ane men in.
2. Ta ko jet jen kõm̦m̦ani ñe jej kwal̦o̦k naan ilo jeban ial̦ ko?
2 Kwõn Kepaake Armej Ro: Em̦m̦anl̦o̦k el̦aññe kõj eo m̦oktata jej kepaake armej ro ijello̦kun ad jutak ak jijet ilo jikin eo im kõttar an armej ro jibadektok kõj. Ñe kwõj reilok ñan er, kwõn ettõñdikdik im kõnono ilo jouj. El̦aññe kwõj jerbal ippãn bar juon, em̦m̦anl̦o̦k ñe komiro en jenolo̦k jãn doon im kepaake armej ro. Kwõn bar jepl̦aak im pukot armej ro im rar kwal̦o̦k aer itoklimo. Ñe ekkar, ãlikin wõt amiro kõnono, kwõmaroñ kajjitõk ippãn armej eo ekõjkan am̦ naaj bar tõpare. Jet iaan ri kwal̦o̦k ro ekkã aer jerbal ilo ejja jikin eo wõt ilo jeban ial̦ ko. Kõn aer keini aer jerbal ilo jikin in ekõm̦m̦an bwe ren kõnono ippãn ejja armej ro wõt. Men in emaroñ in kaitokl̦o̦k wõt limoen armej ro.
3. Ewi wãween jemaroñ kajerbal lol̦o̦kjen̦ ñe jej jerbal ilo jeban ial̦ ko?
3 Kajerbal Lol̦o̦kjen̦: Kwõn kajerbal lol̦o̦kjen̦ ñan am̦ lale ia eo em̦m̦antata ñan am̦ jutak ie im wõn ro kwõn kepaak er. Kwõjjab aikuj kwal̦o̦k ñan aolepen armej ro rej etetal ijo. Kwõn lukkuun jãle ak lale ta eo ej wal̦o̦k ippãn armej ro. Ñan waanjoñak, ñe armej eo ej ekaiuriur, bõlen em̦m̦anl̦o̦k ñe kwõn jab kepaake. Ñe kwõj kwal̦o̦k iturin m̦õn wia, kõjparok bwe mãnija eo en jab inepata. Em̦m̦anl̦o̦k kõnono ippãn armej ro ilo iien eo rej diwõjl̦o̦k jãn m̦õn wia eo ak rej ro̦o̦l jãne. Kepaake er ilo juon wãween me eban kailbõk er ak kõm̦m̦an aer mijak. Bareinwõt, lukkuun lale ta eo ekkar ñan lel̦o̦k ñan armej ro. Ñe armej eo ej kwal̦o̦k itoklimo, kwõmaroñ lel̦o̦k magazine ak ñe ejjab innem kwõmaroñ lel̦o̦k juon tract.
4. Etke jerbal in kwal̦o̦k naan ilo jeban ial̦ ko ewõr tokjãn im ekalañlõñ?
4 Em̦õkajl̦o̦k an ajeeded katak ko rem̦ool ñe jej kwal̦o̦k naan ilo jeban ial̦ ko. (Ekl. 11:6) Jet armej me jej iion er ilo jeban ial̦ ko bõlen ejeja ad iion er ilo m̦oko im̦wier ñe jej kwal̦o̦k naan jãn em̦ ñan em̦. Etke kwõjjab kõm̦m̦an iien am̦ bõk kun̦aam̦ im kwal̦o̦k naan ilo jeban ial̦ ko? Jerbal in ej m̦õttan jerbal in kwal̦o̦k naan eo ad im el̦ap am̦ naaj lo tõprak ie im ekalañlõñ.