Juõn Ladrik Erik Ej Jerbal Ñõn Anij

E KILUBŨTBŨT ke ladrik in erik? Etan ej Samuel. Im leo me ej dror pein ion bõran Samuel ej pris eo e utiej an Israel, I’lai. Leo juõn ej El-ke’na, jemen Samuel, im kõra eo ej Han’na jinen, im irro ar ãñintok Samuel ñõn iben I’lai.

Samuel ej emen ak lailim wõt yiõ ridtan. Ak e naj jokwe ijin ilo imõn kaber eo an Jeova iben I’lai im pris ro jet. Etke El-ke’na im Han’na r’ar lelok juõn eo erik einwõt Samuel bwe en jerbal ñõn Jeova ilo imõn kaber eo? Jen lale.

Kar jet wõt yiõ ko mokta lok jen ien in, im Han’na e ar lukkun buromõj. Unin an kar buromõj ej kin an jab maroñ neje, im e ar kanuij lap an kõnan bwe en wor nejin. Inem juõn ran, ke Han’na e ar lolok imõn kaber eo an Jeova, e ar jar im ba: ‘O Jeova, kwon jab meloklok iõ! Elañe kwo naj letok juõn nejiõ eman, Ij kalimur bwe I naj lewõj e ñõn yuk bwe en jerbal ñõn yuk toan wõt an mour.’

Jeova e ar uak jar eo an Han’na, im jet aliñ ko tokelik e ar keutak Samuel. Han’na e ar yokwe ladrik eo nejin, im e ar jino katakin e kin Jeova meñe e ar lukkun drik. E ar jiroñ leo belen im ba: ‘Ñe e bwe an ridto Samuel im e likittit, I naj bõklok e ñõn imõn kaber eo bwe en jerbal ñõn Jeova.’

Eñin men eo jej lo an Han’na im El-ke’na kõmõne ilo pija in. Im kinke e ar kanuij emõn an jinen im jemen Samuel katakin e, ej mõnõnõ in kõrijer ñõn Jeova ijin ilo imõn kaber eo an Jeova. Kajojo yiõ, Han’na im El-ke’na rej ilok in kabuñ ilo imõn kaber in ejej uan, im lolok ladrik eo nejeir. Im aolep yiõ Han’na ej kõmõne juõn liboror ekãl im bõklok ñõn Samuel.

Meñe elõñ yiõ ko re motlok, Samuel ej jerbal manlok wõt ilo imõn kaber eo an Jeova, im Jeova im armij ro rej jimor yokwe e. Ak lõmaro nejin I’lai, Hop’nai im Pin’e-has rejjab emõn. Rej kõmõni elõñ menko renana, im karel ro jet bwe ren bareinwõt jab bokake Jeova. I’lai en kar jolok ir jen air bõk jerbal in pris, ak e ar jab.

Meñe e drik Samuel, ejjab kotlok bwe jabrewõt ian menko re nana rej walok ilo imõn kaber eo ren kõmõn bwe en jolok an jerbal ñõn Jeova. Ak kinke eiet wõt armij ro rej lukkun yokwe Jeova, etto an Jeova jab konono iben armij. Ke e ar ridtolok jirik Samuel, eñin men eo e ar walok:

Samuel ej kiki iloan imõn kaber eo ke juõn ainiken ej koruj e. Ej uak im ba: ‘Ña e.’ Im e jerkak im etõrlok ñõn iben I’lai, im ba: ‘Ña eo, bwe kw’ar kir iõ.’

Ak I’lai ej uak im ba: ‘I ar jab kir yuk; kwon rol im babu.’ Inem Samuel e ar jeblak im babu.

Inem rej bar kir im ba: ‘Samuel!’ Im Samuel ej jerkak im bar etõrlok ñõn iben I’lai im ba: ‘Kw’ar kir iõ, im Ña e.’ Ak I’lai ej uak im ba: ‘Nejiõ, I ar jab kir yuk. Kwon bar babu.’ Inem Samuel ej jeblak im babu.

‘Samuel!’ ainiken eo ej kir alen jilu. Inem Samuel ej etõrlok ñõn iben I’lai. ‘Ña e, bwe kw’ar kir iõ,’ ej ba. Kiõ I’lai e jela bwe Jeova eo ej kir ladrik eo. Kin men in ej jiroñ Samuel: ‘Kwon ilen bar babu, im elañe ej bar kir yuk, kwoj aikwij in ba: “Kwon konono Jeova, bwe korijerõm ej roñ.”’

Eñin men eo Samuel ej ba ilo ien eo Jeova ej bar kir e. Inem Jeova ej jiroñ Samuel bwe e naj kajeik I’lai im lõmaro nejin. Tokelik Hop’nai im Pin’e-has re mij ilo tõrinae iben dri Pi-lis’tia ro, im ke I’lai ej roñ kin men eo e ar walok e ar buñlok, e moruj kenwan, im e mij bareinwõt. Inem e jejjit nan eo an Jeova.

E ridtolok Samuel, im ej erõm dri ekajet eo eliktata ilo Israel. Ke ej lallab, armij ro rej kajitõk iben: ‘Kwon kãlet juõn kiñ bwe en iroij iom.’ Samuel ejjab kõnan kõmõne menin, kinke ilo mol, Jeova ej air kiñ. Ak Jeova ej jiroñ e bwe en eoroñ armij ro.