Kilen Kwal̦o̦k Naan eo Ekããl im Em̦m̦an Ilo̦bwilej
1. Kõnke ewõr jikin ko ekkã an obrak kõn armej ro rej itoitak, ta eo kar rõjañ eklejia ko ñan kõm̦m̦ane?
1 Jet iaan jikin ko me ewõr eklejia ko ie, ewõr jet jikin ie ekkã an obrak kõn armej ro rej itoitak. Kõn men in, kar lel̦o̦k naan in rõjañ ñan eklejia kein bwe ren jino kõm̦m̦an karõk ñan kwal̦o̦k naan ilo̦bwilej. Remaroñ kõm̦m̦ane men in ilo aer kõjerbal tebõl̦ ko im illik bok ie, ak kõjerbal waan bwilbwil ko me ewõr kadede jikin illik bok ie. Ñe rej kõjerbal juon waan bwilbwil, eokwe juon iaan rukwal̦o̦k ro ej aikuj jutak ak jijet iturin. Bõtab, eaorõk bwe 2 rukwal̦o̦k naan ren pãd iturin. Ro rej pãd iturin tebõl̦ ak waan bwilbwil eo rej aikuj kate er ñan kwal̦o̦k jouj bwe en pidodo an armej ro kepaake er. Ñe juon ej itok im alwõje bok ko, juon iaan rukwal̦o̦k ro emaroñ jino bwebwenato ippãn armej in. Rukwal̦o̦k eo emaroñ ba, “Kwõnañin ke kar l̦õmn̦ak kõn ta eo Baibõl̦ ej ba kõn mel̦el̦e in ilo bok in?” Ak ñe ebar wõr juon ak ruo rukwal̦o̦k rej pãd ilo ijin, eokwe remaroñ kwal̦o̦k naan ñan armej ro ipel̦aakier ilo jabdewõt iien epel̦l̦o̦k.
2. Kwal̦o̦k juon bwebwenato me ej kaalikkar joñan an aorõk kilen kwal̦o̦k naan in ekããl.
2 Karõk in ekããl ekõm̦m̦an bwe en lukkuun lõñ rũkkatak Baibõl̦ ro rekããl. Juon rijikuul̦in kaal̦õj ear kõn̦aan jeje bwebwenato kõn Ri Kõnnaan ro an Jeova, ak em̦õk in kappok Im̦õn Kweilo̦k an Ri Kõnnaan ro an Jeova ak ejjab ellolo. Wiik eo tok juon jiroñ in ear loe juon tebõl̦ me em̦õj illik bok ie im ej pãd inabõjin m̦õn jikuul̦ eo. Jiroñ in ear jino katak Baibõl̦. Tokãlik ear peptaij, im kiiõ ej bõk kun̦aan ilo kilen kwal̦o̦k naan in ekããl ilo̦bwilej.
3. Ta l̦õmn̦ak eo an jet rukwal̦o̦k naan ro kõn kilen kwal̦o̦k naan in ekããl?
3 Juon jeid im jatid kõrã me elukkuun em̦m̦an ippãn kilen kwal̦o̦k naan in ekããl ej ba: “Jet armej rej bõjraktok iturin jikin bok eo im bũki bok ko rekããl. Jet iaan armej rein rejjañin kar roñ ak jel̦ã kõn Ri Kõnnaan ro an Jeova. Ij kile bwe karõk in ekããl enaaj kõm̦m̦an bwe jen tõpar elõñ armej.” Bar juon jeid im jatid kõrã ej ba: “Elukkuun em̦m̦an kilen kwal̦o̦k naan in ekããl kõnke armej ro rej jibadektok kwe, im meñe remaroñ jab lukkuun itoklimo ak ãinwõt rekõn̦aan wõt baj jel̦ã.”
4. Etke ewõr tokjãn ñan kõm̦m̦ane kilen kwal̦o̦k naan in ekããl ilo ejja awa im jikin eo wõt kar karõke kajjojo wiik?
4 Em̦m̦an ñan kõm̦m̦ane kilen kwal̦o̦k naan in ekããl ilo ejja jikin eo, raan eo im awa eo wõt. Etke? Kõnke armej ro ren imminene kake, im enaaj kõm̦m̦an aer jab ãliklik in jibadeke, kwal̦o̦k aer kajjitõk, im ebbõk aer bok. Eklejia eo am̦ enañin ke jino kõm̦m̦ane kilen kwal̦o̦k naan in ekããl? El̦aññe aet, eokwe bõlen kwõmaroñ bõk kun̦aam̦ ilo kõl in ekanooj em̦m̦an im l̦ap tokjãn ñan ‘kwal̦o̦k kõn Aelõñin Anij.’—Luk 9:60.