Peran in Kwal̦o̦k Naan ilo Jikin Peejnej Ko

1. Etke jejjab aikuj ebbeer ñe jej ikkũm̦kũm̦ ak mijak in kwal̦o̦k naan ilo jikin peejnej ko?

¹ Kwõj ke ikkũm̦kũm̦ ak mijak in kwal̦o̦k naan ilo jikin peejnej ko? El̦aññe aet, jab ebbeer kõnke meñe Paul ear juon ri kwal̦o̦k naan eperan im ejaje mijak, ak e bareinwõt ear aikuj in ‘peran’ bwe en maroñ kwal̦o̦k naan. (1 Tes. 2:⁠2) Jen etale jet apañ ko ekkã aer wal̦o̦k im bareinwõt ta ko jemaroñ kõm̦m̦ani ñe jej wõnm̦aik apañ kein.

2. Etke jejjab aikuj inepata im l̦õmn̦ak bwe jenaaj ko̦kkure an ri jerbal ro jerbal ñe jej kõnono ippãer?

² Jenaaj Ke Ko̦kkure an Ri Jerbal ro Jerbal Ñe Jej Kõnono Ippãer? Ilo elõñ peejnej ko, jerbal eo an ri jerbal ro ie ej ñan jipañ armej ro kõn aikuj ak kajjitõk ko aer. Kõn men in, rej kõtmãne bwe armej ro renaaj kepaak er im kõnono ippãer. Enañin aolep iien rej jouj kõnke remaroñ watõk eok ãinwõt juon ri wia ak customer. El̦aññe em̦m̦an wãween ad nuknuk im jej kwal̦o̦k jouj, men in enaaj kõm̦m̦an bwe ren bar jouj tok ñan kõj.

3. Ta eo jemaroñ kõm̦m̦ane bwe jen jab kabõn̦õn̦õik ro rej wia?

³ Ij Aikuj Ke Kwal̦o̦k Naan Meñe Elõñ Armej? El̦aññe kwõmaroñ, kwõn kããlõt juon iien em̦m̦an me ejjab lukkuun lõñ ri wia, bõlen ilo iien eo ej kab pel̦l̦o̦k m̦õn wia eo. Kwõn kõttar an bo̦o̦j eo ak eo ej jerbal ijo make iaan im kwõmaroñ kepaake. Im ñe kwõj kwal̦o̦k naan ippãn, kõm̦m̦an bwe en kadu.

4. Ta eo jemaroñ ba ñe jej kwal̦o̦k naan ilo jikin peejnej ko?

⁴ Ta eo Ij Aikuj Ba? El̦aññe elõñ ri jerbal ilo peejnej eo, kwõn jibadekl̦o̦k bo̦o̦j eo im kõnono ippãn. Kwõmaroñ ba: “Kõnke epen ñan lo ro ewõr aer peejnej, ilo m̦oko im̦wier, kõmij jibadektok eok ilo jikin jerbal in am̦. Innem kõnke ijel̦ã bwe kwõj jerbal, inaaj bwebwenato wõt jidik ippam̦ kõn Baibõl̦.” Ñan kõm̦m̦an bwe ren jab l̦õmn̦ak bwe jej itoitak im wiakake men ko, em̦m̦anl̦o̦k ñe jejjab kajjitõk kõn jabawõt. Bõtab, ñe rej kajjitõk jej bõk jããn jãn ia ñan kowõnm̦aanl̦o̦k jerbal in kwal̦o̦k naan eo ad, innem jemaroñ kwal̦o̦k kake. El̦aññe ekkar im em̦m̦an kwal̦o̦k naan ilo peejnej eo, kwõmaroñ kajjitõk mãlim ippãn bo̦o̦j eo ñan kwal̦o̦k naan jidik ippãn ri jerbal ro. Innem, ñe kwõj kwal̦o̦k naan ippãer, kwõmaroñ ãliji ejja naan ko wõt kwaar ba ke kwaar kwal̦o̦k naan ippãn bo̦o̦j eo. El̦aññe ri jerbal eo ejaad in poub, kakadul̦o̦k am̦ kõnono im likũt juon tract ak peba jidikdik ippãn. El̦aññe kwõjjab maroñ kõnono ippãn ri jerbal ro, bõlen kwõmaroñ kajjitõk ñan likũti bok ko ilo jikin kakkije ko aer ak ijoko ekkã aer jijet bajjek ie.

5. Ta un ko unin ad aikuj peran im kwal̦o̦k naan ilo jikin peejnej ko?

⁵ Jijej im Paul rar peran in kwal̦o̦k naan ippãn armej ro ilo jikin peejnej ko, im kwe bareinwõt kwõmaroñ ãindein. (Matu 4:​18-21; 9:9; Jrb. 17:​17) Kwõn kajjitõk ippãn Jeova bwe en jipañ eok ñan jab ikkũm̦kũm̦ im bwe en kaperan eok. (Jrb. 4:​29) Elukkuun em̦m̦an kwal̦o̦k naan ilo jikin peejnej ko kõnke ekkã wõt ad iioon armej ro ie. Innem, etke kwõjjab kajjioñ in kwal̦o̦k naan ilo jikin peejnej ko?